葵廣掃街必食😆實在太鍾意食Mexican wrap同taco，taco即叫即整，可以揀餡料，等左五分鐘有熱辣辣taco到手，裝得好整齊，比埋手套企埋一邊食。 牛肉有驚喜！感覺似burger裡面嘅patty，有啲得肉筋咬下，好濃郁嘅牛味👍🏻 感覺似食緊漢堡包，不過比較容易漏哂啲牛出黎😂😂 蝦就比較普通，蝦近乎蝦米嘅size😆 口味比較清淡，下次可以試下其他醬汁，可能會更惹味。 整體已經好高質！$32-$34有份即製taco。

大三巴附近已有兩間分店，做遊客生意，地方大，唔洗等位。餐牌一目了然，有哂推介菜式，都係大路野。 餐廳有啲舊，有啲啲葡式裝修。 **白酒煮蜆** 蜆的份量都幾多，但好細隻，湯汁比想像中稠，似係好多生粉整成，味道帶酸，裡面有少少檸檬，加埋白酒的果香，整個菜甜甜酸酸，幾特別，但唔夠熱。 **馬介休炸球**
呢個好好味，味道夠，但又係敗在唔夠熱。炸皮好薄，裡面有薯蓉加魚肉絲。軟綿綿咁，好好食。 **咖哩牛坑腩**
牛坑腩夠淋夠軟身，雖然用個煲上菜，但完全唔熱，啲咖哩汁唔辣，好快變杰，附送的豬仔包不食也可，又乾又柴。
如果行到攰，諗唔到食乜，呢到坐得舒服，價錢公道，但味道可以更好。

星期一的中午亦見長長人龍，店員做到冇停手。一場黎到，想食個豬扒包。官也街有兩間世記，但只有呢間有豬扒包賣，所以好多人排隊。 **厚蛋豬扒包** 豬扒包另加$12要埋厚蛋，厚蛋類似玉子燒的厚度，裡面有少少流心蛋汁，令個包更juicy。不過蛋味唔濃，比豬扒搶哂味。 包可以揀豬仔包或方包，總係覺得豬扒包應該要配豬仔包。豬扒勝在即炸，食的時候值得個燙口，超酥脆，但其實醃粉味偏重，雪味都強，一場黎到，唔洗排隊可以食下，但排超過15分鐘就唔值得了。

銅鑼灣登龍街無敵多選擇，KINKAO夠膽喺到開分店，應該都有返啲實力～**豬肉船麵**
豬肉船麵的湯底甜而不膩，順口舒服，豬肉片的量多但好鞋，金邊粉的質地好正，彈而有咬口，唔會淋哂。 豬肉丸係細細粒路線，但冇咩豬肉味，港式豬肉丸好食啲。 **雞肉金邊粉**
呢個質素就普通，成碟重茄汁味，好濕，上面仲無啦啦整啲醬，整體好甜。 雞肉係鞋而且重雪味。 所有食物唔算好差，但唔會好驚艷。凍檸茶係泰茶做茶底，視乎個人口味。

大角咀的人氣台灣店喺銅鑼灣開分店，午市唔算多人，可能銅鑼灣的競爭比較大。牛的款式有牛展、牛筋和牛肚，可以選乾拌麵或者紅燒湯底。 ✡✡半筋半肉蔥油拌麵✡✡
呢個超失望，首先可以見到牛展係青青紅紅，夾起係軟淋淋，食落係酸酸地。我唔肯定呢啲係咪「眷村」口味，但真係唔太啱我口味。 肉質唔係炆到入味香濃嗰啲，單純地霉霉地。 蔥油拌麵預左多油，但成餅野搞唔散，超實，而且拌麵質地軟，一啲咬口都冇。只係每條都沾滿油，食幾啖都滯。 ✦香噴噴炸雞排便當✦
呢個真心好食好多，炸雞排非常酥脆，食落去真係咔嚓一聲，雞肉好滑，大推～
配菜好豐富，全部配飯都好好食，特別係茄子，送飯一流。

九龍城真係唔愁無野食，仲要有咁高質嘅傳統糖水！真係食完想encore第二碗。 無論係傳統糖水，定新式嘅芒果系列甜品都有，非常多選擇，簡直選擇困難症發作。 [[招牌蛋白杏仁茶]] 既然叫得招牌，不如就試呢個啦。本來戰戰兢兢，因為杏仁茶好容易有伏，點知呢個係我食過最好食最難忘嘅杏仁茶。 真係要試，杏仁茶嘅香味撲鼻，質地啱啱好，唔會好似芝麻糊嗰隻杰身，又唔會太水，啖啖都有蛋白，增加濃稠度！ 勁足料，好多蛋白，當然拌勻得均勻d會更好😆 $36值得！重點係食到底都仲係熱辣辣，最後一啖都仲有蛋白！

店舖由外國人處理，座位唔多，甜品選擇就非常多。無論係一件一件嘅甜品，定係Gelato嘅口味都非常多選擇。 Gelato有水果口味、開心果、Tiramisu同埋朱古力等等，可以隨便試味再買。 兩球$75，杯仔細細。 ✏️朱古力非常濃郁，係大人口味嘅朱古力，不過食到最後甜味開始湧出黎。質地相對雪糕係比較軟身易溶。 ✏️Tiramisu味淡好多，無論酒味定咖啡味都唔濃。 唯一問題係店內比較多昆蟲飛來飛去，衛生好似麻麻🙈

每次經過都見到長長嘅人龍，難得今次只有兩三個人等，決定入去試吓。 呢度係用QR code自己落單，選擇豐富，但全部菜式都偏向健康。出去斟水飲時發現有一個角落，擺左少少茶點，店員話可以隨便拎黎試。Scone乾到食唔到，另外嗰塊就實得滯。 [[Chicken Quesadilla]] $118 份量的確多到有啲嚇親，原來除咗雞肉薄餅之外，仲會跟一個muesli bowl。 味道講唔上好好食，唔惹味唔濃郁，芝士少，靠少少酸瓜吊味。 Muesli 幾清新，乳酪係原味無糖嘅，加埋穀物，香蕉同莓果脆脆甜甜，唔錯。 [[Pan Fried Beef Cobb Bowl]] $148 呢個望落都知健康😆全部係食材原味道。 🔅無花果係平時比較少食嘅金無花果，完全冇味。 🔅煎牛扒可以選擇生熟程度，我地揀左五成熟，出黎唔會太韌。牛肉完全冇調味，靠灑上面嘅芝麻粒，同埋沙律汁。 🔅南瓜同想像中嘅質地唔同，咬落去係爽脆嘅，冇乜味。 🔅上面嘅流心蛋配酸種麵包嚟食啱啱好，酸種包反而有驚喜，有少少煙靭嘅感覺。 🔹其實所有食物整體都有啲失望，覺得全部偏向係打卡食物，味道方面有改進空間。

行到好肚餓唔想周圍搵野食，索性喺citysuper坐低，以為要頹食，點知相當有驚喜。 中日韓西式，要咩菜式都有，唯一係價錢高左d.... 泡菜手撕豬捲餅 裡面嘅泡菜一d都唔辣，但手撕豬都幾夠味，鍾意佢有海量嘅沙律菜，中和左豬肉嘅濃味，令到成個捲餅一d都唔會覺得膩。 **三文魚炒蛋捲餅** 三文魚比我想像中多，但係全熟，非常腥，炒蛋亦都比較熟，呢個組合可以更好味，依家最突出嘅係腥味。 值得一讚嘅係薯條，即叫即炸，一啲油膩感都冇，非常香脆，仲要係我最鍾意嘅鬚生薯條。

中環食lunch，難免要等位，呢間餐廳有兩層，2人枱大約等10分鐘就有。 上層樓底比較矮，坐得好逼，講野都要細細聲😂 餐牌好多選擇，唔食叻沙嘅都可以食西餐。 [[海南雞叻沙]] $77 一上枱已經望到湯底好杰身，仲有好多豆卜索汁。湯底非常惹味，重香料，個人覺得幾辣，但好過癮。唯一挑剔嘅係檬粉好淋好碎，幾乎夾唔起，要筆黎食。 雞正常發揮，唔會好鞋。 [[傳統叻沙]] $90 呢款咩餸都有啲，最特別係有螄蚶，係生嘅🤭食落偏腥，其他餸正常。