同女朋友慶祝紀念日，上網見到佢哋做緊優惠，價錢都幾平下，最吸引我係個牛骨髓，就book咗枱嚟食。 餐廳環境正常，地方偏細不過都算坐得舒服，燈光偏暗，服務都幾好，店員會仔細介紹菜式同埋到會送一啲小食。 食物方面，最令我滿意嘅都係個牛骨髓，擺盤、味道都係會令我想再番黎食。兩個主菜還好，我就叫咗牛，咁佢就係切好上碟嘅，咁店員會當晚特選幾隻鹽比客人嘗試，呢樣嘢我覺得係幾特別同埋都會詳細介紹每一隻鹽嘅特點同埋口味等等，牛扒方面嘅質素我覺得唔算太出色，合格之作。而女朋友就叫咗豬，意外地好食，醬汁同埋肉質都係非常之好，相比之下牛扒會比較遜色。網上訂位優惠附送左紅酒俾我哋，普通質素。另外最後甜品方面就有個蛋糕，都係屬於非常普通嘅質素。 整體考慮到呢一餐其實係非常之平，能夠喺呢一個嘅預算做到呢一餐，性價比方面我覺得其實係做得好好。坊間好多人均600-800$嘅西餐廳都係做返咁上下嘅質素，有時仲會中伏，所以雖然依餐未到好難忘，但我好respect 佢哋，能夠用牛骨髓依道菜令成餐飯生色不少。 Overall:7.5/10

同朋友去左cwb 搵嘢食 黎左依間想試好耐嘅pizza 入到去環境偏暗 但個vibe都幾適合吹水/拍拖。見到menu 主要有pizza / pasta / salad / Drinks 我朋友之前食過 分量都偏多 我哋又唔係好叫左個half half pizza （crazy cheese/超級撒亞人） 上碟都幾靚仔/pizza 個皮係做得好soft 面粉發酵係有落過功夫 味道整體係中上 (8/10) 另外佢有好多Beer 揀 都幾得意 我叫左杯Peroni 幾smooth $79 人均消費：200幾$

今個weekend 同女朋友去左西環個邊行下 去試一間burger 不過無開。無奈下行左去附近搵嘢食 見到Dare 就入去試吓。 入去似台灣/日本家庭小店咁 有部電視機 地方細細地 同女朋友研究完一陣就叫左個意粉同炸雞Don。 意粉🍝合格有餘 正常 7/10 ； 食完個炸雞Don都未到 催左兩次 最後差唔多20-30分鐘先有 不過我好肚餓唔理咁多 即刻食左先講 ：Ay！？ 幾好食喎 係用左美式炸雞burger 個隻peanut butter 調嘅sauce 個mixture應該有花生醬 少少喼汁 chilli powder and herbs。好食 😋8.5/10 補償返我食唔到burger ge 唔開心。依間野會有下次👍🏻 Overall: 8/10

今日同女朋友去左旺角食完晏 行街行到去油麻地 見到am pm 依間都好似開左好耐嘅外賣甜品鋪🍫🍮🥐🍦 Menu 林林總總 好多選擇 最後想試下佢個牛角包🥐waffle 朱古力🍫味$35 另加$10 有3.6牛乳雪糕 on side 3.6牛乳雪糕🍦好食過雪糕車 waffle 係用格仔餅機夾牛角包🥐整出黎 都係無得唔好食 淋上朱古力醬 偏苦嘅朱古力粉 少少朱古力碎on top 朱古力🍫都濃又唔會好甜 幾好👍🏻 下次會試佢個招牌味 布甸🍮 依間野會再幫襯😛 Overall ：8/10

今日嚟到朋友介紹嘅pizza Maru 係一間韓國fusion餐廳 裝修服務都尚算幾好 不過不失 今日假期啊過嚟食lunch 咁我同朋友叫咗兩碟嘢 分別係韓式牛骨汁炸雞 泡菜卡邦尼意粉 咁呢兩樣嘢都係未食過嘅 炸雞肉質不過不失 未去到好多肉汁炸得有少少乾身 可以做得更好 醬汁調味都幾好 係食到有啲韓國風味 另外個意粉都唔錯 泡菜加落去變咗有少少辣辣地嘅cream撈意粉fusion菜黎講係夾嘅 未食過嘅朋友仔都可以試吓嘅 講返價錢啦叫咗兩樣嘢買單300幾蚊 分量都正常 唔算話食到好飽 所以性價比有少少偏貴 不過考慮佢係開喺銅鑼灣希慎入邊 呢個價錢都可以接受嘅 整體而言都會有機會再返嚟食 下次會試吓佢個Pizza Overall: 6.8/10

今日同朋友仔嚟到中環搵嘢 一路都想試吓呢啲舊式香港茶餐廳 入到去環境都係八九十年代圓枱圓凳 懷舊風 咁我哋個日係食lunch 每人叫咗碗面 朋友叫咗碗蕃茄湯豬扒公仔麵 味道好一般 茄湯味道唔濃郁 湯底屬於偏鹹 正常偏甜會好食好多 豬扒都係一般貨仔 我就叫咗喇沙湯豬扒公仔麵 湯底正常普通 個人認為好過碗蕃茄湯 另外叫多咗個豬仔包煉奶俾得唔夠多 都係一般貨色 叫左檸茶奶茶 正常 埋單$ 133 應該都唔會再嚟食 因為真係好普通 咁嘅價錢可以有更加好嘅選擇 Overall : 4/10

今日去咗旺角沙嗲王食晏 睇返原來都好耐冇食 有啲掛住佢哋嘅白咖喱香茅豬扒飯 試吓睇吓有冇退步先 咁我就叫咗lunch set 白咖喱香茅豬扒飯 汁另上 再叫多咗兩隻雞翼做小食 整體而言質素係keep到嘅 香茅豬扒非常軟身 配上甜甜地嘅白咖喱 非常惹味 好送飯 不過個雞翼就比較普通 咖喱份量都足夠撈飯 埋單好似$60幾 非常夠飽 間唔中嚟食下都唔錯

今日舊地重遊 同朋友黎到太古城Apita搵嘢食醫肚 基本上呢個築地章魚燒小丸子係必食 可以話係太古名物 一定係要叫玉子章魚燒 一定會食過返尋味 以前都成日嚟食 但係質素都係keep到 章魚燒燒到外脆內軟 最上面嘅燒汁同埋沙律醬永遠都係好大方 加埋玉子沙律 配埋一齊食 每一啖都超級滿足 絕對係過足癮 唯一係價錢貴咗少少 不過佢嘅質素同份量都絕對對得住呢一個嘅價錢 $50 8粒 佢哋個炒麵都唔錯不過今次就冇叫到 如果大家肚餓可以嗌多個炒麵試吓佢啲燒汁配沙律醬撈埋一齊食都好正 依間嘢絕對大推👍🏻👍🏻👍🏻

同女朋友嚟到旺角口痕想掃街 嚟到肥姐小食 見到門口大排長龍 質素應該有返咁上下啦 咁我就叫咗一個王牌試一試佢，分別有墨魚細腸同埋雞腎。首先講個滷水汁係幾出色嘅 調味啱啱好 值得一讚係墨魚同埋雞腎 墨魚口感一流 而雞腎係三個入邊最入味 細腸就不過不失啦 如果下次再嚟我會淨係叫墨魚同埋雞腎 不過要留意真係好多人排隊 我哋叫完企咗喺側邊食 食完成條隊都係keep住咁長 冇郁過🥶不過排都唔駛等好耐 等五至10分鐘都已經可以買到了 都值得推介嘅👍🏻 係略嫌佢貴咗少少

今日嚟到筲箕灣東大街試一試呢個I love 班戟 一直好多朋友都叫我試 話好正 叫咗一個焦糖燉蛋倍豆腐味雪糕 等咗一陣就整好 $32 價錢都算平 焦糖燉蛋意外地好食 配埋個餅皮甜甜地幾夾 豆腐味雪糕就正正常常唔係好甜 整體都幾好食嘅 但我期望會大啲 經過嘅朋友都可以一試嘅