Lunch叫咗個泰式古法秘製豬手撈麵 $53 落單果時話要等十分鐘 最後等咗差唔多廿分鐘 重點係我前面係無單😅 出一個餐都要等咁耐 點樣做food court呀 如果前面有單 係唔係要等半個鐘😅 豬手好鞋 可以睇到一條一條肌肉組織 有啲位又鞋又硬 好似煲湯瘦肉咁😅 豬皮偏薄 口感同味道都麻麻 一啲都唔似泰式豬手 第一次食到質素咁差嘅豬手 個麵勁重鹼水味 重到有啲刺鼻😨 要自己加水落去沖淡下 最後都頂唔順 無食曬 整體上係差 價錢偏貴 唔建議😅

入西貢staycation 諗住快快手食個晏再check in 見呢間cafe喺Google同Openrice嘅評價都唔錯 而且食物賣相都幾好 所以決定食呢間 Total 叫咗四樣嘢 明太子龍蝦手工意粉 $168 溫泉蛋慢煮牛肋條丼$118 Dirty $45 Iced latte $45 價錢唔平 加埋10%服務費直頭有少少貴 人均消費過二百蚊 最厲害係order咗四樣嘢 佢可以上錯三樣😅 食物嚟到要問佢先記得俾餐具 你仲好意思收我服務費？ 你啲staff似騷擾我多過服務我😅 兩杯咖啡中規中矩 唔值$50呢個價 兩款食物味道都偏淡 丼飯啲飯偏硬 未食過咁硬嘅珍珠米飯 龍蝦好細隻 手工意粉無手工意粉嘅口感 食落似超級市場藍色包裝嗰隻linguine 餐廳收費水平高過食物水平一個檔次 座位唔好坐 無環境 無服務 總括而言 搵笨👍🏻

網上面見到有人推介 咁啱又經過 所以就入去試吓 個呀姐一路同人講電話一路幫我落單 落到一半先收電話再落過一次單 我都唔該前唔該後 佢態度都係超差 又惡又無禮貌 好似得罪咗佢咁🤷🏻‍♂️ 落完單之後 撈米嚟咗湯米 話走芫茜又無走到 之後女朋友夾曬啲茜俾我😂 都知道同佢反映唔會有好結果 廢事俾人加料啦🤷🏻‍♂️ 飲品叫咗杯柑桔蜜同菠蘿冰 上枱果時我呆咗 第一次見綠色嘅柑桔 味道無乜問題 比較淡 不過見到都唔開胃囉🤢 菠蘿冰又幾搞笑 係利賓納加菠蘿 總括嚟講 米線味道唔錯 不過份量比較少 CP值低 服務態度極差💩 食米線有大把更好嘅選擇 唔會再去食

本身無諗住寫食評 所以無刻意影相 之後越食越唔高興 返到屋企諗諗吓都係寫返篇文🤷🏻‍♂️ 所以啲相唔齊 有啲係喺ig save返落嚟 一兩日前上網睇已經full曬 當日18:00走去walk in 有位 一行入間餐廳已經feel到個地板黐立立 安排左係餐廳中間嘅位置 窗外環境係靚 不過如果座位方向對住太陽 啲窗簾又有隙 咁你就會俾個西斜曬到連menu都睇唔到 見openrice咁多負評都知伏伏地😅 見有coupon用所以先入黎試下個新奇片皮鴨 餐廳行高價位路線 無coupon用嘅話就真係幾貴 最大問題係食物質素同個價錢唔成正比 獅子頭幾好食 個size大粒過山竹牛肉少少🤏🏻 口感同味道都唔錯 不過啲飯凍嘅 煎鍋貼無影到相 味道同八方雲集差唔多 不過配鍋貼啲醋好香好醇厚 冰草都無影到相 味道幾特別 配個酸酸地嘅汁 幾開胃👍🏻 輪到重頭戲片皮鴨 有個師傅推架車出嚟 係你面前切 佢一路片一路出煙同流肉汁出來🤤 睇見都食指大動🤤 但係上到枱嘅時候 啲肉係唔暖亦都無肉汁🥲 味道亦十分之普通 完全唔值呢個價錢🥲 鴨片切得太薄 保留唔到肉汁又無口感🥲 燒臘舖啲燒鴨仲好食過佢🥲 薄餅嘅味道同口感都一般🥲 配料幾特別 有藍莓醬 爆炸糖 芥末醬 山楂條呢啲非一般配料 食落發覺唔識欣賞 都係傳統口味好食啲 啲醬本身係好味 但係鴨嘅味道比較淡 所以藍莓醬 芥末醬同山楂條好容易就蓋過曬啲鴨味 爆炸糖同片皮鴨唔夾 只係俾人強行拉埋一齊 甜品份量極少 口感比較稀 味道同街邊糖水舖差唔多 請我食都唔會食多次 建議將啲錢洗係更有意義嘅地方😑

Food court內廉價食物 所以期望唔高 只係覺得再做多少少就perfect 尖椒皮蛋 皮蛋無乜皮蛋味 醬汁無乜辣味 辣度連譚仔五小辣都無 皮蛋亦沾唔上醬汁嘅味道 整體味道沉悶 份量大 但係我寧願佢將皮蛋個份量減半 拎半份皮蛋既錢去改善醬汁個質量 麻醬雞絲涼麵 醬多 幾香芝麻味 但係幾杰 碗麵食到一半已經覺得膩 醬料缺鹹味 建議加多啲淡豉油同醋 溝稀個醬 增加味道層次 紅糖冰粉 味道清新 可以除去前兩道食物嘅累贅感 山楂香脆添口感 酸味可以中和糖水嘅甜味 食完會有涼快嘅感覺 十分欣賞呢款甜品 不過今時今日$69食到咁多野 算係咁啦😂

機緣巧合之下嚟到陸羽食晚飯 由正門旁升降機上二樓用膳 店內裝修古色古香 現在買少見少 由於疫情關係要四人一枱 啲餸都係四人份量 或者已經分好一人一份 樓面人手充足 侍應人數比枱數多 牆上的menu 不過同今餐飯無關係 沙律味道正常 內有蛋 薯仔 啤梨 蘋果等切粒 略嫌沙律醬太多 同埋大蝦唔夠爽口 冬瓜盅味道清甜 帶有一點點鹹香 除冬瓜仲有菇 燒鴨粒 夜香花 鹹蛋等 鵪鶉相比起雞鴨鵝 口感較軟嫩 但味道較淡 炸雲腿外皮香脆 腿肉結實 切成薄片既有口感又方便咀嚼 邊咀嚼邊透出鹹香 南非乾鮑味道濃厚 溏心 口感同味道都一流 柚皮入味 無澀味 厚度十足 口感軟腍 一試難忘 生炒骨味道正常 酸度甜度平衡 炸粉厚薄適中 紫薑爽口 唔會太辣 雞肉香滑 味淡 夾上金華火腿 增添鹹香味 豐富口感 荷葉飯正常 濕潤 帶點荷葉香氣 獨特廣府菜 雲吞皮炸過後浸上湯 鋪蟹肉 蟹肉少得可憐 上湯清甜 浸住炸雲吞皮卻無半點油味 材料簡單但很滋味 杏仁味香濃 口感順滑 布甸少甜 無乜特別 陸羽有好多傳統廣府菜式 而且味道和品質都有保證 只是價錢比較貴 偶爾食一次無妨

網上見到呢間餐廳有優惠 雖然折後都有啲貴 食材又係普通貨色 不過可以食到咁多台式食物 都想試吓 所以就網上訂位同俾錢 餐廳比較細 座位比較密 被安排坐喺廚房旁邊 不斷有熱氣排出 不是太舒服 上菜速度時快時慢 網頁上嘅鵝肝香菜吐司已經消失 無得order 澱粉類食物係正常size 好似想塞飽人咁 作為任食放題應該要調整返個份量 名叫小碗手工滷肉飯 飯量有超過一碗咁多 而且飯上面嗰啲係肉燥 唔係滷肉 滷肉係有肥膏 佢呢碗免治肉嚟 而且滷汁太杰 唔係滷肉飯嘅滷汁 米飯偏乾硬 無飯香 湯底一般 牛肉軟腍可口 但係份量太大 不是放題應有份量 大腸同小腸都‘燒’得唔夠耐 （台灣大腸包小腸都係用燒 唔知此店烹煮方法） 雙腸都唔夠油香同焦香 配料少 醬料欠奉 炸得幾香口 但係無九層塔和蒜 連鹽酥雞嘅靈魂 椒鹽都無 我只會稱佢為炸雞 不過不失 麻辣味偏少 靈魂人物 椒鹽唔見咗 第一次食甜不辣係配泰式辣醬 味道正常 蚵量同蛋量都十足嘅蚵仔煎蛋 台灣蚵仔煎會落芡水一齊煎 煎完仲會配混醬 而唔係右上角兜汁 唔係正宗蚵仔煎 所以佢先叫蚵仔煎蛋？ 芋圓比較清淡 無乜甜味 蛋餅 鴨血 飲品正正常常 為咗唔浪費食物 食咗太多澱粉質 飽到食唔到太多款式 我係台灣讀過四年書 除左牛肉麵之外 其他都唔太台式 我覺得係一間唔太了解台式食物嘅台式餐廳 菜式對唔住台灣 亦對唔住個價錢

Weekend無book位直接walk-in 門面簡潔美觀 點知一入門嘈到拆天 自己本身唔太鍾意嘈吵地方 因為要好大聲先傾到計 用膳後我同朋友都覺得喉嚨痛 坐低咗 侍應問我哋要sparkling or still water 我哋要still water 埋單先發現收$75一支 串燒食材一般 用料簡單 調味一般 偏鹹 比預期中普通 有正常入廚經驗嘅人都可以整得出 食左十幾款串燒 真係好一般 雞胗 雞甲狀腺 雞皮等部位好快就sold out 想食就要早啲嚟 Meatball口感唔錯 蛋味香濃 但偏鹹 Sweet corn tempura有驚喜 炸得香脆可口 唔油膩 會食上癮 試過就算 唔會再去食 食材 味道同烹調手法唔值呢個價錢 價錢平佢一半又比佢好食嘅串燒大有人在 近近地 蘭桂芳已經有一間 唔明白米芝蓮一星個point係邊 厭錢多嘅人可以去試試