黃金魷魚($138)，份量都幾多件，鹹蛋黃炒到起沙包住晒每片魷魚，鹹香味濃郁，而且外層炸粉酥脆，魷魚口感半爽半煙韌，好正。 避風塘軟殼蟹($168)，大約有八件，同樣炸得香口酥脆，外脆內軟，帶少少辣。 泰式炸墨魚餅($128)，共八件，每件都算幾大，墨魚新鮮，食落有彈牙口感，外層酥脆，配泰式辣醬簡直係絕配。 頭抽乾炒牛河($88)，份量足夠兩個人或以上食，大排檔既鑊氣就係與別不同，炒出黎唔會太油或太乾，而且炒得好平均，每條河粉都沾有頭抽，牛肉軟淋好入味。

豬腳($238)，揀左較細份既normal size 450g，上枱時菜式非常大份，賣相好震撼，豬腳切成一片片，每片既厚薄度都好適中，唔會太薄欠缺口感或太厚油膩感，肉質燜得軟淋，皮好彈牙兼且keep到有少少咬口既咀嚼感，好重骨膠原，如果淨食豬腳覺得有點寡，建議可以用菜包住黎食，因為將肉和菜一齊放入口可以減低淨食肉既油膩感，加埋店鋪既醬汁味道更惹味。 雙拼炸雞($192)，一半係醬油炸雞，外層粉漿脆口，內裏雞肉嫩滑有肉汁，而且每件雞都已經去除骨頭，可以大啖大啖咬，另一半係辛辣炸雞，這個辣味道非常有趣，就算食完一件雞都可能覺得一d都唔辣，但辣度其實係後勁慢慢滲出黎，漸漸會發覺越黎越辣，另外仲有薯角、薯條、薯格做配搭，可以一次過食晒三種。 海鮮辣炒麵($108)，湯底雖然鮮紅色，但辣度唔算辣，幾適合香港人口味，麵質粗身，食落帶有微微煙煙韌韌口感，海鮮主要有八爪魚、蝦、青口。

麻辣小龍蝦，在香港小龍蝦雖然慢慢普及起黎，但仍然唔算好多地方可以食到，要整得好食就更加難遇到，麻辣汁確實正宗，咀唇有麻痹既感覺，辣度方面已經揀左微辣，就算只係輕輕啜蝦殼既汁都仍然好辣，十分刺激，夠香夠惹味。 酒香鴨舌，共有8隻，每隻都飽滿，酒香濃郁，而且帶微辣，配啤酒做佐口小食非常夾。 wasabi八爪魚，同樣係美味既佐口小食，wasabi汁包住八爪魚粒，肉質爽口，如果八爪魚切成長條口感會更好。 話梅蝦，係餐廳獨門秘方，話梅汁帶少少甜而且味道有回香停留在口腔，蝦厚肉大隻，彈牙口感。 椒鹽鮮魷，即炒即上菜，仍然熱辣辣，炸粉香口酥脆，魷魚彈牙並且冇筋容易咬開，本身已經好夠味，加少許淮鹽令味道提升就足夠。 玫瑰白蘭花梳打 / 夏威夷檸檬梳打，特飲除左清涼解渴，賣相仲好靚好鮮豔，充滿夏威夷氣息，冰粒係隻有不同顏色既熊仔。 木瓜雪耳糖水，木瓜清甜軟林，雪耳一吸直接滑入口中，食埋個甜品咁就非常完美。

好多新鮮生猛蝦，望到已經好想食，水缸就係座位隔離非常方便，夾起左既蝦先放入冰水等隻蝦暈左，再放上爐燒，咁樣d蝦冇咁掙扎周圍彈，隻隻蝦身型都好飽滿，而且仲有爆滿蝦籽，蝦頭亦有好多膏。 坐低無耐，店員會送上一艘海鮮船和優質牛肉，鮑魚大隻飽滿，爽口彈牙，加左生蒜更加惹味，至於扇貝雖然熟左會收縮變細，但一d都唔乾身，只需加少少調味已經好足夠，牛肉方面肉和油脂分佈比例都幾平均，入口有油脂既香味同時保留到牛味。 另外仲有其他款式種類，都係自助形式去拎，覺得幾特別既係居然有雞軟骨，口感”索索”聲，而且醃得夠入味，我幾鐘意雞腎厚切，因為食落咁先有口感，不過雞腎中心店比較難燒熟，要燒耐少少，食燒物點少得燒菠蘿，外層焦脆，內裏清甜多汁。 炸物同樣係任拎，放在一個保溫櫃內，所以食落仍然帶有微熱溫度，一邊食住炸物一邊燒住等。

突然有種心血來潮想食馬來西亞菜，二人套餐較抵食只需$366，而且選擇種類都幾多，可以自由搭配。 椰漿飯配馬來生炸雞髀，雞髀炸得熱辣辣脆卜卜，雞皮一咬就有超脆既聲音，雞髀肉唔乾身，做到鎖住肉汁無流失，辣醬味道會偏辣少少，我覺得加落雞髀到黎食好正，飯粒有陣陣椰香味。 馬來甘香海鮮天使麵，需要加$28，天使麵炒得夠香夠入味，帶有少少辣夠惹味，海鮮之中蝦嫩滑彈牙，青口亦飽滿大隻。 小食拼盤，自選三款，揀左馬拉盞一口蝦多士、參巴水牛城雞槌、馬拉盞魷魚圈，醬汁有兩款，辣醬和類似甜酸醬，雞槌同樣炸得夠嫩有肉汁，魷魚圈外層酥脆，內裏爽口彈牙。 班蘭咖央多士，食星馬泰菜必點既咖央多士，方包烘得好脆，這店咖央放入左牛油，好邪惡但好食能勝於一切。 美祿山，先飲一啖飲品再舀一匙羹美祿直接放入口，雙倍濃郁味道好滿足。 檳榔島敍雜果賓治，非常清甜解渴，生果有幾多款就數唔到，但一邊飲一邊食生果粒好有口感。 香烤薄餅配辣茄雞件($68)，再點多一款小食，辣茄醬其實唔算太辣，好岩唔食得辣既客人，雞件其實係雞槌咁大件，炸得香脆，薄餅一定要趁熱食，放涼左就會開始變硬。

揀左澳洲和牛放題，入座後店員會先送上一盆刺身拼盤，咁樣可以省略揀食物用既時間，畢竟放題需要爭分奪秒，我覺得非常貼心既服務。 生蠔充滿海水味道非常鮮味，質感幼滑，而魚類既刺身都係用上魚腩既部位，魚既油脂味極之鮮甜。 澳洲和牛拼盤，第一輪同樣入座後由店員送上，所有款式齊全晒，可以食完再落order指定款式，個人最鐘意澳洲和牛，因為油脂最多，在口腔內散發出陣陣既油脂香，店鋪為左方便客人容易d燒熟食物，食材會切得較簿身。 淨係食肉都會有d油膩感，拼盤有埋蔬菜和菠蘿，菠蘿幾甜而且多汁。 薄切牛里脊肉，輕輕燒一燒就熟，口感軟淋，牛味濃郁，生蛋同牛簡直係絕配，令牛肉更滑身。 另外幾款食物我都好鐘意，醬汁羊卷肉博燒，因為有醬汁燒起上黎無咁容易燒焦，食落唔會乾身而且醬汁滲入晒落羊肉到，牛舌充滿油脂香味，因為薄切容易d燒，但就缺少左厚度既咬口口感，雞皮燒和雞軟骨，一款軟淋一款爽口，兩者一齊食有種相輔相成感覺。 炸物同樣出色，粉漿夠簿而且唔油膩，外層酥脆香口，內裏啖啖蝦肉好滿足。

十八層海鮮杯Omakase($1388)，整個廚師發辦材料新鮮，用料上盛，價錢絕對稱得上質素，係我食過難忘既一餐。 櫻花蝦玉子燒，燒至金黃色，外層帶有少少脆口，內裏軟熟而且熱辣辣。 主角之一既十八層海膽杯，將各式各樣最新鮮既海產切粒或切絲放入杯內，頂層放上海膽和白飯魚脆片，先進食鮮甜既海膽，整個口腔都充滿陣陣海膽餘韻既味道，然後將杯內既食材倒出再攪拌，咁就每一口都食到唔同海鮮既味道，百感交集。 龍蝦兩食，放在龍蝦殼上既係火炙海膽芝士，半熔既芝士包住龍蝦肉一齊食，極邪惡但極好味，另一款係將蝦膏加牛油加海膽一齊炒，每一口龍蝦肉都入晒味，非常香口。 櫻花蝦蟶子皇，好巨型既size，師傅細心將蟶子肉分成6件，一口一件方便食，加上左櫻花蝦食落可以增加口感。 火焰海膽甲羅燒($298)，額外再單點一份我最愛既甲羅燒，頂層有幼滑既海膽，底層同樣有幼滑既蟹膏，兩者都係能夠在口腔內散發餘韻既食物，亦都放入左三文魚籽和洋蔥粒黎增加進食口感。 燒野菜，有六款，茄子配木魚碎，日本蕃薯仔配綿花糖，我從未見過既創新菜式，唔錯唔錯，有驚喜，哩個什錦野菜可以中和一下之前食得太多濃味既食物。 鐵板燒鰻魚，味道同坊間食到既幾乎一樣，反而最特別係鰻魚皮，經過鐵板燒處理之後個皮勁脆口。 日本十勝黑豚厚燒，豚肉肉質軟淋，食落唔乾身有肉汁，八成肉和二成脂肪既比例岩岩好。 炒飯，飯粒炒得夠乾身，粒粒分明，將蛋黃刺穿，蛋汁直接滲入飯中，令飯粒更加滑溜。 紙包花膠羊肚菌蜆湯，估唔到可以用鐵板黎煮湯，先用袋裝住湯，再放上鐵板加熱，感覺幾豐有想像力，飲落有濃郁海鮮味，湯底足料，花膠彈牙重骨膠原。

醬油蟹2隻($420)，與韓國既味道一樣，鮮味十足，而且爆晒膏，非常滑溜，蟹肉同蟹殼醃到已經分離只需用手指輕輕一壓，蟹肉輕易就擠出黎，非常方便，紫菜飯團當然用黎伴蟹蓋一齊食，每粒飯吸晒蟹膏和醬油味道。 醬油蝦($198)，蝦肉晶瑩剔透，味道鮮甜，口感彈牙之中帶點黏牙感覺，證明肉質上盛，灑上左芝麻粒更加香口。 醬油鮑魚($198)，醬油加入左辣椒，辣辣地更惹味，鮑魚爽口有咀嚼口感。 厚切牛舌芯($168)，牛舌芯比牛舌油脂味較濃郁，而且更加有咬口，所以厚切食用效果最好，但注意內裏位置有機會未燒得熟，個人建議燒至八成熟然後剪開，再繼續燒令裏面熟透。 韓牛腹脅肉100g($240)，輕輕每邊燒幾秒就可以食得，牛味濃，肉質軟淋，沾少少海鹽就足夠。 豬皮($98)，豬皮容燒燶，所以不要燒太耐，食落似花膠口感，有骨膠原感覺，沾黃豆粉食會冇咁油膩。 梅肉($118)，有兩大塊，非常抵食，肉質夠鬆軟，相信經過人手敲打處理。 除左原汁原味食之外，仲可以加上韓式辣醬和泡菜，然後將生菜包住黎食一樣咁好味。 蒸蛋($88)，賣相吸引，蛋好滑，上菜時香噴噴熱辣辣，盛器亦有保溫作用，就算隔一陣再食，仍然keep得住暖的。

大蝦鐵板套餐($648)： 味噌湯，湯底煲得夠入味，而且最重要係熱辣辣，飲起上黎特別好飲，內裏有昆布和豆腐。 比目魚，調味和燒烤既時間控制得好好，味道唔會過鹹或過淡，肉質好嫩，魚皮香脆，而且連細小既魚骨都清走晒，處理得好細心。 大蝦，廚師可以將蝦殼開一個小洞，然後直接取出蝦肉而不破壞蝦殼原貌，哩下功夫一個字[勁]，講返大蝦肉質彈牙，蝦既表面燒到金黃色，加上帶點脆皮口感，令層次感豐富。 安格斯牛肉，從鐵板上將一塊牛肉切成粒粒狀，方便一口一粒，燒至八成熟，牛肉唔會好“老”好難咬，加埋炸蒜片，一腍一脆互雙揮影。 炒飯，飯粒炒得乾身，粒粒分明，放入左我最鐘意既蝦米仔，令個飯味道更提升。 野菜，椰菜用左牛油去炒，每啖都食到濃郁牛油香味，份量都幾大碟，食完整個套餐之後其實都有d飽。

蝦片($15)，係餐前小食，蝦片加入左黑椒帶少少微辣，味道唔錯，而且好脆口，食唔停口食完一片又一片。 香脆蝦餅($58)，共三件，這價錢合理，蝦餅係一整個圓形，有別於坊間切開半圓形，口感方面蝦餅外層炸得酥脆，蝦肉新鮮彈牙，醬汁係店家自家調製味道帶甜。 花膠海鮮冬蔭功($228)，這菜式無論食材或配料都用料好足，配料方面用左泰國多種香料去熬製，聞落已經好香，辣辣地好香口，而且有個爐不斷煮keep住溫度，食材方面有花膠、大蝦、青口、魚塊、魷魚、帶子，大大片花膠充滿骨膠原好爽口，吸埋冬蔭功既味道更惹味。 黃咖喱軟殼蟹($198)，鐘意食軟殼蟹既好處就係可以成隻連殼食，配咖喱永遠都係絕配，好入味，這咖喱汁係店鋪用左乾咖喱調製，唔辣的怕辣既人都唔使驚。 印度薄餅($35)，有咖喱汁當然唔少得配埋薄餅，伴汁一齊食先夠正，一定要趁熱食口感先至會軟熟，涼左就慢慢會變硬。