次次weekend經過，呢間餐廳門口都係對滿晒人，趁今日平日得閒，終於可以唔使排隊就入嚟坐低食返個lunch。 自己本身已經好鍾意食米線，而呢間餐廳佢主打米線， 所以唔係好洗諗就叫左一個麻辣蕃茄米線配瑞士雞髀。 食物好快就到，碗米線份量夠晒多米線，我諗細食嘅女仔應該食唔晒🤔- 個湯底有驚喜喎！ 本身諗住佢係主打蕃茄- 個蕃茄味係絕對足夠，而佢個麻辣味係有驚喜，夠麻又唔會過辣，食落去夠香😋！ 搖滾米線佢本身嘅配搭係跟牛乳炒蛋，佢哋將個蛋放上米線上面，原來食落又OK喎😮 至於隻瑞士雞髀- 好巨型啊！比我想像中大隻-佢哋嘅瑞士汁好香，係輕微嘅甜味，又唔會好油好膩，我幾鐘意！ 比起我平時食開快餐嗰啲雞髀大隻好多好有滿足感🤣 不果結果飽到食唔晒碗米線。 本身呢個餐配飲品係半價，所以試咗佢哋嘅特飲-紅豆奶茶。 佢啲紅豆都幾大粒，不過紅豆份量就冇正常紅豆冰咁多，但係個奶茶底絕對係專業！我下次嚟會再encore呢杯 😍 題外話，舖頭個設計都幾特別佢係用咗以前香港80年代做主題裝修，卡位都坐得舒服。重點係，冷氣夠凍！30幾度嘅將軍澳絕對需要😂😂😂

黎親將軍澳通常都係會去澳南嗰邊嘅海邊餐廳，但係今日去咗一間開咗都一段時間但係位置唔太顯眼嘅西餐。其實都book Mark咗一段時間今日終於嚟咗食，睇Menu選擇都比我想像中多，一開始諗住試吓佢嘅burger，但最後尾都係選擇咗試佢哋嘅牛，而見到隔離枱個意粉都唔錯所以兩個人叫咗兩個main 一個salad 。而一坐低，侍應已經serve咗餐包，我覺得有誠意嘅地方係佢哋唔係跟普通牛油而係咗未嘅麵包醬，有輕輕既蒜蓉味加咗橄欖油咁👍🏼。 《鮮芒果及扒虎蝦肉沙律》$128 份量比我想像中大，有四五隻虎蝦，佢個沙律汁係用咗Mango Mayo dressing 食，味道好Fresh,佢個沙律汁叻嘅地方係令我覺得食羽衣甘藍都可以唔苦！沙律菜都夠新鮮，我自己好鍾意呢個沙律🥰 《墨魚汁鮮帶子海蝦扁意粉》$188 本身見到價錢覺得有少少貴嘅，但係因為偷聽到隔離枱話好食，而自己係好鍾意食帶子嘅，所以都試吓啦。侍應好細心，特登俾咗濕紙巾我哋驚我哋食到成咀黑晒😂。份量都真係唔細喎，有兩粒鮮帶子同三隻大虎蝦，佢哋處理海鮮都真係好好，值得一讚係完全唔會overcook，仲煮到好彈牙又冇腥味，我自己覺得好食過我喺海邊試嗰啲餐廳，佢個扁意粉都幾得意唔係傳統嘅扁意粉，會窄身少少，而煮嘅煙韌程度都好滿意。 《炭燒美國頂級牛腹柳 8安士》$258 Order 左medium，挑剔嘅我即刻係中間切開睇吓佢哋生熟程度控制得好唔好😂，點知有驚喜喎！我覺得係介乎medium rare同medium之間，加分！牛肉質素都OK，而我覺得最值得讚嘅地方係佢哋綜合左香港人食牛扒嘅習慣，有唔同嘅調味料係個碟上面，有蒜頭啦，有芥末，有蘑菇汁，仲有用番茄醬煮咗嘅雜菜粒，當然仲有薯條啦！ 仲有仲有我冇諗過佢哋嘅飲品係有驚喜嘅，問咗佢哋嘅侍應有咩推介，最後叫咗兩杯特飲 《Forest》 係芒果菠蘿沙冰底加入左薄荷葉一齊打碎，感覺係好fresh，仲要係超大杯，朋友食完成餐飯都未飲得晒。 《偽鴛鴦》 即係用朱古力底再加用咖啡做嘅冰磚，叻嘅地方係杯嘢飲唔會比溶咗嘅冰沖淡，反而會越來越多咖啡味，如果跟餐只係加$38 ，都幾抵飲！ 認真呢間野d 野食係有驚喜，本身對將軍澳嘅餐廳都冇乜期望😅 但我都幾肯定呢間會再嚟食，而平日晚我見佢都full house，睇嚟我太遲發掘佢地喇🤓，埋單$3xx 一個人， 呢個質素，絕對唔算特別貴！

突如其來好想食韓燒，所以做唔到拉咗同事仔同我一齊去食。既然搵得韓燒，梗係要搵一間質素有保證，所以就去咗喜來稀肉喇。原來尖沙咀呢間分店都好大， lunch唔使book位，一坐低侍應就安排咗三款前菜，啱晒已經好肚餓嘅我。落單係用QR code自助落單，仔細睇，燒肉選擇都好多，唯一可惜嘅係冇lunch Menu。 同同事揀咗一份喜來烤牛肉，同一個芝士石頭鍋飯。食親韓燒最開心嘅係個爐側邊嘅芝士蛋，但可惜lunch時間太少短，第一次冇refill就走😂。 喜來烤肉嗰份量都唔細嘅有180 gram，我諗都有10件以上，佢係已經有汁醬醃好咗嘅薄牛肉片所以基本上係放落個爐每邊燒10秒內已經食得，我覺得個肉已經醃得好入味，基本上唔需要再沾任何調味料已經好好味👍🏼 而個芝士石頭鍋飯係超級多芝士，仲有午餐肉，雖然冇傳統嘅石頭鍋飯咁多飯焦同濃味，但係如果係芝士控嘅話一定要試吓！🧀 雖然佢冇lunch Menu，但係價錢上都唔係特別貴，以呢個質素同環境舒適度我都覺得值嘅，下次應該要拉多啲同事一齊過嚟可以點多啲唔同嘅肉😋

之前食過覺得值得再食，所以再同朋友兩個人嚟食。晚市套餐特別抵食，而且份量都好多，所以同朋友點左一個套餐，再另外散叫一啲串燒，已經好飽好滿足。 套餐前菜係好特別嘅冰菜沙律，唔係周圍都食到，而且冰菜咬落去有少少爽口，帶鮮甜。 大阪牛肉飯 呢個飯嘅份量一定會令你好驚喜，絕對有二人份量。而且有大量嘅牛腩同牛筋，都煮得好入味，好林。配埋牛肉汁，食落去好香口。 京蔥雞髀肉燒得剛剛好，個面有少少脆，食落去肉質嫩滑又juicy，正！ 鹽燒牛舌 厚切嘅牛舌咬落去夠厚肉，帶少少煙韌，鹽燒令牛舌本身嘅香味更加香濃。 豬腩葡萄卷 呢個係餐廳推介，本身都有少少擔心會唔會唔夾，因為比較少食葡萄嘅料理。但係真係有驚喜😍豬腩燒得好香，食落去少少脆口，帶少少油脂感得來，又唔會太膩。而且葡萄嘅酸甜味，中和返油脂感，一定要試！ 餐廳成個環境都坐得好舒服，裝修都好似日式居酒屋，價錢尚算親民，住喺屯門嘅街坊一定要嚟試下😃

見新都城開咗新餐廳，決定嚟試一試。
有唔同嘅任食燒肉set,由最basic嘅雞同豬到唔同種類嘅牛都有價錢個range都好大, 雖然本身個人係好鍾意食牛嘅，但最後都揀咗雞同豬套餐試下水溫先。

先講餐廳裝修，好新好闊落都好乾淨，職員並唔係每個都醒醒目目但係都好好禮貌。

任食雞同豬肉類方面總共有五款咁多，有鹽汁同燒汁，但眼望同食落去基本上係冇咩分別，可能係想突出返本身個肉嘅味道😊 海鮮有一款，就係多春魚喇！

蔬菜類都多嘅有菇粟米翠玉瓜南瓜等等，蔬菜可以讚一讚都新鮮嘅！

熟食選擇都算多，會推介下個天婦羅蝦，炸雞都ok，蕎麥麵都OK，有跟鵪鶉蛋同Wasabi

甜品方面有明治雪條提供，值得一讚，而飲品方面有佢哋自家調製嘅四款飲品有茶包有汽水機，任飲唔錯吖。

今日同朋友黎觀塘工廠區拎野， 就順便去試左book mark 左好耐但又未有機會試嘅餐廳。 COTI 雖然有幾間分店，但係地址都唔係我平時會去嘅地方，所以今次有機會就即刻試吓佢，一入到黎嘅感覺好舒服，雖然鋪面唔大，但入面嘅裝修好有北歐/北美嘅木屋感覺，個玻璃天窗設計感覺好似係出邊落緊雪入邊有個暖爐嗰種木屋咁，感覺好cozy。 點知一坐低冇幾耐，出邊就即刻落大雨😂。 同朋友order左兩份食物share 《All Day Breakfast 》 $74 價錢wise 黎講我覺得好抵，依家出面一份All day閒閒哋都$100。 而佢既份量都唔細，質素絕對係中上。 最欣賞佢既雞扒，好嫰好入味！仲有個sourdough都幾高質，軟硬適中，上面配上牛油仲加埋香草，好細心👍🏼 比較得意嘅係佢配上一件切咗細細粒嘅哈密瓜，可以中和肉類嘅油膩，我覺得呢個組合好好💕 《蒲燒鰻魚飯》$88 鰻魚份量都唔少一條切開左兩份，側邊仲有足夠嘅配菜仲配上燒咗嘅玉子。個鰻魚汁配上燒咗嘅鰻魚一上枱嘅時候好香，個鰻魚都有油香味，飯嘅份量適中作為一個brunch剛剛好👍🏼 《天然蜂巢咖啡》+$24 開頭覺得加$24好似幾貴，但嚟到嘅時候覺得都值呢個價錢😆。將一杯牛奶同濃縮咖啡分開上，配上蜂巢連蜂蜜，成個presentation係好IGable! 我覺得值得一試。 《玫瑰花茶》跟餐免費🤩 開頭以為唔使加錢嘅都係是但比個茶包你就算，點知都有小驚喜。係用茶包再配上玫瑰花粒，茶入面仲要已經加咗蜂蜜，飲落去甜甜地好舒服，普通一杯玫瑰花茶，都做到咁有誠意，值得一讚啊！ 整體來講性價比都幾高，雖然舖頭細細得一個職員，但呢位女職員非常細心，服務態度都非常好，上菜速度都唔會耐，之後如果再黎開工廠區都會再幫襯，試埋其他菜式啊

呢排流行食芫荽，作為本身鍾意食拉麵嘅我，就諗起鬼金棒，一次過滿足我兩個願望，順便捉埋個朋友嚟👩🏻‍🤝‍👨🏿 入到去獲配坐高枱位，即係隔住個玻璃對住廚房同對正一大盤貌似五花腩嘅叉燒，好似好好味咁，即刻嗱嗱臨嘟個QR code落單！我朋友叫咗玉米筍辣麻味噌拉麵，我就梗係芫荽辣麻味噌拉麵，仲要慌死唔夠追加芫茜。確認落單，飲品5秒就到！由於對住個廚房坐嘅關係，可以欣賞到師傅炒芽菜料頭鑊氣十足，炒到啲火hehe含含鬼火咁高🔥，不過太快影唔到🤣 拉麵10分鐘左右到🍜🍜，玉米嗰碗多玉米，我嗰碗果然好多芫荽😂😂😂第一時間撥開啲芫荽呷啖湯，大家都叫咗小辣中麻，麻辣度都好恰當，好啱我哋口味，湯底濃而不膩。麵身屬於較粗身款，本身本人麻麻哋粗身拉麵，但意外地掛湯，加返分。叉燒同醣心蛋都甚為出色，芽菜係畫龍點睛。偷食咗朋友⋯兩條小玉米，表面燶燶哋幾爽口，同拉麵都幾夾，見到隔離幾枱都有嗌呢個🌽🌽 環境整體都唔錯，企理乾淨，岳高頭有好多👹👹👹👹都幾有氣氛，最鍾意係佢高枱位有傳統拉麵舖應該有嘅凍水龍頭自由斟，加分加分！

最近睇咗篇報道先知大家認為將軍澳係美食荒漠🥲，但係其實將軍澳越來越多新樓盤，都越來越多高質素嘅餐廳，今次食呢間餐廳其實已經唔係第一次食，之前已經食過佢哋嘅lunch，覺得好抵食，今次試吓夜晚會唔會多啲選擇。 一入黎就見到有新野，就係送餐嘅機械人喇！一坐低1分鐘都未夠，已經有機械人送咗兩份肉類嚟，超級快！ 放題肉組合《美國SRF和牛》🥩 想食好少少揀咗個最貴嘅黃牛，結果都冇令我失望，肉質好嫩，而雪花都好平均；而我覺得個牛味係咁多種牛之中比較重牛味，鍾意食牛嘅朋友揀呢一隻就冇錯啦！🤩 其他特上牛既脂肪比較多，比較油，鍾意油香味嘅人就會比較啱😉。除咗牛之外，我想講佢哋嘅雞髀肉🍗係超級滑呀，可能我本身都超級鍾意食雞，所以我有再追加個雞肉😋 湯底就升級揀咗佢哋嘅《德川大將王豚骨湯底》，上次試咗佢哋嘅雞白湯，比較普通無特別既驚喜，所以今次揀咗佢哋嘅推介豚骨湯，齋飲個湯嘅感覺都係都夠濃郁，仲跟咗個豬軟骨tim ga! 唔錯唔錯 《任食自助配菜🌽🥬🥗》-夜晚黑呢個價錢冇諗過有咁多配菜選擇，最開心嘅係超級多蔬菜選擇，生菜、南瓜、萵筍、蘿蔔、金針菇、雞髀菇、粟米、山藥等等，想飽肚啲嘅有日本葛粉、芋絲、烏冬、出前一丁、拉麵 ；打邊爐當然都要有丸類啦，每次必食嘅貢丸、牛丸、魚蛋、芝士豆腐、年糕袋、芝士腸等等都有齊晒。當你以為已經好多選擇嘅時候，我想講仲有唔同嘅熱食，甜品，自製窩夫雪糕😂 其實90分鐘真係食唔到咁多嘢，所以我話有好忙，嘴巴好忙🤣 至於飲品方面選擇都ok，支裝飲品嘅有鴻福堂嘅鹹柑桔，有自助嘅汽水機，唔飲汽水嘅仲有熱飲咖啡朱古力茶都有得揀，但我記憶中上次支裝飲品嘅選擇好似多啲🤔 整體覺得晚餐價錢都好抵，性價比都高，唔使出去旺區都有呢個質素嘅日式放題，我覺得食得過！ 最值得一讚嘅係地方夠闊落，好乾淨，職員加湯都非常勤力值得一讚👍🏼

最近屋企附近開咗間新嘅西餐cafe，講真開頭覺得港式西餐廳質素應該麻麻地，但見佢新開有咁多嘢食揀，都想試一試。 Menu上面基本上係好多選擇，有意粉，意大利飯， burger，pizza，牛扒，鐵板等等。同朋友揀咗一份牛同一個pasta。 《石燒美國頂級榖飼牛肩胛肉眼扒》🥩 價錢只係$78 ，加$30就有湯沙律同飲品。以為份量係好細，點知份量真係唔細中要係石燒板上，可以自己控制個生熟程度，仲配埋薯角。重點係佢係後設嘅肉眼扒，所以就算自己最後控制得唔太好變咗medium well，都唔會鞋，入邊仲好林同Juice，真心讚。仲要好細心咁跟咗三種source。 下次我會小心啲未到medium就好離開件石唔好等佢overcook 🥲 加咗$30有湯，沙律，餐飲同甜品。餐湯係蕃茄忌廉湯，質素都OK，不過如果再熱啲就好啦。而個雜菜沙律份量都唔細，整體來講呢個set非常抵食🙂 《煙三文魚黑松露海蝦意大利闊條麵》🍝 本身對呢個Pasta係冇咩期望，點知呢個pasta 絕對係中上水準之作。煙三文魚份量唔算少，落足黑松露醬去煮呢個pasta所以好夠味，但又唔會過鹹，海蝦份量雖然唔多得三隻，但一人份量嚟講都呢個價錢都算抵食！如果pasta佢煮到真係Al dente， 估佢唔到！但如果鍾意食港式嘅意粉呢個你哋未必會慣，但我自己就好鍾意👍🏼 飲品方面，佢哋都好似其他Cafe咁有好多唔同種類嘅選擇。所以我地另外再加多左杯《荔枝乳酪梳打》，夠晒大杯，我自己覺得配咁重味嘅食物再飲有氣嘅嘢感覺會Fresh啲🏝 食完呢餐嘅感覺係佢個食物質素係有保證嘅，有多選擇，價錢又平。都一定會再嚟試埋佢其他嘢，而家新開張仲可以免收+1 ，所以真係幾抵食！🤑

一直都想試吓呢家西班牙菜，今日終於同朋友嚟咗。 黎到時間都尚早，六點鬆啲，唔算多人，所以餐廳好靜好舒服。環境都好有西班牙嘅感覺，而近門口嘅天花更加有好多花嘅decoration，啱晒用嚟做背景影相打卡。 同朋友兩個叫咗兩個tapas ，一個主菜，一個甜品。 《蕃茄清湯酸菜白雪魚》🐟 呢個完全係一個fusion嘅tapas，成件事好有驚喜。先講個湯，係好清但係超級夠味，個麻味喺最後慢慢滲出嚟，比起傳統嘅酸菜魚冇油但係個麻味更加出色，見到佢哋落咗一串嘅青花椒，相對成本比較高，有誠意！👍🏼而個魚係鱈魚，都預咗唔會好似平時嗰啲酸菜魚咁滑，但係佢係將層皮煎到香先至放落個湯上面，都好有心機，真係超推介！🤩 《龍舌蘭青檸野雞鎚》🍗 呢道菜絕對係眼睛食先，因為上菜嘅時候係會喺個龍舌蘭酒上面點火，啲酒揮髮嘅時候已經好香，而呢份tapas嘅份量絕對唔細，一共有六件雞鎚。而個雞鎚唔會乾，而本身醃咗嗰個味已經好入味再加上龍舌蘭酒同青檸，酸酸地好開胃。😋 《西班牙橡果黑毛豬柳龍蝦汁砂鍋飯》🐖 呢個係西人版嘅煲仔飯，一打開蓋嘅時候已經聞到好香嘅飯焦味，個面鋪滿左豬柳同埋魷魚，淨係個樣已經睇落去好豐富。個飯底龍蝦汁味都好出，但唔會好似平時龍蝦湯咁鹹， 飯既配料都好豐富，基本上係每一啖飯都會有配料係，入面有辣肉腸，肉粒，香菇等等。個豬柳可淋，絕對唔會鞋同唔會有豬羶味，叻👍🏼 。可惜嘅係太遲去撈個飯，結果啲飯焦黐咗喺個煲底度，食唔到。 《百利甜酒提拉米蘇窩夫》🧇 呢個甜品又係嘩一聲，完全係相機食先！ 好適合女仔朋友嚟打卡影相，或者同朋友嚟慶祝生日都一流。有個勁大個嘅棉花糖做cover，下面就係用百利甜酒做嘅Tiramisu waffle，仲有一球嘅movenpick雪糕，同埋唔同種類嘅水果😍。想講呢個甜品唔單止睇得，識落都好好食，個窩夫係啱啱焗起配埋個Tiramisu個味道係好夾， 下次嚟我一定會試埋其他味😛 《招牌雜果沙冰》 本身諗住個飲品都係普通沙冰唔會有特別，但係杯沙冰係超級大杯！個橙汁底非常濃郁，熱辣辣飲呢杯野係超級加分，兩個人share一杯最後都飲唔晒。 整體來講，呢間餐廳性價比高，覺得同朋友嚟慶祝生日一流，而Menu入面都有好多選擇，所以一定會再嚟試埋其他野 👍🏼