今日光顧了板神發現他廚師的水準十分差勁。理由如下， 1.洗手後用濕手做飯，水滴落在食物上 2.沒有烤麵包，麵包吸收了盤子上的菜水，是軟的 3.烤蔬菜滴水不止（除非是故意的效果） 4.一開始沒有問過敏或食物喜好（另一台的廚師問了） 5.蝦頭苦的，炸過頭了 6.炒飯沒有味道 7.很鹹的鮑魚 8.廚師態度差：說話很小聲，連客人的眼睛都不看 我希望只是該廚師 服務態度不好和廚藝欠佳， 而不是整間公司也是同一水平。 唯一的優點是 服務員態度良好 彬彬有禮， 我相信我短時間內不會再來

發現自己好耐冇食過日本菜, 今日就走左去食拉麵, 因為太肚餓既關係,我哋叫咗兩款拉麵同小菜
我發現前菜小龍蝦蟹籽沙律外表雖然平平無奇,不過係勁好食!食到唔停口想再叫多一份,  而蝦味噌豚骨湯麵 比我想像足料, 粟米, 蝦撈埋一齊食, 好有層次感
建議你哋加蒜蓉落去連湯食, 加咗之後完全係另一度風味, 簡稱重口味,  一個拉麵, 兩種口味, 正! 佢個豚肉同流心蛋亦都做得非常出色, 硬度啱啱好。 另一個豚骨湯麵 就非常適合鍾意豬骨湯底既人
因為佢冇其他配菜既關係, 出色與否就好睇豚骨湯嘅味道, 同埋拉麵嘅彈性
當然, 以佢都做得非常之好 食完唔覺肥膩
餃子就啱啱煎好上, 個皮好脆, 個餡好多汁, 小心爆汁!

今日放工好肚餓, 就去咗附近嘅餐廳食飯, 發現原來有間隱世嘅小店喺鰂魚涌度, a lucky day。 入到去, 我哋嗌咗三度送 分別係苦瓜炒羊肉, 金沙四季豆同埋蚵仔酥。 我覺得苦瓜炒羊肉真係做得非常之出色, 炒完嘅苦瓜完全冇苦味, 羊肉更加冇騷味, 加埋豆豉調味, 正!
苦瓜炒羊肉嘅味道濃郁，似港式嘅小菜，豆豉味好重，親白飯一流，可以食多幾碗 至於金沙四季豆, 真係有邪惡又健康, 炒出嚟嘅四季豆好爽脆, 撈埋蛋黃, 食下食下成碟已經食完。 最後蚵仔酥係必點之選, 蚵仔炸得香脆，面頭加左啲椒鹽粉。蚵仔好新鮮, 食得出唔係急凍貨。
 比起出面啲台灣餐廳, 佢做嘅蚵仔酥更加之出色, 而且分量都非常足, 唔會得一小碟唔夠食
下次會去試下個LUNCH!

今晚去咗荃灣愉景新城。個商場多咗好多食肆，想經濟實惠D鋸下扒但又唔想去快餐店同人迫，最後我地就揀咗茶餐廳2.0。

嗌咗個紐西蘭西蘭牛扒配薯條。冇諗過咁大份！塊扒有成隻手咁大，非常之厚身，有吋幾兩吋厚😳我哋嗌左五成熟，又真係煮得啱啱好，切開中間嘅肉仲係鮮紅色。因為個板超級熱，一路切開塊扒，輕輕反一反，果邊就好快會煎熟。咁厚既牛扒食落去完全唔鞋口，而且好重牛味👍🏻啖啖肉真係好正。佢啲薯條亦都好厚身，尤其係放喺鐵板上面一陣，將佢個皮烘到金啡色就更加好味😍
另外我地仲嗌咗個期間限定嘅鹿兒島A4日本和牛鐵板燒😆估唔到百零蚊就食到和牛💕仲要個賣相好靚，好似high tea咁！兩個人食一人食一層就啱啱好啦。啲牛完全冇調味，直接放落鐵板自己燒。我就用左枱上面嘅鹽調味。淡淡嘅咸已經帶出到和牛獨有既牛油香。雖然牛嘅份量比起一般鐵板少啲，但係因為和牛特點係豐富嘅脂肪，所以其實個份量係好足夠☺
間餐廳仲有一個出面比較少見嘅甜品系列就係雞蛋仔fushion. 叫咗個蘋果金寶雞蛋仔。第一次用匙羹去食雞蛋仔感覺好特別，啪開雞蛋仔個感覺就好似啪泡泡紙咁。連埋淡忌廉仲有香甜嘅糖煮蘋果同提子乾一齊食真係好好味👍🏻個口入面有冰凍嘅雪糕、有濕潤嘅朱古力醬仲又有香脆嘅雞蛋仔。。下次再嚟要試埋其他味😋 我推薦比一家大細嘅朋友黎鋸扒同食甜品。 小朋友應該會好鍾意食個雞蛋仔😆

今日就去咗食川菜, 我諗大家都知道川菜嘅麻辣十分出名  所以嗌咗三個小菜都係麻辣, 分別係 紅油抄手, 涼拌海帶同紅油肚絲。
呢間野既麻辣真係非常出色
  涼拌海帶個麻油味非常之重, 食落好爽, 係非常之好嘅開胃菜, 食完胃口大增。 紅油肚絲係另外一隻辣味, 豬肚醃得好入味, 配上青瓜既清爽, 真係好惹味停唔到口, 不過食到個嘴都腫咗 紅油抄手係最出色嘅, 雖然佢嘅辣味冇其他嗰兩個餸咁重不過配合餛飩, 另一種滋味。 最估唔到既係佢嘅醉雞煲都非常之好食, 一上枱加熱, 花雕酒香就散曬出嚟, 成個餐廳都聞到
職員非常之貼心咁幫我哋落埋啲雞, 煲到到啱啱好, 好滑。
食完辣野再食清野, 咁先COMPLETE 嫁MA

今日去咗apm行街 突然之間發現原來春水堂喺觀塘開咗餐廳咁我哋梗係要試啦  咁岩個日係母親節, 唔到六點都要啲人已經開始排隊, 最後我哋差唔多等左半個鐘先入到去


一黎就叫個開胃菜先,  麻辣涼伴牛肚絲
牛肚絲做得好爽,辣味適中,最佳開胃菜


入到黎食台灣菜, 冇理由唔叫滷肉飯係咪?  又真係幾惹味 勸減肥嘅朋友食要忍口, 因為你會不斷想食落去


之後要咗個紅燒牛肉麵,真係辣得適中,牛展同牛筋嘅比例啱啱好. PREFECT! 最後都要我哋要試春水堂最著名嘅珍珠奶茶啦 春水堂嘅珍珠奶茶比其他唔同嘅地方係佢既奶茶非常之重茶味, 同埋嗰啲珍珠比較細粒, 可以一啖啖咁食,好正 
唔止奶茶, 原來春水堂餐廳都好出色

幾個女仔去食high tea，自己心裏都預咗係食環境同打卡，對食物質素都冇咩期望。

我哋去咗位於尖沙咀山林道嘅victorian rose tea room，一出𨋢就見到富麗堂皇嘅裝修。入到間餐廳反而比預期中細，個樓底矮所以有少少壓迫感。

因為一早訂枱時已講明我哋食下午茶所以侍應一嚟就俾個飲品牌我哋。選擇唔太多：只有幾款咖啡同特色飲品。

最快到嘅係焦糖燉蛋，因為我好肚餓，唔等其他嘢先食咗-係好味嘅，上面焦糖脆脆同入面燉蛋都做得好,有少許雲呢拿味。再等左三四個字成個tea set終於到啦! 賣相好靚，三人份量嘅食物全部擺晒係同一個架上。可能我實在太挑剔，成個下午茶入面冇一樣野我覺得好好食。鹹點嘅蜜瓜火腿正正常常，並唔係用高級嘅火腿。個香煎蟹餅同埋個迷你漢堡係凍嘅，真係有啲失望。甜品方面最出色或者叫最有特色就係伯爵茶戚風蛋糕。食落去重茶味得來，蛋糕鬆軟。但其餘嘅草莓撻、朱古力撻等等同一般餅店做出嚟嘅甜品冇咩分別。正當我哋諗緊個餐其實係咪冇鬆餅嘅時候，個鬆餅終於上枱啦。鬆餅係唯一一樣新鮮出爐嘅食物，食味尚可。至於一開始叫個杯嘢飲，我就真係唔推薦啦。士多啤梨酸奶淡而無味，最後我只係飲咗一半。總括而言，我會推薦呢間餐廳俾唔介意價錢貴，只係想享受華麗堂皇裝修同英倫氣氛嘅你。

今晚約咗班好耐冇見嘅朋友係灣仔區聚聚舊，朋友就搵咗一間新開冇幾耐打卡一流嘅cafe。去到門口已經見到佢最有特色嘅黑白壁畫。沿途上樓梯我見到店主非常之用心嘅畫作，我哋幾個女仔讚嘆不已！

我地點左一個八爪魚沙律、一份羊扒、炸魚薯條同埋一個鵝肝大蝦意粉。

個沙律好清新👍🏻個汁係柚子醋，清甜開胃
炸魚薯條就冇乜特別，只可以講魚同薯條係即炸嘅，不過不失
至於個鵝肝蟹肉大蝦意粉嘅用番茄汁做底，加埋蒜頭彩色椒，個意粉煮得幾香😋香煎鵝肝係我嘅至愛，冇令我失望。唯一可改善嘅地方，就係比多隻蝦就好啦！
羊扒外脆內軟，羊肉質地唔會鞋，亦都唔會太蘇，好香口👍🏻個汁唔係普通西餐燒汁，頗重香料味，我就麻麻哋啦。唔好睇小旁邊嘅雜菜，個薯仔本身好有薯味，焗到個皮脆脆地，其他蔬菜好新鮮，絕對唔係急凍菜。 經過店員一番推介後，有人點左兩杯特色飲品，打卡一流❤我冇飲到我就唔方便評論好唔好味啦。 最後埋單我哋一個人~$200，價錢唔錯。因爲食物質素超乎預期，我哋坐咗成晚傾計都無俾人趕，而且店員仲好Nice幫我地揸機喺不同主題既壁畫前影相。我哋臨走之前，佢仲叫我地入去餐廳冇開放嘅區域參觀一下。入面原來好大似乎可以搞到私人派對🎉露台出面仲有隻可愛嘅貓貓添
我會將呢間餐廳去街比上三五知己傾吓計、影下靚相嘅你。

今日放工之後去咗銅鑼灣附近食嘢, 行行下發現到有間叫得牛牛牛嘅餐廳排曬隊好似好多人, 咁我哋當然要試下啦。


食台灣菜點可以唔食滷肉飯呢? 所以我地叫咗台灣菜最出名嘅滷肉飯同一個麻辣拌麵 我發現個拌麵真係幾辣, 不過好惹味 食極都唔想停,  P.S.食完之後個嘴腫咗 之後要嗌個珍珠奶茶黎解辣, 珍珠奶茶拍得住出面啲名牌奶茶店, 茶味十足! 個滷肉飯一食就知係正宗嘅滷肉飯, 滷肉非常之香 。
又係食極都唔想停!
如果要減肥嘅人就唔好嚟呢間呀


呢一間係一啲非常之高質嘅台灣菜,  佢嘅拌麵同埋滷肉飯都非常之高水準  加上佢杯珍珠奶茶,  令我覺得我好似去咗台灣咁

今日行街 想食pizza就喺銅鑼灣附近搵下有邊間出名嘅pizza店, 行過百德新街  見到呢間好似幾好食咁,就試下佢! 入咗去之後, 我地叫左一個沙律同埋pizza, 我個人認為沙律同埋pizza係一個好好嘅配搭


沙律方面, 我哋叫咗個香芒洋薏米沙律, 簡直專為夏天而設 上嚟好大碟 爭啲食唔曬 芒果好有香味
啲菜都好新鮮,  原來Pizza係可以雙拼嘅 我哋叫咗個至尊薄餅同埋黑白配薄餅
黑白配薄餅我本身以為中間嗰啲係芝士, 原來唔係,係薯蓉
不過佢配搭起黑松露都OK match。 而至尊薄餅, 非常足料, 全部都係送, 好有層次感,係不愧為最著名嘅菜式。

下次行過可以再試!