源記甜品專家 又嚟試下一間老店 雞蛋糕賣曬 所以桑寄生蓮子蛋茶 我地都決定下一次先再試 今次就叫左燉蛋 合桃露 同埋杏仁露 燉蛋燉得好滑 甜度適中 幾好味 合桃露 同埋杏仁露 呢兩樣都比較普通 味道亦唔太出 冇下次lu… 唯有下次再試最出名嘅 桑寄生蓮子蛋茶 同雞蛋糕 希望可以為老店加返dd分 *佢地既蓮子整得好鬆化 蓮子好味 用既碗都好傳統 影相打卡係靚嘅 PS岩岩又去左轉源記 當時12點幾 已經開左門 但我地走到入去 就問我地 堂食定外賣 我地話堂食 食桑寄生蓮子蛋茶 點知佢地話未有 又一次冇得食

最推薦White Hse Cookie Cup & 金箔黑松露雜菌蝴蝶粉 White Hse Cookie Cup 萬聖節就快到所以公仔都轉左用南瓜 我覺得佢幾可愛 一樽奶賣成69蚊 係有少少貴 但係呢一隻曲奇杯 都係手工野 隻公仔少啲心機都畫唔到 又可以影相打下卡 我覺得都OK嘅 始終69蚊 都係想買個開心 買個手工 金箔黑松露雜菌蝴蝶粉 比起另外嗰兩個意粉 蝴蝶粉做得相對出色 味道幾好 煙煙韌韌幾好食 環境係靚嘅 周圍都勁多花打卡簡直一流 但係真係超級迫 我哋已經book咗枱 三個人 但係都係比職員叫咗我哋坐近窗口嘅吧枱 咁就慘啦真係坐得極度辛苦 張枱又細完全唔夠位 職員又唔積極收碟 搞到非常唔就手 後來終於啲嘢食真係冇位擺 職員終於幫我哋收碟 明明其實餐廳仲有其他位置可以坐 但係職員都話安排唔到 唔緊要啦可能真係full Booking 但點知去到我哋食完走 其他位都係冇客坐…. 下一次都可以再嚟 不過一定要book張大啲嘅枱 如果唔係真係坐得辛苦食得辛苦

聽講坪洲有神級蝦多士 襯平日人少少 入嚟坪洲試一試 新鮮熱辣出爐既蝦多士丫 係比起出既既好食 夠脆 夠熱 唔腥 但又未去到神級咁誇張 如果要我哋排一個鐘頭先有得食 咁…就唔太值 但如果好似今日咁唔使排隊 咁就真係可以一試㗎 新鮮出爐熱辣辣 味道一定唔會差 吉列豬三文治 同樣都係新鮮出爐 所以冇油益味 仲好脆口 都唔錯 餐廳乾淨 冷氣夠強 出餐都快既 雖然枱枱都嗌蝦多士 但環境都唔會話好熱 好大陣油味 環境唔錯 建議大家都係平日嚟坪洲試就最好 起碼唔駛等成個鐘

今次我哋網上book枱 所以唔使等位 今次我哋揀咗中間嘅價錢 都好夠食 揀咗鳳梨雞湯 職員提醒我哋呢個湯底入面係有苦瓜嘅 接受唔到嘅朋友仔就要揀其他湯底 講真湯底令到我有少少失望 牛大人嘅鳳梨雞湯好似普通嘅雞湯咁樣 完全冇鳳梨苦瓜湯嗰種甘甜 當日喺台灣飲嘅鳳梨苦瓜雞湯 真係完全唔同 但係食材方面 真係有驚喜全部嘅食材 真係好似喺台灣食嘅咁樣 喺自助吧攞嘅芋頭貢丸比起Donki嘅更好食 牛肉有牛味 唔鞋 油炸鬼夠曬脆 仲有幾款小食 皮蛋豆腐做得真係唔錯 我哋兩個人食咗四份 嘢飲方面 除咗一般嘅紙包飲品汽水之外 少量嘅台式紙包飲品 例如麥香紅茶同埋麥仔茶 仲有提供冷泡茶 我哋本身鍾意飲啲濃味嘅茶 菊花普洱 真係啱晒我哋口味 最後買單嘅時候職員會提供買甜品紙 可惜呢一度淨係提供一人一份想食多少少都冇 咁有三款雪糕可以揀 唔想食雪糕嘅仲有仙草凍 仙草凍 配料都算多 味道亦都唔錯 總括嚟講牛大人真係幾抵食 而且大部份嘅食物都幾好食

早幾日去咗陸羽茶室 激到成肚火 收我30幾蚊茶錢竟然俾個不鏽鋼茶壺我 啲茶又唔夠濃 真係激到我彈起 終於呢兩日去咗蓮香居飲茶安撫我受傷嘅心靈 古語有云 飲啖茶食個包 水滾茶靚 一盅兩件 嚟到我呢度變咗 嘆啖茶食個撻 水滾茶靚 兩盅十件 睇吓樓下嘅圖就可以見到我哋嗌左邊十樣嘢 最為強烈推薦係 係蛋撻同豬潤燒賣 啱啱好呢兩日天氣又涼我哋就叫咗杏汁白肺湯嚟滋潤吓 點知呢頭落單 轉頭叔叔就推住架車出嚟 蛇羹啊蛇羹啊 我哋又忍唔住舉手試吓 係呀呢度仲係用緊點心車 姐姐經過嘅時候麻煩豎起耳仔 聽吓佢哋嗌咩 經過兩日嘅訓練我終於可以聽得順利一啲 1.蝦腸～牛腸～豬潤腸～ 2.蝦餃～燒賣～牛孖根～ 3.叉燒包～雞球大包～馬拉糕～ 聽住佢哋咁嗌真係可以想像到爸爸媽媽嘅年代係點樣嘅 好似真係別有一番風味 呢度而家已經比較少茶客 會衝出去攞嘢食 取而代之 就係截停架點心車同姐姐講 再唔係當佢嗌緊啲點心嘅時候 你更加大聲回應佢 例如你聽到佢嗌燒賣你又想整返籠嘅 你用更大聲去回應佢大聲一嗌燒賣 之後佢就會攞住籠燒賣 走埋嚟你張枱 同出面嘅茶樓相比 似乎更加有情懷更加有人情味 比起一般填紙仔落單有更加多嘅交流 姐姐唔太忙嘅時候亦都會推介下你有咩好食 不過慘在 呢度有啲點心係要落單 有啲點心係要等佢推車出 仲有啲點心要星期六日先有平日冇得食 你食唔食到全靠緣份 好似我哋想食豬潤燒賣成功落單有得食 想食灌湯餃點知要等車出 *可惜原來已經一早賣晒唔怪之得等極都冇 諗住落單嗌個西米布甸 哎呀星期六日先有㗎 帶着小小嘅遺憾期待住下次再嚟 可能呢啲就係飢餓營銷 飲茶都要有策略 介紹番啲點心 蛋撻非常鬆化 從來都唔知道原來蓮香係有蛋撻嘅 可能因為真係唔知道 所以覺得佢特別好食 直頭鬆化到驚為天人 我哋食嗰陣時蛋撻已經出咗爐一段時間 絕對唔係熱辣辣 直頭係凍冰冰 喺凍冰冰嘅情況食蛋撻 都知道絕對係輸蝕左 都打定輸數可能真係麻麻哋 但係第一啖已經鬆化無比 真係好希望下一次可以食到新鮮出爐嘅蛋撻 豬潤燒賣一揭起個籠蓋 嗰陣豬潤味濃郁到不得了 一食落去唔知點解又係鬆化無比 好正 雖然唔係黃沙潤 但係已經食返兒時味道 細細個嗰陣時淨係去過蓮香樓 當其時好多人一窩蜂衝出去拎嘢食 真係嚇到我騰騰震 只可以靠爸爸出去拎嘢食 宜家大個咗夠膽出去拎嘢食 但係已經冇呢支歌仔唱 蓮香雖然唔算係一間好好既茶樓 但係喺呢度絕對可以食得返一份情懷同埋回憶 如果有一日香港失去蓮香嘅時候 會唔會又係代表一個時代嘅終結呢？ 雖然啲叔叔係有啲寸嘴 但睇住佢熟手幫我哋斟水 自己又諗吓點解冇啲後生仔既？當呢一啲叔叔退下火線果陣 蓮香仲係咪好似而家咁樣？ 定終有一日會被淘汰變成出面一般嘅酒樓寫字落單？到時仲會唔會有一個叔叔拎住個大茶壺喺度幫人斟水？ 如果蓮香變成出面一般嘅酒樓 冇咗姐姐嘅叫賣 冇咗叔叔既寸嘴 可能佢就已經唔再喺蓮香 只係得返個名 因為呢一份屬於蓮香嘅傳統已經失去

陸羽茶室 慕名而來失望而歸 一個90後 對於懷舊嘅點心 真係唔係幾熟悉 咁有時代感嘅點心紙亦都係第一次見 對我嚟講係新奇 朋友係60,70後 對佢哋來講就係一份情 我哋今日一共嗌左10樣嘢 其中有兩樣唔記得咗影相 食評：咁10樣嘢就包括左 以下呢一堆 筍尖鮮蝦餃，脯魚蝦燒賣 釀豬潤燒賣，鮮牛肉燒賣 臘味芋頭糕，滑雞球大包 煎粉菓連湯，火鴨三絲筒 雪耳南杏露，蔴蓉香蕉糍 好食 正常發揮 不過不失 差 咁講返啲點心 其實味道都係好一般而且唔夠熱 - 豬潤燒賣 朋友聲稱係好大期望嘅 始終想食返細個嘅味道 但係佢嘅期望就變成一個失落 我哋親眼見證住舊豬潤咬都咬唔到開 非常之老 諗住試吓個豬肉餡 點知腥到爆炸 完全係擺唔入口 開頭都以為係自己食唔慣內臟 點知朋友食完一致認為 係蝦嘅腥味 - 煎粉菓連湯 講真真係聽都未聽過 根本想像唔到係乜嘢嚟 甚至擺到上枱都唔識得點樣食 好彩朋友教係要浸佢落啲湯度先再食 食落去個感覺都幾特別嘅 味道還可以 只可惜都係唔夠熱 - 鮮牛肉燒賣 個樣呢係同燒賣一啲都唔似嘅 比起燒賣佢更加似牛肉球 都係老毛病唔夠熱 但比起出面嘅牛肉球佢就有小小陳皮味 都叫做有少少驚喜 - 至於其他嘅點心味道都係正正常常冇啲特別嘅差錯正常發揮嘅