McCafé 出咗新吞拿系列 佛系嘅我近幾日先試 食咗新吞拿意式包 我其實仲未食過新吞拿 （竟然！🙈） 喂幾好味喎！ 咁可以買幾罐擺喺屋企 😛 個包外面烘得脆跪 咬入去裏面當然有新吞拿 仲有芝士、蛋沙律 幾好味不過細份咗啲 男士可能會唔夠飽 另外叫咗 新岩鹽焦糖燕麥咖啡 轉咗Oatly 嗱帶返個頭盔 我本身好少飲咖啡 絕對唔係咖啡專家 通常一杯咖啡飲半杯就放低 但今次我係飲晒成杯 平時啲飲品加啲粒粒嘢 通常都係勁肥嘅珍珠乜圓 而佢加咗啲燕麥脆脆 多咗層次有嘢咬又好味 而且感覺健康我鍾意 🥰 另外仲有新吞拿魚芝味薄餅 新吞拿扭扭通粉 我孤獨食客邊食得哂 下次有機會先試 新吞拿芝味捲就11點前先有 即係冇我份 😂

旺角女人街一間特色麵店 麵賜園 門口大大個玩味十大嘅霓虹光管 主打各款自家熬煮冇味精濃湯麵食 打開餐牌仲要有唔少素食選擇 我點咗 素蘇格蘭炸蛋 同埋 「賣一碗蝕一碗湯麵」（陰公😂） 蘇格蘭炸蛋平時已經少有 呢度竟然仲會做素食版 當然要試啦 一啖咬落去超好味 😍 外皮以麵包糠炸至酥脆金黃 下面嘅一層素肉非常厚實而彈牙 唔會太咸同乾 我相信唔講普通人都唔知係素肉 裏面溏心蛋嘅蛋白非常嫩滑 整個餸菜調味到內外控制都處理得好好 有啲工夫 👍🏻 配甜酸醬好好味 大家絕對要試 「賣一碗蝕一碗湯麵」 昆布豆腐湯底好濃郁 帶味增更有日式感覺 素湯來講做得唔錯 配菜有 日本舞茸、雞髀菇、蘆筍同蟲草花 未到處理唔算好突出正正常常 不過勝在材料好而且份量十足 感覺好養生同健康 😆 我冇特別轉其他麵 佢就配左一個幼麵 麵質偏淋少少 鍾意有咬口嘅朋友 可以叫佢唔好煮咁淋

同老公去咗汝洲街素年 見到 Menu 上有嘢未食過嘅？ 原來四月尾換咗新 Menu 😃 我叫咗夏威夷三文魚香芒蓋飯碗 雖然呢個菜式其實唔使煮 但如果我喺屋企整就好麻煩 因為要買同攪好多材料😛 呢個蓋飯碗內容非常豐富 有素三文魚、牛油果、香甜芒果、中華沙律 另一邊有紫椰菜、甘筍絲、蘿蔔仔片 食材樣樣非常新鮮又色彩繽紛好開心 中間嘅飯帶微溫 配香菇昆布醬汁好味 整個餸菜食完好 fresh 又飽肚 老公叫咗印度菠菜豆腐咖喱角碗 中間有一個大大隻印度咖喱角 外皮非常酥脆 中間薯仔豆咖喱 切開咗一半方便大家食 旁邊嘅手抓餅新鮮熱辣又脆卜卜 底層菠菜豆腐咖喱好香微辣 兩樣加埋再配甜甜的車厘茄 做到印度餐廳嘅香口惹味 又帶返點清新同靚仔 我仲叫芫荽青檸梳打 佢個芫荽係就咁浸入去 所以梳打只係微微芫荽同檸檬味 幾清新配咖喱啱啱好 食完過隔離 shop at years 行吓 有素食產品同一啲本地設計 兩邊嘅店員都年輕又親切 幸運嘅話可能見到店主嘅貓貓 Bear Bear 🐻 🐱

Happy birthday to me ( Yeah ) 其實已經係上個月嘅事 😂 當時仲未開夜晚堂食 所以晏晝去 Veda Veda 係喺喺中環 Dragon-I 隔離 門口好似一間黑框玻璃屋 設計型格時尚 入面感覺清新簡潔大方 顏色配搭同物料帶異國情調 雖然唔算好大 但都坐得幾舒服 當時嘅時段只有一個 Menu 選擇 就係 Champagne Brunch Set 不過睇落去都好吸引 六道菜再加無限 Dosa Bar 同甜品 首先嚟三個頭盤： Sev Puri 我非常鍾意嘅炸薯仔空心波波 外皮香脆、咬落爆汁 裏面有薯仔、乳酪、番石榴、脆脆 香辣甜酸，味道豐富又開胃 絕對刺激味蕾 Caesar goes veg 比較普通嘅一個沙律 冇乜特別不過不失 Sweet potato fries with truffle aioli 炸蕃薯條熱辣辣帶微辣 配埋黑松露蛋黃醬十分美味 我本來同自己講：嗱呢個食幾條好喇！ 最後忍唔住食晒 🙈 接住再上三道菜： Chickpea Hummus with rumali roti 鷹嘴豆蓉配小脆餅 佢呢個鷹嘴豆帶酸同辣 高蛋白質又好味我鍾意 Veda’s Samosa Chaat 我其實幾鍾意 Samosa 不過佢通常大大嚿 食起上嚟會好麻煩 好欣賞佢將呢個菜式整成薄餅狀 而且已經切開幾部份 食起嚟十分方便 配上甜中帶辣醬汁同番石榴粒 配搭十分出色又有心思 Idli with sambhar pickle stew 有啲似羅宋湯嘅蔬菜湯 配兩個蒸糕 （口感少少似饅頭） 個湯飲落去都幾辣 個蒸糕浸一浸啲湯再食淋啤啤 口感有啲奇怪 我個人就覺得麻麻地 其實食到呢度都已經有六七成飽 平時通常係食 Masala Dosa 呢度有四款俾你揀 我揀咗 Grilled mushroom with Spinach 同埋 Avocado, Feta and Rocket Salad Dosa 大大片煎得薄脆 烤菠菜蘑菇正正常常 牛油果火箭菜出奇地夾 Dosa 好清新 😍 食到呢度其實已經好飽 無限 Dosa Bar 都冇用 🤣 最後 Dessert platter 有 Sorbet、新鮮水果 & Cindy’s cake 用 High tea 架上好開心 Sorbet 好似一舊冰咁 淡淡帶 Lime 味 點一啲椰子碎 食頭兩啖都覺得幾清新 食多幾啖唔知食黎做乜 已經太飽放棄咗 🤣 總括嚟講十分滿足的生日飯 可以一次過試咁多款唔同嘅印度素食 環境亦舒適 店員好親切滿帶笑容 值得推介俾各位

🌱牛肝菌蘑菇意大利飯 & 幸福味道 Brownie in a pan @The Point Kitchen🌱 位於奧海城嘅 The Point Kitchen，環境闊落舒適，食物種類都幾適合帶埋小朋友一齊去食。佢最出名一道龍蝦Pizza ，餐牌上都有唔少素食選擇（奶蛋素為主） 牛肝菌蘑菇意大利飯，非常香濃美味，推薦。黑松露芝士薯條，小煎Pan上Keep住溫度，薯條加芝士嘅配搭，好快俾小朋友搶晒。 香辣朱古力蛋糕，朱古力蛋糕微辣，旁邊的菠蘿亦辣，一齊食十分特別！值得一試。 Brownie in a pan 超級好味嘅甜品，Brownie 同香蕉熱騰騰，配上凍冰冰嘅雲呢拿雪糕，再加上合桃，口感豐富，係幸福嘅味道呀 ～～～～～ 🥰

🐱 寵物 Friendly 嘅 Staycation 🐶 同好友慶祝生日，今次選擇左去 The Murray, Hong Kong, a Niccolo Hotel Staycation。 我又可以放低媽媽嘅身份，同朋友放鬆一下 ，好緊要㗎 😛 The Murray 係寵物 friendly 嘅酒店，check in 時已經見到好多人帶埋狗仔貓仔一齊入住。而餐廳亦都可以帶埋寵物一齊用餐，當然安排嘅座位會有唔同範圍。所以各位主人可以安心用餐，又唔怕騷擾到其他人。 我哋個 package 包下午茶、三道菜晚餐同埋早餐 Buffet。 下午茶喺頂樓嘅 Popinjays 用餐。餐廳環境優美，佢仲有戶外範圍可以飲嘢。今次食嘅下午茶係 Givenchy x Popinjays Summer in Pink Afternoon Tea。 我可以話呢度打卡一流，環境餐具食物擺盤全部都好靚，仲有品牌加持，但係食物味道就普通。 加上我其實唔太好甜嘢，而佢嘅甜品真係好甜，有幾款我直頭食咗兩啖就真係食唔到。🙈

🍣 雜錦壽司拼盤 瀛素食 🍣 出開去油麻地剪頭髮，順便去咗瀛素食食個午餐。 瀛素食可以話係一個平民日式餐廳。 雖然坐得迫迫地，但價錢平民化。 午餐餐牌有五個選擇。 全部都係$48 仲送例湯好抵喎。 我叫咗雜錦壽司拼盤，有四件軟殼蟹卷，幾好味呢，「軟殼蟹」脆卜卜🤪。 其餘四個壽司就普通嘅粟米壽司、腐皮壽司、玉子壽司。平時喺普通壽司店都食到。普普通通。 另外有一件係素三文魚壽司。咬落去有啲似蒟蒻嘅質地，其實冇乜味道。 如果佢配牛油果壽司就仲好。不過以$48來講，已經交咗功課。

🥑 牛油果楓糖芒果吐司 @ 2DP (TST) 🥭 今日約咗幾位女友尖沙咀行街食飯。我竟然早咗到，咁岩又未食野，於是就去咗喺厚福街嘅 2DP - Tea & Veggie食啲嘢先。 餐廳環境都算舒適，上菜好快。食物選擇清新健康。而且寫明不同成份同有symbol 代表（五辛、果仁、蛋、奶、辣、生酮），唔同嘅素食者唔使估估下，逐個問，方便體貼。 因為天氣實在太熱，所以唔想食飯同麵，揀咗牛油果芒果吐司（佢配上沙律同乳酪）。 平時都會自己整牛油果醬配麵包食，或者加蕃茄粒。而佢加上芒果粒（而且芒果好甜好靚），即刻開心咗。下次我整都可以加唔同嘅水果粒先。🤪 佢嘅餐牌入面，仲有現時好流行嘅 Keto Diet 菜式。大家都知道生酮飲食比較多油脂、肉，素食生酮就再少啲選擇。咁呢度都可以有選擇食到

🥗 西貢白色清新 Cafe 🥤 · 早排同朋友去咗位於西貢嘅 Little Cove Espresso，一去到門口已經被美美的店面吸引，當時人龍不算多，我們大概等了半小時左右。店舖可以選擇坐喺室內或者室外，室外又唔少朋友帶埋狗仔一齊進餐，感覺寫意。 · 餐牌裏面嘅選擇感覺健康清新，而且有多款素食選擇。我點了牛油果蓉配天然酵母麵包同芝士牛油果開心果沙律。我唔飲咖啡所以叫咗杯 Banana & Mix Berries Smoothie。 食物上到嚟十分驚喜，因為不但擺盤精美，而且用料非常新鮮美味。真係食得又打得（卡），值得推介。如果唔使排隊就更好啦。😛

寵物 Friendly 嘅 Staycation 早餐喺 The arches 戶外範圍用餐，涼風吹吹下，座位都安排得好寬闊。開揚舒服。 行出外面就係出名嘅打卡位。有特色嘅圓拱形門同埋一條大斜路。好多人排隊影相。 素食者都有不少選擇，西式有沙律、水果、乳酪、芝士、各種包點、自選餡料嘅奄列，中式有粥、自選湯麵、幾款素點心。 不過衛生方面就需要再注意一下。因為當我去拎食物嘅時候，都見到唔少蚊之仔喺度嬲住啲食物。令我食慾大減。