同朋友約左收工喺尖沙咀食飯,諗住簡簡單單食個中菜就算, 點知意外發現間精緻中菜!!
收工趕到過去都得等一陣先入得,被安排坐左喺望到海嘅位置,有點兒開心, 等一陣係值得嘅 打開Menu發覺菜式好多款, 3個女仔又食唔到太多野真係有啲難落決定~ 幾經辛苦唯有決定叫啲賣相吸引嘅菜
⭐蜜汁金華火腿烤雙方
極意外! 甜+咸味混搭嘅組合再加青瓜,脆脆炸腐皮,軟軟嘅夾餅皮! 呢道菜作為前菜真係加分! 好好味吖~
⭐三角海鮮餃
外表極精緻,呢塊皮嘅顏色同外表我地十分欣賞! 
⭐蟹肉大湯包
鮮味大爆發!! 比想像中更多湯汁,仲有一絲絲蟹肉,好好食!! 除左個頂有啲厚硬之外, 一切都很完美~
⭐金沙奶皇流心角 岩岩好一人一粒甜品,新鮮炸起外脆內軟,流心奶香濃郁順口, 用佢作為結尾真係好滿足~結論係好滿意嘅一間特式中菜!!!

難得入一次大埔搵朋友, 2個人又唔算好餓, 見呢間餐廳靚靚仔仔咁就忍唔住入去坐低食啲野 間餐廳裝修真係好靚,侍應們嘅制服都好好睇! 感覺淨係入黎感受下個氣氛都已經值回票價!!
喺openrice已經book定位,順利入座~ 基本上都係卡位, 所以點坐都舒服。
雖然無影相, 不過Menu設計得好可愛, 但餐點種類唔算多, 所以都簡左一段時間先決定到食咩。
蟹肉薯蓉沙律
賣相好可愛~但啲菜唔算好新鮮,仲要食到一半發覺啲蟹肉有啲腥, 實在太可惜了.. 明太子蛋包意粉
啲汁超多!加埋個靚蛋,撈埋一齊食真係好香! 明太子,蛋香,奶香!! 一下子沖曬出黎, 但又有可惜位,就係實在有啲膩..
好彩係同朋友share兩份食,如果唔係自己一個未必食得曬
青森蘋果梳打+蜜瓜梳打
超可愛又復古嘅飲品! 蘋果味好香, 不過係想像中嘅味道~ 雖然無驚喜,但係好飲的

跟公司食飯最緊要係咩,就係一定要叫一人一盅嘅燉湯!! (多謝老細) 花膠雞湯 =我最愛! 最鍾意呢啲雞湯味鮮而不膩, 好有屋企落足料煲湯嘅感覺! 雞肉以為會乾乾柴柴,點知力都唔駛.一妹就開~
呢個湯真係好精彩,力推!
黑虎掌菌蝦球鍋巴
第一次食黑虎掌菌,聽同事講返原來係啲咁矜貴嘅野黎 見佢個樣咁普通本來都無抱咩期待, 點知咬落口!真係唔可以以貌取人!! 好好食! 蝦夠新鮮,超級彈牙! 黑虎掌菌陣味慢慢出黎,開頭有啲似牛肝菌嘅味道, 不過2款都係靚菇, 不作比較, 因為2款都好好食~~
加埋個鍋巴, 簡直係絕配吖~~
鮮雜菌炒萵苣頭 起初只係想健康啲食個菜,點知都有驚喜~ 佢一上檯就覺得好可愛好靚, 炒得剛好, 爽又甜!
椒麻酸菜魚 睇到張相又流曬口水, 叫左個小辣, 魚夠嫩! 如果可以再香啲就好~仲有食左一堆食物都無影相,呢間餐廳睇黎可以變我公司飯堂之一, 大落地玻璃,又坐得舒服~

中秋節帶屋企人去食個齋, 見佢地食得開心就好😚
因為十五多人食齋,當晚訂位要先比訂位費$200,18:15入座~
準時去到,見餐廳座位都排得比較迫, 見普通4人卡位都要坐5個人,令到走廊好窄,辛苦曬啲員工~
雖然座位排得迫,但就未見有滿座, 從我嘅字裡行間應該都睇得出唔係坐得咁舒服🥶
但就返食物而言, 水準就很不錯~ 雖然我食齋次數不多, 但新派齋都會好重調味同埋用好多油去炒/炸.  但呢間感覺食完都好舒服,仲係有食到食物原貌嘅感覺😋  最好食就係個烤麩! 個汁嘅調味好食過出面上海店食嘅四喜烤麩!其次就係炒飯~入面嘅九層塔真係令個炒飯生色不少! 最普通係個蜜汁脆鱔, 因為實在太硬喇, 咬到牙骹都軟埋..當日元宵佳節仲送左一碗芝麻湯圓, 飲完個熱薑水, 同屋企人食飽賞月, 莫名地有一種滿足感~

每次喺附近剪完頭髮, 都想輕輕鬆鬆食啲小食(因為整頭髮真係要坐太耐..)
呢間餐廳唔經唔覺開左咁耐, 食物餐牌不變,唯一變得最明顯就係個價錢😂
燉奶係正常水準, 鮮奶咖啡香滑濃味,奶感厚實, 最鍾意就係個牛油咖央多!!😚 烘得剛好!(雖然睇相好似好深色咁😂) 咬落去又香又脆, 但又唔會刮到個口~
雖然可能好普通, 感覺好似成個香港茶記都做到咁, 但硬係覺得特別好食😂 舖頭嘅姨姨感覺都做慣做熟, 大家都輕輕鬆鬆, 食個下午茶都食得特別自在~
就算最近遊客多左都好, 只要唔駛排隊,我應該都會每次剪完頭髮就食呢間餐廳😼

呢餐飯可以用"難受"去形容
未講到食物同服務同環境, 呢餐飯出現左2隻曱甴已經令我好後悔簡左呢間餐廳做慶生飯..(仲要係我力推的) 呢個就係唯一食得曬嘅野, 可惜無咩膏, 好細隻滿滿嘅臭油味, 呢個最後食淨左好多打包走, 諗住返屋企煮一煮再試下, 但都拯救唔到佢 睇到張相又記起啲炸醬嘅苦味, 加埋啲濕到似「飯糕」嘅飯, 清清淡淡嘅人蔘雞湯...我地真係好努力, 但都係食淨左咁多, 浪費食物。
一開始我地一行三人入到餐廳, 佢就想安排我地全張會頂頭+頂背脊嘅出餐位, 其實見仲有3張吉檯, 但佢一黎就話唔可以坐。

但我地坐低左之後真係被頂左背幾次(未開始落單), 仲要未滿座都已經坐得咁唔舒服, 就再禮貌問下店員可否調位。佢地就講一大堆野, 又話有限時, 又話我地3個人唔坐得4人檯,  但最後有第二位店員出黎話ok ah你地可以坐第2張檯~ (點知個位仲要有曱甴)
其實我都明白餐廳想做大檯客, 我平時都好少要調位, 但係出餐正正喺頭頂, 仲會出熱鍋, 真係唔想食得咁緊張吖

估唔到事隔一年黎食嘅味道會差咁遠, 同屋企人都好失望

今日收工好心情, 約埋朋友去食個潮州菜~
以前喺青衣城食嘅翡翠係上海菜, 佢嘅潮州菜真係第一次食
首先環境舒服! 坐住卡位望住個海景, 真係估唔到同打冷都幾夾
另外順便一提, 2個人晚市都可以坐到咁舒服嘅卡位, 真係要讚下餐廳職員~

食潮州菜一定要叫佢嘅滷水! 我地就叫左個滷水鵝片, 一黎到真係比佢嘅份量嚇親!!仲叫左個龍鳳球~有雞有蝦~送飯一流!(不過唔記得影相)

有鑊氣炒飯!夠曬大碟!我地一共叫左3個食物, 可惜份量太大..最後要打包帶走
結論係, 原來佢除左上海菜好食之外, 潮州菜都好ok wor~~

首先, 我無影到米線嘅相, 但我要強調佢嘅撈米線比酸辣粉更好食!! (唔係咁食得辣嘅記得記得要落少少辣!!)
短短一個月內, 我食左2次橋底 2次分別係同唔同嘅朋友去, 點知大家簡嘅野食都差唔多 但今次令我激動左嘅係 狼牙椒鹽土豆  (手震) 令我諗起喺雲南食過嘅薯仔料理~一放入口嘅孜然+椒鹽味~omg~太滿足了~又想再去食! 另外再叫左啲例牌野~ 翠玉瓜真係必點, 次次都咁好食!! 同埋標題強烈推薦嗁撈米線!!! 雖然我覺得太辣了, 但最後都係忍唔住食曬

又係朋友介紹   身邊啲精明朋友最叻搵好野食,其次就係搵著數!! 咁都比佢留意到呢間餐廳8月內做會員就可以有一個免費指定套餐90分鐘放題套餐優惠 (雖然個優惠係要帶一位同行朋友一齊去食, 做會員嗰位先free, 但點諗都好抵) 湯底我地要左個椰子雞, 一上檯隻香味就令到我地車左個麵落去淥左先!!!
當日食得太多野, 最令我深刻就係呢款牛~ 真係一放入口就feel到啲牛嘅級數好唔同。(非專業食家嘅我, 食親放題都唔知自己食緊咩牛)
飲品方便我最鍾意荔枝紅茶, 唔甜又有茶香味~
最後食左3杯movenpick+2杯海鹽雪糕先走...
說好的唔會食得太飽 結論係十分十分滿意呢間餐廳~ 員工好nice, 收碟上菜都超快!!
希望快啲再有優惠!!

第一次好食到想寫個食評, 原來要夠字先可以比good good, 打多少少廢話先 正文來了! 見有個foodie朋友極力推介, 當然會抱住期待去食啦~
結果係, 喜出望外!!! 好好彩7點9去到唔駛排隊, 同朋友都叫左和牛~(佢極力推薦), 果然無失望, 真係好好食!!!! 特別係入面啲通菜粒, 喺個咁濃味嘅湯底下咬到佢真係個人都fresh埋 同埋好鍾意佢啲炸豬皮有大有細(碎), 唔會一下子浸曬落湯就淋曬, 留到最後都仲有啲大舊又脆嘅豬皮, 真係莫名地滿足~~
食幾啖麵啜幾啖湯之後, 加一匙辣椒醋~~簡直係味道大昇華吖~~~
其實仲叫左一份生菜包(好似係$48), 可惜我太飽了, 由朋友幫手清曬  期待下次再去食, 希望到時唔駛排太耐隊