食完晚飯即興找附近有無甜品食......就揾到呢間......感覺好傳統同專賣中式甜品.....坐低先知有西式😂 叫左個木糠布甸同焗粟子西米布甸，木糠布甸ok既......餅碎多同埋布甸都算滑既......粟子布甸就係即焗既，所以等左15分鐘左右，熱辣辣上枱好有冬天feel.......不過....無蛋味.....西米又太軟....無口感....粟子蓉餡都好少......好一般..... 即興揾甜品但無留意食評😅下次要注意下....

同同學仔想食快閃餐，拉麵一定係我地不二之選！ 一入門口就有一部自動售票機，先自行揀選食物，方便易明，好快就上餐啦🤩 兩個人叫左一個小龍蝦沙律、炸餃子、豚骨拉麵、蝦味增拉麵！ 小龍蝦沙律：去拉麵舖有沙律真係好少見，好多小龍蝦肉，好爽口同埋有蝦籽係入面，伴紫菜食正呀！呢個係拉麵以外必點既前菜！ 炸餃子：正常野，煎脆D會正D.... 豚骨拉麵：湯底呈奶白色，好濃豬骨味！拉麵係幼細直身拉麵，軟硬度剛剛好！👍🏻 一定要讚佢個豚肉！係帶爽口既豚肉，好少食到拉麵入面塊肉係中上架！ 蝦味噌豚骨拉麵：加入左櫻花蝦同味噌入豚骨拉麵，味噌味唔算突出。不過多左份櫻花蝦既鮮味～都係有半肥瘦既叉燒😋 糖心蛋：呢個真係好好好食！流心蛋蛋味好濃好重！超滿意！😆 試左圖片介紹既特辣食法，對我黎講唔夠辣呀🙈不過芽菜好好食呢！

Lunch time成日經過都見到好多人排隊既日本丼店舖。上網資料話係由東京黎既丼店！好吸引咁樣！店外係睇唔到入面有幾多個坐位，都估計唔到要等幾耐，好神祕既感覺！無得book位，今日排左10分鐘左右，人齊先入得。 店舖唔大（其實鰂魚涌間間食肆都係細細間既）但裝修好日本呀！有個壽司吧枱，中間既位客人會有機會面對面，但擺左植物做間隔令人舒服既～ 選擇唔多，揀左海宝丼【特上】。有紅肉，白肉，章魚，鰻魚，蛤，小扇貝，海膽，甜蝦，真雪蟹，鮭魚棒，黃瓜，魚介出汁，小鉢一種！今日小鉢係菠菜加少許鰹魚碎。 食材睇同食都好新鮮！好足料！舖滿日本米飯面仲要厚度唔野少！海膽好鮮甜呀☺️紅肉，白肉，章魚，鰻魚，蛤，小扇貝切粒後加左好多芝麻，好香芝麻油味但唔會食到成口油，本身自己都好鍾意芝麻既。依個丼令我諗起係日本沼津魚市場食過既丼飯，係預客人留返少少餸作茶漬湯飯！可惜海邊丼並無提供湯作茶漬湯飯，味道應該會好夾同埋結尾可以更完美😝海街丼仲提供左透明既柚子醋味啫喱，作拌飯用，酸酸甜甜好開胃！ 好推介呀！不過午餐黎講都幾貴，一個月食一次啦😙

Happy Friday即興去左天后尋味😆入左 八十八居酒屋🏮 叫左5 Dishes Tapas. 香蔥吞拿魚腩、蓉拌鵪鶉蛋、蒜片和牛粒、鰹魚他他燒、鮮蟹粥鍋、日本炸雞配土佐豆腐 另加串燒、豚肉露荀卷同羊架 ... 串燒好高質過和食普通，不過想講下食左兩個印象深刻既刺身： 深海池魚魚鮫刺身 ～ 壽司師傅話特別位，勁推介喎！不過油份無想像中重，口感真係特別既，好爽脆！ 沙甸魚刺身～ 之前食過沙甸魚刺身已經好鍾意！估唔到夏天既沙甸魚仲肥！油香重，濃味得黎又滿口油脂香！一客唔夠喉再encore左囉⋯⋯ 黎過三次啦，每次都好滿足！

食完晚餐後仲好放肆咁去左食糖水😅..... 康瑞就聽得多....今次第一次食康瑞亦都係第一次食芋圓.....😝 呢個係特式仙草配芋圓、地瓜圓同小丸子，入面仲有紅豆、薏米同西米。對我黎講芋圓定地瓜圓定小丸子都係粉狀野......好似媽媽整既無餡湯圓..... 食落去芋味同地瓜味對我黎講都好淡....唔岩我口味哦....🙈 另外叫左碗綠豆沙，正常野，一般般啦... 甜品呢...我都係鍾意食雪糕、涼粉，豆腐花或窩夫多D😆

膽粗粗試新野....開飯都幾多差評，但6款清酒放題2小時同活魚刺身好吸引.....都係忍唔住要去試下！ 一去到待應姐姐就問坐唔坐船，不過除鞋既時候發現係盤膝位，即刻轉走，我盤膝一陣都會腳脾，仲要著住裙添。。。反而見到佢d 4人細房好正喎，可以自成一閣，又唔使盤膝，不過尋日俾人book哂。建議訂位時先訂定房間，不過我唔知有無最低消費架.... 一坐好，想問清酒放題既時候，待應推介佢地日本引入既清酒機，$20一個代幣，買五送一，可惜...第一杯未斟滿就要維修....好好笑......整好左哥哥送多左2個代幣，不過一試就發現係室温清酒...原來部機無製冷功能，諗住放棄餘下6個代幣，直接叫放題，待應姐姐都好識做咁幫我取消佢。不過忍唔住再確認清酒放題係凍既先落單... 叫左絲鱲刺身、吞拿魚他他配山葵汁 、燒雞皮 、燒河豚魚乾 、燒免治雞肉棒沾蛋 、燒黑豚五花腩 、鹽燒牛舌 、安格斯牛肉壽喜燒 原條魚刺身好新鮮！絲鱲係爽脆口感既魚，跟埋同魚刺身最夾既酸汁！食完刺身，可以加錢將個魚腩同魚骨煲碗麵豉湯，不過真係好細碗😅 （唔記得影相添）吞拿魚他他賣相唔討好...但估唔到好有油香，唔錯。串燒正常野，唔係差但又無咩特別囉。牛肉鍋最正係個壽喜燒湯底，夠濃！配 稻庭烏冬正！ 埋單先知原來要自己釣魚先有7折，唔怪得知咁多人去釣同影相啦。雖然唔係好有興趣釣魚，但係知道有折既話一定去釣既🤣 不過哥哥都做返7折魚俾我🤓 有朋友問釣唔到魚點算，同埋點知釣到咩魚呀？.... 其實佢係有隔分開不同既魚區，有標示係咩魚同價錢，同埋哥哥係會幫手架，仲會俾你攞住魚獲影相相😆 會再去既，因為有清酒同活魚刺身👻 不過建議釣魚船屋可以俾多d資訊俾食客。如座位要盤膝、清酒機既温度、刺身既折扣呀。 六款清酒入面，比較鍾意飲甜口同米味重既杜の藏同物譽。 -杜の藏 純米吟釀 翠水 -物譽 純米吟釀 -高砂 特別純米 辛口 -真澄 純米吟釀 -獺祭 純米大吟釀50 -出羽櫻 櫻花吟釀酒

鰂魚涌新開既日本食店，雖然離公司遠少少.....不過真係高質D! 呢間好旺場呀，成日門口企滿人，早一日book lunch都好多時book唔到呀，咁快就咁多人知道呢間正野啦.....🙈 第一次試左帶子蔥吞拿魚腩丼！蔥吞拿魚腩夠油，連埋蔥同芝麻伴住食好正！佢既帶子好大粒好新鮮！呢度選料真係唔錯！同埋好欣賞佢個飯！粒粒分明又煙韌！醋既酸度恰好，一粒飯都無食淨...☺️ 同埋午餐跟餐有連哈密瓜沙律、蒸蛋同味噌湯，好滿足！又多間午餐飯堂～

食完飯總係覺得要有甜品先夠complete！ 試左佢兩個米豬蓮推介，燒菠蘿雪葩同杧果拿破崙。 燒菠蘿雪葩 - 新鮮菠蘿上面舖左糖，燒菠蘿只係燒左表面既糖，菠蘿唔似燒過......雪葩好淡味，似食刨冰多過雪葩....味道太單一啦....愈食愈悶....🙈 杧果拿破崙 - 認真打卡一流，個presentation真係好靚！杧果唔酸但又唔係太甜，仲加左杧果醬。搭得太高，一定要分開一層一層食，拿破崙都算鬆化，呢食得好開心🥳

幾年前黎過一次同媽媽慶生，印象係好好食。最近有想再黎既感覺而用開飯book位有個八折就黎左。 叫左兩個set dinner, 一個甜品。 落左單，先上麵包籃。法國餐廳既麵包真係好好食！外脆內軟！仲要熱住上枱，麵包唔食唔得！ 前菜： 烤鮮蝦沙律配芒果 - 用芒果salsa醬配沙律真係好好食！夏日感既沙律🥗 大蒜薯蓉湯配湮肉油 - 不過不失，無咩大驚喜 主菜： 雜菜扁意粉配羅勒鮮茄醬 - 扁意粉質地好煙韌，不過個醬個人覺得唔夠「茄」 西班牙黑毛豬扒伴普羅旺斯雜燴及薯蓉 - 黑毛豬味唔錯，薯蓉一般，少少薯粒都感覺唔到。反而佢個普羅旺斯雜燴好味，配薯蓉同露荀食 甜品： Apple tart - 特別在佢係一片片舖平既蘋果撻，所以出黎先可以咁薄...不過唔明點解要配椰子雪糕😭雪呢拿雪糕會夾勁多！

黎親銅鑼灣食飯，都愛飯後黎食返碗冰....我就特別鍾意蜜瓜涼粉冰！因為味道好似維他隻蜜瓜味豆奶.....😂 由細到大都好鍾意呢個味道！但係食哂全碗冰又會覺得太凍......所以配涼粉就剛剛好啦！朋友食杧果椰果冰，杧果夏天當造，甜度up, 不過好少椰果同爆珠......大部分都係杧果冰，食耐左會有d悶......下次都係跟涼粉啦～～～順便清清熱.....😊 蜜瓜涼粉冰.......上面仲有d蜜瓜粒 杧果椰果冰....得面頭幾粒椰果，下面全部冰