以前放lunch成日過黎食飯，自從換公司之后就好少嚟，隔左半年再試，水準都完全keep到。 今日因為係週末，3點到左都要排20分鐘隊，證明呢度真係好受歡迎 裝修都好有特色！ 叫左一個蔥油豬扒麵+炒蛋，上菜速度好快，但相信都係落單即炸嘅。 蔥油真係無得輸，聞到咁香就即刻食指大動豬扒果然係呢間鋪嘅招牌，皮非常香脆，肉唔會乾，好juicy 但係無論幾肚餓都食唔細，份量實在太多啦，對女仔嚟講一定食淨。 炒蛋正正常常，麵條好有咬口，唔想食飯嘅人都可以試下。 整體嚟講好抵食，以呢個價錢食到咁大碗又香脆嘅豬扒麵，絕對值得推薦。

同朋友兩個人一齊嚟食，雖然係好近地鐡站，但我地搵左一陣先見到係邊。上到去好快就有位，可能我地早去，走果陣好多人係門口排隊。 食物選擇都幾多，坐係位到見到一大本ORDER紙，出面另外仲有沙律區同幾款小食俾你任拎，不過ORDER 紙都已經有好多款食物可以揀。 出邊嘅熟食有章魚小丸子同埋葡撻，兩樣都試過，葡撻細細粒一啖一粒，個皮幾鬆脆。章魚丸子入邊真係有章魚，而且仲大大粒，個皮食到少少雜菜唔止係粉漿。 講下我地叫左Ｄ咩，我地ORDER左”御品鮑汁燴花膠”，味道有少少淡，不過好大份、好抵食。 而”黃金焗帶子”就麻麻地，咁大個錫紙兜粒帶子SIZE 應該係得一半，但味道唔錯。 其他燒物算係咁，”串燒蕃薯仔”好香好甜，一啖一粒好滿足，”芝麻雞翼” 食落都好香，反而”鐵板牛柳粒”唔知係咪煎得太耐，咬落韌左少少。 叫咗牛油炒雜菇，一上枱已經聞到好香牛油味，但食落呢又唔會太油。炒雜菇真係有好多唔同種類嘅雜菇，呢個係推介 最後我地嗌埋燒菠蘿，同埋最後一定要拎埋雪糕，食到飽一飽好滿足。

因為約左朋友喺觀塘行街，見到小火焰openrice評價相當好，所以一早就book左枱。建議大家週末都要預先book定，因為真係好多人排隊！ 真係座無虛席！ 黎韓國餐廳點可以唔食炸雞，其他地方好少有提子乾炸雞，所以就試下啦！雖然提子乾會跌曬落枱食唔到，但本身已經淋左honey，甜甜地夠曬味，而且雞入面嘅肉汁仲喺度。但下次再黎應該會嗌其他炸雞試，相信可能更好食。 呢個係招牌菜呀好受歡迎咁，上面嘅雞翼淋左柚子醬，少少酸甜味，好fresh~年糕會有少少辣，但好入味，同喺韓國食嘅冇分別，맛있어요！ 本身對呢一道菜最冇期待，以為拌飯都差唔多，但呢度嘅비빔밥係我覺得今晚最好食嘅首先waitress 好貼心咁擺底韓式辣椒醬等你自己加，再加埋蟹籽同拌飯原來幾match，食到停唔到口，推薦大家去試。 觀塘附近選擇唔算好多，呢度食物好味，價錢又唔貴，難怪咁多客人啦！

見到呢間openrice評價相當高，仲要喺米芝蓮店，所以食完晚飯就過黎食甜品。位置就喺he she eat轉角，附近有好多間甜品店對手。 可能因為過黎嘅時間尚早，啱啱係晚飯時間8點左右，唔使等位就入到去，但其實都算full，可見呢間係受歡迎嘅～ 都係叫左3個甜品share。第一個係earl grey奶凍： 雪糕冇咩好講，但奶凍好食奶味重，earl grey味唔會太搶，兩者好夾，又唔會太甜。係最推薦嘅一款甜品。 另外係因為店家推薦而嗌嘅芭菲。食完飯再食佢都相當有罪惡感，因為係焦糖口味一定會偏甜少少，但可以接受，啫喱味道都唔會假，一定要撈混食。呢個都唔錯完全明白點解會係推薦餐單。 其實呢味都唔差，但平心而論同其他鋪頭食到嘅冇咩分別，冇咩特色，對綠茶情有獨鍾嘅人都可以試下嘅。 埋單180，人均60唔算平，但有番咁上下質素嘅。

約左兩個朋友平日lunch過黎試新野食，雖然棟大廈唔難搵，但上到去竟然差d搵唔到個門口原因係餐廳大門都係關住而且寫上只供會員進入，好搞鬼 真係好鍾意呢間餐廳嘅環境，雖然平日lunch食完飯仲要去番工，但周圍好多花草佈置好有假日偷閒feel，可以好好咁放鬆一下心情 因為3個人所以嗌左3個set lunch share，但一上菜就知大鑊，每樣份量都相當大。 首先就係差唔多枱枱都嗌嘅饅魚蛋包飯，呢個配搭絕對唔會難食嘅，但味道亦唔特別，饅魚多骨食起黎要小心。 呢個冷烏冬就有d失望，材料唔少但略淡，蝦感覺唔算新鮮。 呢個pizza係最好食嘅，可惜因為份量太多亦係食剩得最多嘅。 其實每樣野食都唔難食，但正如店名一樣麻麻地啦不過不失，食野注重環境嘅人倒不妨過黎一試。

可能係時間尚早，難得和民唔使等位就入得，唔知想食咩嘅時候，和民會係一個好選擇，因為餐牌非常多元化。 因為3個女仔食得唔多，只係嗌左3樣野share。 沙律相當足料，上枱時大家都嚇左一跳。材料如圖所見，除左沙律菜同雞肉，仲有蛋、蝦、水果、青瓜等等，3個人食都有剩。 每次黎和民一定要叫石鍋飯，呢次都不過不失，為左避免飯焦一定要keep住不斷攪。 食完唔係好推薦嘅海鮮鍋，已經唔係要細鍋，但感覺只係得d蜆肉，而且價錢唔算抵食，可以唔試～ 最后埋單3xx，人均115算抵食。

平日中午時間，為左食越南野就bk左品越。但係呢間餐廳嘅位置有d難搵，因為佢雖然地址喺雅蘭中心，但就唔係喺平時正門果度上去，而要行到山東街嘅側門上樓梯，所以都花左d時間問路。 之前有試過中環分店，覺得唔錯，所以期望都幾高。 就旺角餐廳黎講，呢度裝修唔錯，而且幾多位，位置又難搵所以平時都應該唔使點等位 揀左一個春卷撈檬嘅午市套餐，一般撈檬都係安全嘅選擇，今次都唔例外，春卷都好脆好好食。 另外+$8要紅棗桂圓茶，細細杯好足料，所以有d濃有d過甜。 呢個就好唔推薦啦！米紙好厚冇味，虎蝦比想像中細...唔係太值呢個價。 以午餐本身黎講，價錢唔算貴，味道都正常，但建議唔好加$試小食啦。

之前已經陪屋企人黎過幾次，每次都係周末朝早。每次大概10點幾黎到，雖然客人好多，但都唔難搵到位。 呢度嘅點心真係大碟又抵食～而且食物質素都相當唔錯架！ 其中比較推薦嘅有豉油鳳爪，每次必點！ 腸粉都好足料～ 粉絲睇落以為會好淡，實際食落味道啱啱好，適合食齋嘅人。 另外比較值得一提就係個薄撐，好薄好香口，食落唔會覺得麵粉太多。 最后通通食清光埋單都係$3xx 由上面嘅相都見到食物款式好多，上菜速度快，價錢抵但又唔會偷工減料，所以好推薦大家同屋企人黎試下。

旺角越式餐廳唔少，呢間算係幾多好評，所以過黎試下。裝潢都幾靚，同行嘅小朋友都好鍾意，而且仲會有越南音樂聽 因為係平日午市時間黎到，最抵梗係食set lunch啦，其實同餐牌價錢差唔多，但會多左餐飲同小食。 蒜香牛柳粒飯 豬頸肉炒飯 以上兩個飯都係一般，牛柳粒份量幾多，但唔算嫩滑。豬頸肉幾香唔韌，但炒飯就有D乾。 蝦餅撈檬 食越菜最鍾意就係撈檬，係一個相當安全嘅選擇，呢度嘅蝦餅炸得好脆又有蝦嘅香味，好好食～ 生牛肉河粉 越南河粉真係冇得彈，地道嘅湯底，送上枱后無幾耐牛肉先浸熟，所以仲好滑好好食。我地食完仲要encore兩個先夠本，最后5個人嗌左7個餐 同場加映：滴漏咖啡 午市真係好抵食，附近返工嘅人可以黎試下。

親戚想食放題，咁啱瓊華個位就腳，就決定4個人一齊去試下。 可能因為係平日午市，客人唔算太多，訂左枱即刻就入得。去到先知原本平日仲有set lunch揀，價錢唔貴，打算下次黎試下。 有成個飲品雪櫃任拎，而且仲可以寫紙嗌特飲。試左藍糖白桃梳打同紫貝天葵白桃梳打，藍糖較甜，紫貝天葵好開胃，顏色鮮豔小朋友都好鍾意。 落左單冇幾耐刺身上枱啦～各款刺身都好新鮮，最鍾意三文魚刺身同大赤蝦刺身，三文魚夠肥美，赤蝦多肉大隻，呢個價錢比到咁高質素嘅刺身，絕對抵食！ 另外燒羊架都好值得推介，我平時好少食羊肉，因為燒得唔好或者羊肉唔靚就會好騷，但呢度食嘅羊架完全唔怕，好好食～ 仲有炸物同天婦羅即炸即上枱，香口夠脆。 最后食埋甜品同haagen-dazs同movenpick雪糕，非常滿足