今日同朋友去左荔枝角個邊上堂，上完堂就順便去到D2 Place到食dinner。由於朋友話今餐想食得健康d，行過見到呢間餐廳嘅餐牌散發着健康嘅感覺，所以就決定入去試下。 我叫左呢個慢煮雞肉配海苔飯。雞肉煮得好到位，雖然係雞胸肉，但係就一d都唔實同柴，食落仲有少少肉汁，配上一個微辣嘅醬汁，攞黎送飯一流個飯除左雞肉，仲配有大量蔬菜，例如牛油果，青瓜，菠蘿，提子乾等，真係多菜少肉，非常健康。 而朋友就叫左呢個三文魚配沙律。三文魚數量都算多，而且配上自家制和風醬，淡淡酸味，食落非常之開胃。沙律嘅份量都好多，仲有秋葵，毛豆，豆腐，玉子燒等。 總括黎講，呢間餐廳可以話係健康人士嘅首選，平時少食蔬菜嘅朋友都可以得閒嚟試下，誠心推介

難得嚟到荔枝角，平時都好少行呢一區，以為佢冇乜嘢食，剩係得啲快餐店同埋連鎖舖頭。點知行經D2 Place附近，發現原來佢旁邊幾條街都開咗好多嘅唔同種類嘅小餐廳。其中一條街仲特別多西式餐廳，所以就決定去其中一間到試一試。 適逢下午茶時段，唔少餐廳都設有tea set。行過見到呢間餐廳個tea set價錢都幾吸引，所以我哋就揀咗黎試一試 我哋一共叫左以下三款嘢食： 首先，呢個意大利飯嘅水準同出面嘅西餐廳差唔多。個飯充滿黑松露嘅香味，而且食落仲有淡淡芝士味。以下午茶黎計，份量都算合理。如果平時鍾意食意大利飯嘅朋友黎到都可以一試。 餐廳係主打食豬肉，一場黎到，就緊係要試下。一試呢一個豬肋條，果然無令人失望，完全可以話喜出望外添。平時出面食開嘅ribs通常都係用烤嘅方法去整，而呢個就竟然用左炸。炸脆嘅外表好完美咁保留左ribs入邊嘅肉汁，外脆內軟，好食到自己一個都可以完成一碟。旁邊仲配上一個甜酸醬，令個ribs食落更加嘢未。佢個份量唔算多，應該係因為佢係下午茶餐加$20換購嘅緣故。 最後，呢個手撕豬扒包都係推薦食物之一。佢並非平時茶餐廳食開嘅普通豬扒包，佢係將豬肉撕成一條條，非常之方便進食。肉係一個字滑，而且配合埋佢個醬汁，真係好食到停唔到口。 雖然只係試左佢嘅下午茶set，但係好食嘅程度係令我再想去多次，因為要試埋佢其他食物

見呢幾日天氣涼涼地就好想食韓國菜。經過呢間韓國餐廳，見個價錢都算合理，就決定同朋友一齊試吓。 朋友叫咗呢個泡菜五花腩鐵板飯。用鐵板嘅方式上五花腩真係非常特別，上枱嘅時候仲渣渣聲。肉，係用咗真正嘅五花腩肉，而唔係平時普通個d薄切豬肉片。佢唔算話好辣，適合唔係好食得辣嘅朋友。肉加埋個醬汁，用嚟送飯一流不過要提醒一下，飯係要加$5先有。 而我就叫咗呢個岩漿炒飯。雞蛋嘅味道十分之出，配合埋芝士一齊食，真係好邪惡。炒飯係泡菜炒飯，但係要讚賞嘅係入邊竟然有幾塊五花腩肉，完全係意料之外。 另外，我地仲叫咗一個蛋捲。蛋捲加上明太子嘅鹹香味，食落好夾。 總括來講，呢間舖頭嘅價錢相對上比較平，但係都能夠提供到唔錯嘅韓國菜，而且店員嘅態度非常親切。途經荃灣嘅，可以一試囉。

今日行經荃灣市中心，見差唔多食飯時間，就決定揾間比較輕便嘅餐廳，一個人快快食個lunch。見好似好耐冇食過山西刀削面，於是就揀咗呢間餐廳入去醫下肚。 因為係細舖頭，所以座位比較密集，要搭枱 嘅機會率好高。但由於而家未到食飯時間，人數唔算好多，所以都可以接受，而且上菜速度真係好快。 我叫咗一份麻辣燻蹄刀削麵同一份蒸餃。雖然已經好耐冇食過，但係刀削麵仍然保持一貫水準，麵條食落口感一流。湯底都係一樣咁濃郁同香，無好強烈嘅味精味。舖頭嘅辣椒油係十分出色，建議大家食嘅時候可以加少少去調味。而個餃子就唔算話好出色，個皮偏厚，但勝在餡好足，食落去都係啖啖肉。 今次我完全係眼闊肚窄，如果再黎嘅話，我諗一個人淨係食一碗刀削麵都已經好足夠。從圖片都可以見得出佢個份量係非常之十足。

今日約左兩個朋友去到中環食lunch，黎左呢間號稱係”Probably the Best Burgers in HK”嘅burger舖，既然佢講到咁利害，就梗係要試一試啦。 Lunch set嘅價錢非常怡人，漢堡包有得免費配薯條。先講一下佢薯條嘅份量，我地三個人都食唔曬。除咗圖中所見嘅薯條，洋蔥圈同薯堡（類似變咗一個波嘅薯餅）之外，仲可以選擇沙律，適合愛健康嘅人士。薯堡同洋蔥圈都非常好食，如果薯條係粗身薯條就應該更開心。 我叫左一個魚柳漢堡。只係$89，竟然有兩塊又大又厚身同多汁嘅炸魚柳。初初叫魚柳就係諗住想食少啲，點知個份量仲大過牛肉漢堡。特別要讚賞一下個包，十分鬆軟嘅麵包。 Lunch set只係可以揀汽水或水。加$31，就可以轉奶昔，有朱古力，士多啤梨，香草同曲奇味可以揀。奶昔嘅都好大杯，我完全飲唔曬。 總括嚟講，呢間餐廳嘅lunch set都非常抵食，有機會行開中環可以一試。

今日有野要做，黎到中環附近。臨近中午時間自己一個行經IFC，見到呢間美國連鎖快餐店，就決定一試。其實呢間鋪頭已經喺香港開咗一段時間，而且仲開左其他分店，但有鑒於我有輕度排隊恐懼症😂所以一直以來都未有機會去食。 呢個burger以快餐店黎計味道都真係不過不失。先講佢嘅肉，食落去係有濃郁嘅牛肉味，比起其他連鎖快餐店嘅漢堡包，的確唔錯，對得住個價錢。特別要稱讚一下佢個麵包。並非用普通嘅白麵包，而係黃色麵包，對於我呢個「包人」黎講，食到一個咁鬆軟嘅麵包，真係非常幸福 除咗burger，我仲叫咗薯條食。見呢個芝士薯條都只係比普通薯條貴多少少，所以就豪不猶豫叫咗。薯條係粗身薯條，配上芝士醬，真係好邪惡，但係得自己一個人食，食落有少少濟。可能反而叫返普通薯條再配上茄汁加芥末醬嚟食仲好。 呢間中環分店有室外地方，係涼涼地嘅天氣坐起出面食，應該感覺一流，真係好似去咗外國咁。

呢排口淡淡，好想食啲香口嘅嘢食。行過荃灣，發現嗰幾條天橋已經開通左，相連嘅幾個新商場已經陸續準備開啟。今日就去咗其中一個商場嘅新鋪頭食日式炸豬扒。 未行到入去嘅時候就已經聞到好香嘅炸豬扒味，餐牌可以選擇嘅款式唔算太多，所以我都好快就揀咗要食邊一款，對於有選擇困難症嘅我非常好。 呢個吉列豬柳泡菜湯烏冬，個豬扒真係冇得頂，炸得非常之香脆。而個烏冬就正常水準，希望有機會會推出蕃茄味湯底，應該都唔錯。 另外呢一個係和風吉列豬扒飯，佢個醬汁非常之有日式味道，甜甜香香，價錢非常之便宜， 10分抵食之選。

今日喺假日，凍冰冰唔知食乜好，喺尖沙咀一路行，去到廣場附近見到呢間台灣舖就決定走入去試一試。 今晚晚餐係兩個人食，望一望個餐牌，價錢都唔係好貴，所以就決定攞飛入去。一撳咗張飛，都唔使10秒就已經有位。店務員非常好，十分有禮貌。最後點左餐之後，大概5分鐘左右就已經有食物上枱。 我地叫咗一碗牛肉麵，湯底非常之濃郁，牛肉亦鬆軟。湯底有些少藥材嘅味道，但係又唔會掩蓋左牛肉嘅香味。 另外叫咗個雞髀扒肉燥飯，同埋一個小食拼盤。個肉燥飯嘅雞肉非常之香脆，肉燥飯加上三樣小菜，有種回到台灣嘅感覺，可以一試。但係個酥炸小食拼盤就有啲失準，好似炸得唔夠熱咁。雖然就唔油膩，味道亦都好似喺台灣食嘅小食，但係有得揀嘅話可以先選其他小食。

今個星期日決定到荃灣區周圍行下，估唔到俾我發掘左一間不錯嘅西日餐廳。呢間餐廳位置就稍為偏僻，由西鐵站行過去都要少少時間。不過勝在Lunch一d都唔貴，而且食物質素不錯，分量足夠，行多兩步都值得一試。 厚厚嘅牛肉漢堡，配上燒汁加木魚，非常嘢味，仲有粗薯條加胡麻醬汁沙律菜作side dish，份量一定足夠。 同朋友再叫多左個雞翼做小食share，其實$68係有4隻，明太子及餃子雞翼各有兩隻，我未影得切相，就已經比人食左一隻。 雖然係一間日式餐廳，但係都有西式嘅嘢食，而且仲要免+1服務費，真係太開心了。

今日難得遠行去到尖沙咀食飯，知道厚福街附近多餐廳，就決定行過去望下。 我同朋友兩個人一人點了一個主菜食。雖然網上多數都係介紹佢嘅沾麵，不過今日我就一反傳統，叫了非沾麵類嘅食物。 個飯用石碢送上，絕對夠熱。芝士量十足，同飯撈埋一齊，做到拉絲效果，而飯亦有足夠嘅鰻魚汁，一個字，正。蛋就當然係糖心啦，不過因為太中意食半熟蛋，未影相就已經將佢成隻食左🙊而鰻魚都不錯，用來送飯一流，份量足夠。 最後，要讚賞呢間餐廳嘅服務。雖然有時限，不過一入門口就會提醒你。