連鎖壽司舖主打嘅係平價，而呢間壽司店係平得嚟食物質素仲要唔錯😋舖頭位置唔大，除咗兩張卡座外，其餘都係吧枱位～壽司師傅就係你面前整壽司！ 舖頭有提供omakase、單點刺身/壽司或各款壽司組合。我就揀咗$188（10件）自選組合，同款壽司只可以揀兩件。其中我最最最推薦係火炙左口魚壽司，火炙後有逼出魚油，入口係非常甘香，下次一定會再encore！其次就係帶子壽司，味道鮮甜，係絕對冇腥味。再之後應該就係甜蝦，真係會比係其他舖頭嘅好食。📍雲壽司 太子西洋菜南街254號地下及閣樓

拉麵沾麵平時就食得多，撈麵真係第一次試，呢款係冇任何湯底的日式撈麵。餐牌有八款口味供選擇，同埋大家都可以根據自己嘅食量，決定返揀M/L size。店舖有介紹撈麵食法四部曲，可以品嘗到不同的口味。 . 叉燒撈麵 (M) $89 手制麵條偏粗身，食落煙靭彈牙。而且都幾掛汁，醬汁帶有少許辣味，相當惹味。而豐富嘅配料帶出撈麵嘅層次感，配料有叉燒、生蛋黃、辣肉碎、蔥花、韭菜、紫菜碎、生蒜及魚碎。叉燒係肥瘦相間，肉質軟腍。 撈麵食法四部曲 1️⃣將配料攪拌均勻食用 2️⃣享用1/3後可以加入黑胡椒 3️⃣剩下1/3時可以加入秘製香醋 4️⃣可以將免費提供的白飯拌進剩下的肉燥中一起享用📍麺屋こころ 灣仔軒尼詩道68號新禧大廈地下1C號舖

深水埗一帶有好多唔同類型嘅文青cafe，而呢間cafe裝修就係木系風格，裡面仲有擺放好幾款植物。本來就想揀比較熱賣嘅牛油果無花果酸種麵包，落單先知道已經冇曬，唯有揀我嘅第二選項西班牙薯蛋配巴馬火腿 ($78)。 . 呢款係輕食item，真係唔太餓先揀佢，份量的確係比較細。焗咗嘅薯仔片舖咗係最底，上層就係太陽蛋同巴馬火腿薄片，食物拌埋蛋汁一齊食，味道啱啱好🤤 📍Loop Kulture 深水埗鴨寮街90號地舖

聽說呢間係人氣打卡餐廳，所以今次我哋有提前訂位。但去到發現原來有榻榻米座位，所以記得訂位時備註埋。 . 培根蛋黃奶油猫耳麵$138 之前都有食過其他猫耳麵，但呢間質地偏硬身，而蛋黃奶油醬汁都比較少，煙肉就係粒狀，份量都比較少。明太子雞翼$78 雞翼係無骨嘅，表面炸到好香脆。微辣嘅明太子釀咗係雞翼裡面，點蛋黃醬食好夾。松露芝士薯條$68 幼身薯條炸到好脆，而且份量都好多。薯條表面有唔少黑松露碎，聞落好香，但吃嘅時候黑松露味反而唔夠突出，需要配埋加咗七味粉嘅蛋黃醬先變得惹味。法式奶油多士$118 多士煎到金黃香酥，有濃濃嘅蛋香味。食落唔會太乾同太油，濕潤度啱啱好。搭配埋楓糖、奶油同水果一齊食，更加有層次感。📍MUTA Restaurant by ATUM 尖沙咀彌敦道132號美麗華廣場1期地庫B131號舖

平時食炸雞最少都要半份，呢間炸雞就可以滿足想食幾件過口癮嘅我。 . 甜辣炸雞套餐$47 套餐包括炸雞、卡邦尼飯或安東雞飯、飲品。炸雞有6款口味，蒜香醬油、甜辣、芝士口味等。呢份炸雞有4件，雞肉係無骨嘅，好方便我呢啲懶人。外賣拎到返office，雞肉都仲係暖嘅。醬汁好充足，辣度上我感覺係小小辣，都幾惹味。而卡邦尼飯有唔少薯仔同煙肉粒，材料十足。只不過食完雞太飽就冇食曬。哈哈韓式炸雞專門店 📍深水埗欽州街37號西九龍中心8樓F71-72號舖

今次係第一次體驗壽喜燒，呢間餐廳係主打關西風。訂咗位去到就可以安排入座，店員會簡單介紹吓餐牌，講解各款肉類特別之處同埋油脂分布比例，當然都會推薦平時客人嘅選擇配搭。之後全程都有店員幫手煮同分配埋份量，真正嘅懶人餐。 . 我哋就揀咗特選黑毛和牛(A5) $689 同 黑毛和牛赤身肉 (A3) $529，套餐價錢包括咗前菜、肉類、野菜同甜品。前菜四小碟分別係番茄沙律、日本生蠔、生牛肉他他同柚子汁海蜇。生蠔好肥美，食落鮮甜冇腥味。而我本身唔食生牛肉，落單時講咗就可以安排熟嘅。A5和牛油花分布平均，脂肪比例比較高，肉質就非常嫩滑，真係入口即化。而另一款赤身肉嘅牛味就比較濃，可以配搭埋青檸汁同山椒粉一齊食。吃曬咁多和牛後會送上炒飯，所以唔使擔心唔夠飽。之後仲會有野菜同烏冬，野菜充分地吸收壽喜燒同昆布汁，味道好濃郁。烏冬口感煙靭，我哋要咗一人份嘅烏冬已經好足夠。食甜品前可以飲啖白川茶解膩，之後就可以慢慢品享抹茶蕨餅、和菓子同十勝紅豆。食完呢餐，真係非常非常滿足。

呢間餐廳由門口設計到內部裝飾都十分日式。餐廳中午主打日式丼飯lunch set，而晚上就會搖身一變成為居酒屋。 . 火灸鰈魚邊定食 $68 呢款六格定食包括主食、沙律、茶碗蒸、前菜、小食同埋麵豉湯。而小食係會不定時轉換，每次嚟都會有驚喜，而今次就係炸鰻魚同吉列帶子。主食火炙鰈魚邊嘅魚油相當突出，入口甘香細膩，齒頰留香。而飯嘅份量都多，唔夠仲可以免費添加。📍漁初·魚丼 長沙灣營盤街147號天悅廣場地下B2號舖

呢間cafe比較隱蔽，位於商場外嘅轉角位。門面都比想像中細，座位比較少，食晏時段就有機會要等位。 . 慢煮牛bagel $65 Bagel表面鋪滿黑芝麻，口感煙靭而且充滿黑芝麻嘅香味。主角慢煮牛就有啲失色，肉質較靭，味道有啲淡。忌廉芝士同車打芝士反而係令成個bagel加分，份量好足之餘仲增加咗鹹味，食落好juicy。Egg Benedict $78 水波蛋非常流心，假如用硬身嘅法包配上流心嘅蛋汁食，口感一流。旁邊附有三文魚同沙律菜。沙律菜加埋黑醋一齊食，味道酸酸地幾開胃。火龍果乳酪 $45 乳酪質地濃稠，火龍果味都好濃郁，感覺好足料。📍 留白 荃灣西樓角路202-216號荃昌中心昌寧商場地下12號舖

入長洲前已經做定功課，呢間班戟就係我book mark咗要必試美食之一。舖頭開係巷仔裡面，唔細心搵好易略過。舖頭位置都偏細，裡面都有提供幾個座位。而班戟嘅種類都好多，有齊曬鹹同甜口味，今次就試咁甜嘅先。 經典榛子香蕉 $38 班戟都係即叫即整，係小店內係可以睇曬成個製作過程，拎上手絕對係熱辣辣嘅。餅底同想像嘅唔同，係偏軟身。而呢個口味一定唔伏，香蕉同甜甜嘅榛子醬係絕配，食完都滿足。班戟價錢唔算貴，下次都會想再試埋牛油果🥑口味。

店舖係只有外賣提供，食物款式真係好多，種類有韓式小菜、燒烤用嘅肉類、熟食食物等。部分食物都仲有size揀，啱曬我呢啲咩都想試啲嘅人。 . 烤牛肉煎蛋拌飯 $70 拌飯嘅配菜好豐富，份量甚至比飯多，一啖食到咁多嘢真係好滿足。而韓式辣醬係另外裝開，可以根據自己嘅口味去拌勻。甜辣炸雞 (S) $55 炸雞揀咗甜辣口味，醬汁係非常多，仲會有俾埋芥末蜜糖醬，比你有多種口味試下。炸雞大概8-10件，但雞肉略嫌有啲柴。辣炒年糕 (M) $55 年糕同平時食開嘅size唔同，比較粗身同細粒，啱啱好係一口嘅份量。煙韌度適中，醬汁係甜中帶辣，裡面當然都會有埋魚糕。整體嚟講，食物都算高質，好適合開party同去野餐食。呢間係絕對可以再encore，下次都仲可以有好多款食物可以試。