兩個女仔行街行到攰就揀左Day and Nite by Master Kama。餐廳位置夠方便，裝修有格調，近旺角站E岀口，Walk in入去唔洗等。
胃口細既我地，見到menu有龍蝦包，唔洗諗即刻要，一齊share食。 主角龍蝦包係每日限量供應，黎到已經聞到麵包香，咬落啖啖龍蝦肉，仲見到個蟹鉗架！值得一提係個麵包，外脆內軟，充滿牛油味。旁邊附設薯條，好味道。

天氣涼涼地就想打邊爐，今次去左大圍果間616牛肉火鍋專門店。裝修走懷舊風，有以前糧油雜貨舖感覺，係等位既時候忍唔住影幾幅相打下卡。建議打電話book枱，因爲多人食既關係，walk in既要等差不多30 - 45分鐘。
雖然走懷舊風，但用ipad落單絕對方便。鴛鴦湯底揀左新推岀既酸菜湯底同牛骨清湯底。舖頭好細心，連墊枱紙都畫埋牛既部位同淥既時間，跟住叫就最好不過。肉類叫左匙柄，三花腱，卦門柳，吊龍伴，其他就叫左羽衣甘藍，嚮鈴同烏冬。 酸菜湯底好好食呀，淥個烏冬落去，簡直係止到我對酸辣粉既癮!啖啖肉好正呀，整體對牛既認識多左，原來牛可以咁爽，咁腍，咁juice。客人仲可到自助吧調較醬料，記住試個牛肉汁同青檸，絕對係味覺提升！ 616仲有段優惠: 晩上19:15前結賬離座 或 後入座 均享有88折。

紅磡小食店愈開愈多，尤其係觀音街小巴站附近。之前行過差館里見到R.T. Thai BBQ，有新野試就買左燒豬頸肉返屋企加餸。 原來係即叫即燒，都幾大塊，份量夠食，價錢又商宜，一路等外賣一路傳來燒烤味，好肚餓呀! 店主仲隨外賣附送醬汁，辣辣地，點豬頸肉好惹味。 唔好睇舖頭細細，選擇都幾多。仲有客人叫串燒即買即食。睇黎下次得閒可以試下menu上面其他野食luuuuu，仲可以打外賣電話落定order

不妨一試既茶餐廳

新澳咖啡餐室

作為麻甩系女生，假日就梗係周圍試唔同既茶餐廳!新澳咖啡餐室坐落係黃埔民泰街，黃埔站A岀口，幾方便。裝修好有香港舊冰室感覺，旁邊擺放左香港街道同香港特有公共交通工具既擺設。
新澳仲好窩心咁設有室外坐位，岩哂養左寵物既食客，可以同狗狗一齊享用下午茶。 入到去，幾滿座，侍應好快就執好枱比我地。今次就揀左佢既招牌茶餐:招牌炒蛋配蒜茸牛油多士及牛肉公仔麵(J2)$45。滑牛有驚喜，幾嫩唔靭，又入味。多士蒜茸味幾岀，咬落香脆，唔錯。唯炒蛋配果塊火腿略嫌失色，麻麻地。但不得不提係杯凍奶茶，茶味夠，少甜岩岩好，好飲！！行過絕對會外賣杯凍奶茶返屋企慢慢嘆！ 家姐就叫左個優閒下午茶:生炸雞髀配薯條(H1),$38。睇得岀雞髀同薯條係新鮮炸，無翻炸，黃金顏色，咬落脆卜卜好熱氣呀！！但好好食，腌得入味唔咸。我地叫多左個西多士share食，omg又係新鮮炸起，切落去有花生醬，係花生醬呀！！好邪惡，但真材實料
結論係，係黃埔又多個飯堂啦😂

糧尾首選
譚仔三哥

重口味既我對譚仔三哥簡直係有種心癮，時不時就會去食。黃埔依間係我成日會去，唔洗點排隊，新裝修完坐位空間亦算寬敞。最喜歡三哥酸辣，比普通酸辣味較濃，同麻辣一樣可選辣度。建議食唔到辣既朋友唔好揀辣度，揀左會較辣。每碗米線內附少量韮菜，芽菜同腐竹，不喜愛食配菜既朋友可以係落單果陣提前同侍應講走配菜喔。 每次都係叫豆卜，魚片頭，三哥酸辣少米線$39 (唔做大嘥鬼，少米線仲減$1)。豆卜吸左酸辣湯既精華真的好好吃，不過要小心熱。 朋友揀左麻辣小辣米線配韮菜同豆卜，一樣係少米線($38)。值得一讚係韮菜幾新鮮，食起上黎「唔老」又無渣。 另一樣必叫既就係尖椒皮蛋 ($21)，好惹味!!

Shine
同朋友gathering梗係揾間舒舒服服既西餐廳傾下計食好野啦。今次去Shine location方便唔難揾，地鐵站isquare岀口轉角就揾到太子集團中心。上到去感覺裝潢高檔，有吧檯位，位置亦算寬敞。第一次黎依間餐廳，以為會比較貴，點知睇menu價錢算中等公道，始終坐落尖沙咀。
Appetizer:
炸魷魚 份量唔算少，兩個人食岩岩好。魷魚幾彈牙，唔會靭，連平日怕「梗胃」，難消化既我，都忍唔住係咁食。

水牛城雞翼 份量大概有六隻，如果多朋友既，起碼要叫兩碟先夠食。雞翼炸得岩岩好皮脆肉嫩，好好食同時好熱氣🙈，有少許辣。建議食唔到辣既朋友可以叫單骨雞翼。

Main course:

德國脆炸咸豬手 想食左好耐!!熱辣辣，脆卜卜又juice既咸豬手食落唔咸又有pepper，幾夠味，點埋芥末醬真係好滿足。美中不足係要自己切，切哂成隻有啲攰。

紅花煙三文魚意粉 意粉上面煙三文魚點綴，仲以為就係得咁多，點知一舀就見到好多煙三文魚碎散布成碟意粉，又幾多料喎，整體幾creamy又散發住smoke salmon既香味，不過食完好飽。

善茶
今日約左朋友係尖沙咀食飯，見未夠鐘就周圍行下，見白蘭軒道巷仔有間裝修富有港式情懷既飲品店，就比佢吸引左。原來佢主打港式地道飲品，見到餐牌有港式絲襪奶茶就毫不猶疑揀左黎試，話哂奶茶係本地特色飲品，每次去茶餐廳都一定會叫，一試便知龍與鳳。
店員好細心，知我依啲怕肥既女仔重視糖既比例，仲介紹我飲微糖去冰，咁先飲到茶底既回甘。 見到奶茶隻色就知茶同奶既比例岩岩好，飲落茶味夠濃，整體口感香滑，唔似珍珠奶茶咁奶白同死甜。見到menu仲有平時係茶樓飲到既壽眉，普洱同香片揀，下次可以帶媽咪黎飲，唔怕佢話我成日飲埋啲無營養又要排隊既珍珠奶茶啦🙈  朋友就揀左店員介紹既蜂蜜柚子香片，飲落有少許驚喜，有别於一般柚子茶，依個反而係茶味較重，唔嗜甜既朋友經過可一試。冬天飲熱蜂蜜柚子香片應該唔錯，$22抵過連鎖店既果茶! 一杯奶茶$26依個價位同係茶餐廳飲差唔多，唔算太貴，價錢中等。其中一個會回頭既原因係依度有打卡位，同朋友影相post ig story真係唔錯，有種80年代感覺。最warm係每買一杯，善茶就捐$1比慈善組織，經過買杯茶仲可以做到善事，唔怪得叫善茶啦! 意念確實唔錯