仲有個零鐘先有船，就過咗嚟坐吓。 戶外都有位，但嗰日都幾大風，費事吹風就揀咗室內坐。 唔算好餓，淨係叫咗1 Black, 1 White, 1 Croffle。 性價比幾高 以「位於離島遠離繁囂嘅假日cafe」嚟講，The Edible Projects嘅嘢食算係幾平，一杯啡$40有找。 Croffle上枱時比想像中細，但幾好食，整得好酥化 唯一想彈嘅係啲櫈設計少怪，挨唔到，對冇腰骨嘅me嚟講，唔係一個可以坐低hea個下晝嘅地方

作為紅茶常客，囧然一個月前先發現佢有all day breakfast，仲要$53落到樓，仲要包埋嘢飲，平到有啲誇張 成份all day包括：丹麥多(全份)、茄汁豆、勁長炸魚柳、唔知咩腸2條、煙肉2塊、松露炒滑蛋(好多)。 紅茶丹麥多世一 有時好想食佢個鮮茄炒蛋牛肉飯或者鰻魚炒飯，都會因為太想食丹麥多而轉咗食常餐類嘅嘢 松露炒滑蛋好香 同埋都好滑，係份量有點多 上碟睇落都大份，但食落係比睇落更大份，食過兩次all day，兩次都食唔晒(given我出面食all day係未試過食唔晒)，下次同佢講腸同煙肉俾少條我先

一係唔嚟，一係一星期嚟兩次😂 今次都係食便當，上次試咗炸雞同炸豬扒，都太厚粉，今次試清湯牛肋條，唔係炸嘢就冇厚粉嘅問題啦 煮得夠淋，好好食！ 台灣腸就私心最愛，唔係好食得辣所以揀咗肉燥撈，不過台灣嘢應該辣極有個譜？下次可以試埋個香辣。

食晏時間都算難等位，尤其大枱，12:40到，等咗差唔多半個鐘，最後分開坐先有位。 叫咗個鰻魚飯定食，$92免加一，有面豉湯、沙律、茶碗蒸同甜品。是日甜品係件細細芝麻糕，都幾重芝麻味，我鍾意～ 不過主角鰻魚飯就一般般，so far都冇乜食過夠送飯嘅鰻魚飯，呢間都唔例外LOL 味道係ok嘅，質感就絕對稱唔上肥美(見圖)，有少少乾同咬落去比較鬆散。個人好鍾意食鰻魚，所以有啲失望 其他配角就ok，下次試吓魚生飯先。

星期日食，1PM到，本身預都要等半個鐘，但可能因為落雨，個位又係地舖，落雨人流少好多，所以唔使等位直入！ 兩個人食，叫咗兩個豚骨原味拉麵同一份日式煎餃子。 拉麵嚟講溏心蛋要流同湯要夠熱係基本，和拉麵都做到，而且都好味 叫咗多蔥，可以再多啲 餃子一份四件，有點太瘦弱(如圖)，味道一般，覺得不叫無妨。 service就好好，上菜快，同埋主動fill咗幾次水 地理位置唔就腳，所以唔算成日嚟食，但大埔好少拉麵店，想食拉麵都會特登過嚟～

今次食麻辣手撕雞淮山麵 睇落份量唔多，不過其實雞肉份量都多，肚餓可以叫加底(食食吓見到有人叫蒜辣，個呀姐問係咪加底，應該熟客嚟) 其實都嚟過好多次，有時係late dinner/宵夜之選，話晒都冇乜食店會開到3AM 見前面有啲食評話佢態度差，so far去過十次八次，無論係呀姐定呀叔，態度都幾好，有街坊街里feel 最鍾意佢蒜辣/麻辣手撕雞，個人覺得有辣嗰啲惹味過無辣嘅蒜香/鹽焗 麻辣手撕雞淮山麵 $43 熱奶茶 +$7

2023/03/25星期六嘅12:15到，仲諗住算早應該有位，未開定休息啊🥲🥲🥲 嚟10次可能得5次撞中😫😫🔫 不過啲炒嘢同意粉係幾好食嘅，希望下次遇啱時間😂😂😂

好近地鐵站，同埋入到工廈都好易搵。 weekday lunchtime食，12:20到，唔使等位，而且目測都多位。 有窗邊吧枱/ 梳化櫈+矮枱仔/ 普通餐枱，環境幾闊落幾chill，感覺坐耐啲hea個下晝都得。 叫咗兩個雙餸鐵路便當，$64/set包嘢飲，撈米線調味幾好，但鹽酥雞扒同鹽酥豬扒都太厚粉。加$30加配咗個紅豆仙草芋圓。 有興下次試佢個Basque burnt cheesecake (好好奇台灣嘢嘅西底甜品質素如何)！

Friday lunch，12:45到，前面有5-6枱，都等到13:35先入座，好彩嘅係上菜好快，填定紙仔嘅話5分鐘內就起到。 花膠雞濃湯米 $69- 個湯最好飲同最come飲，雞都滑，但偏淡，如有醬更好 胡椒濃湯雞米 $59- 雞最滑，個湯惹味但兩者比會鍾意飲花膠雞個湯多啲(雖然兩碗都飲到見底😂) 麻辣擔擔麵 $43- 好食但一個人食晒會滯，建議幾個share 紅油抄手 $24- 超大粒！ 樣樣都好食嚟講，人頭$65嘅lunch性價比好高！

Beans嘅all day或者午晚餐可能比較貴，冇$100-200都難啲落樓，當然嘢食都值嘅，但如果budget緊🤏🤏 下午茶絕對係正正子嘅選擇！ Tea set ~$50倒，呢個Oreo麻糬流心吐司超驚喜啊 黑媽媽嘅(竹炭？)吐司襯返Oreo嘅黑色，同面頭白色嘅麻糬同雲呢拿雪糕球形成對比。 Toast入面係流心朱古力(比你想像中嘅再流心多好多 係好流嗰隻)，睇返啲相啲人揭起個toast蓋，會見到入面好juicy嘅流心。 我食嗰陣冇留意有蓋，就咁切細件食，每次一下啲汁係咁流出嚟，我 心諗有冇咁juicy啊？但個toast個外層仲係脆㗎喎！ 個麻糬完全係畫龍點睛！ ！ ！麵包嘅香脆vs麻糬嘅煙韌、雪糕嘅凍冰冰vs麵包同麻糬嘅暖熱，完全係味覺上嘅享受！ ！ ！ 咁講可能好浮誇，但呢排心情好差，嗰日係差到要即刻搭車出去搵好味嘅嘢食cheer up吓，呢個甜品完全做到安慰嘅效果！ 自己食晒成個，就覺得個流心可以用濃度高啲嘅朱古力、少甜啲就更好嘞！