將軍澳親戚之前有提過呢間私房菜，今次探完佢哋終於扚起心肝book枱同老公去試吓，兩人有優惠套餐$228，所有小菜都唔使補錢可以揀兩碟，揀咗餐牌有手指公嘅兩款招牌，分別係千島蝦球同拔絲咕嚕肉 落單之後上菜都好快，首先送上一人一碗湯，粟米豆腐羹好滑好清甜 小菜都好快炒好，幾有鑊氣份量又多，兩款都酸酸甜甜係白飯殺手 另外叫咗兩款餐前小食，分別係好多人食嘅椒鹽粟米同黃金豆腐粒， $38一碟又唔算好抵食不過真係好好食，炸得唔會太油膩，豆腐外脆內軟，椒鹽粟米粒輕輕一咬就甩出嚟，鹹鹹甜甜真係好開胃 質素唔錯，下次可以考慮過嚟食私房菜，四位起就可以自訂餐單，另外有八位起嘅私人到會

平時周不時都會落Pavia約朋友食野 貪佢靜靜地野食又好食 早幾日落去見佢有個新promotion都分享比大家 而家做緊食set dinner 或者人均食滿$500就送兩小時紅白酒free flow 啱晒我地吹水慢慢坐 比目魚配薯蓉一如以往地厚身 煎到好香 配野菌忌廉汁都好香滑 仲有薯菜同薯蓉好香牛油味 北海道帶子蘑菇忌廉汁天使麵份量都算幾多 幼身天使麵放滿成隻碟 帶子鮮甜軟滑 蘑菇忌廉汁都好香 食海鮮飲咗幾杯白酒 果香易入口女仔都好啱飲

門面係間凍肉店，有賣Dry-Aged牛肉同好多款唔同嘅凍肉，果然係韓牛專門店😍 而另一邊都有買韓式外賣即叫即走，亦有個廚房整炸雞、煎餅等等。紫菜飯卷、炒粉絲都放晒喺display櫃，因為每日新鮮製賣晒就冇，所以夜少少就要睇彩數先買到自己鍾意嘅味道喇 烤牛肉紫菜飯卷 $53 份量好多有幾層，一個人食得輕盈啲絕對夠飽，但當然食埋其他小食更開心☺️ 甜辣無骨炸雞 S $48 炸雞只有原味同甜辣味，呢隻偏甜唔會太辣，外脆內軟好Juicy 海鮮煎餅 $58 剪好一塊塊放入盒，盒蓋都有開窿以防倒汗水，海鮮細細舊係煎餅上，有八爪魚、墨魚、蝦仁等等，煎餅質地好soft 醬醃烤牛肉午餐盒 $78 呢個午餐盒超級豐富！除咗有一件我本身都15/16好想叫嘅雜菜煎蛋卷，仲有個湯同有齊三款好受歡迎嘅韓式醃菜，佢哋自製嘅泡菜偏辣好開胃 菠蘿汁 $10 韓國牌子酸酸甜甜，襯口味偏濃嘅韓國菜就啱晒

豆乳狂人分店越開越多，尤其是九龍東都有幾間分店，真係好開心，去邊區食開飯都可以買甜品返屋企當宵夜 黃大仙分店喺南館地下盡頭，鋪位長長哋，有大玻璃見到一面生產機器，果然好專業，難怪出品水準咁高 多芒楊枝甘露 $48 夏天一定要食呢個清爽芒果西柚甜品！鮮芒果大大嚿超級甜，西柚晶瑩剔透酸酸甜甜好好味 Oreo奶蓋珍珠布丁 $52 超豐富嘅甜品有豆乳布丁、珍珠、厚厚綿滑嘅奶蓋，仲有香滑嘅可可豆乳做底，特登有一盒仔Oreo碎可以返屋企自己倒，唔怕林晒真係好貼心😉 抹茶紅豆小丸子 $48 高身膠罐裝打卡影相一流，抹茶個綠色真係好靚，加埋佢嘅好朋友紅豆同煙韌嘅小丸子拼湊出一個完美嘅甜品，抵佢穩守AhSoy推薦首8位☺️

門口大大個全日套餐餐牌，有二人餐同四人餐，星期一至日同假期都供應， 5:30前仲要唔使加一好抵 二人餐有大大碗酸菜魚、一個冷盤小食、一個小炒、兩碗白飯、兩杯嘢飲，只需$388 ，份量多到三個人食七成飽都唔大問題😎 我哋兩個人食就十成飽🤣 酸菜魚麻香味重，魚片好滑，有雲耳、豆卜、萵筍、粗薯粉等等超級豐富，少少在地化港式風味唔會好似大陸嗰啲咁油膩，好食！ 花雕醉雞細細碟，但酒味香濃，咁啱有雞髀肉開心☺️ 連杞子都充滿花雕酒香味 小炒有六樣嘢揀，四肉兩菜，豬牛雞都有，我哋揀咗招牌紅燒肉，一塊塊鋪喺花菜上面份量好多，厚身入味肥肥地，唔會太鹹，甜甜地幾好食 白飯可以加錢轉陽春面或者擔擔麵，但個人覺得送小炒同酸菜魚配白飯最襯！ 飲品加$5可以轉黑芝麻豆漿，香滑濃郁唔會太甜超好飲，另外揀咗杯凍檸茶都唔錯！

久聞觀塘張公子晚飯小菜高質，假日小試牛刀食午市點心，入座冇預訂店員都快速安排座位，估唔到工商業區weekend lunch time都唔少人 QR code落單除左點心都有佢地招牌小菜，叫左五款點心，標價而非計大中小點，價錢比一般酒樓高，但款式特別質素高，絕對物有所值 蟹子蒸燒賣 (四件) $52 好大粒真係好大粒😂 燒賣皮被肉餡掙到好飽滿，面頭再加一層厚厚的蝦膠，新鮮蒸起好鮮味 XO醬煎腸粉 $63 腸粉好滑，一段段排到整整齊齊，煎得好香但唔會太油膩，XO醬均勻上色入味，辣辣地好惹味 金網香芒鮮蝦卷 (四件) $48 網皮好酥脆，包住蝦肉同鮮芒果蓉，附上酸酸地芒果汁更酸甜開胃 生拆蝦餃皇 (四件) $60 望落餃皮稍厚但食落因生拆蝦肉夠鮮甜完全彌補不足，又係king size蝦餃好睇又好食 蠔皇叉燒包 (三件) $42 食叉燒包最驚入面得叉燒味醬，但一搣開入面有一塊塊叉燒肉，冇愧對張公子名菜之一張公子叉燒，調味鹹甜平衡唔會太重味，包都好軟熟

青衣城有間新冰室，價錢都唔算平但係分量幾多。我哋一行三人叫咗幾個是日午餐，我主要食過日式照燒汁雞扒煎蛋飯，雞扒兩大塊好多肉，煎蛋都有三隻，仲係流心太陽蛋，近影佢直頭想跌出嚟好動L🤣 蛋黃紅卜卜幾香，篤穿咗用嚟撈飯好正， $69包熱飲都算唔錯，不過轉凍飲加$5就比普通茶餐廳貴少少，所以我索性加錢轉特飲有半價😝 同行朋友一個叫咗櫻花蝦炒飯，一個叫咗豬扒炒烏冬，都係大大份，試咗少少櫻花蝦炒飯正常發揮炒得幾乾身，櫻花蝦幾香口

坊開咗間新嘅麵包店，喺正大門款式好多全部都好吸引，用日本麵粉、天然酵母、新鮮牛油，做下午茶或散水餅都一流！ 招牌酥皮蛋撻 $12 呢個做散水餅真心fit！買蛋撻會有紙盒裝，細細件得體又好食，個皮超級脆，有少少焦糖味，甜甜地個蛋好滑 芋泥燒餅 $16 芋泥好軟滑仲有少少芋蓉，加咗薄薄一層麻薯，面頭仲有黑白芝麻增添風味真係有古代燒餅嘅感覺🤭 紫薯Q丁包 $18 爆餡紫薯+麻薯，整體唔會太甜，頭尾都尖尖地好似個真紫薯咁 抹茶菠蘿包 $16 菠蘿皮好脆，但唔會好厚好重牛油，感覺比較健康，個皮同個包都有抹茶香😚 個包好鬆軟好回彈😝

天氣熱一定要飲沙冰！放復活節假想去九龍城寨公園行吓，喺九龍城食完正餐經過好出名果間泰式串燒店，隔離就見到有間貓貓主題嘅椰子飲品店，款式好特別，完全係椰子迷必訪！就叫咗飲品同甜品去公園嘆吓。買滿指定金額仲送超可愛店家自製貓貓杯墊 🐱 椰子Oreo特飲 $38 泰式椰子奶茶 $41 兩杯沙冰都打到好幼細，透心涼，椰子同Oreo原來好夾，Oreo夾心嘅香甜同椰子嘅清甜相輔相成，椰子碎碎同Oreo脆脆令杯沙冰更有口感 在落九龍城嘅飲品店，當然要有泰式奶茶味道！加咗椰子令泰奶除咗煉奶同香濃茶底之外，再多一層次，係泰式奶茶變奏版，好有特色 芒果椰青凍 (L) $46 一大碗甜品入面放滿果凍，又係夏天必選！有原味果凍同綠茶凍，唔會淋好多糖水，都係用新鮮芒果、椰果同爆珠帶出甜味

翠華餐廳全港有好多分店，主要售賣經典茶餐廳食品，亦有加添創意推出新產品，例如醉fun fun濃情奶茶系列 濃情奶茶（隨身瓶） $88 同瀘州老窖合作推出白酒x奶茶嘅新鮮配搭，喺厚厚嘅玻璃瓶下除咗港式香滑奶茶，仲加咗白酒，飲落會有白酒嘅香甜味，不失為能夠代表香港又得體嘅紀念飲品 神之叉燒飯 套餐 $90 套餐配時菜+湯/飲品，揀咗羅宋湯好足料好多肉，仲有好多蔬菜，時菜冇得揀款式，當晚係清甜芥蘭 叉燒揀咗肥啲，燶邊爽口好好食，鋪係蔥花蛋皮上面份量都唔少，再加上秘製豉油超級滿足 羅漢齋炒麵 $70 炒麵雙面黃底面都脆脆，但麵餅中間保持軟熟吸左羅漢齋芡汁特別惹味，外脆內軟食到停唔到口