今日同家人嚟咗呢間位於荔枝角長沙灣廣場入面嘅居酒屋。 咁啱我哋坐近吧枱位置，咁就好似omakase咁樣可以同店員討論吓啲嘢食，長下知識。 我哋先點咗一個酒 - 青 ($98) 店員話係佢哋嘅招牌Cocktail 入面有Vodka, 青蘋果汁同菠蘿汁, 仲有Wasabi. 感覺超神奇, 又好啱居酒屋嘅主題。wasabi 飲到最後係有少少確喉, 但有菠蘿汁中和返嗰個辣味。 坐吧枱仲可以睇住佢好型咁樣調酒 前菜其中一樣係海苔牛脷，落咗啲麻油，海苔唔係麵豉湯嗰種又滑潺潺又薄，佢係比較厚身的，需要咀嚼下，慢慢帶出到嗰個海苔嘅香味。 鱈魚片 ($68) 烤到好香脆，非常鬆化，一啲都唔硬，暖暖地嘅時候食就最啱。加上佢有一個日本沙律醬配七味粉點，就更加適合送酒食。 叉燒和牛串 ($98) 呢個組合好神奇, 用咗叉燒汁燒嘅和牛串有少少似食緊叉燒，但當然佢個和牛個質感同叉燒好唔同啦，肉質好軟熟。 牛舌味噌煮 ($88) 牛舌係我嘅至愛，呢個味噌煮幾好食，而且價錢又唔貴。聽店員講佢係慢煮咗三個鐘頭，唔怪得咁嫩滑，而且又鎖住到啲肉汁啦。

特登嚟到太古見朋友，作為太古街坊，佢知道喺Apita裏面新開左一間露營主題嘅餐廳，見裝修都幾清新，蛋包飯吸引，所以想試吓😮

原來蛋包飯係太古店期間限定，所以我哋揀咗明太子海鮮蛋包飯。午飯嚟講唔算太平，不過睇相實在吸引，決定就試吓 ☺️ 嚟到冇失望，賣相吸引，分量足夠👍🏼 木魚絲豐富，香氣四溢☺️ 裏面係珍珠米炒飯底，口感煙韌 明太子有時會偏鹹，但呢一個就夠鮮味又唔鹹👍🏼 美中不足係呢個價錢，應該可以多啲海鮮
黑松露卡邦尼意粉😊 意粉掛滿忌廉汁，口感creamy, 好滿意鋪喺面嘅黑松露片，入口香氣四溢，食落有唔同層次嘅口感 抹茶tiramisu🤔 我係抹茶控，都鍾意tiramisu，但呢個配搭對於我來講就唔係我口味。比較似抹茶芝士奶蓋。 賣相同新鮮感尚算不錯👌🏼 中間有兩層蛋糕，夾住流心芝士，拎起膠片嘅時候，芝士好似熔岩咁流出，有驚喜🤪

疫情放緩，又係時候出動食好嘢。今日爸爸放假，就請佢過嚟一齊食泰菜。

Ahan Thai之前行K11嘅時候見過，亦都有朋友介紹過。餐廳嘅門面吸引，啱晒打卡😝斑蘭椰香鮮奶咖啡（熱）
第二度無飲過，味道好特別，斑蘭同咖啡好夾好有驚喜，😍 咖啡大杯又好飲，唔會太甜，冷氣好凍嘅時候，一杯熱飲落肚實在滿足☺️首先嚟嘅係煎海蝦芒果牛油果有機藜麥泰式沙律，係好好嘅開胃菜，冰凍，酸，鹹，甜，加埋軟滑嘅牛油果，有咬口嘅藜麥，一下子又好多重味覺嘅刺激😆不過牛油果有小小爛，應該係壓凹咗。我無要求換，切走咗果小小，不過就有少少失望。其實可以切粒唔要果部分？香煎帶子青咖哩醬新鮮蔬菜濶條麵

賣相吸引，青咖哩味道頗特別，甜中帶辣，仲越食越辣。蔬菜濶條麵好煙靭，香菇同帶子煎過，都幾香口。餐飲叫咗個Affogato, 賣相真的很吸引，雖然飲落就有啲論盡😂 滾熱嘅 Expresso 用玻璃樽仔裝住，waiter亦都好貼心咁提醒要注意溫度。

為咗慶祝可以開始堂食，我同朋友決定去食西餐！朋友揀咗The Point Kitchen因為佢算係奧海城裏面較好食嘅西餐。 今次叫咗3 course set, 首先有是日餐湯蕃茄湯👌🏼 M5澳洲和牛西冷 +$188 我地叫咗5成熟，肉質鮮嫩，但有啲位有筋唔好咬。不過夠肥又多汁，肉味香濃，想咬耐啲唔捨得吞😂 Margherita pizza 最傳統嘅Pizza，但簡單最能夠食到食材嘅味道。薄皮pizza香脆，清新唔油膩。芝士算係唔吝嗇，但個人覺得basil leaves可以多啲😋
最後嘅甜品係Vanilla Puff, 雖然係普通嘅甜品，但皮薄Vanilla fillings夠凍又清新，食完都唔會飽飽滯滯咁，算係一個圓滿嘅一餐。

自從疫情以來，一年去一次旅行嘅計劃被迫擱置。土耳其一直係我好想去嘅地方，機緣巧合知道有呢一間backpacker介紹嘅特色餐廳，心諗一定要來試一試。 雖然同真實嘅土耳其有啲距離，但係餐廳裏面嘅裝飾，配上民族音樂，都已經足夠令人心情興奮😆 到梗係要試一試土耳其早餐 Turkish breakfast，因為早餐對於土耳其人來講非常重要. 初初睇覺得份量唔多，但係食落其實又飽肚。可能因為食下午茶嘅關係，都唔需要食太多，兩個人都夠食。重點係個bagel好出色，加上面頭嘅亞麻籽，好有口感又香口。配上四款醬，包括榛子醬，honey and cream, 辣番茄醬，同士多啤梨果醬，非常豐富。 另外當然唔少得芝士，都係土耳其必食，而且有一定有兩三款。由淡食到濃，滿足到我對芝士嘅渴求😛 值得一提係土耳其茶似足土耳其用嘅杯，仲係免費添飲架😚 我地仲叫多咗個印度薯波配虎蝦冬陰功汁，呢個fusion又幾特別👍🏻 個茶壺都好靚☺️ 最後埋單個侍應俾咗張手寫書籤我，好窩心啊似足土耳其人嘅好客🥺

朋友介紹左呢間菜式裏面含有大麻嘅特色餐廳，於是就慕名一試，今次仲少有地帶咗中意試新嘢嘅爸爸一齊嚟 首先叫咗一杯mocha咖啡，花都拉得幾靚，杯面精心加上朱古力粉。 主菜我哋叫咗日式芥末忌廉香煎廣島蠔闊條麵，芥末同埋三文魚子同埋蠔好夾，又有口感。除咗芥末之外，食落仲有啲蒜香。值得一讚嘅係，廣島蠔真係好肥美，又大隻。 我哋再叫咗一個薩他羊架配楓香乳酪醬伴蘋果玉桂藜麥沙律，見到個名咁長就知道有好多料，同埋非常豐富。的確，羊架同埋乳酪，仲有藜麥嘅配搭，做法新鮮，又清新，而且有唔同嘅層次感，鹹同甜，軟同脆，係好滿足嘅味覺體驗。 本來我哋想試芝士撻嘅，但係因為怕羊架太多，於是叫咗個較為清新嘅熱情果撻。味道不錯，但個人認為擺盤就比較簡單🙆🏻‍♀️ 其實最後冇乜特別覺得放鬆咗，可能本來都好輕鬆😂不過餐廳菜式的確新鮮，值得一試😊

放假就同阿媽出走食好嘢，知道尖東呢邊都幾多餐廳酒吧，就過嚟呢邊逛逛。我哋比主打地中海菜嘅呢間餐廳吸引，決定入嚟試吓。

喺OpenRice見到呢個賣相吸引嘅海鮮拼盤串。Mixed Seafood Skewers 海鮮拼盤串 $188，有三文魚，吞拿魚，配水牛城辣椒醬。
最特別嘅係可以用最頂嘅檸檬，讓檸檬汁慢慢向下流。醬汁酸酸甜甜，加上香烤嘅魚肉， 十分滋味。最底嘅pita bread 口感煙韌，又有烤過嘅香味。 三文魚特別出色，肉質鮮嫩。 我哋仲叫咗兩個午市套餐，每位$138。 頭盤仲有蘑菇湯，同埋雞肉凱撒沙律。湯用新鮮蘑菇打碎，味道濃郁又有口感。 呢個意式煙三文魚切片非常精緻，醬汁清新，加上紅菜頭同埋紅椒，中和煙三文魚嘅味道。 呢一個紐西蘭肉眼扒好出色。紅菜頭薯蓉感覺清新，加埋牛扒，冇油膩嘅感覺。$138有頭盤有湯，呢一個main course, 加埋甜品同埋飲品，實在係物超所值。 呢一個係本來係傳統希臘千層茄子，餐廳換左裏面嘅材料俾我哋，有茄子，青瓜，黃椒，同埋菇，雖然有好多芝士，但份量唔算多，感覺都唔濟。 最後嘅甜品都好出色，特別係蛋白餅。酥脆，入口即化，唔會好甜，又有檸檬汁吊味，酸酸甜甜，很好。

其實都唔係第一次嚟呢度啦，我同一位朋友有好幾次都約埋喺呢度食，貪佢呢度嘅餃子真係好食，而且價錢合理。話說因為佢就嚟離開香港，所以我哋到再嚟，而且今次特登食豪啲。 皮蛋都係我哋嘅至愛，辣度啱啱好。 今次叫咗龍鳳松茸餃，同埋至尊松茸豬肉餃。兩樣都係比較貴嘅餃子。 我哋都係大食之人，所以叫咗12隻。原來碗湯都比平時大。 佢啲餃子真係冇得輸，好足料，隻隻都好大隻。為咗食真啲佢嘅松茸味，平時好鍾意嘅菜甫辣椒都落少咗，的確，唔使落調味都已經好好食。 其實最鍾意都係飲佢個湯，粉葛好香，好清甜冇味精，成碗飲都翻到去唔會覺得口乾。 今次試咗平時冇食過嘅蜜糖雞翼，雖然知道佢會係甜，但係覺得都係甜咗啲試過就算了，唔特別喜歡。 不得不提佢嘅酸蘿蔔，好爽脆，酸酸甜甜好醒胃。好掛住以前有得任食，而家只係俾少少你試食，可能好多人好似我咁食太多

難得放假嚟到iSquare，見到呢度做下午茶，就入咗嚟食。我想講我真係未食過咁難食嘅上海菜，深水埗普通餐廳都好食過佢。 酸辣湯冇乜料，冇咩肉絲，辣味唔出。個面黐到一餅野，好用力整開佢先散。 京蔥牛肉餅，個包好薄。一啲蔥味都食唔到，個味似叉燒包味多啲。 啲餡一pat pat… 上海湯年糕又係差，個湯好淡，啲菜琳晒，菇就用罐頭菇，肉絲係茶餐廳嗱過嗰種，然後又一絲火腿都冇。 又見到個盒開晒口咁，都唔重視私人資料。 服務態度又差，倒瀉水個待應大大聲講粗口嚇死人。好唔愉快嘅經歷。

隨着疫情放緩，開始多咗約朋友出去食嘢。太耐冇食生蠔啦，所以見到$178有半打，就心郁郁想試。見到呢一個擺盆，認真架勢。 海水味適中，鮮甜，唔苦澀。三款sauce可以揀， 不過我自己就鍾意傳統嘅檸檬汁。輕輕少少已經帶出鮮味㗎啦。 炸魚柳非常出色，原本見到咁多魚鱗，以為會好吉口，點知非常香脆，魚肉亦都非常鮮味。 咬開之後可以見到魚肉好多汁。deep fried確係能夠鎖住肉汁。 晚飯都要有啲澱粉質落肚，所以叫咗個西西里醬蟹肉扁意粉。味道唔錯嘅，都食到蟹肉，不過略嫌啲醬汁嘅味道掩蓋左啲蟹肉味，咁就有啲可惜啦。 餐廳環境氣氛唔錯，地方闊落，都坐左成兩個鐘，適合帶埋朋友嚟敘舊傾偈。