燒豬扒丼 如圖片所見， $50一個豬扒飯，仲要塊豬扒有手掌咁大，對於大食嘅我來講真係無可挑剔😺 豬扒仲要真係新鮮炸起脆卜卜，即叫即炸，中間啲肉唔會好鞋同埋死死實實，我仲食到麵包糠脆脆嘅口感啊😚 唯一覺得美中不足嘅係沙律醬比較少，但係問掂完拎佢都會好有禮貌咁拎俾你🤓 照燒雞扒烏冬 廚師好有心機咁樣將雞扒剪到一塊塊，同埋林上咗好香嘅燒汁仲有芝麻，啲肉唔會好鞋同埋都冇雪味，份量來講就算係男仔都會夠食。 不過蛋方面呢就有少少太熟啦，做唔到真係好流心嘅感覺，烏冬就真係彈牙而唔係林嗰種。 湯方面亦都唔會好鹹但係好香，有奶香嘅感覺😙 雖然係午飯時間但係可能因為位置唔算太方便所以都唔使等位，而餐牌嘅選擇都非常之多，下次會再試其他食物🤩 重點係午飯時間都係冇+1 㗎非常抵食!!!😌

呢款雲南過橋米線湯同米線係分開上嘅， 如果叫唔辣嘅朋友要注意，因為唔辣係唔會有肉碎嘅😶今次叫咗小小辣，基本上食唔到辣味，所以建議要叫小辣或者以上。米線方面就係甜甜地鹹鹹地嘅豉油汁，咁分開上就唔會浸到啲米線林晒啦。 湯汁材料比較豐富，有芽菜芫荽同埋韭菜。 呢款雲南米線既餸選擇多啲啦，但係每件只有一舊，所以建議如果有特別鍾意喜歡嘅餸要單叫。 蘿蔔好大嚿都好清甜，紫菜唔會有沙。米線雖然浸係湯到但係都好彈牙，蔥粒同埋米線吸晒湯汁香味，辣辣地精神為之一振 尖沙咀好似都比較少米線嘅選擇，雖然要等位但下次都會再嚟，因為上菜都幾快，同埋湯汁好香濃 值得留意嘅係人齊先可以入座我，所以如果人多嘅話建議盡早排隊喔😬

濃厚豆乳軟雪糕👈🏼 雪糕上面有少少黃豆粉，好特別😋 好香濃嘅豆乳味，下邊係一粒粒少少鹹嘅脆米。 食完甜甜嘅豆乳配搭少少鹹香，感覺幾特別，唔會太膩。不過都幾快用，所以大家打卡擺位唔好chok咁耐a😏 絲滑可可粉雪冰👈🏼 粉雪冰口感有少少似tiramisu,香濃芝滑😽 朱古力脆脆應該係pizza朱古力脆脆，食一啖雪花冰再食脆脆夾埋起嚟個口冇咁甜，冇話好滯嘅感覺 由於係新裝修所以感覺好似文清Cafe，都好多女士嚟打卡影相，個杯身簡單，有喜茶嘅感覺😹 由於店內座位唔多，如果想堂食嘅朋友就要夾啱時間啦，不過上菜嘅速度都好快如果真係好想食嘅朋友都可以等一等，值得一試😽 附近都仲有新開嘅川菜，食完辣野再過嚟食甜品咁就啱啱好啦✌🏼

話說睇完戲之後唔知去邊度食糖水喇，行咗好耐。。。 跟住見到原來呢條街開咗間新嘅糖水舖，睇咗佢個Menu覺得唔係好多糖水揀，但係已經唔想再行所以就入咗去試吓啦。 個人編好鍾意食芋圓嘅所以叫咗芋圓桂花涼粉 私心推介呢個甜品，因為芋圓唔會好林，好Q彈，桂花糕都唔會話太硬啱啱好，仲好香，涼粉就不過不失啦，咁因為佢都驚太苦所以有落糖漿。整體份量來講都算幾多嘅 之後仲叫咗椰汁涼粉西米露 西米露就冇乜特別啦，不過椰汁就好似太多，雖然唔算好甜，最後都係成碗飲晒。 可能因為係新開啦，裝修都比較新淨，同埋甜品擺盤都比較日式，適合打卡傾計。 值得一讚嘅係上菜速度都非常快，店員好有禮貌。 如果有其他甜品嘅話會再嚟試😙

由於餐廳喺亞士厘道，人流唔算好多，所以就算午飯時間係12:15左右嚟到都唔需要等位可以即時入座，好方便。 咁今次中午就叫咗水冷麵同埋蕃茄泡菜海鮮湯麵 水冷麵係有冰粒咁樣上，天時暑熱都真係非常透心涼，餸菜方面有雪梨絲，甘筍絲，泡菜，同埋牛肉。 咁成個麵加埋酸酸甜甜咁樣呢就真係好開胃，同埋麵身都比較彈牙，份量都好大碗，就算男士都會夠食。 而海鮮湯麵呢，佢啲餸都好多，個湯呢就好creamy,可能落咗忌廉或者牛奶煮啦，所以好香。啲麵吸晒汁真係連湯都飲埋😬 飲品方面，特飲都只係加$8姐，所以見到差不多每一台都有叫。 鍾意幫襯黃店嘅你唔好錯過啦！

話說嗰日朝早好趕出門口，所以最後就決定咗食呢一間老店啦，喺附近住咗咁耐都一直未幫襯過，咁本身以為茶餐廳服務都麻麻地 咁我坐低咗冇幾耐已經有人幫我落單啦 其實早市時段餐廳都有八成滿座㗎 但係上餐速度都非常快，落咗單之後大概15分鐘內已經上菜啦 沙嗲牛肉公仔麵唔算好鹹，同埋牛肉份量其實真係幾多，至少比其他我食過嘅茶餐廳多，起碼都有5塊。至於多士真係好誇張，我拎起嘅時候牛油係熱到可以流出黎，同埋個包係熱辣辣脆卜卜既，佢係真係喺岩岩係個多士機度拎返出嚟，食開快餐店嘅包都係好硬，真係沒有比較沒有傷害🤷🏿‍♀️ 嘢飲同炒蛋就正常啦，冇乜特別都算正常發揮😬 聽朋友講呢度鹽焗雞飯好出名，諗住下次再嚟試☺️

中午喺港島食飯一定要訂位，雖然早左到但都可以馬上安排入座，非常滿意安排。 冇諗過原來成日經過，佢就係喺上環A一出口隔離，交通非常方便。 雖然要落地庫一層，但店面安排坐得比較疏落。 雖然好多張枱，但唔會有好嘈雜嘅感覺所以方便傾偈。 Lunch set選擇都差不多有十幾20個，非常之多，睇到眼花撩亂，唔知點揀好。 最後同朋友一齊揀咗呢個海鮮龍蝦湯稻庭烏冬餐，跟餐仲有包嘢飲我哋揀咗烏龍茶。 👉🏼主食：海鮮龍蝦湯稻庭烏冬 烏冬吸晒啲湯味，食落濃濃地好香，但仍然保持到爽口彈牙嘅口感唔會好林，蝦，青口等等海鮮都非常新鮮，尤其是蝦唔會有好梅嘅感覺。 👉🏼香芒三文魚卷 芒果係好甜唔會酸，三文魚亦都好新鮮，配蟹子咬落卜卜聲，做得唔錯。 雖然好多張枱，但上菜速度非常快，而且食完店家唔會收碟趕你走仲可以傾吓計。考慮到服務態度親切同埋仲有好多lunch set未試關係，已經約咗朋友再嚟幫襯

收工太夜所以去咗買壽司餐盒 由於有promotion嘅關係，買滿$50即減$10 當日都幾多人排隊 👉🏼壽司餐盒 冇因為係放工時間嘅關係，刺身依然保持得好新鮮，蝦都好爽口彈牙。 👉🏼蟹子沙律盛 睇相都知落咗超多沙律醬有啲肥，不過唔撈沙律醬就冇咁好食。青瓜切得好細，啖啖都好爽脆，有啲類似蟹柳嘅食物撈埋喺入邊感覺好似食緊肉咁，夠飽肚。 如果鍾意食花之戀嘅朋友可以揀五件花之戀餐盒，餐盒方面其實都算好多選擇亦都有流心蛋。 總括而言就算冇優惠卷都會幫襯。因為近地鐵站好方便同埋食物能夠保持一貫水準。

由於係冇得訂座所以建議要食下午茶嘅朋友早啲嚟等位， 因應疫情嘅關係會隔住張枱咁坐。 三點準時到好好彩等左15分鐘就可以入座 👉🏼Scone到嘅時候都仲係有啲熱，唔錯，牛油仲係即溶嘅搽上去好好味😋 👉🏼 smoked salmon and cream cheese on bruschetta ，有啲蕃茄唔會太膩 👉🏼 tuna and cucumber sandwich，吞拿魚溝青瓜唔會有太滯嘅感覺 👉🏼 Prawn with lemon and avocado bite，牛油果好有營養，蝦亦都爽口彈牙 👉🏼 selection of Agnes b delice chocolate，每粒朱古力中間都有唔同嘅餡，而且口感都幾獨特 👉🏼coffee，配tea set先係完美嘅good afternoon 總括嚟講都係咸點做得比較出色，人均消費$160包嘢飲食飽都唔會趕你走，適合閨蜜傾偈消暑。推薦比鍾意打卡影相嘅你哋性價比高

同朋友約好去尖沙咀行街， 搵到依一間冰室諗住入嚟試食 店家都有做好防疫措施又用膠板分隔開枱 好彩嘅係都唔使等位，而且上菜速度都非常快 👉🏼自家製日本滑蛋叉燒飯 同幅圖一樣咁精美，滑蛋炒到啱啱好屋企應該炒唔到咁滑，叉燒都好嫩滑，而且份量好多一定食唔晒，呢個應該算係signature 👉🏼常餐 多士係麥包非常之健康，豬潤啱啱好熟非常之鮮嫩唔會老，口感好爽滑 👉🏼鴛鴦走 好有奶味但唔會太甜 比較推薦嘅係叉燒滑蛋飯，除咗影梳靚之外亦都好好食😋