最近冇咗晚市堂食，午餐都會想食得好少少 🥲 呢日嚟咗次次經過都大排長龍嘅小火焰食韓國菜！2點鐘依然有午市套餐免加一，仲有得加點特價小食同甜品 ✨ 泡菜醬燒黑豚拌飯 塊黑豚食落似豬扒，肉質不錯，加上甜甜地嘅醬幾好味。拌飯有大量紫菜，好重蔴油香，同蛋汁椰菜絲泡菜撈埋一齊，邪惡地好吃！不過menu上佢有一隻辣椒，但食落係冇辣味的 ✨ 泡菜豆腐鍋 呢個鍋就好辣，平時食開bb辣嘅我一唔覺意就畀啲辣油濁親！配料頗多，除咗豆腐仲有菇、翠玉瓜、有蔴油香嘅韓式粉絲，加埋碗白飯非常飽肚 ✨ 忌廉蟹肉餅、脆香牛油雞翼 新鮮熱辣上枱！餅係現成貨，淡淡地，香口得嚟幾creamy。雞翼炸得剛好，爭少少牛油香但都算好唔錯喇 ✨ 凍岩鹽焦糖咖啡、熱烤杏仁咖啡 成餐最有驚喜係飲品，唔會死甜又有咖啡味，可能仲好飲過啲綠色、紅色連鎖咖啡店

喺觀塘食lunch最怕就係坐得逼唔舒服，呢度座位安排幾鬆動，有足夠空間坐得舒服傾吓計 Lunch set menu有五六版，全部跟餐送飲品一罐（呢日見到有檸檬茶、荔枝烏龍茶、薑母茶等放雪櫃自取）。小食有兩大盤任夾，韓式炒粉絲好香麻油味，而泡菜香得嚟唔會好辣，冇過甜或者過酸，個人兩款都幾中意食 ✨ C4A 蜂蜜牛油香蒜脆雞（免費轉無骨雞） 蜂蜜超多！牛油同蒜味都食到好濃，調味上係幾足料。略嫌炸粉過厚，一路食一路可以搣返走一舊舊嘅炸粉。伴碟有酸蘿蔔同沙律，清新啲可以中和返冇咁漏 ✨ R6 芝士蛋熔岩泡菜炒飯（跟湯） 鐵板上菜一嚟到見到啲蛋漿已經全熟，完全做唔到熔岩拉絲效果。不過食蛋發現原來有粟米、三色椒同少量芝士，用料係ok嘅。炒飯完全唔辣，食到頗多泡菜同煙肉但啲飯係冇乜味嘅

第一次嚟木屋首先畀menu震撼到，選擇多到淨係lunch set menu都有五六版，而且份量頗大，細食人士要留意 🤣 ✨ 清邁黃咖喱牛坑腩 Lunch set加$8由飯轉薄餅，侍應特別提醒只有一塊但見到都剪開有六小塊。咖喱係所有食物之中最早嚟到，唔會好辣而重椰香，牛腩煮得腍但仲有啲咬口，只係個汁有啲凍，相信係煮好咗就咁畢出嚟 ✨ 生菜包配沙嗲雞串 係輕盈午餐之選但生菜包嘅肉份量多到就咁都食得飽，味道係偏辣，個人中意加返啲青檸汁清新開胃啲 雞串燒得剛好有焦香味，咬開見到雞肉仲係帶點粉色，最驚喜係個沙嗲醬好重花生味，仲有啲花生碎！ ✨ 小食拼盤 追加$38有四款小食，全部都唔錯，蝦肉都算新鮮 ✨ 馬拉盞炒通菜煲 呢個係散叫嘅，最大驚喜係佢！剛嚟到時個煲仔仲係辣手出哂煙，陣咸香味飄出非常吸引！ ✨ 青檸梳打 + 龍眼冰 Lunch set各加$5同$10就有，用料都幾有誠意

大圍美食多，西餐選擇卻唔算太多，風車係其中一個性價比相宜嘅地方。閒日去食下午茶，餐牌上有十幾款選擇，價錢唔貴更免加一 🌟 醬燒豬扒土耳其三文治 上菜時聞到好香牛油味，揭開塊包見到搽咗滿滿嘅香草牛油。三文治夾咗兩塊手心咁大嘅豬扒，都有1cm左右厚，鮮嫩多汁，燒烤醬甜甜地幾開胃 而配菜嘅炸薯仔粒新鮮熱辣，咬開見到薯絲，份量仲好多！沙律菜都唔錯，不過相比起味道就較淡 🌟 素菜千層麵 一向好中意食千層麵軟綿綿夾住大量肉醬嘅口感，呢日想食清啲就叫咗素菜呢款。配菜同三文治嘅一樣，可能係所有餐都一樣。切開見到大大舊嘅翠玉瓜、蕃茄同埋芝士，幾清新。不過麵嘅部分只有上下各一層，同平時食開嘅千層麵有啲唔同，但都可以一試 🌟 法式洋蔥湯 🌟 凍水果茶同Cappuccino

第一次嚟利舞臺dodam chicken，見到好多人但座位安排闊絡，唔會好大壓迫感或者聽到哂隔離枱講嘢 👍🏻 呢度嘅炸雞有烤同炸之分，各自都有將近十款唔同口味，花多眼亂，最後都係揀返原味脆雞（即係炸）。新鮮熱辣上到枱見到雞嘅顏色偏深啡，有幾件有少少苦焦味，似係炸得過咗啲火。如果覺得原味好寡，伴碟仲有兩款醬畀你點，韓式甜辣醬同芥辣醬 不過咬開雞肉大部分都仲係好嫩有肉汁，炸粉好薄，令人食唔停口，好快就清哂成隻雞 😂 韓式牛肉粉絲好大盤，粉絲用嘅係粗啲好似扁意粉嗰種，牛肉有好多片，年糕亦有好多條（建議上枱就快啲食，擺耐咗會發脹腍咗），份量大到食唔哂。湯底偏甜，唔好甜味嘅要留意吓 炸雞就係要配啤酒！Corona凍冰冰原枝上枱，爽 🤪

深水埗各色coffee shop林立，不時都會去發掘吓新店，今次搵到呢間做生酮飲食嘅有心小店 💛 Menu上有好多飲品選擇（好多都係keto friendly!!），店員就推介我飲玄米茶同焙茶杏仁奶，屬坊間較少見。我要咗每款各一杯熱，兩款茶味都好香濃好好飲！ 焙茶味濃，配合杏仁奶嘅甜，入口味道比聞更有層次。玄米茶好特別，平時飲就咁玄米茶好似清清淡淡咁，呢度唔知係咪加咗杏仁奶，襯托咗佢陣炒米香味出嚟，奶嘅甜香味完全冇喧賓奪主，令茶嘅回甘味更突出！極推介！💓💓 臨走仲買咗塊70%黑朱古力軟心曲奇返屋企食，店員提醒要整熱嚟食。我就咁用微波爐叮咗十秒，切開一半見到入面啲朱古力半溶，入口唔甜又濃朱古力味，應該食多幾塊都唔會覺得漏 🤣🤣

每隔一段時間就會好想食雞煲，通常揀揀吓都會嚟返呢度，勝在雞煲選擇多又唔貴！ 醬料收人頭$12，九宮格基本野有齊哂 今日天氣涼返啲，揀咗胡椒豬肚雞煲暖吓個胃，兩個人食半隻啱啱好 雞件同豬肚唔會斬到碎哂，每人應該都有食到每樣六七舊，非常足料。仲有啲白蘿蔔片（入味超甜！）、三大舊粟米、芽菜同炸枝竹，食完呢煲都飽咗大半 😂 打邊爐叫咗手打黑墨丸，食到有一粒粒墨魚肉，整體粒丸唔算好彈牙但食到鮮甜味（之前嚟試過手打蝦丸會彈牙啲，更推介） 肥鵝腸真係好肥好肥好肥，見到一舊舊白色肥膏都差啲令我卻步。。。淥完出嚟啲肥膏整走哂，剩返塊皮咁簿嘅腸，好爽口！ 最後點少得油麥菜解吓油膩，好大盤又全部都好新鮮，啲菜葉翠綠色又爽脆，正！

✨ Paradise Full 餐牌有四款all day breakfast可以揀，份量同材料各有少許不同，跟一杯小橙汁。我揀咗有相睇嘅Paradise Full，嚟到個份量大到嚇親我，懷疑根本唔係一人份嚟 😂 材料都係基本野嚟，三角薯餅、scrambled egg、煙肉、沙律菜等等，仲有件窩夫係分開裝。窩夫切開覺得好實淨，應該係多牛油所以食落口都香啲，但一定要趁熱食，凍咗個面唔脆！ ✨ 鐵板黑椒一口西冷牛飯 份量都係唔少，一口牛有七大粒全部係肉冇肥冇筋，都唔係「拿」到腍哂冇口感嗰種。一杯燒汁唔夠撈飯，要多杯汁落多啲先夠。侍應攞汁嚟時好好咁提醒會好咸，唔好一次落哂 成個飯得啲汁同粟米，覺得少咗啲嘢咁原來係冇芝士，芝士控要留意一下 🤣 有少許飯焦，可以解吓鐵板癮。另外加30蚊要咗湯、沙律同餐飲，粟米忌廉湯幾好飲

依家想食點心多咗好多選擇，呢間勝在位置就腳，太子站行一分鐘就到！ ✨ 鳳爪排骨飯 得一隻鳳爪煮到好入味同好腍，排骨肉幾滑，大大小小都有四五舊，落少少豉油就好夠味 ✨ 熱點蝦餃皇、蟹籽燒賣皇、白灼西生菜 叫得蝦餃皇果然係有咁上下份量，每隻餃有兩隻爽口嘅蝦，皮薄但有少少易爛。燒賣同生菜就冇乜特別，正常發揮～ 最中意係蝦餃燒賣呢啲必食之選有得揀要兩粒定四粒，兩個人去食就唔洗焗住食多粒喇 🤣 ✨ 雪山叉燒包 其實本人唔多喜歡飲茶食包，因為好易太乾或者搞到食滯咗。呢個叉燒包都算「皮薄」餡靚，包面甜甜哋，細細個過吓包癮 ✨ 春風得意腸 腸粉皮唔算好薄，但包住咁大舊餡反而啱啱好，唔會冇哂存在感。蝦膠彈牙，有啲甜粟米喺入面爽爽哋咁 ✨ 薑蔥牛栢葉、鮑汁鮮竹卷、燒汁百花釀茄子 牛栢葉同鮮竹卷都係正常發揮，味道剛好。釀茄子好似fusion菜，但試無妨，蝦膠又係好彈牙

二人份量嘅 All Day Breakfast，一見到以為好似唔夠食，但 lunch 份量尼講其實係食到幾飽下 😂 食物質素ok，沙律菜新鮮，炒蛋同煎蛋都幾靚仔，其他都係現成食材冇乜特別。美中不足係食物都幾凍下，條芝士腸凍到我哋諗咗陣究竟係有冇煮過。。。