藍田平價西餐廳，網上評語好比差多，就試吓佢啦。今次第一次去食，6:30左右唔洗等，餐廳大約八成滿座。 墨魚汁小章魚墨魚意大利飯（$58），配料豐富，有三隻小章魚，仲有啲墨魚、蘑菇同蜆。但個意大利飯唔得，都食得出少少墨魚味，但係成個飯未收晒水，成個湯飯咁...... 活蜆蒜香煙肉忌廉汁天使麵（$54），配料足，蜆仔都算多，仲有蘑菇同雞髀菇。天使麵軟硬適中，但嗰汁真係唔得！食落好稀好水，唔夠creamy，亦唔係好夠味...... 水牛城辣汁烤雞翼（$25），雞翼唔乾，無咩辣度，加埋表面嘅汁食落酸酸哋。本來呢樣餸會成為開胃之選，好可惜，雞翼裏面唔入味，亦都唔似平時食開嘅水牛城雞翼，失望！ 前—法式焦糖燉蛋（$16） 後—瑞士巧克力奶凍（$16） 甜品原價$26，可以$16優惠價跟餐叫！兩個甜品都發揮正常，為成餐飯加返少少分！ 下次如果想食意粉，以更平嘅價錢去食薩利亞好似好啲！

鳥語，環境舒適好坐，唔會趕人走！環境唔算大，有分榻榻米同枱位。今次就揀咗坐枱，貪佢唔洗屈住對腳！ 富士山黑豚肉咖哩飯（$118），吸睛之選！但味道麻麻地啦，咖哩唔辣，入面黑豚肉份量都多，仲有啲菇。可能為咗塑形，啲飯就比較硬。 挪威鮮三文魚拌溫泉蛋紅菜頭天使麵（$138）， 又係賣相滿分！天使麵撈溫泉蛋，麵條食落滑嘟嘟，味道唔算驚艷。三文魚稍稍煎過都唔會難食得去邊嘅～ 原隻軟殼蟹配羅勒青醬意大利飯（$148），賣相擺盤都係冇得輸。隻蟹同一掌一樣大，重點係個意大利飯好好食，軟硬適中而且好入味！ 紅酒牛柳配牛肝菌意大利飯（$158），擺盤襯色靚到絕。牛柳味道普通，半熟狀態，唔會太韌。值得一提，又係個意大利飯，好食x2。 總結，食物賣相打卡一流，必點有意大利飯嘅餐點。價錢少少少少貴，不過間唔中一餐都ok啦~

呢個鋪頭開咗一段時間，已經聽過幾次朋友好評，今次就嚟一試究竟！ 一坐低就即刻叫咗制作需時嘅招牌菜—辛安東元祖奶奶雞半隻（$158加一），少辣。一上枱，賣相幾靚。如果兩個人食，份量都夠。 以豉油燘燉，味道有港式感覺😂。除咗雞塊，仲有啲配菜（蘿蔔、薯仔&青瓜）。不得不提係，墊底嘅韓式粉絲超入味！粉絲呈闊條狀，有厚度，咬落煙韌彈牙，正！ 傳統韓卷($48加一），味道正常，料都算豐富！大家一定要沾沙律醬嚟食，好夾！ 另外仲叫咗籠韓式泡菜小籠包（$58加一），內餡札實，無湯汁。與其話佢係小籠包，不如叫返佢韓式餃子... 總結：除咗奶奶雞，其他都有一般！ 順帶一提，店員親切有禮，值得一讚

天氣凍凍哋，最啱食啲有湯嘅嘢食，而冬蔭公豬頸肉湯河（$52）就係不二之選，食飽暖笠笠！湯底少辣，酸味比辣味重，愈食愈開胃！另外，湯粉有嚼口，唔會一夾就散。豬頸肉稍稍煎過，好香口，正！ 乾炒金邊粉（$50），普普通通，不過就比較油。最驚喜嘅係，入面有菜甫粒粒，估唔到增加到口感之餘，又幾夾噃！ 我仲追加咗份小食，香茅炸雞中翼兩隻（$13），一般般，唔夠脆。好彩入面唔鞋，好多肉汁！建議可以叫下其他小食！ 店舖面積唔算大，當炒嘢炒到有鑊氣嘅時候，會有啲煙霧瀰漫嘅感覺😂不過唔會維持好耐，放心！

SEDAP惹味馬拉，位於商場嘅偏辟位，好易走漏眼。今日突然想回味係吉隆坡嘅味道，就決定試下呢間餐廳！ 鮮蝦炸粿條（$62），一人份量，炒出嚟色澤唔錯，食落香口有鑊氣。除咗面頭個幾條芽菜，仲有啲雞蛋片同魚蛋片。粿條入面嘅蝦仔一隻手數得晒，好在唔霉仲好彈牙！ 馬來沙嗲雞肉串（$28），雞肉唔鞋口唔乾，個醬都幾好食，好多花生粒係入面！ 印度飛餅配咖哩汁（$42），小小辣。飛餅燒焦部分脆卜卜，下面餅皮夠軟熟，外脆內軟不過味道一般。下次可以skip~ 環境睇到廚房位。 餐牌仲有好多選擇！

錦麗，主打越南pho，好評如潮。開咗咁耐，第一次試。平日經過門口都大排長龍，今日晏就去食，好難得等咗5分鐘就入得！ 坐低即刻叫個生牛肉河（$63）試下！生牛河睇落勁多油浮面，好在飲落又幾清，好重牛味！正！牛肉超足料，剛熟透的牛肉好稔。不過河粉份量有啲少。 枱上有個貼紙教大家最佳食用方法！唔怕辣嘅朋友，一定要加辣椒調一調味，微辣食落仲過癮，同行友人最後成碗湯都飲埋 加多個小食啱啱好飽肚。雞肉米紙捲（$30），橫切面好吸睛，雞肉都算多，加埋其他蔬菜，口感滿分！ 友人叫嘅綜合牛肉粉，同我個生牛河比較都大同小異。係多咗牛丸、牛腩（？），生牛肉份量少咗。 其他菜式（非牛肉控就未必啱食！）店內有自助斟水位，叫唔叫嘢飲就悉隨尊便啦～

定食8，糧尾救星，門口已經有大大個poster寫住最平$38起！ 我就揀咗平價定食套餐之一嘅，熔岩芝士豬排丼（$38），加麵豉湯同茶碗蒸（另加$10），當日無茶碗蒸就換咗個布甸畀我！ 豬排份量都算多，兩塊肉中間夾住芝士，啱啱上枱，芝士仲拉得出絲～外皮唔算係好酥脆。呢個價位嚟講，叫做及格啦！ 另外，散叫咗個明太子雞翼（$28），入面明太子一啲都唔吝嗇，咬落去超juicy！高質！ 同行友人叫咗個厚切鰻魚飯丼（$58），有蛋絲襯托，賣相夠靚！食落鰻魚夠淋，無細骨，okay啦！ 店內裝潢，有自助茶水供應，惟枱與枱之間太近，空間不足。 留意返，要收加一服務費！

歇腳亭，人氣手搖飲料店，每次經過都好多人。普遍大家都會簡，珍珠奶茶，奶蓋綠茶等等。 計我話，歇腳亭最好飲嘅一定係樂活水果茶，少甜少冰。$26夠晒大杯，入面仲有啲橙肉同百香果籽，夠晒咬口。

牛摩，屯門長龍店，每個週未都好多人。今次預先喺The Gulu拎定電子飛，避開人潮！ 今次進食時間係9:00後，入座前就要簡定套餐種類同湯底，我哋一行兩人就簡咗精選牛肉套餐，黑夜時段60分鐘放題每位只係需要$139（加一服務費）！ 我的是蕃茄湯底，有蕃茄粒同洋蔥。友人的是泡菜湯底，微辣。以放題來說，精選牛肉油花花紋都算唔錯，不過就比較薄，無咩嚼勁。除咗牛肉，仲可以簡豬肉同雞肉！ 店內環境闊落，位與位之間唔算逼。而放題區選擇應有盡有，有丸有菜；墨魚滑夠彈牙，蔬菜夠新鮮。當日進餐時間較晏，食物都唔係fill滿，都啱嘅，唔好做大㗰鬼嘛。熟食方面，就有壽司、炒飯同白飯，啱晒大食嘅朋友！ 飲品區選擇都算多，仲有兩款沙冰𠻹！去到甜品區，賣相唔吸引...夾咗幾款嚟試，泡芙係最好食嘅。而雪糕都有三種，對芝麻無興趣嘅我只係試咗乳酪雪糕，唔夠酸！隔離有toppings可以加上雪糕，朱古力脆片、波波、蜜糖星星脆唔脆就要睇吓運氣啦。 食到一半，竟然見到有響鈴夾。雖然唔夠新炸嘅好食，不過有就都值得一提！ 戰績：2個人，4碟牛，1碟豬

峯，門口有日式門簾作裝飾，店內座位用嘅都係木枱木凳，感覺簡潔乾淨，一啲都唔嗡耷。鋪面位置不大，某啲位置坐低後可以見到廚房。 當日午市時段人流唔多，唔駛等就直接入座。午餐定食有四款，咖哩牛肉、雞塊、豬排和吉列蝦。每部定價為$50，送罐裝汽水，想飲其他飲品（eg凍檸茶）就要加錢啦。 咖啡豬排定食一定係首選！豬排夠大塊，切開六份，外表酥脆，炸粉唔算厚，入面塊肉有咬口。而咖哩都不過不失，有啲紅蘿蔔粒。碗飯份量睇落好少，正常女仔食應該啱啱好。溏心蛋蛋黃夠流心，不過食落就無咩味。 同行友人有嗌牛肉同炸雞定食，牛肉比較普通，雞塊都夠juicy～ 以呢個價錢喺觀塘覓食，都算係咁㗎啦！