女朋友話今日想食日本野，之前同朋友食過呢間居酒屋話好食，所以就帶女朋友去試下。 蒜子蕃茄沙律個蒜子味唔算好重，加上啲醬係酸酸地，好味。 豬生腸個口感唔似平時食嗰啲生腸，一啲腥羶味都冇，加上啲醬甜甜地，都值得一試！ 西班牙黑豚肩肉串，呢個真係推介，黑豚肩肉非常juicy，好嫩好多汁，而且一啲都唔膩。 串燒仲有雞翼串同韭菜泡菜豬肉卷，雞翼串一串有兩隻，燒到個皮好脆，啲肉好滑好嫩。而韭菜泡菜豬肉卷嘅韭菜仲幫手消滯，豬肉一啲都唔韌，值得食。 味噌煮豬軟骨、魚餅、油揚同蒟蒻，全部嘅味噌都好入味，特別想讚就係個蒟蒻好厚好爽口，而且仲入晒味噌味。 三文魚頭個皮燒到好香好脆，入面啲肉仲保持到嫩滑，配埋醬汁仲可以提升三文魚嘅鮮味。

今日同女朋友訂左想食好耐既The Grill Room，去試一試佢地既牛扒。 不過未食主菜前，都要先食下前菜黎開一開胃。先點左一碗南瓜湯，湯底唔會好稀，反而係好濃郁，南瓜味亦一樣濃味。 另外就點左一份三文魚他他配香草乳酪汁。就咁睇已經睇到三文魚既份量相當多，三文魚好香滑，配上蟹籽另到口感又唔會太單一，不失為一道好味既開胃菜。 然後就係我特地為佢而黎既燒美國安格斯肉眼扒配黑松露薯蓉。我就點左5成熟，可以睇岀牛扒上枱時仲保持到紅色，食落一定唔會好老。牛扒本身質素已經好高，食落牛味好重，普通加一點海鹽已經好好味，不過我見佢仲有兩款醬汁俾我我就都試一試，兩款黎計我都係比較鍾意燒汁，始終覺得燒汁最夾牛肉。而黑松露薯蓉更加係最佳配角，薯蓉又綿又滑，唯一缺點係太少，真係俾多多我都食得晒啊。 唔夠喉下我地仲點左一客香煎北海道帶子龍蝦汁意粉。本身上枱時以為份量唔大，點知越食越覺得大份，原來意粉俾既份量都好多。而佢既主角一定係香煎北海道帶子，火喉相當好，少少焦邊又唔會另到中間太過火，而且又大大隻，都係相當推介試試。

銅鑼灣岀名多美食，短期內都冇得去日本搞到心思思，咁就揾間日本餐廳去解下思鄉。 查到豊勝手丼既好評都幾多，咁就不妨試一試。 前菜先來一客薄燒牛肉沙律，個汁底酸酸甜甜非常開胃。而牛肉方面則燒得剛剛好，肉質非常嫩和肉味好香濃。 然後第二道上菜既係就係九鼎丼，係餐廳根據當天食材既新鮮程度來發辦，有九個小魚生丼飯，但從相片中都可以看岀魚生既份量都好多，完全遮蓋整個碗面。味道方面都係無得彈，每款魚生都非常新鮮，尤其要讚三文魚籽同海膽同拖羅。一口食晒非常滿足。 第三道係豐盛壽司盛合，有十二件壽司，魚生質素同九鼎丼一樣咁好，而且份量都係大大件，絕不吝嗇。鰻魚既長度等於兩件普通壽司。而海膽壽司入面既海膽同九鼎丼入面既海膽係唔同既。不過都一樣creamy，唔會有腥味。 另外再加點左銀鱈魚西京燒，魚肉嫩滑唔會老。再配上甜甜既醬汁非常夾，好味。 最後就加上一碗鯛魚湯烏冬，湯底滿滿都係鯛魚味，烏冬又彈牙，食到飽到捧住個肚走

一家人齊齊整整就想去食下泰國嘢，但係天水圍食好味泰國菜既地方唔多，好彩都仲有位於銀座既泰妹。 餐廳佈置光孟，環境亦非常乾淨舒適。 頭盤小食就點左春卷同蝦餅，兩個都好好食，春卷就好多料，啖啖都係料。而蝦餅就都係啖啖肉，炸粉唔算厚。都係相當推介👍🏻 而泰國菜都必備既馬拉盞炒通菜，泰妹當然都有，佢地既通菜唔會老，而且馬拉盞既味道亦相當惹味，少少辣又唔會過辣，貼近香港人既口味。 最後就係泰式海蝦粉絲煲，一睇就知非常豐富，有兩隻大海蝦開邊，又多膏又多肉。而粉絲份量亦好多，入晒味，食完唔洗叫飯，已經飽到上心口😂

今日約左幾個朋友一齊聚會，咁就揀左元朗既野川拉麵 深燒食堂去一齊飲下野 吹下水 餐廳設計非常年輕，食物選擇亦非常多，好似去左居酒屋咁。 我地幾個人就點左好多炸物同燒物黎食，一路食一路吹水真係不亦樂乎 當中尤其炸魷魚鬚，香噴噴非常可口，就算覺得會熱氣都不停擺入口。 另外燒扇貝，黃金燒蠔，燒帆立貝都好好食，因為我都好鐘意食呢類燒海鮮，所以我認為呢part佢地都燒得好好👍🏻 我覺得如果一班朋友想一齊飲下野食下野既話，野川拉麵絕對係一個好地方，又多食物選擇，下次我都再黎

岩岩岀糧就梗係要食返餐好既黎獎勵自己，元朗既鮨文就係好去處。 我地就點左佢地既omakase ，咁就開始美食既盛宴啦 首先第一道係茶碗蒸，好濃香既蛋味，而且配合香菇同帶子，非常開胃，仲要喺表面加上金箔令賣相更靚 然後係青鯛魚刺身，配上少少岩鹽黎食，完全帶出魚嘅鮮味 另外就係日本既生蠔，又大又鮮味，食一隻真係唔夠喉 鮑魚配上鮑魚肝醬非常夾，最後仲可以配一啖醋飯黎食添 接落嚟就係一系列壽司，當然入面最喜愛既就係拖羅，入口即溶，油脂好重，好好味👍🏻 最後就係海膽杯啦，成座山咁高既海膽，加上三文魚子，醋飯同牡丹蝦。真係非常之邪惡，但又食極停唔到口 雖然已經好飽，但飲埋佢既魚湯同埋食埋密瓜係必須既，密瓜超多汁同超甜，日本直送果然係唔同啲😛

之前成日都見到呢間餐廳門面都幾靚，諗住食佢好耐，今次就專誠去試一試佢。 咁我就點左前菜係薯蓉焗田螺，估唔到佢薯蓉既份量超多，又有好香既牛油味，真係淨係食呢個都會飽😂 主食就點左牛扒配雜菜，5成熟既牛扒都ok但略嫌有根。配菜既薯仔就幾好食。 最後點左一杯華田朱古力沙冰，岩哂我朱古力控

喺旺角真係有好多好餐廳選擇，今次我就揀左安安燒。 食物選擇非常多，而且價錢合理。我點左不同類型既串燒，有海鮮類，肉類，蔬菜類都有。其中我認為最好食最值得推介係牛油金菇，味道又香又好食，令人食完一啖又一啖。另外燒茄子亦非常惹味，亦係另一必點之選。

元朗美食就相當多，咩款式都有，但我今次就選擇試下緣聚西日餐廳，試下高性價比放題。 餐廳裝潢就非常年輕化，好多掛牆裝飾，有心思👍🏻 而餐廳中間就放滿火鍋既材料，沙律，好多選擇既飲品及甜品供人任拎，令人花多眼亂。 而點餐方面係用手機點餐，可以節省好多紙張，又環保又方便👍🏻 食物方面，選擇都好多，有日式既魚生，天婦羅，不同既炸物，燒蠔同火鍋等，全部食物既質素都相當高，尤其我想特別讚一讚蟹粥，又夠蟹既鮮味，粥又夠綿，我都叫左兩碗黎自己食😋

同朋友約左喺荃灣食飯，一鍋堂以綠色為主色，枱同枱之間都幾闊，行路嘅通道都算闊，拎野都冇咁容易撞到。 入黎嘅兩邊通道有曬菜，飲品，沙律，仲有一部乳酪機，正。 我地揀嘅湯底都幾清，其中一款係潮汕湯底，真係有條魚喺度，愈食愈入味，唔錯。 一坐低朋友就點左好多野😂😂打邊爐肥牛就緊係唔少得啦，肥牛真係幾好食，我地嗌左5 6次。蟹柳又係另一個必嗌嘅，一咬開，絲絲蟹柳就散開啦，係真蟹柳黎嘅。 另外都嗌左蝦滑，墨魚滑，炸魚角，響鈴，竹笙，帆立貝等，食到好飽。