黎到西貢當然要食海鮮，於是簡左依間米之蓮餐廳，入到去坐低都好舒服，兩個人食，所以都唔係叫左好多野食，全部都好好食 先講炸豆腐，我地叫左半份，外脆內軟，好好食，椒鹽好正，我覺得必試 油鹽水花甲，好好食，啲蜆好新鮮，完全無沙，啲粉絲我覺得係偏少嘅，但因為我地兩個人食，所以剛剛好 椒鹽鮑魚，超級好食，九孔鮑大大隻軟熟又有彈性，超易切，外皮香脆，入面鮮甜，十分推薦，必試！ 欖角骨，甜甜地再配欖菜味十分特別，但個人覺得有少少太多蜜糖，如果凍左變到有點硬 最後係椒鹽瀨尿蝦，肉質超嫩又鮮甜，勁好食，但個人覺得有少少貴 埋單千二蚊左右

平時多數食外賣，第一次食堂食，一入到黎已經覺得幾classy, 燈光幾暗，但氣氛好好，幾靜，唔會太嘈 我地叫左片皮鴨，幾大隻，唔貴，好似4百幾蚊，啲皮好香脆，好好食😋 之後叫左招牌叉燒，甜甜地，叉燒好嫩，一啲都唔難咬，十分推薦 另外叫左藕餅，肉質好滑，煎得好香，中意食藕餅嘅朋友可以試下，但唔算超驚艷 之後最重要當然就係艷影蝦球，我覺得依個必點，超好食，啲蝦大大隻又彈牙，再加埋啲檸檬汁超級清新，食10隻都唔會“漏“，一定要試下！！！

見到幾多好評，咁啱經過就黎試下，叫左個peri peri 雞卷同埋和牛漢堡 先講個peri peri chicken wrap, 個人覺得必試，好好食，啲雞好Smokey 又唔會太咸, 再配埋啲salsa沙律同醬汁係超夾，酸酸地，好清爽開胃，好大卷，但完全唔會覺得腻，下次再黎一定會再叫 和牛漢堡個人覺得無雞卷咁出色，可能因為我本身唔係特別中意食漢堡，但佢份量都ok，同埋芝士係真係拉絲，所有野都好夾，洋蔥又唔會好辣，好有誠意，薯條係粗薯，外脆內軟 另外值得一讚嘅係店主好friendly 好好傾haha

本身想食其他野，但四圍都排長龍，見佢算少人排啲，就試下，勁有驚喜！！ 貴精不貴多，個menu得3款拉麵簡，其實只係啲肉唔同，咁我當然試曬啦！再加$10 溫泉蛋！本身無咩期待，點知幾有料到！！！ 湯底濃郁又唔咸，仲好香！又唔油，勁好味！ 先講豬肩肉，個人覺得還好，但如果怕肥膩嘅朋友可以試下，佢比較乾身同無咩油，但又完全唔韌～ 叉燒就好好食啲肥位入口即溶，瘦位唔難咬又香，厚薄適中 溫泉蛋都好好食，不過要加$10，如果包埋就好，另外加左辣醬試下，幾好味，有少少似豆瓣醬，但同個拉麵超夾另外份量都好夠飽，麵底係幼拉麵，好食 另外，本身見佢好似有洋蔥咁奇怪，但同個湯底超級夾，好清爽，又切得細細粒，唔會食到太勁洋蔥味 如果見唔多人排隊的話絕對值得一試

成日都想試下依間，但見佢成日排長龍，懶得排，今次終於有時間排下，同朋友一齊試下，無想像中咁好食，但比想像中貴 叫左個壽司拼盤，都ok嘅，但有少少腥但海膽都算甜嘅另外叫左件燒左口魚壽司，個人好鍾意食左口魚，覺得係比其他地方好食少少嘅 仲叫左個吞拿魚丼，吞拿魚蓉非常好食，一啲都唔腥，算係所有野入面最出色，吞拿魚腩就普通，但算係成餐焦點，但都好細碗 之後就到最後，燒蠔，非常普通，細細隻，完全係放題質素，但要成$38一隻，好彩無叫一set6隻，不推薦 最尾覺得又貴又食唔飽，就轉左場落樓下食其他野 唔會有下次

完全唔明d野食好評點黎，咖啡我唔知啦，無試，但野食質素真心好一般至難食，個意粉不知為謂，員工態度又唔係好 我見咁多好評諗住試下，寫明要等20分鐘，所以都預左等4-5個字分鐘，叫左個蒜辣蝦意粉同雞軟骨，個意粉料都算足，有5隻大蝦， 都彈牙，但個意粉真係難食到不得了，得蒜味同辣味，d黃色一粒粒本身以為係菠蘿/粟米，原來係翠玉瓜，仲有要d翠玉瓜係同個意粉一樣無味，收得$98可唔可以用心少少，又乾，份量又唔係多，仲要好意思收咁貴要人等咁耐。。。。我仲要食lunch, 又貴又唔好食，曬錢曬時間，樓上有幾間差唔多價錢好食好多 個雞軟骨都ok嘅，份量都多，加左d調味粉係幾好食嘅，但個醬個人覺得還好，都係覺得炸雞軟骨配日式蛋黃醬酸酸地好食d，無咁油 整體來講就係唔洗試，半價都唔會食

千奇唔好叫海鮮湯粉絲！勁難食，係勁難食！所有野同白烚係無分別，我無諗過可以有咁難食嘅野出現係張秀玲，我之前食過依間野d飯， 覺得ok, 所以試下，點知中曬大伏！ 先講個湯，係甜架！我以為會酸辣或者至少會辣（佢menu有條辣椒）， 完全唔辣，仲要甜，成件事超核突，同海鮮完完全全唔夾， 但佢d海鮮算ok唔腥，係d蝦有d「枚」但放落個湯真係無敵奇怪同唔夾.....點解會係蛋花湯，超奇怪，佢成個味，直情係似用泰式甜辣醬加水混合而成，極度奇怪，成碗湯渣咁， 仲要收我$88 望落去好似好多料咁，但下面全部都係生嘅娃娃菜 個蝦餅係幾好食嘅，加$28 都唔貴 如果大家去食可以食其他，豬頸肉，豬手，木瓜沙律果d都幾好食，湯粉真係不可一不可再

想試超耐，但次次見到都係排曬長龍！！今次專登2點幾3點先黎，等左一陣就有位，終於比我試到一生懸麵！！ 我見到佢有個名古屋撈麵好似幾特別，仲要又無圖，好似幾神秘咁，但價錢又唔貴，所以決定挑戰一下，另外都想試下佢地嘅唐揚炸雞(咁難得排到就想試多d野） 首先到嘅係唐揚炸雞，係剛剛炸起，個皮好脆，炸粉好薄，雞塊非常juicy!! 但個人覺得唯一小小不足就係有少少唔夠入味。 朋友點嘅係櫻花蝦沾麵，櫻花蝦都好足料，同埋好中意佢d拉麵夠粗，口感好好但個人都係覺得個湯有少少偏淡味 之後就到我叫嘅名古屋撈麵！簡直係非常非常好食！！！！超抵食！有叉燒又有溫泉蛋，另外仲有蒜，蔥，紫菜，肉碎，同少少湯汁，撈埋一齊簡直不得了非常惹味！大家如果中意食蔥蒜依啲味就一定要試下（隻蛋係我唔小心插爛左先記得要影相） 另外一個好抵讚嘅位就係，佢地嘅拉麵真係好足料！大大碗！一定食得飽！

朋友生日就想黎試下依間野，望落去環境都幾chill, 野食就西餐為主，但望到餐牌都覺得幾多選擇，有burger意粉咁，基本野都有，仲幾有特色。午餐仲跟飲品一杯，雖然荃灣區lunch黎計有少少貴，但選擇多同環境唔錯，坐得舒服 朋友叫左個煙三文魚牛油果egg benedict, 望落都大份足料，而且d煙三文魚唔會太咸，淡淡地剛剛好，唔會搶左個蛋同牛油果嘅味值得一試 我就簡左個帶子松露意粉，佢地用嘅係偏意粉，個人覺得個意粉味道偏淡，唔係好夠松露味，帶子都有4片（2隻）不過不失 另一位朋友點左個虎蝦蕃茄意粉幾好食，蕃茄味濃郁，再配2隻虎蝦，真心不錯，酸酸地咁虎蝦大大隻 最後就係全餐嘅highlight, 芝士松露薯條！ 好！好！食！ 雖然佢係蕃薯條加薯條（個人唔係特別中意番薯條）甜甜地咁， 但芝士真係超級足料，痴住曬d薯條，超正！中意食芝士的話可以一試！另外個松露汁都幾出色，酸酸地又有松露香十級推薦

平時都好中意食酸菜魚，但真係間間都唔同味，朋友推介又咁多好評就來試下，好好食！ 我地叫左個避風塘炸魚同一份大嘅酸菜魚，個避風塘炸魚，不得了，好！好！食！ d魚好好食，好新鮮，炸得好好，非常酥脆，再配避風塘味，簡直完美，辣度亦都剛剛好，外脆內軟，又唔會覺得好油，仲好入味 酸魚都係我係香港食過數一數二，叫左個大份酸菜魚加粉絲，d魚好大舊，啖啖肉，份量夠多，魚亦都好彈牙好新鮮，但個湯我個人覺得有少少唔夠酸，可能我叫左小辣所以個湯淡d, 粉絲就一般般，有d太淋，另外叫左個白飯都係，有少少軟。 另外，坐位安排都幾好，坐得幾舒服會再同朋友來食