睇YouTube 片得知呢間餐廳 特登約齊六個人嚟食，因為可以有原條花膠食 花膠雞湯不得了，聽店員分享個湯底製作過程繁複，難怪味道非同凡響，大家都要飲番兩碗先至加湯打邊爐 嗌左龍蝦、三份牛、蟶子、貴妃蚌、墨丸、響玲、竹笙etc 整體：食材新鮮、用料高質，成餐食得好過癮，非常滿意，值得一試 人均500

因為睇MM條片而認識呢間舖，一直都想搵機會試下 今日咁啱有得早收工，於是18:00過嚟碰運氣，結果一嚟到門口就即刻有得入座(不過當時已經淨番一兩張枱，到18:15已經坐滿，要排隊。到18:45陸續有人埋單) 三個人叫左醉貓炒河(走辣)、馬拉盞椰菜苗（走辣）、燒豬頸肉、串燒拼盤、咸蛋魷魚 因為見到openrice 食評話食物偏辣而我唔食得辣，所以索性全部走辣 串燒拼盤 性價比高，有豬肉、雞肉、雞軟骨、腸仔。每樣都燒得好食，加埋個沙嗲醬冇得輸。 臨尾幾串唔夠醬點，問店員可唔可以加醬，佢都回應得好爽快👍🏻 醉貓炒河 可能因為走辣，所以略嫌覺得唔夠味，但個河粉都好彈牙～ 咸蛋魷魚 比較失色嘅一道菜，魷魚比較細隻，口感一般（唔係平時去大牌檔食果種咁厚身大隻) 燒豬頸肉 好有炭燒風味，夠厚切，份量多 馬拉盞椰菜苗 掛住食唔記得影相，佢個調味好好，值得點 總結：食物、環境、服務態度都好滿意 食物嘅選擇多，會想再嚟試其他嘢食😄 最後埋單$600/3位

燒味飯嚟講，環境好舒適，冷氣夠凍 一嚟就放低兩碗湯 足料冇味精 叫左個燒鵝五寶飯$80同叉鵝飯$64 見到真係嚇親，勁多肉 味道唔錯，超值！ 呢個價錢真係冇嘢要投訴了！ 會介紹俾大食嘅朋友

之前路過見到，但車仔麵嚟講價錢都唔平，58蚊三餸一麵，令我卻步。 後來係open rice 見到評價幾好，今日決定試下 環境幾好，坐得舒服。用qr code落單 晚餐唔想食太多，所以兩個人只叫左個小食同一碗麵share 海苔炸物拼盤 有八爪魚，芋頭，墨魚丸，芝士魚腐？獅子狗？ 味道唔錯，有兩款汁沾，炸漿算薄 叫左一碗牛丸、羊肉餃、豬大腸、酸甜齋 烏冬，配沙嗲汁 每道餸都好好味，最深刻印象係羊肉餃（好少地方有得食）😋 今餐真係喜出望外，下次再試其他嘢～

見到咁多好評，就嚟同朋友食下 服務質素好好，侍應不斷幫我哋換乾淨嘅碟 但食物質素真係好一般，尤其調味方面。 好有大陸風味 叫串燒，佢全部都要落重孜然粉同辣粉，搞到勁重口味，完全食唔到肉味。 燒生蠔幾抵食，十蚊隻，半生熟的，隻蠔係幾大隻，但個蒜味都係怪怪的 燒元貝，上到枱發現未熟，舊肉仲係透明，要叫侍應再拎入廚房整過…. 當紅炸子雞塊皮唔脆，但個味道已經係全部餸之中最正常 欖菜肉碎四季豆，唔入味 總括來說，成餐飯冇一道係好食，唔會再去！

老公睇app 見到呢間評價幾高分，所以決定試下。
嗌左牛丸墨丸河，豬膶豬腸魚皮餃米，油菜，埋單$111
湯麵分開，湯底係淡淡嘅胡椒豬肚湯（暖胃），麵分量足。河粉略碎。

牛丸墨丸河：牛丸有兩粒，墨丸有三粒。牛丸juicy有驚喜，有潮汕風味（難怪要+3蚊）；墨丸冇特別。
豬膶豬腸魚皮餃米：魚皮餃有三粒，豬腸4-5塊,豬膶5-6小薄片。樣樣都幾好食。

因為開頭冇諗住出post ，所以冇影食物照。

另外，佢有張儲分卡，滿$50送一個印花（單次滿100蚊就兩個印花），滿十個可換指定套餐（當50蚊用）

見佢款式都多，下次會再幫襯試其他野食！

心血來潮想打邊爐食靚牛，見到咁多好評，即刻訂座試下。我揀左平日夜晚去，七點食到九點，全店得三四枱客。 知道啲食物價格偏貴，諗住最緊要食物高質就ok。叫左份大嘅牛拼盤$498，除左牛胸爽同牛舌之外比較有牛味之外，其他都唔係咁出色。（平時街市買手切肥牛，牛舌etc好食好多）。之後再叫封門柳，但都冇令我改觀。 個炸魚皮同紫菜響玲似係自己炸，上碟仲熱，算係誠意之作。 墨魚丸ok，蝦滑足料。 桂花蚌都幾鮮甜 嗌左兩扎竹蔗茅根水，埋單對單先知道買二送一，要同職員講先補番俾我地。 總括來講，味道係ok，但性價比低，冇一樣食物會令我掛住佢，所以絕對冇下次了。 四個人食左二千蚊，但四個都唔飽，要再轉場食糖水。