呢晚唔想煮飯，又過開嚟深水埗，自然想喺呢度搵食啦！因為先生很喜歡夜晚可以飲啖靚湯同埋食吓家常小菜，所以最後都係嚟返呢間「雪山冰廳」。呢度環境細細但係唔算太逼，兩人或四人可選擇卡位坐。多過四人可選擇坐圓枱，悉隨尊便啦😁 坐低點餐，就俾黑板上面寫住嘅是日精選吸引咗。今日有倉魚/盲槽$98+椰皇川貝燉雞腳赤肉湯。二人套餐再抵啲，每人有一盅燉湯，另外可選一款魚同埋一款四季小菜，都只不過$168, 如果揀撚手或招牌小菜，每款都係加$10咋，所以真係超級抵食！ 😋椰皇川貝燉雞腳赤肉湯 湯清有椰香嘅味道，雞腳富含骨膠原。（雖然我見隔離枱有人不吃😅）但就咁飲啖湯，都已感受到滿滿的膠原蛋白，潤肺養顏喎😍 😋川汁蝦球滑雞煲 上枱嗰陣個石煲仲滋滋聲，夠曬滾熱辣🥵雞球走過油，皮脆但肉質嫰滑，而且腌得好入味，送飯一流😋 😋豉汁蒸盲槽 火候掌握妥當，魚肉新鮮嫩滑，好好味😋食剩條魚骨。我見每枱都幾乎點了一條魚。以呢個價錢嚟講，真係勁抵食啦👏🏻 😋上湯香菇浸時蔬 如果你唔講明要咩菜，店員就會自動送上雜菜，有西蘭花、菜心、白菜仔和芥蘭。啱曬鍾意食不同菜類嘅朋友仔喇！ 總括嚟講，呢度嘅食物款式種類相當多，有常餐，也有中式小菜菜可選擇，質素水準不俗，而且價錢相宜，深水埗區嚟講屬於中上選擇！

對上一次幫襯C兄已經係幾年前喺深水埗分店嗰次！今次知道C兄喺荔枝角D2 Place Two又開咗分店，於是就嚟咗呢度食個晚餐。D2 Place Two呢間分店比深水埗店更寬敞，一啲都冇壓逼感，坐得好舒服。 我哋總共嗌咗三碗番茄湯底嘅拉麵，三款唔同嘅餸，可以分甘同味！作為有金舌頭美譽嘅外子，第一時間feel到番茄湯底甜味較重，由於他本身並不嗜甜，所以就不甚喜歡。如果甜味少返啲，酸味多返啲，味道會更好！不過味覺呢啲嘢實屬見仁見智，各有喜好啦！ 以上三款麵順序是騸牯鮮滑牛（$54）、騸牯鮮牛面頰（$68）及香辣牛筋肉（$64），份量不多，可能牛很貴啦三款牛竟然最腍最好味係牛筋肉（我覺得啦） 題外話，餐廳沒有熱的飲用水提供給食客，不是十分理想，希望可以改善一下🤔

收到風知道最近餐廳推出咗「火焰醬香椰子雞窩」套餐，就拿拿臨約老公過嚟品嚐吓啦。呢間餐廳喺我地經常出沒嘅地點附近，已經幫襯過幾次，係屬於平民價錢嘅東南亞菜。最近天氣都幾清涼吓，點個雞窩暖吓身先。見到侍應遮遮拎住個煲同埋啲工具送到我地張枱。有個好得意嘅沙漏裝置，上面寫住＂Susan教你食椰子雞：先影相再飲湯最後先食雞＂搞到我好鬼期待添。睇見侍應遮遮點起個火，再淋啲酒落去個煲蓋等佢燒著，酒精即時引發火焰！此乃危險動作，小朋友切勿模仿！等到個沙漏流曬差唔多五分鐘左右，侍應遮遮再送上油飯及配料俾我地。打開鍋蓋，好香椰子味呀！呷啖湯，好清甜嘅椰子湯，忍唔住飲咗一大碗。湯面浮起少許雞油，但不致於太油膩。窩裡的雞肉好嫰滑，我地三扒兩撥就ＫＯ咗個椰子窩。跟住送上嘅特色小食拼盤，全部即叫即炸，送到枱面上仲係熱辣辣。特別推介脆炸鳳尾蝦卷，真係好香脆，兩條真係唔夠喉呢！最後再嚟多份星洲叻沙摻摻，料頭充足，湯鮮味濃，又係忍唔住飲曬啲湯，哈哈！
又係大滿足嘅一餐！

尋晚突然降溫，得返15, 16度，好想食啲暖笠笠嘅嘢。咁啱我哋喺佐敦附近，所以就同先生嚟咗官涌街市上面呢間新肥泉海鮮大牌檔！

我哋七點左右嚟到，已見到有人喺度打緊邊爐，好似好正咁但我哋得兩個人，所以都係嗌幾個小炒就好了。

我哋見到呢度有個90分鐘任飲任食小炒放題，每人第一輪可點兩個小炒，於是我哋就點咗以下👇🏻

❄️雪花肥牛粒，肉質軟腍得嚟有咬口，有肉汁唔會煎到乾柴😋❄️菜膽上湯雞，估唔到雞胸嘅肉可以做到海南雞咁嫰滑，半隻真係有啲唔夠喉😋❄️濃湯海味雜菜煲，熱辣辣嘅煲仔菜，啱曬而家咁凍嘅天氣，送飯一流😋❄️牛肝菌炒時菜，唐生菜好新鮮，配搭牛肝菌好清新。食肉時都要食返啲菜先符合均衡飲食原則呢😋食得曬先好再嗌，咪做大嘥鬼！我哋食曬四味餸之後，有啲意猶未盡，所以再點了一隻可愛BB鴿淺嚐😋❄️可愛BB鴿，雖然有啲細隻，但都有啲肉咬吓，而且肉質結實，炸得好香好脆，仲辣嘴的！呢度環境闊敞，光潔明亮，枱與枱之間有足夠距離。有大枱，有細枱，最適合一大班人或幾個人一起大快朵頤，小酌一番😋開放式廚房，可以睇到師傅們準備食物嘅過程！放題餐牌👇🏻

鋪頭位於一個絕不起眼嘅位置，喺車公廟站，溱岸樓下。若不是秦石商場冇啖好食，先俾我哋搵到呢間隱世魚米家！ 記得早十幾年前好多魚米家分店，唔知點解忽然變曬魚米。定係其實唔係同一間餐廳？魚米還魚米，魚米家還魚米家？儍儍分不清😅 講返食物，招牌即炸魚腐米線，幾乎每次必點。魚湯底好清，一點油都沒有，而且唔會好腥。如果感覺有點腥，可以用佢地枱面提供嘅自家秘製麻辣醬，好香，加啲落去湯度，增添風味。 魚腐即叫即炸，香脆軟糯又大粒，滋味十足

最近一直忙碌，稍為得閒啲就想去食碗米線。附近連鎖店嘅米線有時實在令人有啲奄悶，所以都係去遠少少，過嚟土瓜灣呢邊食碗真材實料嘅米線吧！ 我哋土瓜灣站D出口出，一路沿住大馬路行，去到啟岸嗰邊過兩個街口就係崇潔街，裡面呢檔食返碗人氣高質米線。 我哋用手機落單，兩碗三餸米線，食到飽飽，好滿足！幫襯得街坊小店，就唔係嚟食裝修，雖然店面殘舊，但嘢食好味搭救。 我點咗豬大腸，豬軟骨和豬紅。豬軟骨的軟骨部分炆得超稔而且好入味。老公鍾意食素，佢就揀咗螺旋藻，冬菇皇和蘿蔔。冬菇皇超級厚肉又入味，好食！ 另外，兩款小食蒜泥白肉肉和蒜香醬油單骨雞翼令人欲罷不能，屬必點小食！

為響應政府「香港夜繽紛」活動，我哋繼續夜媽媽出街覓食啦😆 今晚嚟到太子藍馬之城地下呢間蘇山雞飯！大約七點左右，已經見到鋪外有街坊排住隊等位，心諗應該「好得」，所以就決定喺度食個晚餐啦！ 手機落單，好快就落好曬！ ⭐豬手飯 勁大碟，豬手肉質嫩滑，仲有一隻鹵水蛋，些少酸菜和花生伴碟，夠曬風味！ ⭐排⻣福建蝦麵（轉米粉） 湯底濃濃蝦味，有兩件豆卜索曬湯汁，配埋米粉一齊食，真係鮮味十足呢！ ⭐ Susan炸雞翼 加$22就食得，好抵食，炸到脆卜卜，記住趁熱食呀！ ⭐鹵水蛋 鹵水太入味，食一隻唔夠喉，意猶未盡，再加多兩隻，補充足夠蛋白質😆 ⭐鹵水雞腳 再加$18嚟多個雞腳小食，補充骨膠原😆 ⭐蝦醬通菜 再炒多個通菜，食得豐富啲先得！ ⭐大滿足嘅一餐 ⭐個個都食得好開心！

今晚收工出長沙灣搵嘢食，經過🗻雪山冰廳！見到餐廳啱啱裝修完，變得高檔咗，而且空間闊落咗，座位多咗，仲坐得舒服咗 我們例牌嗌二人餐，有蒸魚，一款小菜和兩盅燉湯！ 🔮麥東花旗參燉赤肉湯 先嚟兩盅湯潤吓喉先。湯嘅味道甘甘地，好夠熱，好想再添飲 🔮清蒸盲鰽 蒸魚最考師父功夫，蒸到啱啱離骨，又唔過火。肉質嫩滑幼細，證明條魚非常新鮮！我哋見差唔多每枱都有條魚，認真受歡迎！ 🔮胡椒豬肚雞煲 拎上嚟仲滋滋聲用個鐵板盛住，減低冷卻速度。所以食到最尾都仲有些少微暖！雞件有煎香過，所以聞落好惹味呢！ 🔮茶走紅豆冰 我覺得紅豆配茶走，同配椰汁係截然不同嘅口味，而且我覺得比起配椰汁更好飲呀！呢杯特飲跟餐加$15，值得的！ 埋單$193兩個人，喺區內都算好抵食啦😋

今晚到尖沙咀辦事，辦好後已快七點半，於是又要出動覓食啦！ 剛巧經過呢間牛丼專門店，見裡面仲有位，唔駛排隊喎！以往經過油麻地、旺角都常見長長長人龍而卻步！今晚真係機會嚟喇！飛雲！因此二話不說就入咗去喇！ 第一次幫襯，揭吓個餐牌，選擇都非常之多！有牛、豬、雞、鰻魚等選擇！有單點、套餐，飯量亦有分大中小，果然係照顧到不同人的需要！ 點餐後好快送上兩份餐，白米飯好香好軟熟！平時夜晚我只會吃小半碗飯，但今晚我居然可幹掉整碗飯呢！雖然牛肉份量唔算多，只有幾塊，但撈飯的溫泉蛋和燒汁都啱啱好可以送飯！ 蜆肉好鮮甜，冇沙，麵豉湯好好味呀 唯一有少許介意就係那位落單的哥仔，竟然打住喊露為客人落單，雖然呢度唔需要加一服務費，亦唔期望有咩服務，但咁樣打住喊露嚟落單，我哋都係第一次見希望餐廳稍後可以增加QR CODE俾食客自助落單啦

平時成日經過都見到好多人喺外面等位，今日終於有機會一試，而且唔駛企門口等位添！ 咁啱今日兩公婆可以早收工，約埋5點半入去食，平日walk in唔駛排隊，！ 第一次食就揀個$248美國特級安格斯餐，有多啲肉類款式選擇，如安格斯特選牛板腱、美國PRIME極級肩里肌等。 我哋揀咗阿嫲養生濃湯鍋，湯底入面有紅棗杞子，滋補養顏，湯頭濃郁好好味！！ 唔講咁多住，落order先啦！叫咗新鮮海蝦、沙白，另外，牛、羊每款都叫咗啲，涮10秒即食，好！幾乎食咗一年嘅牛肉quota！ 即場做會員，仲即刻有9折coupon 迎新禮物！甜品係movenpick或哈根大師雪糕！！ 可惜120分鐘食得太趕，唔太啱我哋呢啲鍾意慢條斯理嘅人呢，哈哈！ 好好味，有機會再嚟大擦一餐！！