兩個人坐一角卡位，闊落舒服，未落單就先送一人一碗紅棗雪耳糖水暖下胃，唔算太甜，幾清潤。 湯底揀咗鴛鴦麻辣鍋，加錢轉配季節限定羊肉湯。麻辣湯底以多種香料加上牛油熬製，鮮麻香辣，唔會得個油字，普通辣已經幾辣下，忍唔住要叫返碟鴨血過下口癮。羊肉湯羶味唔重，非常清甜，食之前飲返碗暖笠笠。 叫咗另一款冬日限定鮮拼九宮格，精選九款重慶特色鮮料，包括鮮黃喉、珊瑚蚌、竹笙、滷金錢肚、滷豬手、牛肉絲、牛丸、豬丸、黑松露墨魚丸。珊瑚蚌鮮甜爽脆，帶海水味。滷味夠入味。鮮肉丸爽甜彈牙。 除咗嫩滑嘅十秒牛舌之外，冇再叫牛肉，要留力食方叔叔推薦菜，包括幾款極之爽脆嘅內，稻田毛肚有嚼勁，鮮黃喉過癮，鮮鵝腸彈牙甘香。大刀牛肝口感似豬肝，味道就更濃郁。 飲品叫咗Sapporo生啤，凍啲嘅話會更爽，另外仲有衝上雲霄百香果雞尾酒，酸酸甜甜，酒味唔重，大大杯。 📍方叔叔重慶老火鍋 將軍澳唐俊街9號PopCorn 2地下G49號舖

🍴和牛漢堡 HK$78
食得多安格斯牛肉漢堡，今次試下和牛漢堡先。漢堡扒由澳洲草飼120日和牛製成，肉味同油香平均，雖然未至於爆汁，但夾埋日式焙燒芝麻醬一d都唔乾。包實漢堡扒嘅芝士係意大利寶伐朗芝士，味帶淡淡香甜，無較常見嘅車打芝士咁濃，唔會掩蓋漢堡扒嘅肉味。炸洋蔥絲好香脆，增添口感。麵包鬆軟，加埋黑白芝麻更加香。 🍴田園沙律、汽水（跟餐） HK$20
沙律份量相當多，絕對唔係得幾條草草了事，加埋辣沙律醬，一d都唔單調。

📍 Burgerman
大角咀埃華街95-97號地下

🍴帆立貝洋風沙律 帆立貝鮮甜嫩滑，醬汁酸中帶蔥油香，灑滿洋蔥、紫蘇花、食用花，格外清新。 🍴厚燒玉子 口感軟滑濕潤，味醂甜味剛好，富有蛋香。 🍴蟹肉忌廉 脆皮卜卜脆，炸得乾身，包住香軟忌廉同一絲絲蟹肉，先點吉列醬，再點蛋黃醬，夠晒滋味。 🍴特上壽司10件 壽司由廚師發辦，幾款白身魚味淡但清新，配搭蔥、柚子等唔同調味，唔會獨孤一味。牡丹蝦肥美爽口，表面蝦油蝦味濃郁甘香。帆立貝以醬油襯托鮮甜原味。赤身、拖羅蓉魚味油香平均。海膽甘甜無異味。 🍴玉子免治牛肉石頭飯 店員即席撈飯，熱辣辣嘅飯粒沾滿雞蛋，菇同牛肉又香又軟，放一陣再食，飯焦香脆到不得了。 🍴巨峰乳酸梳打、Asahi生啤 巨峰同乳酸味道濃郁，比例平均。 📍一門 銅鑼灣軒尼詩道502號黃金廣場4樓

The Base Nature嘅理念係將簡單基本食材加以變化，煮出健康好味嘅菜式。一坐低見到枱面有樽Detox Water，脫毒心切嘅我即刻飲番杯先。兩個人叫左兩道主菜，另加35蚊升級做套餐，有飲品同埋湯或沙律。




沙律揀左柑桔柚子味，食落精神為之一振。是日餐湯係南瓜粟米忌廉湯，香甜兼濃稠順滑，多士亦都夠脆。



🍴香煎日本刺身帶子配海鮮墨汁意大利飯 HK$148

一上枱已經香氣撲鼻，刺身級帶子大粒厚身，表面煎得好香，入面依然嫩滑，飯夠煙韌，啖啖海鮮墨汁香氣。



🍴韓式BBQ燒大三角牛肩肉漢堡 HK$148

薯格夠熱夠脆，唔會鹹得滯，絕非K咩C之流。食漢堡我通常唔會揀BBQ汁，驚太甜，但店員話韓式BBQ汁辣辣地，即刻吸引到我。牛肩肉肉味唔錯，微辣醬汁令每一啖都更豐富惹味，蛋煎得恰到好處，半流心，食得出係靚蛋。



西柚檸檬冰茶檸檬味較重，西柚味唔算突出，冷泡蜜桃蘋果綠茶酸酸甜甜，兩杯都清新解渴。

📍The Base Nature
荃灣楊屋道1號荃新天地一期UG70號舖

餐廳以黑膠唱片為主題，昏暗燈光配搭頂級音響，再加上當晚駐場DJ康家俊挑選屬於Pulp嘅Different Class大碟，靚酒靚歌靚晚餐，絕對係抵抗疲勞沖喜套餐。 🍴燒美國黑安格斯肉眼扒（10安士） HK$368 叫咗三成熟，肉質粉嫩富油香，法式伯那西醬帶蛋黃牛油香氣，濃而不膩，日本南瓜焦香甘甜，薑黃花椰菜、法邊豆都好鮮甜。 🍴慢煮法國鴨腿 HK$298 油封鴨腿肉質柔軟，酥脆甘香，可輕易用叉拆開，沙律有無花果、蜜柑、合桃，配上18個月意大利黑醋汁，清新解膩。 🍴Tiramisu HK$138 賣相精緻，咖啡同酒味唔算突出，不過不失。 🍴Santé by 壞特?te HK$148 雞味酒用歌曲命名，以白桃酒混合白玫瑰茶風味伏特加，散發白桃清香同茶香，湯力水嘅氣泡增添口感層次，調配出色。 📍Mercury Recalls by Lost Stars 銅鑼灣百德新街51號華爾大廈地下A號舖

🍴廚師拼盤 HK$148 好多餐廳嘅小食拼盤都幾廢下，現成貨炸熱佢就算，所以甚少會嗌。不過呢個拼盤就唔同講法，雞軟骨、水牛雞翼、炸生蠔、炸蝦雖則較為常見，但炸得乾身唔油膩，點少少日式芥末醬，出乎意料咁好食。真正吸引到我嘅係炸口水雞，辣中帶酸，好難唔流口水，雞肉用乳酪醃過，嫩滑多汁，配埋以三種辣椒加蛋黃醬調製嘅四川醬，辣味層次豐富。 🍴龍蝦喇沙汁魷魚意粉 HK$148 醬汁以龍蝦加上14種香料熬煮四個鐘而成，充滿醇厚龍蝦香氣，亦帶點椰香，而檸檬葉嘅清香更係畫龍點睛，呢個汁如果煮成湯，相信都會好出色。 🍴招牌骯髒意大利芝士餅 HK$82 咪睇佢成篤嘢咁污污糟糟，一食就知今次實肥死，因為會追住食唔停。一入口就散發濃濃酒香，口感極之軟滑，四周嘅朱古力餅碎增添層次，食極唔厭。 🍴藍檸檬梳打 HK$44 檸檬酸香鮮明，梳打夠氣唔太甜，清爽。 🍴黑糖焙茶 HK$45 奶滑香甜，慢慢飲嗒出茶香。 📍GoNuts. 將軍澳唐賢街29號藍塘傲格林威治村地下4A號舖

🍴蜜汁雞扒炒蛋多士 雞扒表面非常焦香，掛滿香甜蜜糖，一切開就爆晒肉汁，食落有燒烤風味，軟腍香口。 🍴經典芝士漢堡 簡單以牛肉、芝士、番茄、生菜砌成，冇乜整色整水，牛肉唔乾，車打芝士嘅鹹香帶起成個包嘅滋味，麵包亦幾鬆軟。 🍴牛角包窩夫雪糕 窩夫表面微脆，唔會太乾，配香甜雲呢拿雪糕剛剛好。 🍴冰搖咖啡 冰爽甘醇，果香鮮明。 🍴凍朱古力咖啡 朱古力味較重，順滑香甜。 餐廳佈置以鹿為主題，室外座位適合帶埋寵物共進餐，室內光線柔和，坐得舒服。 📍 Deer Coffee 西貢市場街25號地舖

耐唔耐就會去牛大人打邊爐，貪佢整體水準幾好又穩定，食過旺角、沙田、銅鑼灣嘅分店，今次食最近新開嘅將軍澳分店，照舊揀咗328蚊加一嘅澳洲極上和牛放題套餐。 揀湯底先，試過招牌牛大人紅燒牛骨鍋，牛味甘香，亦試過曾經限定嘅醍醐番茄酸辣鍋，酸辣醒神，今次就叫咗期間限定剝皮辣椒雞鍋。湯底帶較温文嘅微辣，一啲都唔油膩，大啖飲都唔驚，清甜回甘，雞肉亦好彈牙，飲完暖笠笠。 套餐包每人兩粒澳洲M9和牛牛丸，彈牙多汁。牛有好幾款，安格斯牛小排、澳洲M5和牛牛肩卷油香較突出，而手切封門柳就肉味較濃，瘦得嚟軟腍。 食咗無數沙白，隻隻鮮甜無沙，簡直係海鮮類嘅不二之選，蝦亦都幾彈牙。 其他方面，皇帝菜等蔬菜全部都好新鮮。蟹子墨汁漿香甜爽彈。鴨血嫩滑，鵝腸爽脆，非常甘香。 飲品除咗汽水同冷泡茶外，仲有幾款特飲，柑桔椰果酸酸甜甜，清爽開胃，椰果鹹鹹哋，層次鮮明幾過癮。 📍牛大人 將軍澳唐賢街9號Popcorn 2樓PopFood 3號舖

🍴煙三文魚沙律 沙律菜大大碟，煙文魚同飛魚子增添鹹香，沙律醬毫不吝嗇醬，想減肥嘅話記得嗌少醬或走醬。 🍴炸物拼盤 有豆腐、雞軟骨、章魚，幾香口唔算油膩。 🍴燒雞中翼、雞軟骨、番薯仔、羊腿肉 雞翼皮好香脆，燒雞軟骨比炸嘅油香更突出，番薯仔表面帶牛油香。 🍴明太子雞翼、金菇肥牛卷、大蔥雞頸肉 肥美雞翼包住明太子，香辣惹味，雞頸肉嘅雞皮軟滑甘香，雞肉彈牙有嚼勁，夾雜大蔥清香，層次豐富。 🍴最中餅雪糕 紫薯雪糕甜度適中，味道自然。 📍椈 中環榮華里13號榮華大廈A座地下G號舖

前排喺中環嘅first crack by summer ice飲過咖啡，幾啱我口味，今次嚟到堅尼地城嘅Summer Ice，回味一下咖啡之餘，試埋佢嘅招牌Waffle。 🍴Cream Cheese Salad Waffles + Duck Breasts with Garlic Combo 先食新推出嘅鹹食，鴨胸非常厚肉，外面煎得夠香，裡面彈牙多汁，特製嘅金銀蒜香而不嗆，食完唔會成口蒜味。 🍴Whiskey Apple Crumble Coffee Waffle 用威士忌煮過嘅蘋果粒香甜迷人，散發淡淡嘅酒香，脆脆增添刺激口感，微脆嘅窩夫亦夠乾身，充滿蛋香，唔會成口麵粉，再配上冰涼嘅雲呢拿雪糕，果然係Summer Ice嘅拿手好戲。 🍴Iced White 堅果味突出，奶滑甘香。 🍴Apple Cold Brew Cider 冷泡啡底甘醇不澀，果香鮮明，蘋果酒令口感更清爽，味道層次更豐富。 📍夏雪 西環堅尼地城山市街1J號地舖