西營盤站附近好多餐廳，競爭都幾大，距離地鐵站少少距離的日常，值得花點時間走去吃。 🍽️牛肉卷➕明太子熱拌烏冬 好豐富，除了牛肉卷同烏冬，附有沙律味噌湯+溫泉蛋，明太子微辣加醬油拌勻食味道濃郁，但略嫌鹹咗少少。牛肉卷裡面包住雞髀菇，中和肥牛的油膩，但相對難咬，個人比較鍾意卷金菇。 🍽️唐揚炸雞冷烏冬 有四舊炸雞，炸得非常酥脆，毫不油膩。天氣有啲熱，食冷烏冬特別消暑，而且冷食烏冬特別煙靭，食得推介。 柚子抹茶上面有一球sorbet，啱哂夏天飲❤️

灣仔大王東街午飯時間好多人龍，呢間特別多人，主打雞同叉燒。 🍴蒜香蔥爆霸王雞 $69 成個套餐有例湯有油菜，可以加$3配菜飯，唔想食飯嘅亦可以轉米線或米粉。醬汁嘅主調係炸蒜同豉油，一啲都唔辣，有好多香蔥絲，配飯都幾惹味。 🍴龍鳳配（叉燒配沙薑雞） 可以揀轉比加錢轉雞髀，呢度嘅雞水準正常，叉燒就可以唔使叫，又柴又乾，亦都冇乜叉燒嘅蜜汁香味，就似好嚡嘅瘦肉。米粉嘅湯底同滾水冇乜分別。 欣賞例湯裡面真係有料，每兜都有原隻雞腳。

良田村裡面竟然有一間對咖啡咁講究嘅coffee shop，無論Aeropress、手沖、虹吸都有得飲，而且咖啡豆嘅選擇都唔少。 第一次見到Americano都可以拉花，原本以為加少少奶，邊white Americano，原來老闆用特別嘅方法製造一層啡泡，拉出淡淡嘅latte art。 另一杯普通Americano比較厚身，係飲過最濃嘅Americano。 坐坐下有啲餓，好想食甜品，老闆話連雪條都係自家製，甜度低，窩夫厚，可以更脆身，肉桂蘋果甜而不膩，肉桂控覺得可以加重肉桂🤤 整體性價比高！ 超足料，一定會再訪，老闆好熱情。

今日陪屋企人黎附近面試，順便食埋晚飯，見到呢見台灣小店幾有味道。 *半筋半肉麵* 餐廳用QR Code落單，紅燒湯底可以自選濃度，濃啲淡啲都有得揀，牛筋好軟好入味，而且份量足。 麵條揀左粗麵，好有手工製作嘅感覺，每條粗幼不一，有勁度有咬口，唔錯。 *鹵肉燙菜* 比起一般嘅油菜多咗醬油嘅鹹甜香味，仲有肉香，比一般油菜好味好多。 *皮蛋豆腐* 夏天食呢一個涼拌小菜，非常開胃，豆腐凍冰冰，加上醬油膏嘅味道，好似食緊豆腐花咁滑。 熱薑母茶 (餐飲+$8) 薑母茶一上枱，已經聞到好香嘅薑味，辣度同甜度啱啱好，唔會太濃，好易入口！熱飲黎講 呢杯薑母茶份量都唔算少架！

同家人喺K11行到肚餓，但商場多連鎖野，價錢又唔平。一行出商場，見到對面馬路有間好大的泰國菜，好多人幫襯。門口已經有濃濃的泰國風味。 裡面好大，可以容納好多張枱，所以多客人都唔洗等好耐。餐牌好多選擇，實有野啱食。 *泰式生蝦* 夠新鮮~點埋醬料好鮮甜！好好食。*鐵板蠔仔炒蛋* 一上枱見到份量呆左，超足料超大份，而且好有鑊氣，唔講以為食緊蠔餅，好香脆。蠔的份量好慷慨，大大粒。 串燒有牛、雞、豬，香口惹味，上枱好快清哂。 *蒜容炒貴妃苗*
食返碟菜平衡下，點知都好有驚喜。夠哂蒜味，貴妃苗好爽好新鮮，冇草青味。
呢到夠大又好坐，野食多選擇，都幾啱一家人黎食。

好羨慕啲喺大堂有coffee shop的商廈返工的人，日日都可以飲靚啡。
29coffee牛頭角總店一直冇機會去，今次出開上環，即刻去試下，天氣熱坐喺到會有少少辛苦，因為大堂係半開放，冇大門，熱空氣會流入。*Smoked Salmon Bagel* 呢到的bagel size比較細，如果好肚餓的話未必夠食，煙三文魚唔係夾火箭菜，係夾青瓜，感覺幾清新，但青瓜份量可以多啲。貝果紮實有咬口，雖然有拉扯感但好有麵粉香！ 煙三文魚加左少少paprika調味，幾好食。 配埋杯高質啡，希望有機會再黎。

最初以為呢到地點唔方便，應該唔洗等位，點知星期日下午黎到滿座，等幾耐就真係睇運氣。唔少人都會黎外賣咖啡。店內有一張大枱，加幾張迷你二人枱，空間感幾好，唔會好逼。 無論咖啡定輕食，都有唔少選擇，幾吸引。 *Egg Salad Egg  Salad  Croissant* 呢個唔太推，預先生焗好，後來再翻熱，牛角包明顯過硬，甚至有啲燶同苦。*Avacado  Toast  with  Eggs* 呢個就好高質，酸種包質素好高，一塊好厚，所以食到好香的麥味，有口感，牛油果冇咩可以衰，夠新鮮就OK! 溏心蛋生熟程度剛剛好，呢個一定會再黎食。*Wake up zombie* 天氣熱飲呢杯special drink，感覺好清新！裡面有茶有啡，味道好平衡。

平時見間間NOC都排哂隊，但其實一啲都唔平，仲要收加一添，不過想食健康啲又坐得舒服，呢到環境又真係唔錯。新出的蟹肉蛋白多士，中間墊左啲菠菜同黑醋，但始終蛋白水分比較多，都係會整到塊酸種包淋哂，不費力就可以切開。蟹肉蛋白的份量好豐富，應該至少有4隻蛋白，調味好輕手，帶點蟹肉嘅鮮甜味，自己加左好多黑椒。 我會話呢個價錢，有一半係比犧牲左的蛋黃。
呢到嘅酸種包冇咩特別，冇口感唔煙韌，冇咩香氣，唔會有麵粉香。

檔口貼有指示，教你落完單唔洗比錢住，返黎拎餅先付款。雖然好懷疑店家係咪記得自己張單，但跟指示做應該冇錯。本身搵唔到鋪位位置，但見到長長人龍就知冇搵錯啦！蟹籽吞拿魚
超多吞拿魚，好有份量的手抓餅，雖然唔係好見到蟹籽的踨影，但呢個價錢冇投訴啦。
夾住新鮮生菜，好清新，餅熱吞拿魚凍，外熱內冷感覺不錯。食嗰時啲餡多到爆哂出黎，略嫌沙律醬多左啲。手抓餅係走厚實路線，唔係台灣嗰種整到鬆身的感覺。下次會想試埋其他口味。

葵廣掃街必食😆實在太鍾意食Mexican wrap同taco，taco即叫即整，可以揀餡料，等左五分鐘有熱辣辣taco到手，裝得好整齊，比埋手套企埋一邊食。 牛肉有驚喜！感覺似burger裡面嘅patty，有啲得肉筋咬下，好濃郁嘅牛味👍🏻 感覺似食緊漢堡包，不過比較容易漏哂啲牛出黎😂😂 蝦就比較普通，蝦近乎蝦米嘅size😆 口味比較清淡，下次可以試下其他醬汁，可能會更惹味。 整體已經好高質！$32-$34有份即製taco。