完完全全真係垃圾…嗌咗個雞蛋腸粉 同 三溝（生菜、魚肉 同 碗仔翅） 腸粉味道正正常常… 入得口食得下..哩到就唔再作多餘嘅評論 真正令我火起嘅就係呢碗碗仔翅 睇下上圖都知，呢碗係成碗都係水… 完全唔係碗仔翅嘅狀態 完全係湯嚟…乜料啊？ 魚肉亦都唔彈牙…質地好硬..真係好差 食物質素得都算…個阿姐仲要唔老實 嗰度餐牌寫住三溝係$20… 但個阿姐收咗我$25，後尾我發現…跟住我問佢唔係$20咩？ 佢答我… 「大碗係$25… 細碗先係$20…啲魚肉都煮緊啦…我以為你要大碗」 你餐牌又無寫有分大碗細碗…我第一次幫襯….點知你點為止大，點為止細？你自己亂噏都得啦…你唔成煲嘢拎出嚟話賣我$100？ 完全覺得係欺騙顧客…你咁做…俾你賺多$5又如何？啲人都唔會再回頭幫襯你間嘢啦… 更何你碗嘢係咁嘅質素

上網見呢間小店有好多好評，適逢放假，就同老婆一齊去試下佢啦！ 呢間小店一D都唔顯眼，我地都搵左一輪先搵到店鋪入口。店舖雖然細，但都有唔小捧場客，係疫情下，職員係每枱都有提供消毒洗手液。 我地就叫左呢度出名既型男漢堡同埋台灣鳳梨蝦堡。牛肉好Juicy，配上流心蛋、煙肉、紅菜頭、蕃茄、芝士等等，成個口感好豐富呀！薯條剛炸起又熱又脆！另外個蝦堡配埋新鮮菠蘿，食落好fresh，味道好夾！ 野飲方面老婆就叫左個特濃花生奶昔，奶昔有好香既花生醬味，creamy 得黎又有小小花生粒粒，好飲好特別！我叫左個ice cream latte，latte上有個雪糕球，latte咖啡味亦都好香，飲完好滿足！ 總括嚟講，今餐性價比十分高，之後會再幫襯！

呢排見有youtuber 介紹係荃灣路德圍既一間車仔麵鋪，原來近排轉左鋪位，作為荃灣既街坊，我決定趁有時間同老婆去幫襯下！😃 原來呢度有好多款式既餸簡！我叫左魷魚柚皮油麵小辣，另外老婆就叫左豬紅豬皮粗麵。柚皮都係第一次食，亦都好少車仔麵鋪有呢味餸，食落甜甜地咁，估唔到咁好味！其他餸都做到好入味，老婆話豬皮淋淋地但食落爽口，配合個沙爹汁湯底好好味！👍 估唔到荃灣有咁高質又平價車仔麵，值得下次再幫襯！😬

入到去，地方唔大，但感覺都算骨緻。嗰到嘅櫈係無靠背，舒適度減咗少少分數！ 嘢食ok👌燉湯都幾好飲...呢點係值得一讚嘅👍同埋個價錢嚟講我覺得性價比係高嘅 但服務分我俾得好低...接下嚟我會用一大段文字表達 職員感覺好新手，好似無做過飲食業咁，可以話係零經驗啊🤔...啲單亂 其他嘢又跟唔足 個時嘅情況係全間鋪得十個客左右再加有啲外賣單，其實咁嘅客量真係唔算旺，點會做唔到架？ 咁我哋嗌左個荷葉飯炒油麥菜同一個湯 個荷葉飯到咗，但無餐具🥲 咁我哋就話想要匙羹同碗，明明我地係有兩個人食.... 佢俾碗同羮我哋，佢就真係只俾一隻碗同一隻羮🥣 咁之後我哋話要多副啦🥣🥣 咁食下食下，跟住碟菜嚟咗，我話「想要筷子」，個女職員就真係俾一對我哋兩個人🥢😅 係諗住一對筷子我哋share用？ 同埋個湯又漏咗單... 等左半個鐘都未有... 總結，嘢食合格但服務要加強，飲食業唔係個客講一句就做一樣...自己要 「sharp 醒」留意有咩位要做...fill水哩啲其實全程都無做過😐 其實一早放定餐具落台，又或者好似茶記咁，客坐低，落水就落埋餐具，咁咪唔會漏囉😑好多方法解決，真係要學習學習

行完山諗住食個下午茶，因疫情下所有食肆都閂六點，附近得返哩間垃圾仲開緊鋪，咁我哋都無得揀就諗住試下，點知就伏咗 我哋5點零5分入到哩間餐廳，個阿姐侍應就猛咁催落單，嗌干炒牛河又無河粉 最後叫咗炒豬扒意粉，份量就好足，但質素就好差，廚房求其撈埋一碟就算數，豬扒係返熱都算，仲要返熱都返唔好，個心係凍嘅 常餐啲牛都係凍 同埋催落單個呀姐上餐係成碟嘢飛跣上張枱，搞咩呀？ 食完，都只係5點8，杯嘢都未飲完，又係到催「我哋差唔多收工啦」聽到佢同啲同事係到討論「唔知趕唔趕到班車呢」... 心諗你哩架搭唔到咪搭下架囉，公司請到你咁嘅員工真係趕客倒米！ 豬扒炒意粉$44加杯凍飲多兩蚊 常餐$34再加凍飲 垃圾都值得$82？？？

兩人限聚嘅情況下，入到餐廳被安排到八人嘅卡位，坐得好舒服👍 一坐低侍應馬上奉上兩杯玄米茶，玄米味好香 嗌咗個 黑蒜油豬手鍋拉麵 同 燒西班牙黑豚叉燒丼 兩個餐都送熱飲，但其實可以唔洗，因為已經有茶 拉麵稍嫌唔夠彈牙，湯底亦唔算出色，不過都可接受，因為始終唔係專做拉麵嘅拉麵店 米飯用嘅係日本米，豚肉肥瘦適中，肉味亦都好濃郁 價錢嚟講我覺得少貴，個人覺得可以唔洗要杯嘢飲但平返$10個價位就合理啲啦 值得一讚嘅係我口罩條耳繩斷咗，諗住問職員拎釘書機釘返...但職員直接成盒口罩拎過嚟過「不如你拎過個新架啦」嗰刻即刻有好窩心嘅感覺🥰

下晝約咗朋友去旺角行街，朋友話不如食哩間係女人街嘅十三姨，咁我之前食過覺得唔錯... 平時呢間食店都好多人排隊，我哋兩點去到好彩唔洗等，已經即刻入座。 每枱都會附送印尼蝦片作為餐前小食，蝦片好脆。雖然餐廳嘅選擇唔算多，午餐set價錢尚算實惠。上次我就食咗呢度出名嘅十三么，今次就試下手撕雞伴雞油飯。油飯加埋炸蒜同香蔥，甜豉油去撈飯好開胃，食落唔覺好油膩，雞叉燒好食，份量有四舊，燒得香口。熱蜂蜜蘋果茶有粒粒蘋果，唔錯。

今日我哋行經元朗，見到呢間賣生滾粥嘅街坊食店，門外有唔少食客等緊，食店玻璃窗上貼滿工整嘅手寫餐牌，心諗食碗生滾粥都好呀，就叫咗個豬膶粥加油炸鬼外賣。 由於我哋唔係住元朗，拎住碗粥搭咗9個字車，返到屋企碗粥仲好暖，粥底棉滑，豬膶洗得乾淨，切得厚身夠爽，一碗有成差不多十大舊，好足料！不過油炸鬼係凍既，如果熱食應該會再正啲，好在浸落啲粥到熱熱哋食都唔大差 呢間食店食物真係性價比高，聽講都出名雞粥，有機會下次會再試！

難得嚟到石門，又見好耐冇飲茶，所以就試下呢間人龍小店！ 我地就試左個全日套餐-南瓜鳳爪排骨飯+花膠蟲草湯栗子燉土雞湯，燉湯飲得出冇加味精，但無乜藥材味，飲落清清地，比較淡味。 個荷葉飯比我地想像中份量大好多，飯粒比較濕，但排骨同鳳爪都算入味。 我哋仲叫咗個點心拼盤添，其中蝦餃同燒賣唔錯。 雖然食物ok，但環境就有啲逼，同埋嗰日係星期六晏晝，唔知係咪人手不足，職員做到好混亂...可以話係有啲燥添...全程淨係聽到有位職員好大聲嗌外賣No. 有啲嘈 而另一位負責收錢嘅職員組織性亦較差，做緊樓面服務...電話一響又沖去聽電話，明明入面有座位但遲遲未安排到入座，即使食完諗住埋單嘅客都等成5分鐘先俾到錢😓 講服務就真係唔係咁得，無以客人為上嘅感覺 本身想俾差評嘅...不算價錢唔算太貴同份量算多，評分俾「一般」啦

早排去左元朗大棠賞紅葉，之後見餓餓地就搵到呢間台灣小店，決定試下佢啦！ 我哋一去到，都見到好多人排隊入座/外賣，我哋都等左一陣先入到去。 小店唔大，裝修比較簡單。入到去我哋就叫咗呢度招牌名菜-肉羹湯新竹米粉，成碗嘢好足料，有蒜蓉，芫荽同辣醬，筍絲，撈埋一齊食個種酸辣好好味！肉嘅口感都唔錯，喺冬天食真係好暖胃！ 我哋仲食咗呢度限定嘅芋見紫薯土司，我自己都好鐘意芋泥同紫薯嘅味道，脆脆地嘅三文治，餡料豐富，所以覺得好好食，不過個餡係冰凍嘅，由於嗰日天氣好凍，如果係熱嘅餡相信會更加正 下次有機會會試埋佢地嘅滷肉飯同其他小食！