石門多野食就眾所周知架啦，今次要介紹既呢間餐廳位於廣場出入口，除左十分顯眼之外，店名玩味得黎亦可令人一睇就知道有海鮮食🐟 . 早排就同屋企人去左呢間餐廳食晚飯🥢，唔睇menu都唔知原來佢地主打海鮮之餘仲有烤魚🔥同海鮮火鍋🍲供應🤩 烤魚共有海鱸魚、江豚魚同珍珠鱲魚 3款魚類🐟，5種口味就有重慶香辣🌶、泰國冬陰功🇹🇭、海南黃金酸辣、蒜香醬燒🔥同新加坡椰香喇沙🥥；而辣度🌶亦有分為唔辣、BB辣、小辣、中辣同大辣5種，完全係顧及到唔食得辣同愛辣人士既口味😬 . 至於火鍋湯底就有泰國冬陰功🇹🇭、麻辣+豬骨鴛鴦🌶、香濃豬骨🐷、胡椒豬肚🐽、台式養生🇹🇼同芫茜皮蛋🥚6款，價錢有平亦有貴🤗 不論客人選擇以烤魚🔥還是係烚下烚下🍲既方式，亦可加配肉類、海鮮同各種火鍋配料，部分配料例如炸芋頭、沙爆魚肚、鵝腸更係平時係火鍋店度都比較罕見，選擇絕對係夠晒多🤗 ****************************** ✨蒜香醬燒烤魚🐟 ($268) 當晚我地就揀左肉質鮮嫩而肥美既珍珠鱲魚，配上蒜香醬，惹味得黎又唔會好鹹，味道更令人有種家庭菜既感覺🤗 對於第一次食烤魚既屋企人黎講，完全係刷新左佢地對烤魚既認知🤣 烤魚本身附有蓮藕、黑木耳、萵筍同芽菜，由於當既我地另外再工有加點配料，食完烤魚之後店員會埋黎為我地加湯，完全係一鍋兩吃既體驗😌 - ✨紅薯粉 ($30) ✨白菜仔 ($36) ✨油麥菜 ($36) ✨頂級黑豚豬腩片🥓 ($125) 作為餐廳必食既肉類之一，呢客豬腩片肥瘦均勻，口感柔嫩又有鮮味😋 雖然價錢唔算好平，但就屬於一分錢一分貨既質素😛 - ✨豬粉腸🐷 ($38) 豬粉腸同樣唔係度度都有得食，而呢度既份量唔少之餘，食起上黎爽口又夠粉，最重要既係食落無怪味，賣相望落亦夠晒乾淨，以呢個價錢黎講，絕對係物超所值🙊 - ✨青檸梳打🍹 ($32) ✨ 熱情果乳酪梳打🍹 ($32) 青檸梳打正常發揮，永遠係安全之選；而熱情果乳酪梳打味道就酸酸甜甜，不過熱情果味道就唔太明顯🤔****************************** 👧🏻人均消費：$300 (另+10%服務費) 😋味道指數：3.8/5 💰抵食指數：3.6/5 🪑環境指數：4/5 💁🏻‍♀️服務指數：4/5 👍🏻再訪指數：3.8/5 - 📍Seafood ghost 地址：沙田石門安群街3號京瑞廣場一期地下G11號舖 ⏰營業時間：11:30–22:00 (Mon–Sun) 🔍 #燕妮吃在新界區 #燕妮吃在石門

呢間恐龍主題餐廳💛前身係銅鑼灣一間日式腐皮壽司🍣外賣店🥡，早兩年仲係銅鑼灣返工時已經久仰佢既大名，最近得知原來早幾個月佢地已經由銅鑼灣搬左去中環📍 . 係餐廳門口見到有兩個牌寫住”we eat like a dinosaur”，估計店名既由大概係來自店主既想法💭😆 新店樓高兩層區分左廚房同客座，除左地方非常闊落更有如一間恐龍主題館🦖；店內有唔少仿草裝飾🌿作佈置，每個角落亦不難發現唔同風格既恐龍掛畫既蹤影，當由一樓行樓梯上二樓🦵🏻既時候，頗有走進侏羅紀公園🦕探險既感覺😆，實在不得不讚嘆店主既搜購能力👍🏻 . 作為主打菜既腐皮壽司款式超過20款，另外仲有唔少日式炸物🍘、麵食🍜同酒類飲品🍸等等，縱使餐廳走既並非傳統日系路線，不過配上如此獨特既環境，絕對令人有意想不到既感覺😉 ****************************** ✨柚子胡椒油甘魚蓉腐皮壽司🍋🐟 ($29) 加左柚子胡椒調味既油甘魚蓉味道清爽，魚蓉新鮮無筋 - ✨柚子左口魚腐皮壽司🍋🐟 ($32) 雖然柚子味道唔算太明顯，不過經過灸燒🔥後魚油被逼出，魚鮨味道突出😋 - ✨蔥吞拿魚拖羅蓉腐皮壽司🐟 ($30) 以肉眼所見有成5、6粒巨型吞拿魚切粒，切粒下面仲有吞拿魚蓉完全係超乎想像，對於吞拿魚愛好者黎講絕對係大滿足🥰 - ✨明太子三文魚腐皮壽司🐟 ($30) ✨牛油果三文魚腐皮壽司🥑🐟 ($33) 牛油果🥑配三文魚呢個千年不敗既組合一般都好難會出事，牛油果咬落去好有清新既感覺🌱，加埋三文魚切粒、甜甜既腐皮同壽司飯，整體味道好夾；至於明太子三文魚味道正常👌🏻，唔太特別 - ✨灸燒檸檬帶子腐皮壽司🔥 ($33) 帶子微微火燒🔥過後加上檸檬汁🍋，味道清新之外亦保留到帶子原來既鮮甜😌 - ✨灸蟹膏厚燒玉子🦀 ($29) ✨明太子燒玉子🥚 ($29) 甜甜既玉子上面唧左蛋黃醬本來應該會令人覺得偏甜，然而餐廳巧妙地係玉子下面加左塊燒芝士🧀，既可中和甜度亦令鹹甜味並全⚖️，食落比一般玉子壽司特別🤔 至於上面既配料個人認為有種配角既感覺，所以不論係蟹膏定係明太子，味道分別都不大🙈 - ✨日式炸豆腐 ($66) 有別於港式炸豆腐偏硬既外層，呢份日式炸豆腐外層非常酥脆，薄薄既外層裹住嫩滑豆腐充分地展現出外酥內軟既質感🤩 豆腐上面灑上蔥花、芝麻同紫菜，下面就有d醬油，估計餐廳係有煮過d醬油去中和鹹度，味道並無平時食到既咁重🧐 炸豆腐一客有四件，每件既份量都幾大舊下，不過考慮到食材本身比較廉價，呢個價錢令人覺得稍為進取左d🤔 個人認為下面介紹既單骨雞翼同樣係差唔多既價錢，CP值會略勝一籌😅 - ✨蜜糖牛油單骨雞翼🍗 ($69) 雖然係單骨，但係每隻雞翼都幾大隻下唔會無乜肉食，食落惹味之餘又夠酥脆，就算加左牛油🧈同蜂蜜🍯都無影響到雞翼香脆既口感，令人想一隻接一隻咁繼續食落去🤤 - ✨海鹽拖肥香蕉又係格仔餅又係窩夫窩夫🧇 ($128) 呢度既格仔窩夫係最傳統外脆內軟個種，口感唔算好煙韌但就唔會過於硬脆🧐 海鹽拖肥醬以玻璃器皿盛載，客人可以自己控制份量就最理想😉 佢既味道並唔似焦糖醬咁甜，就算倒晒落窩夫度都唔會令人覺得甜膩🙆🏻‍♀️ 除左新鮮香蕉🍌切片之外，窩夫上面亦灑有唔少燕麥片🌾、乾果🍇、朱古力釘🍫同焦糖爆谷🍿以增添口感 呢份窩夫一份有四大件，提返大家要食甜品就切記要留肚唔好食咁飽🤗 - ✨奶蓋白玉烏龍🍡☕️ ($59) 好多客人黎到呢度都會俾呢杯奶蓋白玉烏龍上面個串白玉串燒三兄弟🍡吸引到📸，而我都唔例外😝 白玉上面沾左糖粒再經過灸燒🔥，除左煙韌口感之外多左層好似焦糖布甸🍮既脆糖外層，為平凡既白玉帶來一種新鮮感🌟 另一賣點既奶蓋味道帶微鹹而不膩，質感濃稠綿密☁️，放耐左都無出現消散情況，加埋面頭既消化餅碎，好容易令人不斷咁”不”晒d奶蓋黎食🥄而遺忘左下面既烏龍茶🙈 大概餐廳係想突出返呢杯飲品既兩大賣點，個人認為烏龍茶☕️味道比較淡，飲到底仲飲到奶蓋未打發均勻既cream cheese顆粒，呢度會扣返d分😣 - ✨黑糖玄米茶拿鐵🍵 ($50) 朋友就揀左呢杯熱黑糖玄米茶拿鐵，玄米茶🍵與黑糖攪勻之後甜度適中，既有黑糖香亦飲到玄米茶淡淡米香☺️美中不足既係上面既脆米本來係可以令茶味更突出，但係就因為份量略為太多，飲既每一口都係脆米反而加重左玄米茶既苦澀味☹️ ****************************** 👧🏻人均消費：$310 (另+10%服務費) 😋味道指數：3.8/5 💰抵食指數：3.6/5 🪑環境指數：4/5 💁🏻‍♀️服務指數：3.8/5 👍🏻再訪指數：3.8/5 - 📍為食龍 地址：中環些利街2-4號LL Tower地舖及1樓 ⏰營業時間：12:00–16:00；18:00–21:30 (Mon–Sun)

前幾篇介紹過上環一間pancake十分出色既咖啡店💛，其實佢地係旺角618仲有一間擁有空中花園既中日咖啡屋名叫「蟲二」，可能有唔少朋友已經食過🙉 最近係ig得知佢地係旺角開左間主打墨西哥菜既三店，甚少食墨西哥菜既我就決定去品嚐下👅 . 餐廳位於洗衣街金雞廣場隔離既一幢唐樓入面，雖然唐樓比較殘舊，但餐廳既裝修一d都唔馬虎，踏入餐廳見到中央幾張工業風梳化同牆壁上面既工具同咖啡用具，加上店內寬闊既空間感，頓時令人有種別有洞天既感覺😲 . 到訪當日有幸遇上店主落場幫手，交流幾句後得知原來餐廳開設既原因純粹係佢同團隊都好鍾意食墨西哥菜，周圍食得多之後稍有心得就想開間主打墨西哥菜既餐廳🍴，不過考慮到墨西哥菜係食材上既運用唔多，佢地就鑽研出更加有特色同適合香港人口味既菜式✨ 幾令人意想不到既係呢度既調酒質素居然比酒吧出色得多，唔會只有冰🧊+果汁🧃而完全飲唔到酒味🥃，個人私心推介大家黎食野時不妨試埋呢度既調酒🍹，絕對高質😌 ****************************** ✨烤肉腸配自家製蕃茄醬🥫 ($88) 呢客混合左辣肉腸同芝士腸既tapas🧆份量絕對唔小，甚至比一般餐廳食到既大份得多😯 辣肉腸並無好似平時pizza🍕所食到既咁鹹，味道好似tabasco有少少辣🌶得黎又有種香腸獨有既煙燻味🔥 至於芝士腸就無需多講，入面好chessy🧀之外，加埋面頭既半溶芝士條令到芝士既味道加倍⬆️，個人唔太食到辣就比較喜歡後者🙉 烤腸上面配左餐廳自家醃製既椰菜，清爽唔會好dry，下面就有自家製蕃茄肉醬🍅，味道有ｄ似港式羅宋湯🥣，蕃茄既酸度亦有助降低膩滯感，食完都唔會好飽膩😉 - ✨ 15香料燉牛肉炒飯配煎蛋🍛 ($95) 炒飯加入左15種香料，帶有濃郁既香料味🌿 同時，配料亦非常豐富；除左大大隻太陽蛋🍳，仲有自家製牛肉🐮、洋蔥🧄、肉鬆、黑豆、橄欖🫒、粟米粒🌽同青辣椒，各種食材既配搭令人覺得好有新鮮感🌟 牛肉🐮經過多個小時燉煮，油脂被逼出之後chewy得好似叉燒，口感同味道方面都唔錯😋 值得一提既係炒飯內有青辣椒既關係，一路食會覺得辣辣地，過癮得黎又頗有墨西哥風味🇲🇽 不過完全唔食得辣既朋友建議食之前花少少耐性將d青辣椒挑走晒先至食👻 - ✨ Mobin墨西哥包🛸 ($105) 餐廳以港式墨西哥包🇭🇰入饌，下面加左芝士🧀香煎形成飛碟形狀🛸，係一道貼地又有親切感既fusion菜🤗 帶甜既墨西哥包加埋香脆芝士既鹹味，鹹甜味道混合有趣得黎又無違和感🙆🏻‍♀️ 墨西哥包配上煎蛋🍳、煙肉🥓同酸椰菜，煙肉同樣係比其他餐廳所食到既無咁鹹，加埋酸椰菜就更加清爽，食落唔會好油膩😋 - ✨ 紐約芝士蛋糕配龍舌蘭醬🍰 ($68) 蛋糕表層既龍舌蘭醬係以火槍🔥燒溶左既拖肥糖混合焦糖餅乾碎，加上龍舌蘭酒🥃之後倒於芝士蛋糕上面，既煙韌又有餅碎沙沙既口感，除左酒香亦有焦糖同玉桂既香氣🌟 芝士蛋糕質感幼滑細膩，帶有芝士清香唔會太過甜膩，整體黎講係幾特別既一件蛋糕🍰，值得一試👍🏻 - ✨ Teatini醉檸茶🍋($75) 呢杯只有伏特加🥃、檸檬汁🍋同蜜糖🍯既調酒，前調真係會覺得自己好似飲緊雀巢檸檬茶咁，酒味之後先會滲出，餘韻又會飲到鮮明既檸檬味，配合埋蜜糖既花香🌺，整體感覺好清爽，不過如果蜜糖既味道再突出少少🤏🏻就完美💯 個人認為呢杯調酒有港式風味🇭🇰之餘仲十分出色，同樣值得被推介俾大家🤗 - ✨ Cosmopolitan柯夢🍹 ($75) 呢杯調酒就有伏特加、白橙皮酒同蔓越莓汁，離遠就聞到橙香🍊撲鼻好吸引😍因為有蔓越莓汁既關係，味道甜甜地感覺上酒味無醉檸茶咁強烈，但兩杯調酒既酒精含量其實係不相伯仲，在此提返酒量淺既朋友千奇唔好俾蔓越莓汁既甜味呃到呀😆 ****************************** 👧🏻人均消費：$250 (另+10%服務費) 😋味道指數：4/5 💰抵食指數：3.8/5 🪑環境指數：4/5 💁🏻‍♀️服務指數：4/5 👍🏻再訪指數：4/5 - 📍Mobin 地址：旺角洗衣街37號1樓 ⏰營業時間：13:00–22:00 (Mon, Wed–Sun)； 🅞🅕🅕 (Tue)

最近升左職同事話要同我食餐晚餐慶賀🎉，經其他同事推介之後我地去左呢間位於灣仔QRE Plaza既西日式海鮮餐廳度食海鮮🐟 呢棟大廈其實有好多唔同類型既餐廳🍴，不過呢間海鮮餐廳我地就真係未曾試過😆 . 一出電梯就見到餐廳門口有幾個大水缸養住生猛既龍蝦🦞同螃蟹🦀，餐廳供應既海鮮菜式係揉合左西、日式製法，晚市除左單點之外仲有一個每位$288既精選套餐✨，有齊沙律 🥗、湯🥣、前菜🦪、主菜🍲同甜品🍮；以港島區地段同菜式而言，呢個價錢都幾合理🤔 . 店內環境令人感覺幾舒適，檯與檯既間距唔會太貼近，配上輕音樂🎵作背景，氣氛幾適合同朋友/情人談心🗣 除左環境舒適之外，餐廳既服務員會時刻關注👀我地既需要同進食速度，每當我地食完一道菜式之後佢地就會埋黎幫我地換碟💁🏻‍♂️，前後三次都係唔同既服務員，可見呢度既服務亦同樣優質👍🏻 食完呢餐之後，我地一致認為餐廳各方面既質素可以話係區內出眾之選，值得回頭同推介俾朋友🤗 ****************************** ✨精選套餐 ($288) 🥢時令野菜沙律🥗 雖然係套餐包既沙律，呢客蟹籽沙律份量相比其他餐廳來得大份，麻醬亦好足夠唔會太多或太少，沙律菜亦算新鮮，味道正常👌🏻 - 🥢麵豉湯🥣 味道清清地唔會令人覺得鹹，有海帶、娃娃菜同豆腐，湯料比一般日式餐廳飲到既更多👍🏻 - 🥢刺身三款 (前菜) 2選1既前菜有刺身同磯煮鮑魚可以揀，由於刺身每款有兩件，兩人以上可以揀晒兩款前菜完全唔洗爭😆 呢日既刺身係甜蝦、油甘魚同三文魚，3款望落都係晶瑩有光澤🌟，未食就已經知道有幾新鮮🤩 甜蝦🦐味道甘甜，肉厚爽彈有黏口既感覺👄；油甘魚🐟非常厚切，一片等於平時食到既兩片，肉質軟嫩帶甘香；三文魚🐟肥美而充滿濃郁魚鮨香氣，一客刺身呈現出甜、鮮、香，高質程度足以令人回味無窮👅 - 🥢新鮮南非磯煮鮑魚 南非鮑魚口感軟嫩，磯煮方式徹底將醬汁既甜味由外帶到內，入味之餘仲保留到鮑魚既鮮味😋 而且餐廳亦好貼心咁將鮑魚預先切件🔪，完全無需要客人落手🙆🏻‍♀️ - 🥢原隻活龍蝦焗飯🦞🍲 (+$120) 套餐既主菜可以揀活鮮蟹鮑魚汁焗飯(兩位起)🦀/壽司盛盒(6件)🍣/寶雲酥羊架🐑，落單時服務員向我地介紹💁🏻‍♂️如果唔想食蟹既話可以加錢將活鮮蟹鮑魚汁焗飯升級⬆️為原隻活龍蝦焗飯🦞，價錢按返龍蝦時價同大小計算，介乎80至150蚊；所以當晚我地就將主菜改為龍蝦焗飯，貪佢啖啖肉又容易食😈 焗飯以鑄鐵鍋上桌🥘，可以持久地保持熱辣辣♨️既狀態，而家天氣涼左黎食就最適合不過🤗 珍珠米顆粒分明，火候控制🔥得恰到好處，既唔乾硬，濕潤💧得黎又唔會有爛飯既感覺，口感幾有黏性👍🏻 一開始見到飯粒以為不過係醬汁撈飯都無咩特別，完全無諗過飯粒雖然深色，味道不單止唔鹹仲帶有一絲鮮甜，事後多口向服務員了解得知原來餐廳係將煮完鮑魚既醬汁加落珍珠米內一齊焗，所以每一口都係鮑魚汁精華所在；加埋少許🤏🏻薑絲同蔥花撈埋一齊食，味道好有層次感😋 大蜆大約有10隻，每一隻都飽滿肥美，新鮮彈滑，最重要係完全無沙，可以話係無可挑剔👍🏻 至於龍蝦🦞先煎香再連飯一齊拎去焗，火候🔥同樣控制得非常好，肉質爽脆彈牙同時鮮嫩多汁💦；由於係即撈即處理並非急凍❄️龍蝦🙅🏻‍♀️，鮮甜味道十分明顯，流質狀蝦膏味道亦濃郁，無諗過除左飯粒令人有驚喜之餘，海鮮部分亦同樣出色，個人強烈推介大家一試😉 - 🥢是日甜品🍮 甜品係以蒟蒻製成既烏龍茶凍，口感Q彈，茶香濃郁，感覺同飲緊一杯烏龍茶☕️無咩分別，但係就無茶既澀味；食完熱辣辣既焗飯再食返個冰凍烏龍茶凍，解膩同時又帶有幾分冰涼快感😌****************************** 👧🏻人均消費：$350 (另+10%服務費) 😋味道指數：4/5 💰抵食指數：3.8/5 🪑環境指數：4/5 💁🏻‍♀️服務指數：4/5 👍🏻再訪指數：4/5 - 📍Misu Seafood Cuisine 地址：灣仔皇后大道東202號QRE Plaza 26樓 ⏰營業時間：12:00–15:00；18:00–22:00 (Mon–Sun)

呢間💛cafe & bar既牛角包窩夫🧇之前見到唔少朋友介紹，呢日約左係銅鑼灣返工既舊同事聚舊就揀左去呢度食晚餐🍽 . Cafe & bar位於告士打道旁邊，外觀望落同大部分cafe無咩分別，實際上佢地日頭係cafe☕️，夜晚就搖身一變轉為酒吧🍸，所以日頭供應既咖啡同部分食物到左夜晚會暫停供應🙅🏻‍♀️ 一打開門就見到左邊L形吧檯同飲品製作區，不過最吸睛👀既絕對係店內兩個放滿bearbrick🐻既展示櫃，密密麻麻既figure散發住強烈既鈔票味道💸😂 除左figure，店內亦有唔少玩味十足既掛畫🖼望落幾盞鬼👻，有興趣既朋友切記要到訪埋佢地既廁所🚻，個人認為入面個兩幅係全店最有趣既掛畫😆 ****************************** ✨Al Forno迷你蟹餅配蒜香蛋黃醬🦀 (3件 $98) 炸蟹肉球口感酥脆，炸粉非常薄身🤏🏻，一咬落去就已經係啖啖蟹肉唔會只得個外殻，真材實料之餘又有蟹肉既鮮甜🦀 蟹肉球下面既蒜香蛋黃醬蒜味🧄唔會好重，蘸點少少黎食就更加滋味😋 - ✨鰻魚配炒蛋牛窩夫🐟🧇 ($118) 鰻魚同炒蛋堆疊係牛窩夫之上，前者鰻魚味道🐟突出同時又唔腥，配上木魚碎同鰻魚汁就夠晒惹味😋；炒蛋夠滑食落亦幾有蛋味🥚，切開之後見到頗為厚身，估計用左3隻雞蛋先有咁澎湃既份量🤔 至於牛角包🥐變成窩夫形狀之後唔會出現一切落去🔪會變腍或者過於硬脆既情況，香脆得黎帶幾分煙韌，牛油香氣🧈亦都幾濃郁，對於而家好多地方都食到鰻魚滑蛋飯，呢度配上近期大熱既牛窩夫反而帶來幾分新意，值得一試🤗 旁邊仲有少量沙律菜🥗伴碟，雖然只屬配角但係食落夠晒新鮮爽脆，岩晒鍾意食沙律菜既我😬 - ✨蜜糖燒烤醬烤雞件紅洋蔥菠蘿🍕 ($148) 呢度既pizza一共有8款口味，個人認為其中幾款甚具特色，而當日就被較少餐廳會用既紅洋蔥🧅作為呢款pizza既配料所吸引而決定一試😆 蜜糖燒烤醬味道酸酸甜甜，配上嫩滑雞件🐔有如食緊豬肋骨咁惹味😋 每件pizza都有一片juicy既菠蘿塊🍍，食落唔會好乾 不得不提既係pizza係手工製作🧑🏻‍🍳，批邊柔韌有咬口得黎又帶麵粉香🌾，好有法包🥖既口感；而批底雖然係薄批，但就並無因為上面鋪左食材同醬汁而變軟或變濕，依然保持到香脆口感😉👍🏻 - ✨墨魚汁意粉配帶子蟹肉蟹籽🍝 ($168) 帶子鮮嫩，墨魚汁意粉口感彈牙，調味亦恰到好處，另外仲有d杏仁片伴碟，撈埋意粉一齊食🍝令口感層次更豐富⬆️ 雖然口感同味道上都幾吸引，個人略嫌橄欖油落得重手左，同埋如果蟹肉🦀同蟹籽可以再多d就更好🤔 - ✨Al Forno Tiramisu🍰 ($68) 本人對於tiramisu有種莫名既喜愛💓，每次見到都必定會點😍 到訪當晚見到附近幾檯客人都有點🙋🏻‍♀️呢度既tiramisu，似乎除左牛窩夫之外，tiramisu亦係招牌菜之一🧐 呢度既tiramisu係將幾條手指餅乾拼埋一齊，係上面倒入咖啡酒同唧上mascarpone cheese，再灑上可可粉同唧上焦糖醬同朱古力醬伴碟🌟 由於手指餅乾並無浸泡過，部分依然保持餅乾原來既酥脆口感，當食到被咖啡酒沾濕既部分就令我覺得好有驚喜😳 咖啡味道☕️非常突出，當以為只有咖啡味之時酒味🥃而後一絲絲地滲出，低調得黎又令人難以忽略佢既存在，完全係咖啡味同酒味兼備⚖️；夾埋厚身而幼滑既mascarpone cheese一齊食，唔會有好甜膩既感覺，整體黎講係幾出色👍🏻 - ✨Halloween No Eyes See🙈 ($88) 呢杯萬聖節特飲no eyes see由士多啤梨🍓、荔枝、藍莓🫐同薑味汽水組成，店員好有心思咁以檸檬皮🍋同藍莓🫐作裝飾，賣相不錯，飲落有涼涼地❄️既感覺，飲完之後仲有水果可以食，整體黎講算特別👻 - ✨Flamingo🦩 ($88) 呢杯飲品就由菠蘿🍍、蔓越莓、檸檬🍋、Grenadine同梳打水組成，味道好似乳酸飲品咁酸酸地，幾適合怕甜既朋友🤗 ****************************** 👧🏻人均消費：$390 (另+10%服務費) 😋味道指數：3.8/5 💰抵食指數：3.5/5 🪑環境指數：3.5/5 💁🏻‍♀️服務指數：3.8/5 👍🏻再訪指數：3.7/5 - 📍Al Forno Cafe and Bar 地址：銅鑼灣告士打道218號地舖 ⏰營業時間：12:00–22:00 (Mon–Sun)

呢間💛cafe自2014年已經係上環駐足，舊址位於cafe百花齊放既太平山街時早已聽聞佢地既pancake🥞出色，不過後期認識更多既反而與佢地既食物無關😅 當年何韻詩被取消演出後係由cafe提供空間作為其演出場地🎤呢件事可能並非廣為人知，不過若提及到2019年香港既蛋糕師遠赴英國參加國際蛋糕節比賽以雨傘⛱、面具🎭同頭盔🪖作為參賽作品🎂而被DQ可能會勾起大家既印象，而呢位蛋糕師正正係cafe既成員之一😞 . Cafe現址係差館上街，雖然距離上環地鐵站🚇只有8至9分鐘路程🐾，不過要有心理準備路上要花d腳力🦵🏻行下斜路同樓梯🙈 Cafe以白色x木系為主，日系風格營造出一個舒適環境以貫徹店名理念：為客人提供會面同社交既第三空間，所以呢度有唔少客人係特登走上黎同朋友飲野食野🍴同傾計🗣 店內外牆壁更有唔少油畫🎨，最吸睛👀既莫過於店內藝妓畫像🎎，簡約又不失日本傳統味道；而盡頭係一個戶外空間，上蓋係溫室屋玻璃所以落雨🌧都唔受影響，而呢邊既油畫風格亦較為大膽，可謂魔鬼😈藏於細節🙊 . 到訪當日店內只有兩名店員👫🏼，收拾、落單、製作飲品食物同埋單工作全部由佢地一腳踢，不過佢地依然密切關注客人既需要，每次送上食物同飲品時亦會向客人講解同提醒💁🏻‍♀️ 可能好多人會認為呢d只不過係服務員最基本要具備既服務條件，不過每當遇到呢種有❤️‍🔥既店員，我都忍唔住要表揚一下👍🏻 另外仲想表揚埋佢地既廁所🚻，裡面空間雖小，衛生程度高得為客人帶黎另類既驚喜😂 ****************************** ✨24小時浸煮鮮豚肉角煮慢煮蛋穀米茶漬飯🍚 ($120) 呢客茶漬飯係倒入高湯之前就已經係一客日式丼飯，賣相吸引令人垂涎三尺🤤 豚肉🐷外皮煙韌，脂肪層爽脆而不膩，經過長時間烹製既豚肉汁鹹度點到即止並無蓋過豚肉本身既味道，惹味得黎又唔會過於濃味，上面更灑有紫菜、芝麻同天婦羅脆粒，增加口感同時亦令口感更具層次👄，送飯食真係一流🥢，就算唔係食肉獸既朋友可能食完3塊都會覺得意猶未盡😋 至於隻慢煮蛋🥚既蛋黃濃稠得黎又有蛋味，穀米混合珍珠米🍚同薏仁，前者飽滿圓潤，口感煙韌而且幾有黏性，與蛋液混合一齊好有細個食雞蛋撈豉油飯既感覺🙆🏻‍♀️ 日式高湯置於旁邊壺內🍶，鰹魚湯🐟既味道只帶淡淡鹹味作提鮮，客人可以按返自己喜好倒入合適份量；而配菜有炒本菇🍄同豆芽苗🌱，外加兩片紫菜，一客日式飯可以俾客人體驗到丼飯、茶漬飯同手卷三種👌🏻不同食法😌 - ✨招牌燒海鹽忌廉麻糬班戟配北海道牛奶雪糕及水果🥞 ($85) 班戟一共有7款口味，分別係原味、藍莓🫐、伯爵茶☕️、黑朱古力🍫、宇治抹茶🍵、花生醬煉奶🥜同黑芝麻，選擇多得令人每一款都想試🤩 當日就挑選左比較罕有既黑芝麻口味，班戟厚實而鬆軟，既無日式梳乎厘既空氣感☁️亦非蛋糕🍰般口感，非常特別😋 而班戟內更包有本人最愛既麻糬，煙韌得黎唔會過削，中間仲有d類似係黑糖麻糬條既物體，甚具特色🥰 班戟上面黃色既係海鹽忌廉，賣相同口感有d似吉士醬，當中夾雜少許海鹽粒🧂，有口感得黎味道鹹鹹地，與班戟既甜味相得益章；上面更灑有香烤燕麥粒、乾果、煉奶同埋焦糖脆片(好似食緊焦糖布甸咁🍮)，豐富得黎亦唔會喧賓奪主🤗 雖然牛奶雪糕🍦既牛奶味道🥛未夠突出🌟，如果只有雪糕多少都會影響到我對呢客班戟既觀感，不過正因為上面淋左濃郁既黑芝麻醬可以彌補到雪糕既不足，我依然會以出色黎形容呢客班戟👍🏻 - ✨泡泡龍 (鮮檸檬氣泡齋啡)🍹 ($48) 呢杯泡泡龍由氣泡水、lemonade🍋、espresso shot☕️分層而成，飲管由底部吸上最先會飲到類似係檸蜜既甜味🍬，繼而係lemonade既苦澀並夾雜espresso既果酸味🍇，去到最尾苦澀味又返返黎，餘韻頗為濃烈，係非常有層次既一杯凍咖啡，不過就真係只有少數既人先會接受到檸啡又苦又酸既味道，至少我身邊係無人欣賞🤣 店員拎埋黎既時候溫馨提示過攪拌既時候唔好太用力免得氣泡會谷上黎，個人認為氣泡唔乾，一開始飲既時候係好爽，不過放左一陣之後氣泡就已經差唔多消失晒，稍為扣少少分🤏🏻 - ✨宇治抹茶豆乳拿鐵配北海道牛奶雪糕🍵 ($48) 抹茶拿鐵用上豆乳，口感比一般既抹茶鮮奶更加濃厚😌抹茶味道唔算濃郁，回甘唔太明顯，味道帶幾分苦澀而後滲出淡淡豆味，不過因為牛乳雪糕🍦本身帶甜，同抹茶豆乳拿鐵攪勻之後就唔覺得苦，適合初接觸抹茶飲品既朋友🤗 ****************************** 👧🏻人均消費：$150 (另+10%服務費) 😋味道指數：3.9/5 💰抵食指數：3.7/5 🪑環境指數：3.8/5 💁🏻‍♀️服務指數：4/5 👍🏻再訪指數：4/5 - 📍 3rd Space 地址：上環差館上街16號地舖 ⏰營業時間：10:30–18:30 (Mon–Sun)

已經有一段好長時間無食過鍾意食既日本野(特別係魚生😫)，早幾日同朋友去左呢間💛日式居酒屋食晚飯🥢，終於可以得「嚐」所願😋 . 居酒屋位於銅鑼灣百樂中心，裝潢佈局同菜式既賣相並無太多既花巧，走既都係平實路線；雖然區內甚至係同棟大廈內有唔少競爭對手，到訪當晚平日七點零鐘已經爆場，建議大家提前訂座就最穩陣啦😉 . 呢度係以手機scan QR code🤳係網頁內落單，入座既時候店員會講返啟用既驗證碼，menu以食物種類區分令人一目了然👀 ，用法簡單又方便⭐️ ****************************** ✨秋葵刺身沙律🥗 ($88) 魚生切粒🐟以麻醬預拌好，當中夾雜秋葵同青瓜🥒，面頭亦鋪左唔少蟹籽，份量十足👍🏻 不過居酒屋實在太過大方，個人認為麻醬過多以至魚生既鮮味被蓋過，如果少返d麻醬就更加理想😅 - ✨心之蛋卷🥚 ($88) 呢客蛋卷不愧為呢度既招牌菜，嫩滑既雞蛋🥚入面捲住蟹籽、三文魚碎🐟同芝士🧀再唧上沙律醬同茄汁，邪惡又惹味😋 - ✨邪惡包😈 (2件 $76) 上一道菜式邪惡在於醬汁，而呢一味就在於食材；本來紫菜夾壽司飯只係平平無奇，但係夾埋帶子同鵝肝就唔同講法😏 灸燒過🔥既帶子就算熟左都依然保持刺身時既鮮嫩，加上入口即溶既鵝肝係咀嚼過程之中滲出不少油脂，每一下咀嚼動作都令人游走於罪惡同滿足之間🤩 另外建議食前蘸點少少醬油🥢，有助提升味道既層次會更加好食😋 - ✨京蔥雞肉串🍢 (2串 $40) 去居酒屋無理由唔食燒烤串😆呢份雞肉串有兩串，每串有兩件雞扒切件，雞肉🐔外層抹上照燒汁，味道惹味而肉質嫩滑💛 大蔥經過醬燒後辛辣味全消，剩下甜味同大蔥既香氣，平時唔鍾意食蔥既我都食到🙆🏻‍♀️ 另外都提返大家呢度所有食物都係即叫即製👩🏻‍🍳，燒烤類食物既製作時間⏱會比其他菜式稍長🤏🏻，最好食住其他菜式等候😉 - ✨彩虹卷🌈 ($68) 呢客彩虹卷每一面各自沾上白芝麻、墨魚汁、蟹籽同魚鬆粉以呈現唔同既顏色，入面係青瓜🥒同炸蝦🍤，可謂係睇得又食得既「心」思「之」作💛 - ✨香蔥石板牛舌👅 ($68) 剛煮好既香蔥牛舌上桌時仍處於滾熱辣狀態♨️，食起上黎啖啖好正，不過單食會略嫌燒汁味道偏甜，要配返啖白飯🍚作平衡⚖️ 話雖如此，呢客牛舌🐮既份量多得有如一客主食都係68蚊，性價比黎講都真係幾高❗️ - ✨原條鰻魚石鍋飯🍲 ($118) 原條鰻魚🐟長到連石鍋都裝唔落要架係上面，單係視覺效果已經贏晒😼 至於肉質嫩滑無骨唔似橡膠，就算係急凍貨❄️，居酒屋亦無hea底，照樣抹上燒汁拎去香烤🔥，鰻魚既油脂被迫出，尾位更帶點焦香比一般鰻魚惹味🤤 珍珠米煮成既白飯🍚粒粒飽滿有口感，貼近鍋底既更加因為石鍋既熱力形成一層香脆既飯焦，食落脆卜卜好有咬口😋 - ✨藍蝶花白桃乳酸🍑 ($48) 作為一間居酒屋除左酒精飲品之外亦會有乳酸飲品供應，呢杯白桃乳酸🍹加左蝶豆花溶液之後變成夢幻紫色漸層💜，乳酸既味道都幾突出，飲落酸酸甜甜，不過桃味🍑就無乜🤨- ✨薄荷菠蘿特飲🍹 ($38) 薄荷🌿帶點清涼感覺❄️，味道唔會太強勁，至於菠蘿味🍍同樣唔算明顯，但整體既味道無上一杯咁甜🍬，個人黎講比較鍾意呢杯🙈 ****************************** 👧🏻人均消費：$316 (另+10%服務費) 😋味道指數：3.7/5 💰抵食指數：3.7/5 🪑環境指數：3.5/5 💁🏻‍♀️服務指數：3.8/5 👍🏻再訪指數：3.7/5 - 📍心之食堂 地址：銅鑼灣耀華街3號百樂中心12樓1203室 ⏰營業時間：18:00–22:00 (Mon–Sat & Public holiday)； 🅞🅕🅕 (Sun)

今次介紹既呢間💛梳乎厘pancake店外觀非常獨特，如果閣下平時活躍於旺角一帶，相信應該知道我講緊既就係個架長期「停泊」係油麻地同旺角交界既黃巴士🚌 . 呢架黃巴士除左係菲律賓🇵🇭同泰國🇹🇭有加盟店之外(遲d連阿拉伯都會有😳)，更威水既係韓國綜藝節目《Running Man》📺係2018年快閃香港當時曾經光顧過及進行拍攝工作📹 時至今日佢地既人氣依然旺盛🔥，就同店名一樣，一年四季不分晝夜路過都總會見到佢地旁邊企左唔少客人等候pancake即時製作👩🏻‍🍳，受歡迎程度真係不容小覷🤫 . 相比各日本過江龍pancake專門店🇯🇵動輒接近/超過一百蚊，呢度既日式梳乎厘 pancake 就親民得多，65蚊已經有三件(D24榴槤口味除外)🤗 除左主打既pancake有成9款口味咁多之外，呢度仲有6款近期大熱既牛角包窩夫🥐、3款日本3.6北海道牛乳奶昔🥛、6款牛乳雪糕🍦同5款珍珠牛乳🧋，選擇都算係幾多😉 ****************************** ✨芒果糯米飯梳乎厘🥭🥞 (雙塊 $50) 雖然炎燒布丁梳乎厘🍮係呢度既招牌口味，向來鍾意食芒果糯米飯既我當日見到居然有呢款口味仲係新推出既就梗係唔會錯過🤩 Pancake口感鬆軟綿密☁️，上面淋左芒果吉士忌廉同芒果粒🥭，食落甜甜酸酸😋；就算吉士忌廉既芒果味道強烈，依然能夠食到pancake既蛋香🥚 旁邊有一球新鮮熱辣♨️既椰汁糯米飯，口感軟糯而不爛，質素並不遜於泰國食店，整體黎講都幾高質👍🏻 - ✨D24榴槤3.6牛乳奶昔🥛 ($50) 雖然本人會食榴槤，但就唔知點解硬係唔太接受到榴槤食品😅（有無人係同我一樣？🙈） 呢日突然對呢杯榴槤奶昔好有興趣就點左黎試下，好彩呢次初體驗帶俾我既係驚喜而唔係驚嚇🤣 奶昔非常幼滑濃厚，夠冰凍❄️得黎又唔會有冰沙感🧊，上面仲有一大舊榴槤果蓉，每吸一口奶昔都感受到濃郁既榴槤香氣同果甜，但就無榴槤獨特既個種「臭」味，飲完仲會有淡淡餘甘殘留於口腔，令我一飲就愛上🙊強烈推介俾榴槤愛好者一試‼️ - ✨宇治抹茶牛乳雪糕🍵🍦 ($35) 牛乳雪糕口感幼滑，奶香味🥛濃厚，只係扭紋雪糕上面灑既抹茶粉味道唔太明顯，要食到去杯底部分先食到呢款口味既主角 — 抹茶凍🌟 抹茶凍既茶味🍵唔算太突出，味道略嫌偏苦，建議連埋雪糕🍦一齊食以雪糕既香濃味道去中和返d苦味會比較好😅 個人最滿意既係面頭個塊威化餅夠晒香脆，加埋冰涼雪糕就份外滋味😋不過要留意返雪糕既溶化速度都幾快，影相📸️千奇唔好影得太耐，否則好快就會變返做一杯牛乳🥛架啦😜 ****************************** 👧🏻人均消費：$68 😋味道指數：3.7/5 💰抵食指數：3.5/5 🪑環境指數：3.3/5 💁🏻‍♀️服務指數：3/5 👍🏻再訪指數：3.7/5 - 📍am.pm 地址：油麻地彌敦道560譽發廣場地下B舖 ⏰營業時間：14:00–22:30 (Mon–Sun)

之前每次由上環行去中環見到呢間💛台灣食店已經好想幫襯，最近係社交平台上得知佢地早排係觀塘開左分店📍又難得而家每個禮拜都會同朋友去一次觀塘，呢日就決定去呢度食返餐🥢
.
標題之所以用隱世黎形容呢間食店係因為佢地採用既係落地磨砂玻璃，係街上係睇唔到店內既環境👀 加上工廠區燈光較暗🌘，如果唔係係食店門口見到banner同對照食評app上餐廳大頭照所見到既和風門面，真係行過左食店都唔知🚶🏻‍♀️..（當晚就發生左呢個情況🙈）
.
觀塘分店呢度除左保留中環店原有既台式料理之外更多左幾款日式飯類🍱 既供應，而為左吸引附近返工既朋友，呢度既價格亦貼近返區內既消費水平，所以比起中環店會較為相宜🌟
******************************
✨仙草奶茶🧋 (升級組合價$12，原價$24)
每次飲台式奶茶都好怕會飲到一杯奶水🥛，當日就點左呢杯仙草奶茶揀左要無糖，估唔到個茶底🍵居然會咁濃郁，奶味唔會好重，而且仙草仲係帶有真·仙草個陣味道同埋Q彈口感，完全無諗過會一杯仙草奶茶都可以咁有驚喜😍
-
✨冷泡四季春🍵 (升級組合價$12，原價$24)
至於冷泡四季春茶就比較普通，茶味正常不過不失，想飲無糖飲品解渴係不錯之選👌🏻
-
✨紅燒牛肉麵🍜 ($78)
湯頭味道微甜而略帶微辣🌶，不過味道就略嫌唔夠紅燒，同埋鹹酸菜既味道偏重，會有種喧賓奪主既感覺😕
牛肉🐮既份量有四大塊，雖然並非半筋半肉，勝在煮得夠入味兼牛味濃郁，適合追求啖啖肉口感既朋友😉
麵條方面，呢度用既係烏冬，係口感上同讚岐烏冬一樣咁彈牙，呢度稍作加分算係彌補返湯頭既不完美，總括而言個人認為係正常發揮既👌🏻
-
✨魯肉乾麵🍝+貢丸湯🥣 ($58)
魯肉選用既係肥瘦分明既五花腩🐽，脂肪最外層同豬手既皮一樣食落煙煙韌韌，個人黎講就好鍾意呢度魯肉既口感😍
美中不足既係五香粉調味較重，撈完乾麵之後令整體既味道會有d辣🌶 同埋有一點比較特別既係呢度既魯肉帶有筍味而且甚為強烈，如果唔食筍既朋友就未必鍾意🙈
至於貢丸湯內既貢丸口感紮實👄，如果有試過自己落手整既話就會知道以天然食材整出黎既肉丸口感上係會不如市面食到既加工肉丸咁彈牙，至於d貢丸係咪食店自家製就不得而知啦😅
-
✨鹽酥雞🐔 ($38)
鹽酥雞炸得夠乾身唔油膩，香口酥脆肉質唔鞋，調味料既份量亦適中，雞塊帶來既香氣聞落仲幾有台灣味😋
大概係台灣人既口味比較重，個人認為呢度既鹽酥雞係味道方面同台灣當地食到既始終有d分別既🤏🏻
-
✨烤台灣香腸 ($28)
香腸同樣唔油膩，並無出現泛油情況，旁邊更附有蒜片🧄俾客人以台灣慣常既食法將蒜片搭配香腸一齊食🤗
蒜片既辛辣味既可平衡香腸既甜味，同時亦令味道更加有層次，令平時抗拒食蒜頭既我都忍唔住要按照台灣人既食法去食😋
-
✨炸花枝丸🦑 ($28)
花枝丸入面係係真材實料既花枝片，就算放涼後食，花枝既味道依然突出，不過個人就認為前面兩款小食會較為吸引🙈
-
✨魯蛋🥚 ($12)
魯蛋唔算太入味，個人認為無乜特別，略嫌欠缺左d台灣風味😅
-
✨芋圓仙草凍🥣 ($35)
望住店員端上呢碗芋圓仙草凍個刻真係有d驚訝😨，因為食店係用返盛載牛肉麵既大碗同托盤💁🏻‍♂️，35蚊居然有咁大碗，單係份量呢點就已經完勝😳
仙草同前面仙草奶茶介紹過既一樣，有仙草味得黎仲Q彈到震騰騰，加埋黑糖糖水底同不可或缺既奶油，整體黎講非常有台灣風味😋紅豆顆粒分明得黎咬落去好粉，食落似係自己煮既味道👨🏻‍🍳而唔係台式飲品店食到既罐頭貨色，所以味道唔會過甜😌
而三色芋圓所用既木薯粉比例亦拿捏得好好，口感夠煙韌之餘更會見到裡面帶有纖維；加上每粒食到既味道都不一樣，有d較淡有d就較濃，雖然同樣唔知係咪店家手工製作，不過可以肯定既係呢度既芋圓係真材實料，並非以人造色素整出黎👍🏻
個人認為縱使呢碗芋圓仙草凍未必係全港最好食既，但係就絕對唔差同對得起呢個價錢，值得推介俾各位芋圓/仙草粉絲一試🤗
******************************
👧🏻人均消費：$150
😋味道指數：3.4/5
💰抵食指數：3.6/5
🪑環境指數：3.8/5
💁🏻‍♀️服務指數：3.8/5
👍🏻再訪指數：3.6/5
-
📍一起食堂
地址：觀塘開源道48號威利廣場地下G5號舖
⏰營業時間：08:00–20:30 (Mon–Fri)；
08:00–18:00 (Sat & Public holiday)；
🅞🅕🅕 (Sun)
(📍中環亦有分店，營業時間或有所不同)

今次介紹既呢間💛cafe位於西環堅尼地城，有趣既係佢地既店名經常會令人誤以為係專為單身人士而設，實情係呢間係一間以單品咖啡為主既cafe☕️，佢地每季會精選一個產區既咖啡豆作重點推廣💁🏻‍♀️，一款咖啡豆有兩種烘焙程度同6種煮製方式可以選擇🤗 而到左夜晚6點(Tue–Sat) 佢地仲會供應埋單一麥芽蘇格蘭威士忌🥃，讓客人先醒而後醉😆 . 除左係有酒飲既單品咖啡店之外，呢間cafe更加係元朗錦田Cohee Studio💛既姐妹店，後者雖然位置偏遠但極受追捧，平日下午都要等成一個鐘先入到座🪑，所以舊年年底得知佢地係港島開左呢間cafe☕️已經想一試，不過就拖到今年二月先去，而呢篇食評更加過分地拖到而家至出…..🙈 不過有一點想講既係堅尼地城呢度供應既食物同元朗店係有d唔同，同時因為地段關係，價錢上亦稍為比元朗店貴🤏🏻 ****************************** ✨Eggado Cheese & Onion Bagel🥯 ($88) 麵包類菜式一共有5款，客人可以選擇配sourdough/cheese & onion bagel，另外會有沙律菜伴碟🥗 相信黎呢度既客人9成都會揀bagel🥯，除左因為酸種麵包🥖既味道未必人人都岩之外，某程度上bagel既賣相比起酸種麵包更加吸睛👀，更方便影靚相📸打卡🤣 當日我地就點左呢客炒蛋牛油果三文魚籽cheese & onion bagel，牛油果🥑新鮮又鋪得夠靚，炒蛋🥚夠滑不過就無乜味道😕 至於bagel🥯雖然芝士🧀同洋蔥🧄味並重，但麵包口感較重而唔係個種以煙韌/嚼勁為主既手工bagel；整體黎講賣相係唔錯，可惜味道同口感就不能抱太大期望🥺 - ✨Homemade Tiramisu🍰 ($68) 據說傳統意式🇮🇹做法係會有兩層mascarpone cheese再夾雜兩層手指餅乾，而呢度既tiramisu賣相望落合格✔️，兩層mascarpone cheese質感幼滑，屬於較為挺身個種而非半流質狀 不過未知cafe係咪想著重咖啡☕️既味道，手指餅乾既酒味🥃並唔明顯，濕潤感💧亦唔算好重，會有種越食越甜膩既感覺😓 - ✨Honey Mascarpone Cream Waffle🧇 ($68) 呢件窩夫上桌既時候仲係熱辣辣♨️，外層帶有珍珠糖脆粒食落甜脆，裡面鬆軟得黎又不失煙韌口感😋 窩夫上面既mascarpone cream質感順滑，雖然睇落好似好膩，但因為有士多啤梨🍓同藍莓🫐呢兩種帶有酸度既水果可以中和一下，食落就無呢個問題🤔 旁邊亦灑上好有咬口既脆糖粒同蜜糖🍯，縱使呢件窩夫有幾款唔同既糖加埋一齊，個人認為佢既甜度亦無上一款tiramisu咁高，稱得上今餐最有驚喜亦係最滿意既item💛，相信日後再有二訪都係因為呢件窩夫🙈 - ✨Caffe Latte☕️ ($58) 二月光顧既時候cafe正供應埃塞俄比亞Guji咖啡豆，根據menu既cupping notes，呢款咖啡豆既風味帶有茉莉花花香🌼、菠蘿🍍、柑橘🍊同紅加侖既果香 店員送上一set兩杯咖啡既時候有提醒過可以分別品嚐latte同espresso去感受一下咖啡豆，然係寫係托盤附上既卡片上✍️，同時亦可以scan返qr code了解返關於呢款咖啡豆既詳情🤳 本人平日都會飲下齋啡，當日先飲完一啖latte再飲espresso，只覺得後者味道既濃亦酸，無諗過自己居然會唔太受得住😓 不過之後再飲返latte就覺得味道同一開始所飲到既略有不同，果味變得明顯左🌟 個人認為咖啡店既理念係幾獨特既，不過對於無乜咖啡知識/平時唔飲開espresso既客人要杯測師上身咁去品嘗一杯espresso，某程度上係有點兒對牛彈琴，同時亦都浪費左一杯咖啡，糟蹋左農民同炒豆師既心血….🥲 另一點就係因為多左杯espresso☕️，係呢度飲一杯white要58蚊然而只有6oz左右都幾貴下，建議cafe可以考慮有單杯同體驗組兩種選擇，而唔係要客人捆綁式消費既模式🥴 - ✨Green Tea Latte🍵 (H $48 / C $58) 呢度既抹茶鮮奶口感順滑，不過奶味🥛比較重，抹茶味道唔算濃郁亦無乜回甘味，唔難飲但就唔特別😐****************************** 👧🏻人均消費：$165 😋味道指數：3.5/5 💰抵食指數：3/5 🪑環境指數：3.7/5 💁🏻‍♀️服務指數：3.5/5 👍🏻再訪指數：3.5/5 - 📍For Single 地址：西環堅尼地城厚和街6-18號滿發大廈地下D號舖 ⏰營業時間：09:00–18:00 (Mon & Sun)； 09:00–22:00 (Tue–Sat)