呢日同男友早上去咗海港城做野，Lunch想食好少少獎勵一下自己，決定行下搵間特別啲既！ 邊行邊搵下見到呢間店既門口好有型，氣派十足，一開始仲以為係啲搞藝術既高級會所。好奇心推動下走去睇睇，發現原來係太子酒店既餐廳黎，有半自助餐食又唔算貴，咁當然要試試佢啦！ 🧡Semi-buffet lunch（$288/位） 自助餐區既選擇好豐富，無論係冷盤、沙律、海鮮都好足，質素亦係中上水平，呢個價黎講，計埋餐廳環境同地區，CP值真係好高！ 主菜方面都有好多選擇，主要係亞洲特色既菜，無論中、日、韓、泰、印既選擇都有！雞、豬、牛、魚既選擇亦都齊，總有一款啱水心～ 我同男友就選擇咗下面兩款： 🔸輕煎鱸魚柳配薯蓉露荀薄荷汁 鱸魚煎得好靚仔，金黃表皮，魚味足，肉唔散，出色！露荀無渣，薯蓉Creamy，正！ 🔸香煎豬里脊肉配西蘭花燒薯燒汁 肉質嫩，肉味香，大份啖啖肉，非常滿足！ 整體黎講成個用餐體驗係好好既，環境靚，坐得舒服，食物都算高質，自助區亦選擇豐富，侍應禮貌好，收碟都快，第日有機會都可以encore 下。

圓方真係好耐都無行過，呢日正好得閒就同男友去走走，一場去到當然都要食埋個飯啦！行過見到呢間韓國菜裝修充滿品味，而且見係閒日都接近滿座，當然要一試啦！ 🧡韓牛大蔥卷配泡菜炒飯（$880） 完美油花嘅韓牛包住滿滿嘅大蔥，一共十幾條連鐵板上，未食先興奮！ 睇住店員係面前燒香韓牛卷，再用番個韓牛嘅油去炒埋個泡菜飯，聞到個香味都流哂口水！ 韓牛卷肉質嫩滑，入口爆發滿滿油香同蔥香，絕對係全晚主角，唔怪得見幾乎枱枱都會點！ 🧡魷魚煎餅（$198） 煎餅咬落好香脆，魷魚嚼勁亦十足，加埋蔥同韭菜嘅香氣真係一流！ 🧡烤風川鰻魚釜飯（$185） 鰻魚份量好充足，咬口一流，醬汁亦調配得剛剛好！ 🧡The Night Begins（$108） 入口清新舒服，味道微甜帶酸，絕對係食肉解膩嘅恩物！ 🧡Lavender Seoul 127（$118） 賣相優雅，味道清甜，果香滿滿，唔錯！

呢日因工作原因同男友途經新蒲崗工廈一帶，食飯時段見到呢間門口唔起眼但內裡好闊落嘅Cafe，當然唔會錯過啦！ 🧡蟹肉青蘋果沙律碗（$95） 蟹肉青蘋果沙律食落好清新，同埋佢加咗Wasabi辣辣地仲好開胃！旁邊配上嘅金黃牛油多士外脆內軟，非常出色！ 🧡龍蝦忌廉扁意粉（$185） 上枱時已經聞到香氣十足，龍蝦肉滿滿，肉質彈牙，食落帶有鹹香味，意粉亦有咬口，唔錯！ 🧡蘆筍雞扒意大利飯（$105） 大大塊雞扒煎到表面香脆，入面嘅肉仲保留到juicy嫩滑！ 🧡香甜士多啤梨法式吐司（$88） 香脆嘅吐司配大大嚿雪糕就係無得輸！加埋果香滿滿嘅士多啤梨醬同新鮮士多啤梨絕對係一餐嘅完美句號！ 🧡鮮忌廉朱古力（$42） 面頭滿滿鮮忌廉好香滑，整體甜度啱啱好，加埋朱古力醬同朱古力粉去配熱朱古力真係好正！ 🧡抹茶鮮奶（$42） 入口舒服，適合餐後邊吹水邊慢慢嘆！

呢日因工作關係同男友去咗海港城，一場嚟到食飯當然要搵下有無咩新餐廳啦！ 估唔到又真係俾我哋搵到呢間新開嘅Cafe，佢門面新潮靚靚之餘，最特別嘅係見佢嘅菜式係有滿滿韓系元素，並非一般Cafe咁簡單，咁當然唔可以錯過啦！ 🧡玫瑰醬八爪魚年糕（$89） 年糕係麵條形狀，同平時食開嘅韓國年糕唔同，口感好好，個玫瑰醬亦香味濃郁但食完又唔會覺得膩，再加埋隻彈牙八爪魚，絕對係出色！ 🧡橡果黑毛豬卡邦尼意粉（$108） 卡邦尼醬汁Creamy，味道濃厚，意粉彈牙入味，配埋肉味香濃嘅黑毛豬，就係滿足！ 🧡香濃花生夢幻沙冰（$95） 鍾意花生嘅朋友一定唔可以錯過，呢個沙冰嘅花生醬味道濃郁，花生味重，沙冰入面仲暗藏麻糬，配埋頂頂嘅紅豆口感一流！仲有配埋個米通俾你食完清清個味蕾，正！ 🧡軟綿綿粟米蛋糕（$58） 栗米蛋糕都係第一次食，感覺非常特別，好似食緊栗米湯咁。甜度嚟講啱啱好，食完好舒服，值得一試！ 🧡甜蜜桃桃伯爵冰茶（跟餐$Free） 桃味特出，甜度剛好，入口舒服！ 🧡怦然心動熱情果梳打（$42） 酸甜解渴，爽口涼快，係幾refreshing！

呢日得閒約男友去咗銅鑼灣行街街，諗起世貿中心裝修完都未行過，就順便去睇下lunch有咩好食。 去到見到個商場都開咗好幾間餐廳，睇過menu後，就決食呢間尖沙咀都有分店嘅「喫茶ちょうぼ」嘅聖誕special提早過聖誕～ 🧡聖誕庭院大蝦菠菜扁意粉（$98） 有紅紅嘅蕃茄做配搭，綠綠嘅菠菜扁意粉馬上充滿咗聖誕氣氛！醬汁creamy，意粉彈牙，大蝦爽口，唔錯！ 🧡誕辰和牛漢堡蛋包飯（$108） 蛋包飯係呢度招牌當然係必點啦！個蛋煮得時間啱啱好，切開仲係流心，入口好嫩滑！和牛漢堡就非常厚身，飯係蔬菜炒飯幾惹味，整體大大份，好食又滿足！ 🧡噹噹金賞唐揚炸雞（$88） 炸雞炸得出色，肉嫩多汁，一啲都唔柴，口感一流！炸雞醬汁甜甜地，加埋青瓜沙律醬好開胃，入口舒服，讚！ 🧡雪人布甸與牛奶大福盛（$68） 雪人造型very cute! 布甸香滑，大福甜度剛好，係一餐唔錯嘅收尾！ 🧡榛子交響曲（$68） 店員會喺你面前用兩個茶壺表演空中混合，有得睇有得飲係幾過癮既。 🧡紅粉緋緋花環拿鐵（$48） 士多啤梨味嘅拿鐵，味道幾特別。

年底放假當然要到處走走啦！呢日就同男友去咗屯門行街街，晚餐時間見到呢間以前都食過唔錯嘅韓系Cafe做緊主題Menu，當然唔會錯過啦！ 🧡水星八爪魚腿蛋包飯（$178） 香滑蛋包飯配上深藍色，非常吸睛！八爪魚鮮味肥美，口感一流！ 🧡殼神星大蝦墨汁意粉（$136） 意粉彈牙，掛滿墨汁，大蝦爽口，加埋魚子真係鮮味滿分！ 🧡星際彩虹芝士豬扒（$58） 豬扒大份，外層香脆，入面流心，底下酸甜醬解膩開胃，出色！ 🧡伯爵茶布丁牛角包窩夫（$122） 牛角包窩夫香氣十足，香脆鬆軟，層次豐富，正！伯爵茶布丁滑溜香甜，兩者配搭一齊非常之夾！ 🧡月球幻影黑芝麻沙冰（$68） 黑芝麻味香濃，甜度剛好，冰涼透心！ 🧡木星朱古力咖啡（$58） 朱古力味重，入口舒服，唔錯！

呢日同男友去元朗Yoho行街街，晚飯時間路經見到以前食過幾次嘅「Terrace in seaside」搞緊期間限定嘅Care Bear主題好吸引，店內有唔少Care Bear嘅裝飾，而且有相關嘅主題菜式，加上過往嘅體驗唔錯，當然呢次都唔會錯過喇！ 🧡熊仔頭螄蚶拌飯（$188） 螄蚶拌飯可謂每次必點，呢次仲裝飾埋個飯做熊仔頭夠哂有feel！泡菜拌飯配大量螄蚶確實惹味鮮美，加埋爽口大蝦，絕對係啖啖滿足！ 🧡愛心傳播飯卷（$98） 飯卷顏色繽紛，擺盤氣氛滿滿，食欲大增！味道方便比較清新，剛好可以中和一下螄蚶拌飯嘅惹味～ 🧡Clordseeker彩雲窩夫（$118） 靚靚嘅Carebear包裝，見到都心情大好！金黃嘅窩夫加上軟滑嘅Cream總係令人忍唔住一口一口咁咬落去！ 🧡Starbuddies紫薯南瓜冰（$52） 紫薯南瓜冰呢個夢幻色彩配搭，賣相先俾滿分！入口口感有層次，甜度剛好，一份幸福嘅感覺！ 🧡濟州柑橘乳酪（$68） 店內招牌飲品，都係每次必點，柑橘味重，酸甜清香，開胃舒服！ 🧡夢幻雪糕布朗尼（$72） 甜品嘅野一份點會夠？雖然同主題無關但由於真係好想食Brownie所以點左。呢度嘅Brownie朱古力味非常濃郁，口感比較濃稠，夾住中間Creamy嘅雪糕一齊食非常滿足！

嚟到秋天除咗諗起食煲仔飯外，當然唔少得鮮甜肥美嘅大閘蟹啦！但係如果要自己買返屋企整又覺得好煩wor，所以呢日就決定同男友去咗屋企就近嘅富臨皇宮歎歎大閘蟹放題，過下食蟹癮！ 🧡時令大閘蟹放題（$498/位） 大閘蟹放題主角當然嚟唔開大閘蟹啦！呢個放題有三種大閘蟹口味可以揀，分別係清蒸、花雕蒸同油鹽焗。 我哋每款都有點，隻隻都好多膏下，我就最鍾意油鹽焗，個鹹香氣味真係好正！ 除咗大閘蟹外，個放題其實本身都超級豐富，有多款主食、涼菜、甜品任叫之餘，佢仲包咗每人一隻蠔皇原隻鮑魚、一個花膠濃雞湯、一碟蟹粉豆苗同一碟生炒骨！ 佢個花膠濃雞湯係真係超足料，花膠大大片，雞味勁濃郁！蟹粉豆苗亦用上滿滿既蟹粉，食得好爽！ 小食方面嘅片皮鴨亦係另一驚喜，即使係放題都唔馬虎，個鴨好香口，係水準之上！ 最後甜品叫咗紅棗糕同香芒布甸，紅棗糕熱辣辣，淡淡薑汁香氣，食完好舒服！香芒布甸亦食得到足料香甜芒果肉，係好嘅收尾！ 成餐整體而然係食得好滿足，上菜亦好快，絕對係秋天食蟹嘅好選擇！

呢日因為工作原因，下午又再次同男友嚟到The One，做完野當然要搵下啲未食過嘅野喇！ 由於唔係太想食粉麵飯嗰啲野，所以最後睇過唔同餐廳Menu後就選擇咗呢間過江龍pancake店作為我哋遲來的午餐嘅選擇~ 🧡BLT三文治（$88） 三文治內嘅厚身豬肉夠哂肥美，夾埋爽口新鮮嘅生菜同蕃茄，成件野個口感有層次得嚟味道夠哂balance，食完唔會覺得好油膩！加埋滿滿嘅伴碟沙律菜同薯角，非常豐富，唔錯！ 🧡墨西哥辣豆醬班戟（$118） 嚟到Pancake店又點會唔叫Pancake呢！不過我哋就特別選擇咗呢款鹹嘅Pancake！惹味鹹香嘅pancake配搭真係第一次，又真係work㗎wor！有肉有菜，有鹹有甜，配搭夠特別，值得一試！

放假無咩搞，所以同男友去好耐都無去過嘅東涌走一走~ 係商場行過一轉後，話咁快又去到食飯時間，但感覺喺商場無咩特別選擇，上網發掘下後，見到呢間位於東涌Sheraton酒店旁嘅餐廳裝修幾華麗，而且係食對我嚟講神秘而陌生嘅黎巴嫩菜，就決定去體驗一下！ 🧡Mix Hummus Platter（$180） 鷹嘴豆蓉一共有4款不同口味，分別係原味、紅菜頭、松露同青瓜。豆蓉本身口感好creamy幼滑，配搭起烤餅非常夾！個人最喜歡陣陣香甜味嘅紅菜頭嗰款，男友就最喜歡味道最濃郁嘅松露嗰款！ 🧡Chargrilled Octopus Tenticles（$178） 八爪魚表面烤得微微香脆，咬落肉質軟稔！配搭上曬乾番茄，酸酸地非常開胃！ 🧡Maison Du Mezze Ultimate Mix Grill（$588） 羊肉同雞肉，我全都要！呢個雜錦串燒絕對係好豐富！整個雜錦一共有5款口味不一嘅羊肉同雞肉串，仲有四片羊肉薄餅，份量超巨大，絕對係炭烤肉食愛好者既天堂！就算多幾個人食都好夠食！ 🧡Little Garden 冰涼爽口，解膩一流，啱晒滿滿烤肉嘅一餐！ 🧡Godiva Marshmallow 香甜舒服，Chill住飲非常Relaxing！