放工後想獎勵一下自己，建議呢一間。位於鴻圖道的地下西餐廳，裝修以藍色為主調，配合落地大玻璃，好搶 Fo 一門之隔，令人覺得去左旅行，超高樓底的餐廳，真係好好坐。 揀左靠牆的沙發位，自成一閣，幾好。 US Prime Rib Eye $198 Order 左肉眼扒，份量適中，皮煎到脆脆地，而肉質夠嫩，有牛味。 薯條好熱，亦係外脆內軟，滿分。 Black Country $168 香煎帶子墨魚汁意粉，帶子勁大隻，好鮮甜 墨魚意粉一向都是高級野，唔係太多地方有得食。 烏卒卒的意粉配上黑芝麻汁，好濃味好過癮，而且食完個咀唔會變黑，幾好。 House wine $68 為配合牛扒，朋友 order 了紅酒。佢話重果味，甜甜地幾易入口。 Sakura Roses $58 櫻花玫瑰酒，飲落有荔枝味，仲有淡淡花香。杯邊舖滿菓味酸粉，好開胃，酒味不濃好好飲。不過真係太細杯了，只能細細啖慢慢享受

好耐冇同老友飲返杯，放假前夕梗要 happy 吓 ，飲啦！

Orion & Sapporo
一般韓烤會飲韓國燒酒或啤酒，而呢間竟然主打日系生啤，當然咪放過 ！



叫左兩款燒肉送酒，一牛一豬，每款都係百零蚊，量多肉靚仔，幾抵食。

牛護心肉
平民價都食到，好香好淋，一碟兩人分享啱啱好。
呢款肉冇醃過，但點小小鹽已經好滋味。




喜來五花肉
食韓燒又豈能錯過五花肉？ 今次揀有醃過的，唔使點醬已ok 。燒到全熟，脆脆地又有少少軟骨，送酒一流！



海鮮葱餅
除咗燒肉，仲叫左海鮮葱餅。最鍾意將個洋葱汁淋上面食，令到成件葱餅內外都係葱，正呀！

自家製泡菜無限添加，爽！



食滿$500 可以加$1 有台灣鳳梨，復活節限定 ！

觀塘 the wave 裡面的 mini friday 幾啱食，選擇多，價錢亦好合理，推介一下。 自選意粉套餐 $158 從意粉、主菜同醬汁都可以自選，夠曬 flexible ，幾乎所有大路款式都有，完全 DIY 最後我揀左煙鴨胸天使麵，配蒜片欖油汁。 除咗鴨胸，其實仲有少少蕃茄仔、菇同茄子。個汁又辣辣地，好香好滋味。 晚餐menu, 雞豬牛羊魚都有，價錢由百幾至二百幾不等，有齊餐湯、沙律、甜品同餐飲。 法式紅酒燴羊膝 $198 有驚喜，羊膝很大份，配上多款蔬菜例如露筍、粟米仔、紅蘿蔔及薯蓉等等，賣相一流。 羊膝好淋好入味，又唔會有羊羶味，真心正。 切開來伴紅酒汁食仲啖啖肉，食得出幾高質，呢個價錢好抵食。 餐前沙律，上面舖滿一粒粒橙色珍珠，原來係做甜品用的爆珠，又幾鬼得意喎。 餐前小食，炸薄脆，好特別喎。 跟餐忌廉湯，味道不錯又夠大碗 熱奶茶，茶味較濃，要加多D奶先得。 跟餐甜品，小小一件Tiramisu, 食到好香酒味、咖啡味同濃濃的朱古力粉。好滑好軟又凍凍地，口感一流。 餐廳環境，真係幾舒服架！

生牛肉湯河 $58 湯底夠濃又夠熱，好香牛味，湯頭係鮮甜的，配上幾多香葉及洋蔥等，味道即時提升不少。 生牛肉都頗多，浸一浸緊緊熟就特別嫩滑。湯底正，牛肉靚，就連河粉口感都好得，滿分之作。 四寶湯檬 $60 四寶包括生牛肉、牛丸、牛𦟌同牛腩片，各款都係水準之上，好滿足。 厚切牛𦟌，筋肉分明，有肉味又唔韌，必食。 需要大讚的仲有小食，份量多、熱辣辣又好味。 炸魚餅 $36 一客五件都係三十幾蚊，真係超抵食。而且新鮮炸起熱辣辣的，魚餅有魚味，亦有香草味，點埋辣椒魚露真心正。 炸春卷 $36 亦都係超高 CP 之選，一客有六件，皮脆饀料多。炸得幾好，唔油膩，熱辣辣好滋味。 剩係望住D小食已經好治癒了。 熱奶茶 $13 青檸梳打 $22

朋友約食，去咗位於尖沙咀的居酒屋。一入座見到呢個格局，即時精神一震。 咁有氣氛當然要飯返杯啦，款式幾齊，基本上日本隊的啤酒、梅酒、吟嚷、發泡酒同威士忌樣樣都有，價錢亦算合理。 三得利頂級生黑啤 $52 瑞穗 梅美人 $55 每人一碟頭盤，用嚟送酒幾好。 都見到附近幾多人叫任飲套餐，價錢由三百至六百不等，豐儉由人。 除了任食，亦有散叫的餐牌可以選擇。 餐牌以外，仲有當天的時令海鮮可以做剌身，有貝類、秋刀、八角魚、金目鯛等都有，明碼實價。 今晚先散叫個宮崎牛火鍋，小試牛刀，得喎！ 宮崎牛豆腐壽喜火鍋 $288 牛肉好靚，油花分布平均，大大片又厚薄適中，簡直超曬班。咪睇佢煲仔細細，宮崎牛都有成五至六片，幾抵食。 壽喜湯底甜甜地，烚到宮崎牛肉緊緊熟，一轉色就好上水啦。再點一點蛋漿食，牛肉好香好滑，有口感得來又好淋，人間極品。唔怪之得咁多人來叫任食套餐，是有道理的，必食必食！ 牛肉被秒殺，之後再慢慢歎豆腐菜煲，有大白菜、皇帝菜、金菇同鮮菇等。睇得出用料上乘，吸收曬湯底的精華，新鮮好味。 特製墨魚汁炒麵 $82 欣賞佢有蒜香味，而且墨魚汁麵唔會食到個咀烏卒卒。豚肉片就炒得乾咗少少，但整體來說都幾好食，足料份量亦夠。

久唔久，就會食下燒味，大圍食燒味，呢間正嘢。試勻晒佢所有種類，全部都係水準之上，有誠意的。 乳豬叉燒飯 $70 乳豬最緊要皮脆，呢檔掂，肉質夠滑，乳豬幾香口。級數同酒席乳豬全體同 level, 唔使等去飲都有得食 叉燒我偏愛瘦叉，呢檔瘦得來幾淋身，好入味。 切雞燒鵝飯 $62 燒鵝肉厚而皮好酥脆，鵝味好濃，連食幾件停唔到口，超邪惡 切雞緊緊熟，肉質好滑，配埋薑蔥食可以清曬成碟飯。 燒味飯配檸茶真心夾，去吓D油膩。 雙併飯加飲品大約七十幾蚊，質素不錯，物有所值。個人小小願望，如果送埋例湯就perfect 池了！

大圍必食的中菜，有呢間，小菜館的格局。鐘意佢餐牌款式夠多，當中好多亦係自家創作的，驚喜滿滿。 頭盤小食，非一般的花生魚仔噃！ 琥珀合桃- 合桃焗得好鬆脆，糖衣外層配上芝麻，真係會令人食唔停架！ 醃涼瓜 - 集合甜酸苦於一身的醃涼瓜真的第一次食，竟然好香涼瓜味，好味喎！同合桃一齊食，都幾夾架！ 天下第一叉 （半份 $108） 厚切的叉燒，係傳說中嘅半肥瘦呀！ 鍾意佢嘅叉燒汁，好蜜味好香，必食！ 厚切得來好淋，啖啖肉有口感 香濃腐乳炒蝦球伴西蘭花 $168 師傅話用最左名牌腐乳「廖孖記」入饡，非一般平價貨可以比拼。果然食得出腐乳夠綿滑，豆味濃而且咸甜辣的比例控制得好平衡。 大大隻爽脆蝦球，每一個位置都 carry 到美味腐乳，口感彈牙，非常過癮。 籠仔甜梅菜蒸菜心 $128 嫌普通灼菜太悶，專登叫D特色野，甜梅菜+籠仔＋荷葉，蒸出來的菜芯特別清甜好味，成件事即刻高級左。 心多多大魚塊 $168 啖啖肉的炸魚塊，粉好薄好酥，炸完都係白雪雪而且唔油膩。有兩款醬汁可以選擇，分別是甜酸汁及粟米汁。 兩者之間我覺得蛋花粟米汁好味D，粒粒粟米濃芡汁，加入新鮮脆口的魚塊，冇得輸。 桂花白涼粉 濃濃桂花味，配上有口感的白涼粉，透心涼又滋潤。 馬豆糕紅豆糕 由細食到大的經典甜品，滑嘟嘟又有豆味，甜度亦好適中，高手之作 落地透明大膠簾，將每張枱完全分隔，夠曬安全衞生，而又唔會阻礙視線，貼心設計，大讚！

想食泰菜，可以來呢間。口味正宗得來，價錢又合理，而且座位闊落幾好坐。 海南雞飯 $68 都幾大份，雞幾滑，亦唔會太熟，火候控制得唔錯。配有傳統黃飯，特別香特別惹味。 仲有雞飯三寶醬，黑醬油、姜蓉及甜辣醬，用嚟撈飯特別滋味，水準之作。 馬拉盞炒椰菜苗 $59 椰菜苗都幾嫰口，炒出來仲係好翠綠。馬拉盞辣辣地，好香好惹味，食得出好鑊氣。欣賞佢 酸辣鳳爪沙律$55 必食之選 辣汁夠辣，少少酸，好開胃啱曬我地口味。鳳爪碎上，食起上來好方便亦更入味。配菜無論洋蔥、生菜或芹菜都好新鮮好清甜，基本上成碟俾我地清晒 泰式燒烏頭 $118 肥美大條的燒烏頭，魚皮部份鋪上海鹽粒，燒起上來特別香特別滋味。 打開條魚，原來魚肚亦釀入不少香茅等香料，正宗泰菜的食法 魚肉幾嫰滑，點埋泰式辣汁真心冇得輸。 珍多冰 $25 傳統的泰式特飲，椰汁珍多冰。除了下層的珍多啫喱，上層還有一絲絲大樹菠蘿肉，香甜美味。 咸檸七 $22 咸檸夠下火，愈飲愈爽。 芒果沙冰 $28 炎炎夏日飲呢杯，堅係正噃，大杯又夠凍，仲有啖啖芒果味，二十幾蚊，好抵！

今晚吃烤肉，去左喜來稀肉，之前有食過，佢嘅泡菜水準之高，令人回味。 一坐低，已經有齊多款泡菜頭盤，俾你食住再慢慢諗吓食乜好。 天氣咁熱，當然叫飲品先啦。 平時食韓燒一般會飲啤酒，今次心血來潮，試吓佢個米酒先。 用大碗上，再用湯匙分落細碗飲，完全是韓國的地道模式，爽呀！ 五花肉好新鮮好靚，真係一層肥一層瘦咁夾住。燒完的五花肉其實係唔肥，脂肪部份燒到脆脆地，好香口好惹味。 而爐邊的蛋漿，一邊係泡菜味，香而不辣。另外一邊係邪惡芝士味，試左一啖，驚為天人 包肉的生菜、泡菜同蛋漿都可以無限添加，欣賞佢，全部都好好食。 牛肉幾靚，紅白分明。燒起來好香，食起上嚟又好淋。切到一片片正方型 size , 一口一片好方便食。 加上芽菜同甜辣醬，堅好食。 裝修幾有特色，又闊落好坐，同 friend 食飯一流的。

人少少又想食多幾款菜式，去阿爺到食雞煲火鍋就最啱。鐘意佢夠多海鮮，而且好多款都係任食。每款都試吓，都舖滿張枱架。



猴頭菇烏雞燉湯
老火燉湯，味道濃郁，飲完個胃即刻暖曬，正過屋企自己煲好多。


黃金蝦
好多咸蛋王包圍隻蝦，熱辣辣又惹味，呢道菜真係冇得輸。


刺身拼盤
簡簡單單的拼盤，欣賞佢既刺身蝦，大大隻好口感，三文魚就好肥美。




清蒸奄仔蟹
Like 社交平台即每人送半隻爆膏奄仔蟹，一隻蟹入面有齊軟膏硬膏，香滑又鮮甜。




麻辣花膠雞煲

香料配菜多多，麻辣雞好入味，肉質幾嫩滑，惹味的。除咗雞，仲有好多花膠，成件事即刻高級左 ！
而且鐘意佢細細煲，食完唔會太飽，可以留肚下半部打邊爐。






火鍋海鮮盤
有七款海鮮，有龍蝦、鮑魚、花蟹、蟶子、元貝、海蝦同瀨尿蝦，全部都新鮮又精靈，除咗龍蝦，其他都可以任食，正！




鮑魚都幾活潑，上枱時仲係郁郁下，好新鮮，encore 了。



龍蝦算大隻，有膏又肥美，睇住時間烚五分鐘，啱啱熟，肉質彈牙又鮮甜
每人半隻都好夠食


火鍋除了海鮮盤，仲有幾十種配料任食，連貴價海鮮如蟶子、花蟹、鮑魚、生蠔、海斑片都係任食，啱曬海鮮怪。



特別欣賞佢嘅蝦丸，好新鮮，食得出係手打，蝦肉多粉少。睇住佢由灰白色煮成鮮橙色，就知佢堅料，好彈牙好蝦味。



黃金時段每位 $338， 加二十蚊任飲啤酒汽水，有加一，但冇收醬料費，收費算合理。