約咗朋友食生日飯，但因為遲遲先決定好去食壽司，所以喺前一晚大概11:30pm先唯有上OpenRice睇吓有咩餐廳可以做網上預約。翻睇過好幾次，有供OpenRice網上預約嘅鮨店本身已經唔多，可以預約到翌日嘅更加冇乜得選擇。見到呢間壽司櫻尚有位置供訂座，網上一面倒好評，就訂咗第二日嘅下午1:30pm。 呢間選址於銅鑼灣嘅壽司櫻於上年年中開業，入到去覺得裝潢唔算新淨。經翻查後原來係上一手「鮨森」結業後留下落嚟嘅設備，未有經翻新太多就易手轉為下手經營。店內座位大約可容納20人，另設VIP房。當日舖面有七位客人，壽司吧枱前只有一位師傅。餐牌上有兩款午市套餐未能供應，我哋就揀咗壽司十二貫嘅套餐。坐低後，店員亦十分細心地拎咗消毒用品俾我哋。但令我較為注意嘅係吧枱上有一啲發泡膠粒，應該係來貨拆發泡膠箱後未有徹底清理抹乾淨。而且我哋座位嘅右後方就係廚房，只見當日廚房並冇閂門或任何遮掩，從座位仲可以聽到洗碗姐姐洗碗時發出霹靂拍勒嘅聲響，其音量之大頗為影響用餐體驗。仲有一樣令我更為注意嘅係，師傅喺為其他客人預備刺身做壽司嘅時候，切出嚟嘅魚生掂到喺砧板上面嘅布。一向喺其他店舖都會見到師傅用白布嚟抹刀同埋砧板，所以白布理應係乾淨衛生嘅，但牙腩見到呢個畫面都稍為有少少毛骨悚然。 回過頭來，店員馬上就為我哋送上前菜—煙燻雞肉沙律以及麻醬秋葵。呢兩款前菜嘅食材同調味都俾我感覺好現成，麻醬秋葵更甚。接下落嚟就到壽司嘅環節，十二貫壽司順序分別係右口魚、真鯛、赤貝、深海池魚、池魚、牡丹蝦、蟹膏帶子、金目鯛、黑陸、赤身、大拖羅以及海膽。 唔知係咪坐低後觀察到環境未算最衛生，牙腩喺食第一件壽司嘅時候覺得有少少怪味，未知係咪心理影響，所以決定再觀察下試埋之後嘅壽司先再作定論，幸好之後嘅壽司都未有類似情況。請見諒牙腩未能為各件壽司一一分享及點評，只覺壽司溫度太低，刺身上調味稍多，掩蓋咗食材原本嘅味道。但十二貫壽司最大嘅問題，就係赤醋飯太黏太多水份，其黏度已經令我忽略刺身嘅味道同質感。食到一半牙腩都忍唔住皺晒眉頭，望住師傅摙壽司時因為醋飯太黏而要用更多水嚟濕手，摙壽司時對手好似啱啱洗完手咁濕...... 其後再上嘅茶碗蒸、味增湯及甜品奶凍味道不過不失，要一提茶碗蒸味道太淡，而且蒸嘅時間過長，令蒸蛋出現氣泡而不夠滑嫩。 總結呢餐午飯，牙腩確實百思不得其解為何OpenRice上一面倒好評，又或者可能係水準唔穩定，但同一價錢同區有更好選擇。而網上食評不斷標榜此為「高級壽司店」，綜合用餐環境、服務態度同食物質素穩定度，呢間壽司櫻都未夠一絲不苟，與高級壽司店尚有一段頗大嘅距離。如果連午市套餐都尚有如此大嘅進步空間，確實較難令人有回頭再試晚市嘅信心。 以上為小編極粗淺之見，不喜敬請忽略。 🍣 お寿司12貫 $420 +10% (經OpenRice訂座享八折優惠)

大圍近年開咗唔少café小店，眾多選擇之中，呢間Platform喺區內或區外都頗有討論度。位於略為隱蔽嘅田心村內，唔熟路嘅話都要花啲時間搵一搵。舖頭位置低調，但門面設計裝修就十分有特色。玻璃門門框油上湖水藍色，門前有幾張枱櫈供作露天茶座，加上地下鋪咗木地板，望落十分寫意。 當日我同朋友諗住去食個late lunch，下午三點幾去到，唔需要等位就可以入座。餐廳內大概容納到20-23人，如果坐滿都可能會有少少迫夾。呢個時間舖頭只有兩三檯客，靜靜地正適合我同朋友傾吓計。呢度嘅裝修行簡約風，但擺設就好有心思，周圍放咗啲綠色盆栽、相架同小擺設。燈光柔和，下午仲有啲自然光曬入嚟。餐廳用嘅係木枱，整體呈暖色系感覺好溫馨好cozy。 餐廳menu簡潔易睇，我同我朋友叫咗個pulled pork同埋the new yorker嚟share。嘢飲方面我嗌咗熱檸檬薑蘋果果茶，我朋友就揀咗杯熱latte。嘢食嚟到我真係嘩咗一聲，個pulled pork啲青蘋果絲多到就嚟跌落嚟😂呢兩道菜都各跟一個bagel，我哋揀咗cheese bagel配個pulled pork。呢度嘅自家製bagel係招牌嚟，烘熱咗暖暖地有啲脆口，個cheese bagel芝士味唔算突出，勝在口感煙煙韌韌又唔乾。個pulled pork味道夠濃但唔會過鹹，豬肉手撕後質地軟熟唔柴，加上酸酸甜甜嘅青蘋果絲，味道層次豐富。唯一敗筆係上面塊芝士脆片煎得太厚身，完全唔稱得上係脆片，感覺上好似一塊溶咗嘅芝士擺到乾咗，咬落好硬身。除咗過多蘋果絲同埋芝士脆片太厚身之外，呢兩道菜都有一個問題，就係旁邊嘅沙律太多😂😂😂(牙腩我真係好怕食生嘅菜🤣)，但調味就只有上面灑嘅少少芝士粉，就咁食生嘅菜(我)真係難以下嚥，可以考慮俾返啲橄欖油同黑醋，又或者係麻醬啲沙律菜。 至於個插着把刀嘅the new yorker入面就好多料，有煙燻牛肉、煙肉、焦糖洋蔥、青瓜同蕃茄，再加上一大pat蜜糖芥末籽醬配原味bagel。唔知係咪底下嘅食材重水份，底嗰塊bagel有啲soggy，影響咗整體bagel嘅口感。所有食材夾埋一齊食，煙肉嘅味搶先出咗嚟，蜜糖芥末籽醬同焦糖洋蔥嘅味亦都突出，反而煙燻牛肉嘅味道就唔太明顯，有啲浪費。大部分食材味道都比較濃，但配埋青瓜同蕃茄有一種減膩嘅效果，食落整體感覺都算和諧。反而兩杯嘢飲就平平無奇。 就嚟食完兩道菜，見到隔離枱嘅客人嗌咗個蘋果批，賣相浮誇(我鍾意🤣)得嚟仲好香肉桂味，搞到我哋心思思，最後忍唔住嗌咗一份🤣。個冰火蘋果批真係好適合打卡，但係嚟到後就要盡快食，皆因個雪糕好快就會溶。蘋果批主體好香好好食，蘋果夠多，甜度同肉桂味剛好仲焗到有陣焦香味，配埋個雪糕食完好滿足🤪個棉花糖同啲crumble相對就冇乜存在意義，用嚟打卡一流，但對於道菜整體嘅味道同口感都冇乜實質嘅幫助或提升。 呢度嘅食物質素未算最突出，但喺眾多嘅Café小店來講都好夠做。配合埋整間餐廳悠閒嘅氛圍，我同我朋友食下傾下都坐咗兩個零鐘。另外店內bagel有原味、芝士同芝麻以供選擇，仲有設外賣，鍾意食嘅話可以買返去第二朝做早餐🤪舖頭位於我就腳嘅大圍，加上網上唔少好評，令我都會想試吓餐牌上其他嘢食，回頭率有五成。 以上為小編極粗淺之見，不喜敬請忽略。 後記: 店員態度算親切，最值得讚嘅係我個朋友走嗰陣留低咗張獎學金嘅支票(有冇搞錯)，個店員追咗我哋成條街俾返我哋😂。 🥯Pulled pork $88 🥯The new yorker $78 🥧冰火蘋果批 $76 ☕️Latte(H) $40 🫖lemon and ginger tea(H) $42 💰人均消費 $162

鮨慎一向都喺我個收藏list入面，今日約咗個朋友食飯就趁weekday冇咁多人book咗午市嚟試。將結論放喺前面，就係恰到好處、實而不華。 二人限聚令下，預約咗1:30pm，大概等到1:40pm先有得入座。坐低後選餐，有「出水」(刺身、燒物、壽司八貫)同「神水」(壽司十二貫)兩款選擇。我哋揀咗兩個「神水」餐。 (🍣神水Kuwamizu $680 +10%) 普遍鮨店嘅午餐都會跟前菜、湯同甜品。前菜分別有茶碗蒸同八爪魚，值得一提嘅係款八爪魚前菜，八爪魚煮得軟熟但又尚留有一絲煙韌嘅口感。上面鋪咗一塊木之芽(我朋友話好似驅蚊草咁嘅味😂)，我夾喺兩嚿八爪魚中間食，令第二嚿八爪魚仲有陣清新嘅感覺😂。 十二貫壽司，以中拖羅打頭陣。我嘅記憶冇辦法逐貫壽司講😂不過可以講吓師傅每貫嘅排列。師傅第一貫以魚味同脂香感互相制衡嘅中拖羅打頭陣，第二至七道梅花間竹咁以魚類、貝類、魚類、貝類去做推進，最後四道再以油脂豐富嘅魚類同海膽作結。每道由淡至濃味之餘亦有鮮明嘅對比，保持每一貫嘅新鮮感。 當中某幾道特別有記憶點，貝類中嘅甜蝦爽滑而鮮甜，與醋飯之間夾住嘅蝦膏仲增添咗一份甘甜。另外赤貝(我最愛🤪)亦非常出色，食材本身十分新鮮，口感可以用爽脆嚟形容。唯獨個螺壽司我就尚未懂得欣賞，肉質雖然爽口但味淡，就算加咗醬油都好似同醋飯冇互相呼應到。 至於魚類，白身魚似乎冇乜記憶點，大拖羅同其他油脂豐富嘅魚類依然脂香感十足。其中池魚壽司印象比較深刻，肉質細嫩柔軟又有彈性。另一款我最近好歡喜嘅醬油漬赤身(寫緊字都流口水)亦頗為難忘，口感細緻有咬口，而且魚味濃郁，加上醬油漬過同醋飯配合得天衣無縫(有啲誇張)，無可挑剔！最後講吓個昆布漬海膽，應該係呢度嘅招牌嚟，令我對佢更加有期望。海膽用昆布漬過，食落微微多咗一層昆布嘅香味，但質地就唔太挺身，比我想像中稀得多，海膽嘅鮮甜味亦都偏淡，相對失色。 壽司環節完結，隨即師傅就開始做卷物，吞拿魚茸夾雜着少少蘿蔔碎同芝麻，捲喺紫蘇葉、醋飯同烘到乾脆微暖嘅紫菜入面，水準平穩。 緊隨住卷物，師傅就係你面前放上四嚿疊高咗嘅玉子😂(我)確實比較少見鮨店會一次過提供晒兩款做法嘅tamago，一款淺色嘅味道偏甜，質地綿滑似custard。另一款長崎蛋糕風嘅食落就比較乾身而且粗糙。 最後呢餐午飯就以麵豉湯同雪糕三文治作結。柚子同芝麻味雪糕之間我揀咗芝麻，不過夾埋脆餅一齊食，芝麻味未算突出，但甜而不膩，總算為呢餐午飯畫上一個句號。 總括而言，食材新鮮，師傅對每一道菜的處理亦恰如其分，沒有過多調味，令客人食到食材最原始最真實嘅味道。十二貫嘅壽司加上卷物嘅舍利都用上赤醋，空氣感、比例同濕度都恰好，唯獨略略偏酸，與脂香感偏重嘅魚類相輔相成，卻於白身魚嘅幾道菜更為明顯。身處中環租金偏貴之地，性價比合理，回頭率達六至七成🥰 以上為小編極粗淺之見，不喜敬請忽略。 後記: 當日為我哋料理嘅師傅係店中嘅Head chef Kami San，師傅唔單止能操流利廣東話之餘同我哋溝通過程中亦十分幽默，周不時都搞下笑咁😂而且佢耳朵十分靈光😂嗰日我見到佢攞赤身出嚟，我就好細聲咁同我朋友講:「呀！係醬油漬赤身呀！我鍾意呀！」師傅明明招呼緊我哋隔離嘅客人，相隔米半之外都竟然聽到我講咩，走過來話:「係！啱jor！係赤身！」相當趣緻🤣店員亦十分體貼，添茶添得好頻密。我哋走嘅時候師傅仲好有禮貌地出嚟送我哋，呢樣確實唔係間間鮨店嘅師傅都會做。呢種咁有溫度嘅服務，仲有各樣細節位，就算食物唔係100%正中我下懷，都係令客人回頭嘅原因。