今日好耐無見大家，所以食豪啲叫左120分鐘任食和牛。點左個任食和牛會送一隻海鮮船。然後可以任點燒生蠔。當隻海鮮船嚟到大家都話一嘩聲因為實在太靚啦，個個都企晒起身影相打卡。店員都好貼心佢話俾客人聽啲海鮮要燒幾耐先合適。海鮮方面嘅鮑魚蝦蠔帶子都好新鮮, 全部海鮮都食得出好甜嘅鮮味。 過咗一陣就會嚟買啲和牛，一嚟到又係嘩一聲，真係好靚。睇到睇得出係和牛嚟， 食落好重牛味，好正，油脂味都好重，所以食物質素係對得住個價錢😋 不過有幾個問題， 第一就係第二round 打後嚟嘅牛啲數目同order嘅有出入，少左好多好似唔想俾禁多你地禁。第二就係啲牛都未溶雪就攞出嚟比客人食。第三地方夠大，一開始又話有八人枱點知原來都係六人枱，最後要我哋八個人迫係六人枱嗰度 。另外就係枱面可以擺嘢食嘅地方好少，但店員又唔會俾張茶几仔俾我地，搞到成枱都係野。

忽然想食泰國嘢，所以就去咗呢間食午餐。我哋兩個人每人叫咗碗泰式自選湯粉。之前喺荃灣食過呢一間泰國餐廳都覺得幾好食，所以嚟到新都城都想試吓。 -扎肉豬頸肉冬陰功金邊粉 首先個冬陰功湯底好好飲，酸辣適中。扎肉幾彈口仲有加咗啲黑椒上去，令到個扎肉更加好食。豬頸肉分量多而且好大片，啲豬頸肉好彈口好好食。 不過最差就係啲金邊粉，啲金邊粉好似放咗喺度好耐，嚟到嘅時候啲金邊粉仲係一個麵餅，全部都黐埋一齊，仲有就係啲金邊粉都給唔到冬陰公湯嘅味入去，真係好差。 所以呢度扣左好多分。 -豬手豬頸肉冬陰功金邊粉 豬手嘅肉質好嫩滑唔會好鞋，但就食唔到豬手嘅滷水味。最後都係金邊粉嘅問題真係好難食。

夜晚行完街想食下甜品就諗起銅鑼灣有間食甜品嘅舖頭開到好夜，所以就嚟左呢一食。但呢一間餐廳越食越失，下次應該真係唔會再嚟幫襯。-雪糕芋圓仙草凍 成個甜品最大問題就係啲芋圓，佢啲芋圓真係超難食。啲芋圓一啲都唔彈口，好實好多粉禁。另外就係啲芋圓無味，本身應該會食到淡淡的芋頭味或者地瓜味，但因為佢落咗太多地瓜粉蓋過晒啲材料本身有嘅味道。😢 所以差差差... -芋圓芝麻豆腐花湯圓 我芝麻糊做得幾好，做得夠滑，而且甜度啱啱好。豆腐花都好滑好好食。所以呢個甜品都食得落口，不過都係啲芋圓出咗事。

上OpenRice睇吓寶琳有啲咩嘢食，見到啲人話依家係窮人恩物所以就黎試吓，我哋九點前嚟到原來佢地都差唔多last order 啦。個店員就同我哋講得車仔麵底返米粉可以揀🤦🏻‍♂️ -雞絲粉皮 啲粉皮煮得啱啱好，唔會煮到淋曬，好彈口。芝麻醬同雞絲都好多好足料，不過足料就唔代表好味😂個人覺得啲芝麻醬落得太多，搞到碟雞絲粉皮太咸。如果加埋木瓜絲就更加好，令到成碟小菜就更加輕盈同清新。 我叫咗個三餸車仔麵，呢碗車仔麵檔左清湯牛腩湯底，個湯底就普通，不過就唔會太咸令到我要飲好多水。滷水豬大腸做得好好，啲滷水汁飲到有少少藥材味，而且都浸得夠耐令到啲豬大腸入晒味。👍🏻 冬菇就冇乜特別，因為唔係用滷水汁浸，所以咬落去冇咩味，不過都好香冬菇味。醬爆福州丸就好普通，唔係好似佢講咁樣禁醬爆，咬落去只有少少汁爆出嚟，不過個樣都好好味同好彈嘅。-胡椒豬肚湯米粉 個人覺得胡椒豬肚湯嘅味道比較淡，係飲到胡椒味但唔夠重，另外就係成個湯比較單調，如果加埋酸菜會更加好味。啲豬肚都煮得夠淋，唔係好似橡筋咁樣咬極都咬唔爛。跟住加咗兩餸一個係豬軟骨一個係柱候牛腩。啲豬軟骨都唔錯啲軟骨唔會好硬都咬得到，但個牛腩就真係好差，非常之鞋，咬極都咬唔爛。 總結來講聽日間餐廳嘅車仔麵價錢偏貴，性價比較低，下次唔會再嚟食。

成日都聽人講呢間海南雞好出名，所以今日禁岩嚟到西貢就試下佢。間舖頭好細，得5，6張枱倒。今日好彩係平日少人啲如果唔係一定有排排先食到。我地兩個人想食多少少嘢，所以叫左個金雞二人餐。 首先嚟咗個南瓜湯，好重南瓜味同好溶，好真材實料好好飲。-西貢滷水狀元蹄 滷水汁好入味，令到成隻豬手都好有滷水味。另外隻豬手好滑，唔會乾柴柴，脂肪同肉嘅比例都啱啱好。真係食唔停口。-無骨海南雞半隻 到主角出場啦，一攞出嚟就見到隻雞好嫩滑。但你就唔好expect 佢會好有雞味😂 啲雞做到嫩滑已經好好😋另外嗰啲醬油都做得好好味。 -雞油飯 一聞落去就已經好香雞油味，呢個雞油飯都煮得好有心機，唔單止落雞油煮仲有加咗啲炸蒜同八角，等個雞油飯更加有層次。👍🏻 176蚊食到咁多好味嘅嘢，真係好抵。唔怪得知，咁多人會過嚟排隊。下次會再嚟食👍🏻

-巴蜀爽脆生腸 生腸好爽脆，再配埋啲辣椒油，真係好惹味。不過啲生腸唔係一開始就放落啲辣椒油裏面等佢入味，只係當你叫嘅時候，職員先幫你淋啲辣椒油上去，所以啲辣椒油只係好表面，當你食耐左就會食多一陣生腸味。 辣椒油做得好好，唔只得過辣味，佢仲有少少麻，而且仲加咗啲蒜蓉，令到成碟小菜更加嘢味。所以個人覺得都值得試一試，如果你怕食內臟嘅話。 -過橋米線套餐 呢個過橋米線去咗雲南酸辣湯底，個人覺得個酸辣湯底好淡，食材方面嘅份量都足夠，而且所有食材都好正常都算新鮮。可惜個米線面底就好少，因為平時食譚仔三哥佢地啲米線多好多。

今次係第一次行海塝街，原來呢邊有好多小店同cafe shop，下次有機會我地可以過嚟試吓其他。言歸正傳，我哋行緊海塝街嘅時候見到呢間舖頭啲蛋糕做得好精緻同好靚，所以想買來試吓。由於間舖頭好細，所以我哋都係外賣左件蛋糕，坐喺海邊食。 佢哋有個抹茶套餐，一件蛋糕加一杯抹茶嘢飲就$35。 -凍抹茶奶茶 呢杯嘢個顏色就唔錯好似好重抹茶味咁，可惜飲落個抹茶味好淡，差唔多飲唔到抹茶味。另外就係呢杯叫做抹茶奶茶但完全飲唔到茶味只係覺得自己食緊鮮奶。啲抺茶味完全俾啲鮮奶蓋過晒，抹茶粉同鮮奶嘅比例錯咗。希望下次佢哋會改善啦。 -日式焦糖芝士蛋糕 呢一個芝士蛋糕又係令我好失望，首先個芝士蛋糕一啲都唔重芝士味，反而有好重益力多嘅味道。另外，個芝士蛋糕唔夠柔滑。真係好失望😞 總括來講，我係有啲失望因為芝士蛋糕同抹茶奶茶都係啲好容易整嘅甜品，可能我哋叫咗佢哋啲唔係拿手嘅甜品所以就出咗事。

由於今日要去西貢玩水上活動要消耗好多體力，所以諗住食飽啲先，咁啱嚟到呢間餐廳見到佢哋個早餐竟然有飯食，咁就一於去試吓啦。一開頭以為$36有飯食應該好細碟啦，點知又唔係喎，同平時啲午餐嘅份量差唔多喎😍所以我臨走嘅時候都見到有啲喺附近返工嘅人過嚟呢度，襯佢早餐完之前外賣個飯走。 -貴妃雞飯配熱咖啡 雖然有一部份雞肉比條生菜遮住咗，但你都見到個份量都幾多，用嚟填飽個肚係一個唔錯嘅選擇。不過好味嘅程度就真係一般啦，啲雞肉唔算好滑但又唔會好鞋，中規中矩啦。可惜個甜豉油做得好差，個豉油一啲都唔甜仲要好鹹添。所以最後都係配姜蓉食。 餐廳環境唔錯嘅，如果坐窗邊仲可以望到風景添，食物方面，早餐有飯食真係好特別，如果大家想填飽個肚的話呢間餐廳係一個唔錯嘅選擇。

今日好好天，所以一早由大圍踩單車去大尾督。踩到兩三點就入咗大尾篤，見有啲肚餓所以入咗呢間泰式餐廳食。我見裏面都好多人坐咗好多人所以應該都好食。我地叫咗個泰式無骨豬手飯同一碗芭堤雅喇沙肥牛米線。呢個價錢唔包野飲，算係比較貴。 -泰式無骨豬手飯 一嚟到個賣相好好，豬手好有色澤，食落去唔會太肥膩，肉質方面普遍比較軟同淋😋但有一舊啲肉質比較實，可能因為係邊邊位。咁滷水汁唔會太咸撈飯啱啱好。所以呢個豬手飯幾好食。 -芭堤雅喇沙肥牛米線 呢碗喇沙肥牛米線正正常常，啲料都好足。首先講吓個湯底，第一啖就飲到好重椰汁味，好香好好飲，我差唔多成個湯飲晒。肥牛嘅份量都算正常，有四五片到。 如果大家嚟到大尾篤玩嘅話，玩完肚餓又唔知食咩好的話，呢間餐廳係一個唔錯嘅選擇👍🏻

今日求其搵嘢食，見呢間係食台灣嘢，而我又未食過呢間所以就入咗嚟試。我地叫左個晚市套餐同一個牛腩麵。晚市套餐包一碟上湯浸時菜同一碗湯。 -惹味牛腩麵 佢有台灣麵同米線俾我地揀，而我今次就揀咗台灣麵，冇理由食台灣野唔叫台灣麵㗎嘛。首先飲咗啖紅燒牛肉湯，個湯底甜甜地同埋有啲薑味好好飲。牛腩都好正，啲牛腩炆得好入味同好淋，肥瘦啱啱好。😋台灣麵好有口感唔會煮到淋曬，都幾彈牙下。 -鹽酥雞滷肉飯 首先講個滷肉飯，啲滷肉唔夠味好淡，仲要配飯食嘅話咩味都冇，真心麻麻。跟住就係個鹽酥雞，正常應該有啲椒鹽喺鹽酥雞上面但係咩都無，所以我炸皮冇味。另外個炸皮係脆但唔係鬆脆，仲有啲硬添，所以個人覺得一般。 因為呢個係跟晚市套餐，所以包左一碗湯同一碟上湯浸時菜。碗湯幾好飲好足料唔重味精，飲完會好口渴。不過個上湯浸時菜就好似清水煮菜禁樣，又係咩味都無，完全飲唔到個上湯。 總括嚟講，如果食台灣麵嘅話我覺得呢間係一個唔錯嘅選擇，但係如果要食滷肉飯或者鹽酥雞就唔好啦，因為冇想像中咁好食，同埋有好多台灣店都好食過佢。