今日同朋友係尖沙咀行街行到攰攰地，就坐低左入呢間專食牛腩嘅鋪頭～ 我同朋友分別叫咗上湯崩沙腩飯同埋崩沙腩撈麵，然後再加咗一碗雲吞，同埋一碟通菜😋 崩沙腩原來係牛嘅橫膈膜，表面有一層橫膈膜連埋啲腩肉，筋膜又連埋少少肉，軟腍味香，肥瘦剛剛好，係牛腩當中極為矜貴嘅肉。崩沙腩配飯或者配撈麵一樣都係咁夾👏🏻啖啖肉！而且崩沙腩大約有8-9件，好抵食👍🏻 雖然話就話係專門食牛腩嘅舖頭，不過都想食吓佢嘅雲吞～佢地嘅雲吞大大粒，一共有6粒，好香鮮蝦味～😋而且碗入面仲會有好多生菜，唔會淨係得雲吞～夠哂開胃😆通菜份量亦都好足夠～個人覺得最好食都係崩沙腩撈麵😍如果未食過崩沙腩就一定要去試吓!!!

今日去左觀塘行街，見到有間望落幾high class嘅西餐廳，又有二人晚市套餐，於是就同朋友入左去試下🤤佢個二人套餐有海鮮拼盤、餐湯、意粉、主菜（澳洲M4和牛/澳洲羊架 二選一）、同甜品😆望落都幾多野食～ 首先嚟嘅係海鮮拼盤😋😋有蠔、熟蝦、煙鱔、煙三文魚同埋墨魚沙律🤤隔離仲有個兜仔係裝沙律醬加埋Wasabi，用嚟點蝦一齊食都幾夾，辣辣地咁幾過癮！😋隻蠔就已經切好左係殼入面，方便哂大家食😂用隻叉咭住食就可以，唔洗驚整污糟手😂😂同埋蠔上面有魚子醬加海膽，令隻蠔更加好食😋墨魚沙律就煙煙韌韌咁好彈牙！ 個日餐湯就係羅宋湯，都好足料，而且好鮮甜😋 意粉方面，就有黑毛火腿意大利粉😆無諗過黑毛火腿撈意粉又幾夾~👏🏻而且仲有香蒜、辣椒、橄欖油加埋一齊，令整碟意粉更加升華😆 至於主菜，我哋揀咗炭燒澳洲M4和牛🤤要左5成熟～牛肉嘅肉質嫩滑，唔會靭！撈埋佢個牛肉汁嚟食更加好食！另外仲有蕃茄、焗薯仔、南瓜同大蒜做伴菜～ 當日嘅甜品係白桃味芝士餅～不過略嫌白桃味唔算好濃，反而芝士味較濃郁同出味🤤 另外，我地兩個都叫左杯野飲，分別係Cosmopolitan同Aperol Spritz, 兩杯都係酒精濃度唔算高，好易入口～女仔都好啱飲！ Btw餐廳裝修好靚！如果慶祝生日或者紀念日都好有氣氛😍而且啲員工服務態度都好好！

最近同屋企人去咗觀塘嘅京滬佳餚食飯，真心好滿意！ 先講下佢哋嘅招牌小籠包，真係值得一試！皮薄如紙，入面包住鮮嫩多汁嘅豬肉餡，每一口都有湯汁同豬肉嘅鮮甜味道🤤🤤 勁想叫多幾籠🥹🥹 再嚟就係香麻龍蝦荳腐花，好特別！好好味！龍蝦嘅鮮嫩肉質同香麻醬嘅濃郁味道結合得好好，加埋豆腐花嘅滑嫩口感，成個菜更加豐富有層次，私心最推薦依道菜！😋😋 紅燒鮑魚鵝掌都好出色，鮑魚嘅鮮香同鵝掌嘅軟滑質感完美結合💓 老上海炒飯炒得香口，米粒飽滿，配料豐富，真係令人食得好過癮🥰 金湯酸菜魚同京滬香酥烤鴨都係我好鍾意嘅菜式。金湯酸菜魚湯底酸辣可口，魚肉鮮嫩，令人食得好開胃。京滬香酥烤鴨就更加唔駛講，片皮鴨一定係世一架啦🤪 外脆內嫩，肉質鮮美，可以自己食晒一籠😝 如果鍾意中式菜嘅就一定要嚟依間試吓😍

好耐無食鐵板燒，聽朋友講板神嘅鐵板燒服務好好，於是就去左尖沙咀呢間分店，諗住去試吓佢嘅鐵板燒套餐😍🤤 一入到門口，staff已經好有禮貌咁招呼我哋，坐低之後，staff會比個布籃俾我哋裝袋，然後就開始介紹有咩食物同埋特式飲品😙 我地叫左個鐵板燒套餐，前菜有三樣，分別係：慢煮鴨胸、玉子燒、同埋一個用脆片裝住左Cream cheese +牛油果粒+蕃茄。個脆片有少少似蝦片咁，包住啲餡咁食個口感好飽滿～然後個慢煮鴨胸煮得好淋好入味、唔會太鹹～玉子燒就好重蛋香味😋 之後就輪到沙律，有沙律菜、車厘茄同埋蘆薈粒，佢嘅沙律落咗柚子汁，酸酸甜甜咁好開胃😆 再之後就係上左我最中意食嘅刺身🤤🤤有帆立貝、油甘魚同吞拿魚，啲刺身好新鮮，而且每件都好厚切😋 食完前菜同刺身，就輪到重頭戲嘅鐵板燒😍鐵板燒師傅將北寄貝燒熟，再放上殼入面，下面就係加左個類似炭精，然後一點火就可以一直有火咁燒住😍打卡真係一流！而且燒完嘅北寄貝肉質鮮甜、又有彈性😋 再之後就係燒龍蝦🤤🤤師傅加埋個龍蝦汁真係好濃味😋食到咁上下飽，就有碗和牛湯消一消滯，店員話係用牛嘅肩胛位嚟煲，所以肉質比較嫩滑，而且加左茉莉花茶，所以可以解膩，另外仲有少少菇同蔥，令到成碗湯更加香😍 飲完湯就輪到燒牛肉同豬肉😋牛肉嫩滑，包埋啲蒜片脆卜卜咁、好好食🤤跟住師傅再炒左個飯比我地食😂😂呢個套餐真係好豐富～啱哂我地呢啲大食嘅人😆 最後就輪到甜品，師傅將士多啤梨燒左一燒，再放落碟，然後加左藍莓芭菲同埋焦糖多士🥰芭菲加埋焦糖多士都好夾，而且仲有士多啤梨嘅甜味，簡直一流🤤 咁啱隔離枱有人生日，師傅仲用蛋漿寫左個「生日快樂」😂😆😆 飲品方面，我地叫左兩杯無酒精飲品，佢係蝶豆花加埋櫻花蝦打成嘅泡，再加左少少咸檸檬同tonic水，味道酸酸地幾開胃～👍🏻🤤

之前喺社交平台見到呢間餐廳個裝修咁靚，於是就諗住去試吓～

一入到去的確係好似去左日本。食物方面叫咗佢哋最出名嘅牛肉壽喜燒套餐，套餐包埋串燒拼盤，有燒雞翼、燒菠蘿、燒豬肉、燒菇同埋燒秋葵，另外仲可以揀多兩款小食。小食方面我哋叫咗個蟹籽玉子燒同埋燒牛舌😋

壽喜燒會有店員幫你燒，而且之後會有蔬菜、菇、豆腐～最後仲有個黑松露燉飯～

野食方面正正常常，係玉子燒同燒牛舌比較出色🤤黑松露燉飯都唔錯！不過略嫌所有食物都偏貴😐而且套餐唔包飲品，要再加$28先有一杯🫣最後2個人埋單人均$300🫣

今日去左新開無耐嘅啟德商場睇戲，再喺呢度食埋lunch，見到有間望落幾靚嘅茶樓，就入咗去諗住試吓😆呢間酒樓裝修得好靚，門口仲有bar枱🥂而且佈置得好有聖誕氣氛🎄 入到去之後職員比咗個有9格嘅茶盒我哋，然後就介紹左幾款唔同嘅茶🍵我地揀左鳳凰單叢茶，佢嘅香氣濃郁，入口茶味甘醇。平時酒樓多數只有普洱、香片、水仙等等嘅茶，但呢間茶樓比其他茶樓多好多唔同款式嘅茶🤤而且個茶壺下面會放個小蠟燭令啲茶可以一直保持住個温度🤣 餐廳Menu有好多選擇： 首先點左份和牛酥，因為平時酒樓都無呢款點心～佢個酥皮好鬆軟而且牛肉好香濃😋 之後下一款點嘅菜式係冬陰小籠包，呢個真係超好食👍🏻一啖咬落去有好多冬陰功湯係個口入面，啲湯唔算好辣，而且個皮夠薄！😍 然後就輪到石燒板麻辣羊肉烤包，佢有個鐵板喺下面，而且聞落好香噴噴😋個包煎到脆卜卜，入面就有超多羊肉🫶🏻食落去亦唔會話好重羊騷味～ 之後我哋再點咗個胡椒龍蝦湯餃，一個碗係裝龍蝦餃，而另一邊嘅茶壺就係裝湯～將個湯倒落去碗入面就食得～😂而且佢隻餃入面啲龍蝦肉好多，啖啖都係肉！隻餃大到差唔多係我拳頭嘅size😆 黑松露燒賣都好特別，有好香濃嘅黑松露味，令燒賣嘅味道升華左，而且燒賣入面啲蝦好大隻，啖啖都係蝦肉🤤 我哋再叫咗碟黑毛豚肉叉燒腸，腸粉皮薄餡多😋😍而且佢個擺盤都好靚～除咗豉油之外仲有埋蔥油～ 甜品方面，我哋叫咗佢地最有人氣嘅石獅黑麻糕😍 佢係一舊以石獅子造型嘅芝麻糕嚟，芝麻味好重，而且又唔會太甜。 總括嚟講，呢間係一間裝修好靚、食物質素亦相當好嘅新式酒樓👍🏻加上平時嘅酒樓都唔會有佢地提供嘅呢幾款點心，所以嚟開呢個新商場一定要試下！😆 地址：九龍城啟德協調道2號AIRSIDE 3樓L301-L302號舖

今日係太子食左間車仔麵，我揀左個三餸河粉，分別點左牛腩、牛肉餅&胡椒豬肚丸🤤朋友就叫左碗豬雜麵～另外再叫左兩款小食：魷魚鬚同埋蝦餅😋😋 我碗麵嘅牛腩每一件都啖啖肉，而且湯底充滿腩汁～牛肉餅就有少少似牛丸咁、好彈牙！而且好重牛肉嘅鮮味～最令我欣賞嘅係胡椒豬肚丸！一咬落去係會爆汁～而且辣辣地好惹味😋🤤 朋友碗豬雜麵上枱時，第一眼就被佢嘅份量嚇親！而且佢每款內臟都洗得好乾淨，完全食唔到臭腥既味道😍 小食方面，蝦餅有5塊（$40），每塊都脆卜卜～仲有碟泰式辣醬🤤真係好好食！魷魚鬚亦都好大碟（$45），同埋辣辣地😋咬落亦都好彈牙～撈埋麵一齊食都好夾～ 總括嚟講，車仔麵同小食都幾高質，而且價錢唔貴，叫左咁多野食都係每人$100左右😆

雖然係黃店，但覺得有大量進步空間🫤🫨 我叫左個泰式濕炒海鮮河，朋友叫左個辣椒炒牛河。我個碗濕炒海鮮河嘅海鮮份量超級少，得少量蝦仔同一粒青口，而且河粉係痴埋哂一pat口感麻麻🫤仲要一上枱個賣相都好唔吸引，全部都係菜、菇同蘿蔔係面😳但$72一碗🙄🙄 朋友嗰碟牛肉河就相對好少少，牛肉份量都ok，河粉偏辣，都惹味～另外我哋分別叫咗一杯芒果沙冰同埋椰汁珍多冰，呢兩杯野應該係呢一餐入面唯一比較滿意嘅😐🥲由於唔太好食嘅關係我同朋友都冇食晒，仲要出左餐廳之後再係九龍城食其他野嚟填飽個肚嘅空虛💸🫣

荃灣高質炸豬扒🤤🤤！好食到要喺OpenRice寫食評😍 今日去咗荃灣食lunch，見到間有炸豬扒同炸三文魚定食嘅餐廳，感覺好吸引就入左去😍定食包埋日式蒸蛋、麵豉湯同埋蘿蔔，而且佢可以免費追加白飯😋 炸豬扒超級厚身，有5-6塊😋同埋個皮好脆卜卜，一咬落去好多肉汁！😍😋炸三文魚亦都好特別，因為好少見餐廳會有炸三文魚，亦都係炸到外脆內軟😆！而且加埋嗰個沙律醬一齊食超好食～好食到叫多咗一碟醬🤭 地址：荃灣富華中心二樓（荃灣地鐵站B2出口一出就係）

今日去左銅鑼灣呢間富山麵家食拉麵，上網見到佢有鬆弛熊主題，所以就揾埋同我一樣都中意鬆弛熊嘅friend去左食😂好可惜嘅係咁啱佢個主題早幾日完左，但佢有部分餐具同杯都仲有鬆弛熊公仔😍😍超級打卡able！🫶🏻 拉麵方面我同朋友都點左碗「大胃王」拉麵😂見佢有5塊肉，感覺好豐富，而且價錢唔貴！我叫左北海道牛奶湯，朋友就叫左激辛味噌湯😋北海道牛奶湯超香濃牛奶味😆！朋友個碗亦都好惹味～好啱中意食辣嘅人！另外，肉質淋身易入口～拉麵嘅份量亦頗多，如果男仔食一定夠飽！ 小食方面我哋叫咗餃子同埋雞翼，兩樣小食都各有5隻～餃子皮薄，而且饀料多汁😙雞翼上面有芝麻，而且剪到脆卜卜～十分推薦😋😋 飲品方面，我叫左杯凍鮮泡蜂蜜綠茶，見佢menu嘅賣相好靚😂😂係士多啤梨形狀🤣而且味道唔算甜～👍🏻朋友就叫咗罐日本巨峰提子梳打～都唔錯！餐廳仲有送鬆弛熊糖比我地，真係好得意！好唔捨得食🫣 地址：銅鑼灣希雲街7號地鋪（銅鑼灣F1出口）