今晚在觀塘晚飯，揀了這間日本餐廳試一試，坐落環境都可以，唔算太迫，而且人唔算太多，都唔駛等位。入到去點選了一個吉列日本三元豬柳、火灸三色海鮮丼、燒黃花魚一夜干同埋一個魷魚圈天婦羅。先講吉列日本三元豬柳，幾香口，咬落去又唔韌，同埋最緊要係要，應該係即炸即上枱。另外火灸三色海鮮丼，裡面都有幾多款刺身，有三文魚、帶子、吞拿魚，同埋有左口魚，呢個丼嘅重點係左口魚，食落去好香口。而魷魚圈天 婦羅食落就無咩特別，同一般其他日本餐廳無咩分別。反而成餐最正嘅係「燒黃花魚一夜干」，最初以為係啲魚乾(即係類似鹹魚嗰啲)，點知上枱時先知係一條正常嘅魚。但係呢條魚好好食，廚師將條魚起咗骨，但係望落完全覺。食落去條魚好香，魚肉好滑，魚皮好脆，脆到連啲魚鰭同食尾都食埋。本身條魚有一個醬汁同檸檬，但係完全唔需要都已經好夠味。一般我多數都只係食龍脷魚(因為無骨)，但今次呢條黃花魚真係無得頂。

每逢假日都會到此店食同一款早餐，奶油脆豬，包面有少少牛油，再配煉奶，加上包夠脆，幾好食。沙嗲牛肉麵，不用轉出前一丁，麵身都夠硬，不會同其他茶餐廳一般啲麵淋晒，牛肉份量正常，但夠入味，再加上辣椒油唔太辣，但夠香，令到成碗麵都好好食。以三十幾蚊嚟講馬鞍山算唔錯。

今晚聖誕節，食完陳漢記煲仔飯，跟住就搵吓附近有無糖水食，於是就入咗呢間「飯後甜品」。今晚點了芒果甜心同糖甩，芒果甜心食落幾香，入面個牛奶布甸同云尼拿雪糕幾夾，再佩上芒果，幾好。糖不甩方面就無咩特別。

聖誕節晚上沒有去叫聖誕大餐，反而去大埔食陳漢記，平時都要排長龍，諗住今日聖誕節，啲人應該都會出去食聖誕大餐，唔會食中餐，應該唔會太多人，不過事實係都有好多人排隊，要排成半個鐘先有位。今次分別點了公司臘味煲仔飯、滑雞牛肉潤腸煲仔飯、炸兩、白灼魚皮同腐乳通菜。先講煲仔飯，公司臘味當中包括了臘腸、潤腸同臘肉，都幾香，但如果有埋臘鴨應該會更加香；另一個滑雞牛肉加潤腸，啲雞都真係幾滑，牛肉片亦幾大塊，而且都有幾多件雞同牛肉，整體份量都幾多。同時亦都叫咗碟炸兩，不過就一般，無咩特別；反而碟腐乳通菜幾有驚喜，啲腐乳真係幾香，配合埋通菜真係幾好食。白灼魚皮就都算爽口，但無咩味道，係要靠豉油先有啲味。

以前食過幾次，都覺得無得頂，雞煲同火鍋都好正。但今日再去，大失所望。雞煲依舊好正；但火鍋就完全唔得。今次火鍋要在鴛鴦鍋，分別係豬骨同麻辣，豬骨完全淡而無味，同用滾水煮無分別，麻辣就鹹到嘔，而且完全唔辣，水準同以前差好多，失望而回。

Boxing day 無嘢做，去了花園城的和氣食堂食日本料理，夜晚都算多人，等了大約三十分鐘有位。坐位間隔普通，尚算企理，有點傳統日本食堂嘅感覺。鋪頭採用QR code點菜，唔會落錯單。今晚點了韓式豚肉石頭飯、黑松露帶子卷物、黑松露左口魚壽司、芝士三文魚壽司、芝士同蒜蓉燒廣島壕、燒雞翼、芝士燒大肉菇同串燒牛舌。先講豚肉石頭飯，唔係太熱，食落啲飯淋咗少少，豚肉味道普通。帶子卷物幾香，但中層塊紫菜有點硬。左口魚壽司同三文魚壽司就幾香口。廣覺壕方面就蒜蓉較芝士出色，味道較香濃。燒雞翼好香，同夠熱夠脆。芝士燒大肉菇好正，味道好香，隻菇好濃味，好多汁。牛舌唔算太香，咬落仲有點硬，較為失色。全部咁多加埋都係四百幾蚊，算經濟抵食，可以再去。

這天晚上在這高級的意大利餐廳享受晚餐，早前都試過3次，每次都是早一個月訂，但都訂唔到窗邊位，今次終於訂到窗邊位(應該是因為訂坐時有向餐廳提及是在當晚求婚)所以在兩星期前訂枱也可以安排窗口位)，在102樓向外望，份外高級。餐廳環境很華麗，十分高級。侍應也服務週到，首先會有一個頭盤，然後每一道主菜也很精緻，每次上菜時侍應也會作介紹。今次因為特殊關係，餐廳也有為顧客作特別配合，更額外送了一份甜品及紀念品給客人，令客人留下一個難忘的晚上。雖然價錢是貴了一點，但無論餐廳環境、週邊景觀、食物質素、侍應的服務都是頂級，絕對值得一試！

晚市唔算多人，叫咗個炒麵同凍檸茶，但係等足半個鐘先嚟，仲要嘢食未到時叫你埋咗單先。心諗乜都未有，連杯檸茶都未到，但係要俾錢先，真係離譜。隔離枱叫個常餐沙嗲牛肉麵，人哋都追咗幾次，都係等足半個鐘，問啲侍應話煮緊，但係煮個公仔麵駛唔駛半個鐘呀。晚市唔算忙都咁，喺返工地方午市仲唔死多幾錢重，真係唔會有下次。