成日經過駿業街熟食中心，今次終於入去睇吓有咩食。入面其實都幾多食店，見到這間「五月食堂」，個餐牌同門面都幾吸引，於是入去試吓。 先講店舖裝修，一定唔係五星級，但同以往去過啲熟食中心食肆唔同，呢度個環境都算幾乾淨。 一入到去，相信應該係老闆娘，服務很好，馬上遞上餐牌，見到都幾多選擇，分別叫了個燒春雞餐、無骨咸豬手意粉、鹽燒多春魚同天婦羅軟殼蟹。落咗單之後，即刻送上兩碗湯同煎餃子。碗湯都幾清甜，而隻餃子就正常。， 到個正餐方面，隻燒春雞啲肉都幾嫩，同埋都幾香，薯角就熱辣辣，個蒜蓉牛油鮮檸檬汁用來點薯角食其實都唔錯。而無骨咸豬手意粉，啲肉食落好香，皮好脆，唔韌，正。 小食方面，鹽燒多春魚又係好脆，而且唔算太鹽，幾好食。天婦羅軟殼蟹就幾大隻，點上沙律醬唔錯，再加上伴碟的生洋蔥一齊食，味道會變得更加濃。 整體嚟過間餐廳唔錯，可以再來一試其他食物。

本身見到都有幾多正評，於是打電話去訂位，一接通電話，話想訂位，咁好正常食店實會問你日期同時間，當我一講日期，時間都未講，食店就即刻話：得喇，唔駛訂位，walkin實有位。（其實應該聽到呢句之後都覺得怪怪哋，打電話訂位咁多次，第一次聽到咁嘅回覆，一般餐廳就算知道自己個場唔爆，都好少咁講，點都會扮吓嘢幫你訂，佢咁嘅回應即係同客講自己唔多人幫襯。） 當晚入到去，個侍應啲態度都已經麻麻，真係覺得一般茶餐廳仲好過佢。 個場裝修係幾特別，不過坐得一啲都唔舒服，張枱矮，鐵桶凳，超硬。 打開餐牌選擇唔多，於是叫咗個2人套餐，帆立貝同真雪花牛。 講到食物，其實都好普通，無咩特別，就算個雪花牛食落口都無肉味。 到埋單嘅時候，當然係舉手同侍應講埋單，一般餐廳都會拎張單埋你等你俾錢，但呢度嘅回應係：得喇，出嚟收銀度俾啦，咁樣同茶餐廳真係無分別。不過分別就係，我今餐成千二蚊，但係佢嘅服務仲衰過茶餐廳，而且仲要加一，真係完全唔明喺零服務之下，連俾錢都係自己行出去俾，咁多仲要俾加一服務費，呢間餐廳真係完全唔得，建議大家真係唔好去幫襯，以免中伏。

都有一段時間無寫食評，今日入開上水整車，於是就搵吓呢頭有咩好食。老婆知道我在上水，就即刻介紹我嚟呢間雞湯麵。 一睇餐牌，有好多唔同款式的雞湯麵，見到有芫荽雞湯麵，諗都唔駛諗一定叫呢個(因為我超鍾意芫荽的味道)。 湯麵好快就到，一上到枱，真係名符其實，因為成個湯碗都佈滿芫荽，啲芫荽嘅數量應該仲多過打邊爐的芫荽皮蛋湯。上枱嘅時候已經聞到超濃的芫荽味。 首先即刻夾左住芫荽來吃，啲芫荽食落好爽脆，同埋亦都無浸淋，食落口唔錯。然後就入咗啖湯，個雞湯亦都真係好濃，飲落幾鮮甜。而啲雞嘅份量都好多，起碼有成七至八件，而且啲雞肉亦好滑，同埋啲雞本身都好好味(餐廳會有碟豉油俾顧客食雞時用，但相信就咁食已經好正，無豉油都絕對無問題。 平時食麵都好少會飲啲湯，但呢個雞湯真係好濃，最後竟然成碗飲晒。 整體嚟講，這碗雞麵真係正，唔怪得6點幾都未到晚飯旺嘅時候都已經坐在好多客，而且店外等外賣亦都超多人。如果鐘意食米粉或者米線嘅朋友可以試吓，相信會比麵更加入味。 完全值得推介，可以再嚟食過

今晚去咗睇醫生，睇完之後都成八點幾，於是就同老婆睇吓附近有咩食。牛頭角近德福呢頭都幾多嘢食，又諗唔到食乜好，於是隨意入咗間有小菜食嘅茶餐廳。(其實係同老婆都鍾意食小菜😂) 入到去先嚟咗碗例湯，碗中湯入面都有成四、五嚿瓜，又唔覺有味精，老算唔錯。見到餐牌佢都有幾多小菜，本身想食醬爆牛栢葉，但老婆話我個胃唔舒服，呢啲難消化，叫我唔好食，所以無得叫。於是最終叫了個二人餐，分別叫了黑椒鐵板牛仔骨同紅燒豆腐班腩煲。而且仲有前菜。初頭唔知佢前菜係咩，上枱時原來係韮菜豬紅。本身我對豬紅其實一般，不過呢間啲豬紅未食都聞到幾香，而且亦幾入味，唔錯。 跟住到黑椒鐵板牛仔骨，茄子食落脆口，而牛仔骨都幾大塊，都有六大塊，同埋咬落去都唔韌，都有肉味，可以一試。 至於個紅燒豆腐班腩煲，啲班腩個脆漿就略嫌多咗啲，而且可能炸耐咗，個脆皮變得有啲硬，不過都可以接受。 值得一提嘅係餐飯食到一半時發生咗個小插曲，就係隔離枱出去埋單，佢行到去收銀時返轉頭，喺我張枱度拎咗我張單去埋。初頭我都無為意，以為佢係餐廳侍應。不過唔夠兩秒又諗個侍應無啦啦拎走我張單，但又唔係叫我埋，咁拎嚟做咩呢？然後又望返隔離枱，見到佢張單仲喺枱度，呢個時候終於真相大白，就係隔離枱客拎錯咗我張單去埋。見到咁嘅情況我就即刻同個侍應講，隔離枱客拎錯單，佢張枱同我張枱都隔住成條行，而我又坐喺度，佢都可以拎錯，真係幾好笑。

自從禁止晚市堂食，經常晚餐都是叫外賣在office食，又或者買外賣上自己架車食，今次終於解禁，可以坐在餐廳裡食，不過老婆唔得閒，唯有自己一個揸車出去睇吓有咩食。 這間茶餐廳之前都食過，味道正路，所以決定再幫襯。 今晚叫了一個豉椒牛肉炒麵，雖然都是一般茶餐廳有的，但有兩樣嘢係我都鐘意食的，一是滑牛肉(我比較鐘意食滑牛多過邊爐肥牛)，二就是所謂的炒麵(其實似係炸多啲)。 首先碟麵都有幾多牛肉，麵亦脆卜卜(不過好似炸都多得濟)，真係全碟麵都係炸咁濟。而牛肉亦都有幾多，起碼有十多塊。 整體嚟講都係一般茶記有的味道，適合我呢類大眾化平民口味。

今日係復活節假期的最後一日，決定再同老婆出遊食下午茶。今次去到石門，都有幾多嘢食，不過睇好多餐廳的門口餐牌都仲係午餐，最後見到一間越南泰國菜(雖然呢幾日已經食咗一次越南下午茶，但諗唔到食乜好，於是決定再食過。) 今次入到這間食肆，座位都幾寬敞，坐落都幾舒服。打開餐牌，其實諗唔到食乜，見到有蝦多士，於是決定叫。最終分別叫了蝦多士配薯角同沙嗲雞串配青木瓜柚子沙律。 先講蝦多士，個賣相唔係幾好，炸到有啲濃，同埋三件個size都幾大分別，同埋食落口都幾油，薯角就無咩特別。 至於個沙嗲雞串，味道正常，唔算突出。而青木瓜柚子沙律都無咩特別。

趁著這幾天復活節假期，與老婆二人可以忙裡偷閒找下午茶吃。今次老婆想飲滴漏咖啡，於是去了這間越男仔(她之前去過，覺得好飲)。 今次下午茶分別叫了皇牌小食拼盤及香茅脆雞豬仔包。 先講小食拼盤，裡面分別有無骨鳳爪、春卷及蒸粉包。鳳爪去咗骨，味道酸酸甜甜，亦帶少少辣，而且啲鳳爪皮幾爽脆，食落唔錯(其實本身我對鳳爪無乜興趣，甚少食)。只於春卷方面，無咩特別，不過食落去熱同脆口，應該係即炸的。而蒸粉包塊皮幾煙韌，同埋入面都幾多料，唔錯。 另外到香茅脆雞豬仔包，上枱時有驚喜。首先個包好足料，厚厚的炸雞扒、生菜、蕃茄、越式酸菜，同埋個豬仔包都好脆口。食呢個包要用刀叉，個包都熱，塊雞扒就應該即炸，同埋都幾大塊，配埋啲酸菜一齊食個味道唔錯。 至於飲品方面，方別就係滴漏咖啡同越式拉茶。杯咖啡味道係幾濃，睇住佢慢慢滴落隻杯度，與杯中的奶慢慢散開，望落去幾靚。另外杯拉茶飲落去幾滑，同埋甜甜哋，唔錯。 整體嚟講今餐下午茶ok，遲啲晚市堂食會搵時間嚟多次。

年廿九無返到屋企食(團年飯一早食咗)，而家夜晚有無堂食，一個人又諗唔到食咩，於是揸車遊車河，兜兜吓去咗西貢。見到平時食開檔炒麵仲有開，於是就去買(其實食咗好多年，不過都無俾食評佢)。 今次自己一個開大餐，買了一盒炒麵、兩串燒賣、兩串牛肉球、一隻糯米雞。 先講炒麵，一定要配佢個辣醬(記住唔係辣椒油)，佢啲辣醬好香，甜甜哋又幾香，配埋炒麵會變得好似撈麵咁，而且佢啲炒麵唔淋，食落去唔錯。 而牛肉球亦都係值得介紹，每粒都幾大個，而且唔粉，食落去都有肉味。 另外今次就叫埋糯米雞，平時都無食過，正常唔算突出。 呢間舖仲有一樣推介就係膠粉，夜晚食宵夜唔錯。

之前同老婆OT，分別叫咗個招牌脆皮牛腩飯、招牌蝦頭油炒飯、沙嗲三寶同麻辣雲耳。先講脆皮牛腩飯，個皮都幾脆，無淋到，而啲牛腩亦都入味同唔韌，同平時食開嘅牛腩幾唔同，都係第一次食咁嘅煮法，仲配埋炒飯，咁嘅食法都幾特別。 跟住到蝦頭油炒飯，食落去都幾香，而且唔算鹹，啲飯都無乜水氣，無淋到。 而個麻辣雲耳都唔係好辣，反而酸咗啲。 最後到沙嗲三寶，唔係太入味，不過份量都算多。 整體嚟講以外賣嚟計都算唔錯，喺而家不能堂食的情況下可以一試。

石門都幾多嘢食，今次去了一間食上海菜的餐廳，分別點了滿漢小籠包、老潼關肉夾膜、蔥油開洋拌麵、水煮牛肉麵、蒜蓉窩芛及芝麻豆漿。 先講小籠包，咬落去唔多汁，唔夠熱，同埋啲肉餡有啲「鞋」，唔係太掂。 之後到個老潼關肉夾膜，個餅皮都幾鬆脆，不過唔係太夠熱，而啲肉幾香同濃味，如果熱啲會幾好。 至於蔥油拌麵個味道唔錯，不過份量偏少，而個湯就偏淡。 而水煮牛肉麵就唔係太夠辣，牛肉就係普通滑牛肉，同埋唔係太入味，似係煮熟個麵就咁放啲牛肉上去再加湯。 反而個蒜蓉窩芛食落去幾脆，加上蒜蓉變得幾香，唔錯，亦係全餐最好食的一道菜。