秋天最啱食蟹～成日食大閘蟹又膩咗啲，於是就嚟呢度試試蟹omakase😆 🔸蟹 ᴄʀᴀʙ ᴏᴍᴀᴋᴀsᴇ $1388 ✨ 先付け 蒸熟後拆肉嘅毛蟹肉肉質鮮甜，加埋味道清新嘅柚子啫喱，夾埋紫蘇葉一齊食層次更豐富～ ✨前菜 由新鮮嘅白海老同海膽組成，加咗少量明太子提鮮，最頂層嘅海葡萄同紫蘇葉花瓣作味道、口感上嘅點綴 ✨吸い物 熱辣辣嘅昆布湯加入咗蓮藕粉同松葉蟹肉，清清哋更加食到食材嘅鮮味～湯入面除咗有少少柚皮絲令味道更清新有層次之外，仲有一塊山葉，味道較濃，建議最後先連湯食 ✨お造り ▫️帶子 ▫️平政 ▫️炙燒金目鯛 ▫️薑蔥池魚 ▫️牡丹蝦 ✨揚げ物 蟹蓋釀咗松葉蟹同大閘蟹肉，以及洋蔥、冬菇、甘筍等配料，再以麵包糠炸過，香口惹味，味道唔錯，不過蟹肉嘅鮮味略為被其他食材蓋過咗🙈 ✨箸休め 食咗咁多嘢食，有杯清新酸酸甜甜嘅柚子雪葩清清味蕾～ ✨焼き物 用日本禾稈草燒嘅鱈場蟹，有少量海膽用作提鮮～店員提議先試淨食鱈場蟹，試試原汁原味先，再夾埋海膽一齊食～入口略帶煙薰味，但呢種用禾稈草燒出嚟嘅煙薰味唔太香，唔太啱我自己口味，而且燒完蟹肉比較乾身，唔熱唔凍咁，唔太欣賞😟 ✨食事 成個餐最邪惡絕對係呢個！將加熱咗嘅大閘蟹膏加入蟹芡拌烏冬，再因應個人口味加入黑醋～好味好濃郁😆 個人嚟講就比較鍾意酸啲嘅醋，中和返蟹膏嘅膩～ ✨甘味 無花果拿破崙蛋糕😍 焗得酥脆嘅牛油酥皮，夾住自家製無花果醬、淡忌廉、椰子雪糕，味道出奇地夾，而且入口比預期中清爽，唔會過甜過膩！好好食😍😍 餐廳環境舒適，裝修行日系簡約風格，餐具同擺設好有心思，呼應返餐廳嘅名「山」～ 店員每上一道菜都會仔細講解，服務態度都唔錯～ 食物方面，賣相非常精緻，好啱打卡！味道唔錯，係有某一兩道菜稍稍失望但唔算差嘅，不過份量就比較少，男士有機會唔夠飽🫢 整體嚟講！呢個價錢嚟講會expect再高質少少🙊 但用餐體驗都非常唔錯嘅，都值得一試～

有得轉翠玉瓜麵，啱哂想食少啲carbs嘅朋友😆 🔸炙燒雞叉燒腸粉湯 轉翠玉瓜麵拼粉絲 $64+12 翠玉瓜麵比較碎，轉得夠稔，口感都似食緊麵嘅😆 拼埋粉絲口感幾豐富～ 雞叉燒表面有啲黑椒味，但食落入面冇咩味，而且有啲鞋，有少少失望～ 🔸十三么 $72 除咗雞叉燒仲有手撕雞～手撕雞相比雞叉燒就入味啲惹味啲，而且食落冇咁鞋，味道吸引過雞叉燒🙊 🔸西多雞翼 $38 炸過嘅單骨雞翼沾滿糖漿，香口惹味得嚟甜甜哋，幾好食！幾推介呢個，嚟到可以試試！ 餐廳環境比較擠迫，坐得唔太舒服，平日都多人排隊要等位，不過翠玉瓜麵都幾特別，如果嚟開呢頭都值得一試嘅～

呢日想食omakase就嚟咗呢間試～但唔係有師傅喺前面逐件整同介紹，感覺似食壽司lunch set多過食omakase🥲 🔸廚師推介套餐｜握り寿司 十三貫 $800 ✨前菜｜鮟鱇魚肝、鮑魚、海藻 ✨漬物｜牛蒡、蘿蔔、蕎頭、茄子 ✨時令壽司 ▫️赤鯥 ▫️帆立貝 ▫️赤身 ▫️沙錐 ▫️粒貝 ▫️右口魚 ▫中拖羅 ▫石垣貝 ▫小肌 ▫白蝦 ▫️大拖羅 ▫️海鰻 ▫️海膽軍艦 ✨雪糕｜綠茶、紅豆、士多啤梨味選一 🔸鰻魚玉子燒 $92 火候同調味都控制得幾好，味道唔錯 🔸鹽燒雞下腿串 $48 燒得好乾！雞下腿都整到柴過雞胸，好失望！ 🔸蒲燒鰻魚肝 $58 燒汁整得幾好味，唔錯～ 🔸燒小甘薯 $38 正常發揮，但面頭啲蜜糖好似多咗啲 🔸鹽燒黑豚腩 $78 香口惹味，唔韌唔乾，幾好食 🔸鹽燒雞頸肉 $38 普通～ 整體嚟講食物同服務都係普普通通不過不失，勝在地點方便～

呢日同朋友慶生，想揾間環境唔錯、地點方便又特別少少嘅餐廳，於是就嚟咗呢間荷蘭私房菜試試😆 🔸 ᴛʜᴇ ᴛᴏᴜʀ ɪɴ ʜᴏʟʟᴀɴᴅ $988/ppl +10% | 𝟼 ᴄᴏᴜʀsᴇs ʜᴏʟʟᴀɴᴅ ᴄʟᴀssɪᴄ ᴅɪsʜᴇs ᴏғ ғɪsʜ, ᴍᴇᴀᴛ ᴀɴᴅ sᴡᴇᴇᴛs | 第一次食荷蘭菜都唔知揀咩好，於是就揀呢個廚師發辦，荷蘭主廚會安排6道荷蘭經典菜肴比我哋😆 ✨ ғᴀᴍᴏᴜs ᴅᴜᴛᴄʜ sɴᴀᴄᴋs ▫️ʜᴀɴᴅᴍᴀᴅᴇ ᴅᴜᴛᴄʜ sʜʀɪᴍᴘs ʙɪᴛᴛᴇʀʙᴀʟʟᴇɴ 呢個係用大量海蝦打成漿炸成嘅蝦丸，外面金黄香脆，內餡係流心嘅蝦漿，蝦味非常濃郁！ ▫️ғʀɪᴋᴀɴᴅᴇʟ sᴀᴜsᴀɢᴇ sᴘᴇᴄɪᴀʟ 呢個係去咗衣嘅荷蘭腸，夾住荷蘭咖哩同洋蔥碎～第一次食荷蘭咖哩，同平時食嘅咖哩好唔同，入口温和啲香料味冇咁重，唔辣帶微微甜味，加埋甜甜地嘅洋蔥碎中和返荷蘭腸嘅鹹味～好惹味😆 ▫️ɢʀɪʟʟᴇᴅ ǫᴜᴀɪʟ ʟᴇɢs 肉質軟嫩嘅鵪鶉髀，底下有少少沙律菜可以一齊食，平衡返鵪鶉髀嘅濃味～ ✨ᴏᴀᴋ sᴍᴏᴋᴇᴅ ᴇᴇʟ 經橡木煙薰6個鐘，煙薰得洽到好處，唔會蓋過哂鰻魚嘅鮮味！而鰻魚係採用野生鰻魚，肉質比較彈牙有口感😆 仲伴有沙律菜同埋廚師特別調製嘅dressing, 味道好夾好fresh! ✨ᴛʀᴀᴅɪᴛɪᴏɴᴀʟ ᴅᴜᴛᴄʜ ᴍᴜssᴇʟs ᴘᴏᴛ ᴡ/ ɢᴀʀʟɪᴄ ʙᴜᴛᴛᴇʀ ᴄɪᴀʙᴀᴛᴛᴀ ʙʀᴇᴀᴅ 青口由荷蘭直送，啖啖肉，而且火候控制得好好，肉質鮮嫩唔韌！加埋白酒、洋蔥等等，非常鮮甜惹味！ 配埋口感軟熟嘅意大利拖鞋包，個包中間切開咗一半搽咗一層蒜蓉牛油，令佢更加惹味同邪惡🤣 ✨ᴄʟᴀssɪᴄ ʟᴏʙsᴛᴇʀ ʙɪsǫᴜᴇ 味道超級超級濃郁嘅龍蝦湯！入面除咗有幾件口感彈牙嘅龍蝦肉，仲有啲焗得酥脆嘅麵包粒粒😆 上枱時店員會舀少量X.O.用火燒一燒再加落龍蝦湯入面，畫龍點睛👍🏻 ✨ᴅᴜᴛᴄʜ ʀᴏᴀsᴛᴇᴅ ᴡʜᴏʟᴇ ᴄʜɪᴄᴋᴇɴ ᴡ/ ᴅᴜᴛᴄʜ ғʀɪᴇs sᴘᴇᴄɪᴀʟ 呢隻雞係未嚟食已經bookmark咗要試😆 佢要早三日預訂嘅，因為製作需時～ 首先用三十幾種香草醃製，浸4個鐘浸熟隻雞然後冰鎮，再風乾一日，臨上菜先再烤焗令個雞皮金黄香脆，而肉質包括雞胸肉都係軟嫩有肉汁！最特別嘅地方係佢啲腳趾係可以連骨食！食落脆卜卜好香口😆而且隻雞係無激素，所以雞頸都食得～ 佢仲伴有用新鮮蘋果製成嘅肉桂蘋果蓉，清甜嘅蘋果蓉完美平衡返雞嘅鹹同膩，係成個餐嘅mvp🤣 雖然唔太食得出個雞嗰三十幾種香草嘅味，冇想像中味道咁有層次咁特別，但佢脆皮肉嫩又啖啖肉，配埋個超級出色嘅蘋果蓉，真係好值得一試！ 至於個焗薯都好正呀，表面焗得非常香脆！ ✨ʙʀᴀɴᴅʏ ᴄʜᴇʀʀɪᴇs ɪᴄᴇ ᴄʀᴇᴀᴍ 干邑白蘭地酒漬櫻桃，甜甜地又帶微微白蘭地嘅香氣，配埋呍呢嗱雪糕，味道好好！店員話係呢個雪糕係荷蘭男仔追女仔時會帶佢去食嘅甜品，唔知work唔work呢🤣 鍾意飲酒嘅朋友可以試試wine pairing, 或者另外再嗌酒都得，餐廳個wine list都幾多選擇嘅～ 總括嚟講食物都好高水準！雖然對我嚟講調味略鹹一啲，但送酒就啱啱好😆 店員服務好好、好親切，介紹啲食物都好詳細～餐廳環境雅致寬敞，慢慢食三四個鐘都唔會趕你走😆成個用餐體驗都好好，超級推介比有興趣喺香港食荷蘭菜嘅朋友！

🔸秘魯式吞拿魚片 ᴛᴜɴᴀ ᴛɪʀᴀᴅɪᴛᴏ $138 平時食吞拿魚他他就食得多，秘魯式吞拿魚小食睇落都幾特別～喺炸米片上面放咗煙薰吞拿魚片、吞拿魚蓉同甜蝦，旁邊伴有黑醋沙律 炸米片都幾脆，但食落有少少油… 煙薰吞拿魚片個味蓋過咗其他食材嘅味道，感層次亦唔分明(除咗個炸米片係脆，其他唔太食得出個味道) 🔸蒲燒鰻魚意大利飯ɢʀɪʟʟᴇᴅ ᴇᴇʟ ʀɪsᴏᴛᴛᴏ $158 呢款西日fusion risotto一上枱都幾香，聞到啲木魚碎嘅味～賣相都唔錯 鰻魚食落不過不失，軟稔冇骨，照燒汁入味～ 意大利飯煮得唔均勻，一啲飯粒比較硬身，一啲就太稔… 飯入面仲有啲菇同木魚碎，不過不失～ 🔸軟殼蟹龍蝦湯農夫包 ᴄʀᴜɴᴄʜʏ sᴏғᴛ-sʜᴇʟʟ ᴄʀᴀʙ ᴀɴᴅ ʟᴏʙsᴛᴇʀ ʙɪsǫᴜᴇ ɪɴ ʙʀᴇᴀᴅ ʙᴏᴡʟ 呢個賣相唔錯，啱啱焗好嘅農夫包表面幾脆身～ 打開農夫包，第一眼就會見到原隻炸軟殼蟹～都幾脆嘅，不過入口都係略為油咗啲 農夫包入面仲有滿滿嘅龍蝦湯煮翠玉瓜～啲瓜焗到好稔，亦都吸哂龍蝦湯嘅味，味道都唔錯！ 🔸牛角包窩夫配雪糕 (雲尼拿/曲奇) ᴄʀᴏғғʟᴇ ᴡɪᴛʜ ɪᴄᴇ-ᴄʀᴇᴀᴍ (ᴠᴀɴɪʟʟᴀ/ᴄᴏᴏᴋɪᴇs ɴ’ ᴄʀᴇᴀᴍ) $78 呢款係好受歡迎嘅牛角包窩夫，集合咗牛角包嘅酥脆同窩夫嘅外形同質感🫶🏻 食落酥脆之餘，亦好香牛油味～ 雪糕係冇乜特別嘅雲尼拿雪糕～ 不過配埋雜莓同熱情果醬，同奇異果、熱情果等等生果粒粒，酸酸甜甜咁都唔錯👍🏻 🔸sᴘʀɪɴɢ (ᴍᴏᴄᴋᴛᴀɪʟ) $78 ᴏʀᴀɴɢᴇ ᴊᴜɪᴄᴇ, ɢʀᴀᴘᴇғʀᴜɪᴛ ᴊᴜɪᴄᴇ, ʀᴏsᴇ, ʟɪᴍᴇ ᴊᴜɪᴄᴇ, ɢʀᴇɴᴀᴅɪɴᴇ 賣相幾用，幾啱打卡！ 第一啖飲落似橙汁，但會慢慢滲返啲西柚味出嚟～酸酸地同帶微微嘅澀，唔會太甜，都幾啱我口味 🔸 ᴡɪɴᴛᴇʀ (ᴍᴏᴄᴋᴛᴀɪʟ) $78 ᴘᴀssɪᴏɴ ғʀᴜɪᴛ, ᴍɪʟᴋ, ʏᴏɢᴜʀᴛ, ɢʀᴇɴᴀᴅɪɴᴇ 呢杯類似係熱情果乳酸奶類飲品，入面有少量熱情果粒粒～Yogurt味唔算好突出，反而奶味比較多，同熱情果個味唔太夾…除咗咬到熱情果粒粒嗰陣好酸之外，整體呢杯嘢都比較甜 總結！餐廳除咗室內，仲有室外露天座位～室內裝修同擺設都幾有特色👍🏻地理位置方便，價錢合理，食物就不過不失，不過上菜就真係比較慢，非繁忙時段嚟食都要個半鐘先上哂以上幾樣嘢食🙈

之前都食過座銀soba雞白湯拉麵，覺得好正又唔貴，於是今次試埋佢嘅姊妹店試鯛魚湯拉麵！ 🔸鯛白湯拉麵 $138 湯底係將新鮮嘅日本真鯛魚同幾種貝類熬製八小時而成嘅濃湯，充滿鮮味！鍾意魚湯嘅人一定會超鍾意！碗邊有少量柚子醬，如果覺得鯛白湯太濃味嘅話，可以根據自己嘅口味加配柚子醬，中和返魚湯嘅味道～想清新啲又得，想濃郁都得，得咗！😆 拉麵幾算掛湯，略為偏軟身一啲～ 配料方面有一塊薄切叉燒，口感軟稔，調味偏淡，唔會蓋過咗魚湯嘅鮮味～ 另外仲有略為煎香咗嘅真鯛魚粒粒，味道唔錯！ 仲有啲紫洋蔥碎(幾甜，唔會太辣太搶味)同埋筍(有別於一般切成條狀嘅味筍，佢係一舊三角形、一舊圓形，配合返舖頭個logo) 總括嚟講個湯底好有驚喜好有層次！唔係普通平淡嘅魚湯！食完拉麵差唔多飲哂啲湯😆✨ 🔸炸鯛魚皮 $48 新鮮炸起，都幾脆～比一般潮州粉麵店嘅魚皮薄啲🤣 🔸櫻木煙薰糖芯蛋 $15 同座銀soba一樣，糖芯蛋真係超級出色！無論係蛋白定流心嘅蛋黄都一樣咁入味！淡淡嘅煙薰味好香，味道層次好豐富！✨ 🔸日式炸雞 $48 炸雞都係即場炸，炸粉好薄，外表金黄香脆，肉質細嫩多汁而且都夠入味！正呀～ 本身想試鯛沾麵多啲，不過太晏過嚟已經賣哂～好彩拉麵都冇令我失望😆 下次會早啲嚟再試沾麵！推介！

🔸冷鍋酸菜魚 (Regular) $218 呢度比較出名應該就係呢個冷鍋酸菜魚～上枱嘅時候已經煮熟哂食得～賣相幾靚👍🏻 魚嘅份量都幾多！但就比較薄同埋口感稔一啲，不過以呢個價錢同份量嚟講都算幾抵～ 鍋入面除咗鯇魚片之外，仲有寬粉、大豆芽、萵筍片等配料～（不過個人覺得寬粉可以多啲🥺 得幾條好快夾哂） 湯底方面，叫咗小辣所以唔算好辣，我諗同譚仔三小差唔多🤣 都夠酸嘅幾開胃，不過就唔夠香，味道冇咩層次，如果多啲花椒香味就好～ 食完之後可以加湯加火鍋配料打邊爐～我就再加咗以下幾樣配料，份量都幾多，質素就正正常常～ ✨炸響鈴 $38 ✨凍豆腐 $38 ✨娃娃菜 $38 不過加湯後味道比較單調，沖淡哂酸菜味，香辣味亦欠奉～建議如果想打邊爐嘅話，打之前食哂魚先好加湯～ 🔸炸小饅頭 (6個) $52 炸得金黄色，賣相幾好～外脆，但饅頭略嫌唔夠鬆軟，不過熱辣辣時點煉奶都幾好食 🔸黑糖糍粑 (細) $38 外脆但內裡唔夠軟糯，糖粉沾得唔夠多，糖漿略為太稀 🔸荔枝沙冰 $45 份量幾多，味道都正常，略為甜咗啲～ 🔸檸檬可樂 $26 正常發揮～ 整體嚟講，食物賣相幾好，份量都幾多～味道就不過不失，都解咗我咁耐冇食酸菜魚條癮嘅～ 不過想分享返令我唔太愉快嘅小插曲…一入餐廳門口掃緊針咭對緊訂枱資料，就比個店員用地拖拖咗落我隻鞋度(我著涼鞋，隻腳feel到個地拖) ，仲要冇講唔好意思望我一眼繼續拖埋嚟，係另一位店員代佢講唔好意思…佢之後同我講因為餐廳12:00開門而我早咗(11:59到，見門口個牌寫營業中先入去，當時已經有另一個客喺入面)，所以未準備好…服務態度方面真係有待改善🙈

嚟迪迪尼玩到咁上下要揾啲嘢醫肚，見生日有買一送一於是嚟咗呢間，同埋諗住薯條應該冇咁易中伏嘛🙊 🔸炸雞籃套餐 $125 有兩件炸雞，同一大堆薯條 炸雞熱辣辣同埋幾脆，調味略略鹹咗啲，唔算好食但都唔算好伏嘅～ 薯條算係粗身，份量都幾多～ 🔸朱古力麥芽飲品（凍） $33 美祿嚟～又出乎意料地沖得幾濃幾好飲！ 🔸炸芝士條 $48 叫炸芝士味麵筋貼切啲🤣🤣 完全唔係拉絲芝士，不過迪迪尼嘅餐廳都預咗🙊 總結係朱古力麥芽飲品幾好飲，其他只係用嚟醫肚🤣

呢間係一間位於中環只招待會員嘅食肆，餐廳有兩層，上層有獨立房間，夠哂私隱度高，同埋方便同屋企人或者朋友傾偈，冇咁嘈☺️ 呢日同屋企人嚟食飯就嗌咗以下嘅嘢食～ 🔸怪味雞 $106 🔸椒鹽排骨 $116 🔸清炒蝦仁 $270 🔸鎮江肴肉 $116 🔸無錫脆鱔 $138 🔸蔥爆牛肉 $126 🔸脆皮素鵝 $106 🔸燻蛋(每隻) $18 🔸松鼠桂魚 $360 🔸奶油津白 $98 🔸雞火炒飯 $116 🔸上海粗炒 $116 🔸小籠包(每隻) $12 🔸花素蒸餃 (每隻) $12 🔸砂鍋雲吞雞 (一份12人) $480 整體嚟講，啲嘢食都幾好食，特別係無錫脆鱔！喺出面比較少食呢道菜，食落脆卜卜，又香口又惹味！ 另外酸酸甜甜夠哂開胃嘅松鼠桂魚，同埋熱辣辣新鮮出籠嘅小籠包都好出色☺️

呢日喺葵芳行到口渴買吓嘢飲，見呢間睇落幾健康就試試佢！ 🔸百香果有機綠茶 $32 超多百香果粒粒，酸酸哋咁勁開胃好飲！ 綠茶茶香亦都幾突出，兩者味道好夾！ （平時買水果茶最怕買到啲太甜嘅糖精假水果茶，但呢度係真材實料😆） 🔸蜂蜜冷泡有機伯爵茶 $30 伯爵茶味非常香濃！加埋蜂蜜嘅香甜～正！ 除咗冷泡茶/熱茶之外，舖頭仲有各式各樣嘅茶包賣～好飲又健康，大推！😍