去咗呢間位於旺角嘅肉蒲團火鍋放題，揀咗花雕醉雞湯，湯底非常濃郁，陣陣酒香，之後加埋再加雞入去熬湯。 放題可以揀好多唔同部位嘅肉類，特別推介A4和牛後腿肉、和牛肩胛肉眼，同埋和牛牛胸片肉，肉質非常靚，雪花分布均勻，肉味濃郁。 虎蝦，非常大隻單啊，肉質新鮮甜美。 牛滑亦都十分推薦，肉味非常濃郁，肉質非常單牙，n call 再 n call! 台湾10級，味道都非常特別，外面係香滑彈牙嘅魚蛋感，入面就有豬肉、粉絲撈埋香料嘅香滑口感。 餐廳蔬菜、丸類亦都非常之多選擇。夾咗好多新鮮嘅菠菜、豆苗、萵筍、爽脆牛柏葉、墨汁墨魚丸等等。 最後餐廳送埋一人一杯嘅Häagen-Dazs雪糕，圓滿美味嘅一餐。

冬陰功湯（細）：一上臺已聞到好香，睇色水就知湯底好香濃，有唔少既香料係入面，酸度及辣度平均，配菜亦都有唔少，有蝦，菇菌類等等，飲完個湯特別開胃醒神。 串燒拼盤：豬牛雞各兩串。賣相唔錯，份量亦都唔細新鮮燒起上到嚟熱辣辣，有沙嗲醬同酸醋比你點，個特色。牛串味道濃郁，頗有驚喜。 海南雞（細）：雞件好嫩滑，肥瘦適中，份量亦都好足，送飯一料。 菠蘿海鮮炒飯：原個菠蘿上，賣相幾有睇頭。飯粒都夠乾身，唔會油淋淋咁，有臘腸，肉鬆提味，加埋海鮮配菜，味道好夾。食件海南雞送兩啖飯更加是絕配。 總結：環境舒適，裝修新淨，食物質素唔錯，份量足性價比高，冬陰功湯頗有驚喜，值得一試。

椒鹽鮮魷：前菜。鮮魷食落爽口，炸粉厚道適中，唔會油淋淋，再薄一點口感更佳。 海鮮粉絲煲：賣相唔錯，食落幾有鑊氣，粉絲收得夠乾身冇黐底，海鮮配料多，有魷魚，蝦仁，帶子,蟹子等等。 生啫牛魔王：個煲有乾蔥，蒜頭，薑等等爆香。而牛既配料方面有不同牛內臟部位，例如黃喉，黑柏葉，牛骨髓等等。黃喉同黑柏葉都好爽口，充滿爆炒既香料味，食材生鮮無腥味。 牛骨髓就好少地方食到，食落軟軟糯糯既口感，有油脂既香味，爆香過更有風味。鍾意食內臟既一定要睇下。 總結：地方頗大，環境夠哂舒適，又近地鐵站，煲類幾有鑊氣，牛魔王煲頗有驚喜，係牛魔王既你一定要試。

胡椒豬肚雞湯：胡椒味10分濃郁撲鼻，有淡淡嘅鹹香。原盎跟埋幾舊雞肉同豬肚仲點綴。 杏汁燉豬肺湯：奶白色嘅湯底，原盎燉，杏汁味極濃，有別於一般嘅餐廳，飲得出好足料。 白灼韭菜花：餐前小食，賣相靚仔，食落無渣。 白灼海蜇頭：餐前小食，海蜇頭特別爽脆，配埋少少麻油作為點綴， 10分匹配 油浸虎杉斑魚：貴店既招牌菜，條魚由魚缸新鮮上，經過廚師開邊及走油處理，均衡受熱，魚皮特別香脆，過程中亦保留到肉質既水分，食落唔會覺得柴皮同變左炸魚咁，呢求菜的確顯現到師傅既功力。

今日嚟咗近家樂坊鴻光大廈呢間煲師傅砂鍋小菜，見到好多唔同特色野食，川味小菜、雞煲烤魚放題，砂鍋小菜等。 最後揀咗雞煲放題，可以任食兩個鐘頭，仲有嘢飲同Häagen-Dazs雪糕。 雞煲揀咗麻辣味，好快就上枱，雞件已經煮熟咗，好多都係雞髀位，再煲一煲得好聞到香噴噴洋蔥、芫荽、同埋花椒味，味道香香嫲嫲辣辣，同雞件好夾。 食完雞煲，加咗清湯變火鍋，嗌咗好多火鍋配料。出乎意料之外，有任食黃喉、豬腰唔係普通放題可以食到。黃喉、豬腰都爽口彈牙！ 不限次數，叫咗幾次美國肥牛、新鮮海蝦、水魷魚、牛柏葉、蟹柳棒等等 特別推介海蝦、水魷魚、蟹柳，質感彈牙，鮮甜。 蔬菜類都好新鮮、叫做娃娃菜、凍豆腐、條裝萵筍、響鈴同埋薯粉，全部食材都新鮮。 最後食埋雜莓味同咖啡味Häagen-Dazs雪糕，滿足嘅一餐。

樂富呢間平昌燒肉店裝修新淨，座位舒適。 揀咗世子餐，嗌咗好多唔同海鮮同肉類。海鮮試咗好多款，有帶子、大蜆、石蠔、蝴蝶蝦、魷魚等等。肉類都試咗好多款，有牛肋肉、牛仔骨、豬大腸、豬頸肉等等。 特別推介世子呢個醬油蝦，醃料好香，蝦肉燒完之後，十分爽脆，ncall 左好多次。 除此之外，雞腎都好彈牙，有肉汁、雞軟骨燒完脆卜卜。 水冷麵值得好推介，麵質煙煙韌韌，湯底好清新，配埋青瓜絲、蛋絲同埋蕃茄仔，非常醒胃，自己一個食咗成碗。 辣豆腐海鮮湯，都好多配料，好有海鮮味，入邊有蟹、蝦、蜆、金菇、蛋等等，味道濃郁。

等緊食物嘅時候，待應比左碟醃蘿蔔，酸酸地少甜，給最後，開胃小菜。 松茸素餃，食到松茸件，味道香濃，配搭蔬菜爽脆口感，非常夾。 龍鳳松茸黑松露鴛鴦餃，餃子煎得剛剛好，外皮金黃色，兩種味道各有特色，松茸同黑松露味道濃郁、香口，配搭豬肉新鮮多汁。 麻辣涼麵，唔算話好辣，有麻辣香，涼麵煙煙韌韌，會買芝麻醬汁，中和辣味。 竹昇米線，清湯配芫荽，米線麵質爽口彈牙。 蜜棧雞翼，外皮香軟，內裏肉質飽滿。 最後，叫埋杯飲品，檸檬薏米蜜糖水，米白色，唔會太甜，有好多薏米粒係底下，飲完才可以食埋啲薏米。

金沙魷魚：香脆可口蛋黃味濃，魷魚好大件好有咬口。啖啖都係邪惡既味道 荷葉飯：飯粒乾身而分明，荷葉味香濃撲鼻。熱騰騰上碟，更顯荷葉香，緊係要拿拿淋趴兩啖先啦。味道均衡，唔會太咸，份量都好足。 海鮮泡飯：湯底鮮味，蝦湯既精華所在，泡飯跟埋脆米上，增加泡飯既口感同層次，確實唔錯，而泡飯都比較易入口，鍾意清清地既不妨試下。 總結：餐廳對住無敵大海景享用佳餚特別開胃有食慾，食物質素亦唔錯，服務員照顧周到，主動斟茶加水，確實係促膝詳談同relax既好地方。

麻醬菠菜：開胃菜之一，口感冰涼，菠菜嫩口而冇渣，味道清新。

雞皮串：乾身而爽脆，有雞油香。

紫蘇葉雞皮蝦串：食法同雞皮串有少少唔同，三種食材既配搭好夾，燒過既紫蘇葉更突顯香味，雞皮串除咗提升整體爽脆既口感，雞油亦能將蝦既鮮味同紫蘇香味 鎖住係蝦身，用心之作。

雞軟骨串：保留到雞油嘅鮮味，爽脆可口，唔會燒到乾爭爭咁。

雞三角軟骨串：三角軟骨為雞胸嘅部份，食落爽脆，油分無一般軟骨咁重，但配埋雞胸肉 各有特色。

雞翼串：燒雞翼係人都鐘意食，一場黎到緊係要試埋啦。只要食材係新鮮嘅，唔需要過多既調味已經好出眾

牛脷心串：牛脷心香濃而嫩滑，唔會有筋或者血管，食落好有咬口，熟度啱啱好。
澳洲牛小排串：熟度一流，保留到肉汁嘅鮮味，丁方切粒更易入口，而且又加均勻

燒雞腎串：細細粒但味道濃烈，口感一流，火喉控制得剛剛好，送酒一料。

燒羊架：肉質細嫩，冇臊味，熟到啱啱好，油脂香味四溢。

燒龍蝦串：龍蝦味好鮮而彈牙，保留到肉質嘅鮮味及水份，表面微微焦香令龍蝦既鮮味得以昇華，絕對值得一試。

燒帆立貝：選用食材食得出生鮮而上等，技巧上師傅亦都保留水分，蒜蓉嘅香味更是絕配，色香味俱全，的確無得挑剔。

燒南非鮑魚：南非鮑魚有別於一般嘅九孔鮑，無論鮑魚味及口感方面更勝一籌，爐端燒嘅做法將鮑魚味濃縮起黎，每啖都係海洋既精華所在。

稻庭湯烏冬：除咗主打嘅串燒之外，估唔到烏冬都頗有驚喜。湯底好濃嘅鮮味，但湯底色水好清，唔會過分濃郁而搶咗烏冬既味道，可謂恰到好處。

三文魚茶漬飯：賣相唔錯，茶漬飯去油解膩作用，配上三文魚碎作為點綴，作為享受甜品前既過渡。

清酒：呢隻清酒係店員既誠意推介，米香醇厚，容易入口，酒店好細心會幫你refill 同囉個stand 用冰粒鎮住清酒，咁就可以慢慢品嚐美食啦。

總結：食材新鮮而上等，海鮮類更是一流，無論烹調技術同服務都無乜挑剔嘅地方，整體十分滿意

點緊餐嘅時候，侍應俾咗啲脆條，香香甜甜，非常脆口，開胃小食。 第一次食烤魚，叫咗江團魚，而湯底就係招牌朝麻先向，表面鋪咗好多好多嘅青紅椒，同埋麻辣籽，味道越煮越濃味，香香麻麻，越食越開胃。 江團魚肉質鮮嫩，完全冇腥味，廚師烤過魚嘅表皮，所以鎖住魚肉汁，非常嫩滑，鮮味十足。 除此之外，湯底本身配有唔同嘅蔬菜，例如洋蔥、金菇等等。 烤雞軟骨，表面鋪咗好多好多嘅孜然粉，非常濃烈。 黃喉片，非常爽脆，煙煙韌韌，夠彈牙。 最後落埋薯粉，吸晒啲湯汁嘅香味。 飲品叫左薄荷青檸，好非常清新，味道好夾。 另一杯叫左水果茶，入邊有好多唔同嘅水果，例如蘋果、士多啤梨、藍莓等等，唔會太甜，味道一樣清新。