同家人飯聚揀咗食呢間中菜，之前食過大家都好滿意，一致同意食過返尋味，試吓唔同嘅餸菜。 蒜香爆龍躉球 $288 用熱鍋上枱，勁香勁好鑊氣。龍躉球大大塊，都幾足料，有差唔多八件。煙煙韌韌嘅龍躉皮充滿骨膠原，加上厚厚嘅魚肉，啖啖肉完全冇骨，好正。 金薯牛柳粒 $148 薯仔充滿蜜糖同埋黑椒嘅香氣，金金黃黃，好粉糯。牛柳粒大細適中，一口一粒，肉質鬆軟，唔會有渣，好有鑊氣惹味惹味。 香煎蓮藕餅 $148 厚厚嘅蒸肉餅煎得外層朝香，裏面保持肉汁，沾上喼汁食風味更佳，裏面嘅蓮藕都幾爽。 蝦醬香蝦腩肉 $148 腩肉油炸後已經瀉晒多餘油脂出嚟，甘香甘香，加上蝦醬調味惹味惹味，咸香咸香。 XO醬海皇炒飯 $168 XO醬少少微辣，炒飯幾惹味幾好鑊氣，有好多金華火腿，仲有好多小帶子同埋蝦，仲有啲爽爽菜粒，幾多料。 最後仲送埋糖水俾我哋食，花生麥米粥口感煙韌煙韌，花生夠晒稔，幾清甜，唔會甜膩。

星期五放工去咗旺角買嘢，去咗通菜街附近搵嘢食，呢一間泰國餐廳裝修幾有feel又坐滿客，好似幾吸引，我哋就排咗一陣隊入去食晚餐。我哋揀咗個二人餐， $338 ，包咗前菜沙律、小食、兩個主食，仲有兩杯嘢飲，價錢都合理。 涼拌酸辣札肉 呢個扎肉沙律幾清爽，好啱夏天食，酸辣嘅醬汁配上大量香口爽脆芹菜、生洋蔥、蔥，好惹味，啱晒我重口味人士。扎肉片就唔使多講，我不嬲都鍾意食。 泰式手打蝦餅 有三大件蝦餅，炸得金黃香脆，每一件都開咗兩邊，食得方便。蝦膠爽彈，沾上泰式甜辣醬食冇得輸。 招牌燒牛肩胛肉 呢個我哋加咗$30升級，牛肉燒得幾靚，火候唔會老，每件肉都粉嫩粉嫩，唔會乾柴，沾上特製嘅泰式醬汁，幾好味。 泰式乾炒闊河 呢個炒得好有鑊氣，一上枱香到不得了要即刻食😆河粉炒得好乾身，而且好入味，配料我哋揀咗豬肉，仲有好多蛋花，爽口芥蘭，成個炒河食落好乾爽，唔會笠身太油，而且味道好香好惹味。 龍眼冰/椰汁冰 跟餐配埋兩杯飲品。我最鍾意飲椰汁冰，又香又解渴。朋友話龍眼冰都幾清香，唔太甜。

同爹哋出咗去油麻地做嘢，見到呢間點心店，好耐之前食過佐敦店唔錯，就同爹哋入去食點心晚餐。 蝦餃- 皮薄餡靚，蝦肉滿滿，爽口有蝦味。 燒賣- 有原隻鮮蝦鋪面，賣相吸引，豬肉爽調味好。 鮮蝦腐皮卷- 炸得腐皮好酥脆，餡料有蝦又有豬肉，仲有芫茜香味，沾喼汁食好正。 韭黄鮮蝦腸- 腸粉皮薄得嚟又煙韌，會唔會淋啤啤一夾就爛，裏面隻蝦大大隻，新鮮爽口。 卡通流心芋蓉包- 卡通表情有啲淺色甩色，賣相有待改善。餡食得出真係用芋頭做，唔係加色素嘅紫色，真材實料有淡淡嘅芋頭香氣。 欖仁馬拉糕- 馬拉糕正常發揮，質地鬆軟得來係比較紮實嘅一種，蛋味甜味適中，上面仲有兩粒欖仁，如果再多啲就仲好。 籠仔鳳爪排骨飯- 用荷葉鋪底，飯粒都吸左荷葉嘅香氣，而且粒粒分明，加上排骨同埋鳳爪嘅汁精華，呢個飯好好味。排骨肉質鬆化，鳳爪都大大隻而且入味。

放工費事煮，買外賣返屋企，試左呢間中環新開冇幾耐嘅一點心分店，呢一間有少量堂食座位，主要做外賣。見到裏面啲點心即叫即正，熱辣辣，外賣包裝仲好精美添，有埋保溫袋，返到屋企都保持溫度，自然好食啲啦。 蟹皇蒸燒賣$20 燒賣大大粒，大過平時果啲起碼一半。豬肉好爽口，仲有啲蝦同冬菇，味道好好。 鮮蝦菜苗餃 $20 皮薄餡靚，望落去精螢剔透咁樣。鮮蝦爽菜苗嫩，好清爽。 鮮蝦腐皮卷 $22 腐皮煎得金黃香口，餡料一貫好味。蝦肉爽而且好香芫茜嘅調味。 鱆魚肉餅飯 $35 超級足料，塊肉餅真係鋪滿成個外賣盒咁大而且厚身。肉餅彈牙得嚟稔滑，又唔會太肥，仲有好多大大粒鱆魚同埋爽脆馬碲粒，落埋甜豉油佐飯一流。 懷舊雞包仔 $12 雞包仔好多餡，除咗雞肉之外仲有啲爽爽地嘅菇菌類，然後調味好香，充滿芫荽嘅香氣，好啱我口味。 蜜汁叉燒包 $12 叉燒包裏面夠多汁，最重要係多叉燒，肥瘦適中，叉燒唔會太細碎，口感好好，蜜汁甜甜地好好味。

帶Daddy去Airside行吓，見到呢間樂天皇朝薈萃做緊周年優惠，有幾款嘢食分階段都係優惠價$10，而家做緊$10原味小籠包六隻，惠顧滿$100就可以享用，相當吸引。見咁抵我哋去咗食午餐。 招牌原味小籠包 $10優惠價 呢個$10優惠梗係必要啦，小籠包皮薄餡靚，裏面充滿湯汁，夾起又唔會串，食嘅時候沾上醋同埋夾埋薑絲一齊食好味道。 黃橋燒餅 $40 燒餅仔細細個要來做小食，好香口，上面嘅芝麻烤得好香，燒餅唔厚一口咬下去好酥，裏面有一啲豬肉餡，幾惹味。 糖醋魚片 $108 賣相吸引，如片大大件，糖醋汁酸酸甜甜好開胃。雖然叫魚片，但係一啲都唔薄身，炸粉唔厚外脆內軟，魚肉唔會炸到乾晒，而且幾厚肉。 雪菜蝦仁炒飯 $98 炒飯有好多蝦仁，雖然唔算大隻，但係都唔太細，食落爽口。炒飯粒粒分明，配上一啲蛋同埋雪菜絲，材料雖然簡單，不過好味。

同閨蜜食飯梗係要揀一間打卡餐廳啦，呢度而家做緊櫻花主題，啲嘢食飲品全部都IG-able，真係睇到人心心眼㗎😍 龍蝦炒年糕 $155 雖然我哋揀呢間餐廳係想食甜品為主，但係呢個主食好好味。龍蝦汁勁濃郁，年糕比我哋平時食開嗰啲幼身，比較柔軟已經煙靭，每條都掛滿龍蝦汁勁正。龍蝦肉都有唔少，都有10粒8粒㗎，肉質都幾鮮嫩。 伯爵茶布甸牛角包窩夫$145 好豐富，一個甜品有齊牛角包窩夫、布甸、黃豆粉厥餅、牛奶雪糕食。伯爵茶布甸好香伯爵茶味，而且幼滑Creamy。牛角包窩夫牛油味香之餘仲微脆焦香，食嘅時候夾住cream，再加啲雪糕，再倒啲伯爵茶醬超好食。 櫻花滿開刨冰 $118 店員細心安排最後上呢個甜品，熄晒其他嘢先慢慢食呢個刨冰。一拎上枱簡直係心心眼，勁靚，粉嫩粉嫩嘅粉紅色，加上好多小櫻花，好有春天氣息，打卡一流。粉紅色嘅綿綿冰當然係櫻花味，我覺得有少少似話梅嘅味道😆食到中間仲有好多厥餅同埋紅豆甜醬，好多層次。 櫻花綻放棉花糖泡泡 $68 呢杯嘢飲勁靚，隻粉紅色杯仲要有隻蝴蝶，pink pink嘅嘢飲上面仲有夢幻小花花，櫻花奶泡甜甜地又有奶香。配有一件韓國傳統花煎，又係有靚靚花花，有啲似扁身嘅日本大福，裏面中間有少少紅豆餡。 意式咖啡雪糕 $72 呢杯Affogato好有儀式感，將熱辣辣嘅咖啡倒入冰冰嘅牛奶雪糕，冰火二重奏嘅感覺，仲配有意大利手指餅沾咖啡添。呢個一樣配有一件韓國傳統花煎。 總括而言，呢間餐廳打卡又得嘢食又好味，我見隔籬枱食嗰碟炸雞同埋辣魷魚飯卷都好吸引，下次再嚟一定要試吓。

同朋友去咗銅鑼灣行街，佢帶我搭叮叮去鄰近嘅跑馬地食日本嘢，原來有間隱世居酒屋，我哋食咗壽司同埋一啲串燒都覺得好唔錯。 特上/上壽司定食 $288/ $238 我哋每人叫咗一個壽司食，特性壽司定食有12件，上壽司定食就有10件，定食配有豆腐海帶麵豉湯、前菜同埋嘢飲。兩個定食嘅壽司種類分別最主要係特上set有拖羅壽司、海膽軍艦同埋三文魚子軍艦。壽司飯已經調味，而且加入Wasabi，魚生上面都掃咗啲唔同嘅調味醬油。魚生都好新鮮，我最鍾意梗係肥美嘅施羅啦，入口即溶。貝類嘅壽司都好清新爽口，配上一啲有子醬油，味道好清新。另外海膽軍艦好正，海膽鮮甜美味，口感Creamy。三文魚子軍艦都好好味，我最鍾意每粒脹卜卜嘅三文魚子喺個口腔之中爆發鮮味嘅感覺。 清酒廣島蠔 $68 廣島蠔好肥美，經過清酒烹調至半生熟嘅感覺，咬開好多汁，勁鮮甜蠔味濃郁，飲埋啲汁嘅精華，簡直係一流。 白鱔 $68 白鱔都幾厚身，燒到皮脆肉爽，而且保持肉汁，魚鮮味好濃，調味嘅燒汁恰到好處。 自家制免治雞肉棒 $42 免治雞肉棒燒得好靚，雞肉混入一啲雞軟骨粒增加口感，食嘅時候最緊要攪勻隻蘭王蛋黃燒汁一齊食，口感順滑香濃。 茄子 $22 有和風同汁燒兩種燒法，我哋就揀咗汁燒，日本醬油嘅香氣配上茄子味道幾好。

陪老公去希慎行誠品睇書，睇到好肚餓就上咗去樓上food court食晚飯，行咗個圈，發現呢間位置比較後面嘅泰國菜，見到其他食客食緊嘅嘢食好似好正咁，就揀咗呢一間。 鳳尾蝦炒金邊粉 $64 賣相都幾靚，有成四隻大蝦，金邊粉味道好好，炒得好幼鑊氣。芽菜、蛋、蝦皮、豆乾、蔥同金邊粉炒勻好香口，food court都整到有水準。仲細心配埋三種調味粉：花生碎、砂糖、辣椒碎，可以跟自己口味自由配搭。 鮮菠蘿炒飯 $68 用鮮菠蘿真係唔同啲，個飯充滿菠蘿嘅香甜。炒飯軟硬適中，材料豐富，除咗香甜多汁菠蘿粒之外，仲有好多滑雞粒、泰國臘腸、三色豆同埋肉鬆，加埋蛋同埋黃薑粉嘅香氣，炒飯都好正。 炸蝦餅拼炸雞卷 +$28/+$26 炸蝦餅係跟餐加倍嘅小食，呢個正常發揮，蝦餅都厚身幾紮實，最緊要沾上我最鍾意嘅泰式甜辣一齊食。炸雞卷都係加配小食，幾香口，出邊嘅腐皮酥脆，裏面嘅雞肉都充滿肉汁，唔會乾。 龍眼冰+$12 最後飲番杯跟餐嘅嘢飲，龍眼冰唔會太甜，陪泰國嘢食絕配，幾清爽。

同屋企人食飯揀咗呢一間中式酒樓，位置喺尖沙咀夠晒方便，而且酒樓都好大，啲枱唔會好密，環境裝修都幾靚。我哋見而家酒樓做緊一個龍鳳雙輝優惠好抵食，分別係$88 1條清蒸生猛龍躉同埋$38半隻炸子雞。我哋四個人可以叫一款，如果再多啲人六位可以叫晒兩款。 金沙黃金蝦拼南瓜 $108 呢個做小食送啤酒一流，黃金蝦好香脆，連殼都食埋，鹹蛋黃加牛油甘香甘香，惹味惹味。金沙黃金南瓜都好好食，炸南瓜好粉好甜，配上鹹蛋黃金沙好夾。 得獎叉燒（小食） $88 呢度嘅叉燒係得獎菜，我哋當然要試吓，就揀咗分size細細的小食。叉燒上枱熱辣辣，都有七八件，蜜糖味香，叉燒醬調味好好，而且肉質好鬆化，唔怪得之攞獎啦。 鮮菠蘿拔絲咕嚕肉 $120 呢個份量好足，色彩繽紛。咕嚕肉雖然望落去比較濕，炸得唔係好夠咁樣，但係原來每一粒肉都包住好多醬汁，甜甜酸酸好醒胃，肉應該係半肥瘦，所以好鬆化，一啲都唔會乾柴。鮮菠蘿好甜，食完啲肉又食吓菠蘿越食越開胃。 X0醬野菌蘆筍炒帶子 $118 帶子大大粒，幾厚肉，火候啱啱好，咬開超嫩滑。XO醬好惹味，炒野菌好好味，蘆筍都幾多，但係略嫌唔夠嫩有啲有筋，不過味道係好好嘅。 清蒸沙巴龍躉斑 1斤2両 $88 呢個優惠我哋梗係唔可以執輸啦，寫明係一斤二兩嘅生猛龍躉，條魚好新鮮，魚肉白雪雪，蒸得火候啱啱好，幾滑而且夠鮮唔腥，沾上蒸魚豉油食仲正。 瑤柱鮮蝦雞粒福建飯 $138 呢個福建炒飯都好足料，除咗有啲蝦粒，仲有帶子粒、瑤柱、雞粒、一啲蔬菜粒，蛋炒飯底炒得粒粒分明，充滿蛋香，配埋上面嘅餸料一齊食，好佐飯。我忍唔住食咗兩碗。

呢排食開韓國嘢有條癮，放假又去咗韓國街搵食，今次揀咗呢一間出名食蛋漿熔岩炒飯嘅，成日見到人哋啲相好吸引，終於可以食到。 秘製章魚蛋漿熔岩炒飯 $198 店員首先將蛋漿倒入鐵板，然後灑上勁多芝士，再用火槍燒芝士蛋液，燒得焦香之後就幫我哋將芝士漿伴入鐵板炒飯mix勻。齋睇我哋已經好想食，香噴噴，用匙羹拉起仲有拉絲效果添。熔岩飯口感豐富，除咗有粒粒爽滑嘅章魚小粒之外，仲有綿綿Creamy口感嘅芝士泡菜紫菜拌飯，少少辣惹味得來充滿奶香同埋蛋香，好鬼正。 牛肋骨湯 $188 一鍋湯熱辣辣，湯幾清，唔會見到面頭全部都係油。個湯牛味幾香，都幾濃郁。牛肋骨應該煲咗好耐，啲肉好鬆化，一夾就會骨肉分離。配料中有好多洋蔥條同埋一啲粉絲，吸晒啲湯嘅精華好好味。如果配一碗飯仲好。