之前係中環返工既時候已經好想黎試呢間日本野，但奈何每次經過都full house，今日難得有位就黎試下。 見到個海膽杯果下已經哇左一聲，d海膽多到滿瀉咁制，每食一口都要小心翼翼怕佢跌出黎。海膽杯材料非常豐富，有大量既海膽之餘，仲有黑魚子、海葡萄、吞拿魚白蝦同蟹肉。由於每一層既配搭都唔同，所以食落每一啖都有唔同既驚喜，而且每樣食材都非常新鮮，食完真係有種幸福既感覺。 碳燒蠔 呢個真係不得了，蠔味好鮮好突出，食完係意猶未盡！必推！ 刺身拼盤 帆立貝好鮮甜，放係檸檬上面增添左d清新既味道；牡丹蝦 好大隻，而且肉質鮮嫩。 鵪鶉蛋串炸 即炸熱辣辣，外層炸好好酥脆，又唔厚粉，正！ 芝士魚餅 魚餅爽口彈牙，咬落啲芝士係爆出黎，好正！ 滑蛋豬排飯 首先份量係好大份，2個人都係勉強食得完。d蛋非常滑，好食到淨係用d蛋送飯都夠。 豬扒幫你切好曬，非常貼心。

之前返深圳飲過喜茶覺得好好飲，估唔到佢係香港都會開分店。等佢熱潮過左之後人少左唔洗再等咁耐，仲可以係個app買左之後見到就到先慢慢行過去，係幾方便既。 去親喜茶基本上都係叫芝芝莓莓，貪佢果味好濃郁，仲可以食到一粒粒果肉，而且呢度d芝士奶蓋係我食過最唔膩既。黎到香港都係叫返我既最愛 - 芝芝莓莓，首先顔色同之前深圳既有d不一樣，淺色d。另外，雖然個杯係好大，但芝士奶蓋佔左3分之一杯，仲要最頂只係杯邊hi到d芝士奶蓋，内裏既頂部根本係空既，拎緊時候係睇唔出。飲落唔難飲，但同深圳既差好遠，而且好快就已經飲完(因爲得3分2杯)。四十幾蚊咁既質素，我都係返大陸飲好過。

雖然而家係12月，但天氣同夏天真係無咩分別。係蒲台島行完山，然後係赤柱碼頭落船，成身熱辣辣食雪糕就最適合不過。

見到呢間幾多人又好似幾吸引咁就入左去，但入到去發覺價錢都幾貴，同價錢收費都唔係寫得好清楚。排隊指示又唔清晰，個店員塊面黑到我好似殺左佢全家咁，而且超級無禮貌。雪糕超細球，個份量係其他店鋪既一半，重點係雪糕味道非常普通，但可以收我$100，我食Haagen Dazs都無咁貴。呢間雪糕店係絕對無下次！

見到Openrice好多好評，而且每次經過都見到好多人，所以就諗住黎試下。
紅燒三寶牛肉定食(筋腩肚)
首先定食好抵食，有上湯時菜同原盅燉湯。時菜新鮮而且清清地好健康，原盅燉湯好大碗得黎係好有誠意，唔似街邊d例湯咁，除左有肉，仲有齊紅棗、蟲草花同黑木耳等材料。
識食一定係食三寶，牛筋、牛腩、同牛肚，分量都幾多幾抵食。牛腩炆到好軟熟。牛筋牛肚好爽口。
古法黑草羊腩定食
同三寶牛肉定食一樣，都係分量好足。味道方面，羊腩肉質鮮嫩，而且唔騷。
百香多多梳打&炭燒烏龍珍珠鮮奶
跟餐加少少錢就有特飲喇，味道同出面d手搖店不相伯仲，推介。

作爲一個無辣不歡嘅吃貨，我間唔中都會試下唔同餐廳嘅川菜係點。餐廳整潔寬敞，比人一種好舒服嘅感覺。神仙組合
呢個雙人套餐真係冇改錯名，真係一個神仙組合黎。$338有酸菜魚有片皮鴨，真心抵到爛。姚姚酸菜魚（精裝版）
雖然係精裝版，但係個分量一D都唔精裝，起碼有20塊魚。魚肉係帶住魚皮，保留魚肉的紋理到，厚實彈牙。湯底係酸酸辣辣咁，可以揀選返適合自己嘅辣度。片皮鴨（半隻）
片皮鴨外皮酥脆鬆化而且肉質嫩滑，餅皮亦都厚薄適中，再加埋甜醬、青瓜條等等，一個字，正！真心推薦！！！片皮鴨半隻但個分量係超多！椒鹽鴨架
應該係用片皮鴨嘅邊角料整成嘅另一碟菜式，但味道一d都唔馬虎，食落咸香焦脆，椒鹽味完美融入。麻辣香鍋
呢度麻辣香鍋係叫一個鍋底再最少叫5個配料，强烈推薦牛百葉、嫩牛肉、蓮藕片同千葉豆腐！

原本以爲係一間bar黎，點知入到去見到有好多野食揀，仲要係川菜同串燒，非常特別。 水煮魚
香港人接受到嘅辣度，麻味都足嘅。條魚索曬d汁嘅味之餘，仲保持到好滑，真係好有驚喜。 燒虎蝦
原本以爲bar嘅食物質素會好一般，但係佢地d串燒係燒得幾好，有燒物孜然嘅味道，但係又唔會燒到隻蝦好乾身。

一口牛柳粒
同隻蝦一樣，個火候啱啱好，牛柳粒好juicy。 重慶燒茄子
原本貪得意想睇下重慶燒茄子有咩特別，原來係原隻茄子切半上面鋪滿蒜蓉，中意蒜味嘅朋友唔可以錯過。 七味魚翅
好適合送酒嘅snack，有嚼頭，甜甜地應該有用蜜糖烤過。 整體而言，食物質素好高，加上個環境又好chill，亦有唔少霓虹燈打卡位，幾適合一班朋友一齊黎。

其實觀塘工廈多美食好多人都知，如果想平平地食個西餐的話，呢間係一個唔錯嘅選擇。百零蚊有個set包starter、main course同drinks。 Starter有沙律、蘑菇湯同多士，沙律係新鮮嘅，蘑菇湯好濃郁，仲食到少少蘑菇粒添，多士就外脆内軟，點下個蘑菇湯會更好味。 澳洲T骨牛扒
分量好大，有成300g。脂肪分佈均勻，肉質都算幾好，個醬汁有少少偏甜。 鐵板法式脆殼田螺臘腸意大利飯
呢個真係第一次食，原本以爲田螺個殼係唔食得，點知原來係挖左d田螺肉再釀喺個脆嘅殼入面，非常有心思同驚喜。西式田螺同中式臘腸又意外地夾，意大利飯近鐵板嘅位置又會有飯焦，好似食緊煲仔飯咁，非常特別。

堂食終於放寬到12點喇！終於可以出返來食餐好既，今晚放工黎咗旺角一間勁多好評既燒肉放題。餓左咁耐，點都要食返餐好既！所以我地揀左最多$$既「店長推薦」——頂級澳洲和牛海鮮放題！

全程都係掃碼ORDER，落單1分鐘第一樣野就到左——M8和牛牛板腱，M8和牛封門柳，極品小牛排。M8和牛牛板腱 (原味)
我覺得係全場最正既單品，雪花均衡，每面燒20秒就剛好，食得出高級和牛既味道，質感鮮嫩，絕對唔係一般「食到飽」既放題貨色，點少少燒汁更惹味，用鹽調味就更突出原味。當然我地有ENCORE啦。 車海老
聽講呢度既蝦係招牌。既然放題我地就唔客氣咁狂點！果然佢啲蝦好大隻而且望落好飽滿。我地PREFER燒到佢外殼有少少燶，一隻蝦既蝦肉已有兩隻手指公既SIZE，彈牙不失鮮味，不過我都建議點鼓油食，鮮味會更突出。

牡蠣
要讚既係呢度既貝殼類都相當出色，當中有RAW既生蠔、有錫紙兜咁上既牛油廣島蠔肉，北海道帆立貝，前兩者蠔味都極重，生蠔燒完仲有陣海水既味道，好正，唯一SIZE唔算大。牛油本菇
放題唔叫蔬菜？唔一定架。呢個牛油本菇好值得叫，牛油同菇本身就係PERFECT MATCH！而且一道菜兩種食法，可以喺個兜內加熱，又可以直接放喺網上燒，我就PREFER後者，有燒烤風味！ 呢個放題絕大多數ITEM都係無限追加，品種太多，本人會推薦以下幾款小食︰章魚小丸子、泡菜、枝豆。甜品有MOVENPICK雪糕，正！

大埔對於我呢D住係港島區既人黎講，一直都係郊區/住宅區，完全無諗到呢度有間咁靚咁有氣氛既餐廳。 係門口係見唔到入面，充滿神秘感。禁鐘後，霧化既玻璃頓時變成透明，非常特別。餐廳內部充滿濃厚既古典氣息，特別係個Bar，彷如置身係電影裡面。 碟豆花木魚清湯 & 鯛魚刺身 首先大廚好聰明咁用碟豆花既藍色去加檸檬玲個湯變成藍紫漸變色，因為碟豆花本身味道唔重，玩到色之餘，又唔會影響到菜式既味道。個木魚清湯清得黎好鮮，無論係視覺定味覺都係一流。蘑菇湯 個湯非常濃郁，而且係會食到一粒粒既蘑菇。蒜蓉包非常香脆，蒜蓉味好足！ 傳統法式鵝肝牛柳
鵝肝入口油香充足，食完個香氣係口腔縈紆左好耐。牛柳好淋，又唔筋，配上鵝肝剛剛好！ Tequila Sunrise
黎既時候有嚇親，也太大杯了吧！重點係味道同出面既bar一樣好飲！

和富不嬲都多野食，但最近和富竟然開咗間石上燒，同屋企人落街唔知食咩就食下，餐廳門口都幾整潔，人唔算多。 黎到當然要叫石上燒，真係原塊石頭上，塊肉都有手掌咁大，都ok既， 淋汁果下d熱氣同氣味令人食欲大振。基本上每枱黎都係叫石上燒。 除咗石上燒外，仲有其他食物，例如Pizza等都係大份既，不過我都係會建議叫返石上燒。 呢度最加分係有個任食沙律+湯+飯Bar，一家大細黎應該會好開心，見到其他都係家庭客，亦唔洗怕唔飽。