之前喺YouTube睇到陳凱琳推介呢間燒味店嘅叉燒， 已經好想試。咁岩喺上環又有啲肚餓，就去咗呢間燒味店食晚餐。佢嘅燒味飯餐有好多唔同嘅拼法， 諗咗陣之後決定試佢嘅乳豬三寶飯。乳豬飯唔係間間燒味店都有， 就算有價錢都唔平。而佢呢間乳豬三寶飯只係$67， 仲有跟餐湯或者飲品，真係好抵食。 本身就想食佢嘅叉燒先至嚟，所以呢個三寶飯我就揀咗乳豬拼叉燒燒肉飯，做咗超級食肉獸。  落咗單之後好快上餐湯， 超級鹹飲咗兩啖就頂唔順
講返個三寶飯，份量超級足， 燒味大大嚿同埋飯嘅量都好多，已經叫定少飯，都仲係好多。 最出色嘅都係叉燒， 一嚟到已經聞到好香， 邊位燶燶哋香脆，叉燒汁好夠甜，鍾意食偏甜嘅叉燒一定唔可以錯過。 至於乳豬同埋燒肉呢， 都係偏瘦， 味道不過不失，同其他燒味店冇咩大分別。下次嚟嘅話我可能揀單拼叉燒飯或者就咁叉燒。

呢個星期天氣開始變凍， lunch時間特別想食啲辣暖下身。 中環嘅lunch time周圍都好多人，呢間樓上舖都一樣。如果大家想食到嘅話，就要提早少少去拎位。今次試咗佢嘅瘋狂擔擔麵同埋瘋狂肥腸面。一碗麵加杯嘢飲就係$83+1，或者可以再加配小食同埋甜品。呢個價錢喺中環來講算係抵食性價比高 本身唔係好食得辣， 第一次食都係叫咗BB辣同埋BB麻試吓先。 辣嘅程度比起譚x米線嘅10小辣來講冇咁辣，下次可以上一級小辣。
瘋狂擔擔面嘅麵質夠爽，煮得啱啱好， 個炸醬味都好香好夠味，撈埋青瓜絲同埋蔥粒更加好食 瘋狂肥腸面都好正，肥腸洗得乾淨， 味道唔錯但未夠入味，可以一試。 跟餐叫咗杯紅肉柚子，食辣野飲果汁都好夾

喺OpenRice見到餐廳嘅秋冬精選套餐， 當中嘅魚翅鮑魚餐都幾吸引，難得套餐入面每個餸都啱食，就諗住去試吓 我哋預早幾日book枱，仲有 window seat，維港夜景真係冇得輸。
前菜係口水雞同埋拍青瓜，口水雞係幾正，啲雞入味又滑。
之後就係蟹黃翅， 好香好正好足料。 飲完翅就到炆鮑魚同埋蒸石斑球。蠔油炆帶出鮑魚嘅鮮味出嚟， 但係XO醬配斑球就普通啲， 斑球變咗斑片，切得太薄。
完咗海鮮類就到花雕醉鴿同埋竹笙青菜。 醉鴿嘅份量兩個人食啱啱好， 鴿肉滑酒味香， 而竹笙青菜就可以一掃油膩感。
食中餐又點可以冇飯呢，龍蝦湯泡貴妃飯果然係 推介菜式之一。 前面已經食到好飽，諗住會食唔落呢個泡飯。但係個泡飯真係好香好好味，最後都成碗食晒。 最後嘅精美甜品係南瓜佬，佢入面有珍珠。
另外 額外加咗杯 Susie Wrong cocktails ，可以揀有酒精定係冇酒精 ， 你杯嘢飲都幾fresh，配中餐合適。 個杯型特別，飲完之後佢會幫你拎個杯去沖下水， 比個袋你拎走。 成餐飯嘅服務都唔錯，人手充足，上菜速度夠快，每個餸上到嚟都係熱嘅。

自從被某飲食網站介紹過呢間韓國餐廳之後，呢度嘅預約就變得好full，非常之難book。幾經辛苦，終於試到喇，我哋今次order左 呢度最出名嘅醬油蟹、鰻魚、豬腩肉同埋魷魚。每樣食物都好出色，免費提供嘅小菜都好好食，不過 小食食晒就冇得refill 全程有韓國阿豬媽幫手，佢會幫手烤肉同埋分好晒啲食物俾我哋，雖然佢講嘢態度有啲串串地，但係佢嘅廣東話都非常之好，聽得明我哋要啲咩，有陣時仲會搞吓笑搞吓氣氛。