朋友話成日都嚟呢度食壽喜燒，鍾意到有時夜晚會自己嚟食，講到咁誇張，就跟佢嚟食一次。 前菜第一啖已經覺得好食，牛筋腩同蘿蔔炆得好腍好入味，調味清清哋食到食材原味。 和牛可樂餅炸得酥脆，沙律菜新鮮，配蟹膏食到有啲感動。 同朋友share一肥一瘦AB餐，最深印象係店員跟得好足，時間啱啱好，令每一塊牛都發揮到佢最好嘅味道。 霜降和牛一定係正，牛板腱同沙巴當睇落好肥但唔會成口油就完左，肉同油脂比例岩岩好。 野菜拼盤我覺得都加咗唔少分，唔同部位會配唔同蔬菜組合，當中京蔥同冬菇尤其juicy清新，即使日本堂食都可能過火或者少少唔熟，呢度做得好好。 赤身和牛上肩同後腿等部位牛味濃郁，肉質會實啲，當然都好味，但如果追求啖啖油香先似食緊和牛嘅話，起碼直接叫兩個B餐個滿足感會大啲，一肥一瘦就冇咁油膩。

每年都會黎起碼一次鮨逸，自問唔係咩都食，但每次黎唔洗諗omakase都會好滿意。蟹肉水雲同鮟鱇魚肝為今晚掀起序幕，同樣酸酸甜甜好開胃，當中松葉蟹肉鮮味完全冇俾調味蓋過。汁煮粒貝好彈牙爽甜，白子新鮮甘香，creamy軟滑。勘八魚包住海膽豆腐，魚肉細嫩肥美。北寄貝同龍蝦極新鮮，上台仲係郁郁下，龍蝦爽脆清甜。北海道花魚火炙後魚油滴哂出黎，連飯都有個香味。帆立貝係好純粹嘅鮮甜，檸檬汁帶來一絲清新，表面畫咗幾刀令口感更加豐富。黑陸魚柔軟甘甜，輕輕燒過好香。第一次見蟹膏豆腐真係配咗真蟹肉，豆腐好滑，但味道完全俾蟹肉蓋過左，一梳梳真係好甜。鰤魚新鮮有光澤，夠肥美。牡丹蝦又刷新左我嘅排名，係我食過最新鮮嘅牡丹蝦。 蝦肉軟滑甜到黐線，甘香蝦膏令味道昇華。岩手縣真蠔大隻爽脆，好新鮮。銀鱈魚同喜知次魚油都好足，輕輕火炙過燒到好香，入口即融。象拔蚌好爽，簡單用檸檬汁同wasabi調味已經好完美。吞拿魚醬油漬包左鹽水海膽，從裡到外都好幼滑。拖羅蓉最中餅令我留下深刻印象。 本來我怕最中餅會令拖羅淡味左，但完全唔會，一啖咬落去外脆內軟，海膽同拖羅嘅甜味直衝出黎，絕對好食過就咁畢黎食，好幸福。蟹膏鮑魚厚切彈牙，鮑魚味香濃。金鯛立鱗燒魚肉保持到幼嫩，咸味主要來自生紫菜汁，好清新。花咲蟹又係食到嗯嗯聲嘅出品，啖啖肉好鮮甜，撈埋蟹膏一流。拖羅魚油豐盈，厚切冇筋，滿足到想食靚拖羅嘅心。白海膽係今晚mvp，大大塊完整白海膽灑上淡雪鹽，果然係最高級嘅海膽，甜度直頭去到生果界最高級別，我會為左佢再黎。

好多時omakase除左期望師傅簡單介紹菜式，好多人鐘意同師傅飲住酒吹下水，我就有啲怕大家你眼望我眼尷尬搵野講。 今晚難得遇上咁耐以黎最好傾嘅師傅，親和力超強，野食同氣氛都好好。 前菜賣相已經好有詩意，水雲清新開胃，沢蟹酥脆香口，湯葉卷內含柔軟嘅太刀魚，豆味香濃。 蜆清湯雖然做法簡單，連鹽都冇落，但真係極度鮮甜，順菜滑嘟嘟口感好得意。 平目刺身本身比較淡，沾上酢橘真係有提鮮作用，少少一塊緣側口感真係唔同啲，爽口有油香。 富山縣白蝦三食先嚟兩道，簡單白蝦刺身已經非常香甜濃郁，炸白蝦風味又完全唔同，雖然蝦甜味冇咁突出，但蝦殼好香口好啱餸酒。 北海道八爪魚好巨型，八爪魚腳切成薄片好幼嫩，吸盤爽脆，配醬油漬wasabi攻鼻得黎構成左我心目中最完美嘅組合。 赤貝仲係郁郁吓，爽口清甜。 秋刀魚大塊厚切，接近半隻手掌咁大，一啖放入口魚油好足。 三文魚子真係有驚豔嘅感覺，一入口嘅回彈同卜卜聲真係嚇到嘩咗出聲，原來咁多年人係未食過真正新鮮嘅三文魚籽，直頭好似台飲店嗰啲爆珠咁上下，師傅話係佢哋新鮮拆出嚟，真係值得一試。 炸粟米脆皮薄到好似一層膜咁，粟米超甜啖啖肉。 白蝦三味最終章，炸蝦丸令我留下最深刻印象。  一咬落去好似綿花咁柔軟，同時有回彈，唔需要點任何醬汁已經好夠味。 金目鯛幼滑甘香，一般火炙做法師傅話係哂料，的確唔洗搞咁多野係最好食。 帆立貝厚得誇張，味蕾受到佢鮮嫩重擊。 墨魚同北海道甘海老都好出色，墨魚同紫蘇葉好夾，三大隻甘海老只取中間最厚肉部分，超甜有彈性。 三款吞拿魚各有特色，一般嚟講大拖羅以外我都麻麻哋，但靚嘅吞拿魚原來不論肥瘦都咁好食。 中拖羅已經好夠肥，重點係非常軟滑完全冇渣。 大拖羅唔使講一入口啲油就爆曬出嚟，師傅反而特登落啲鹽降低油香，魚油同魚味之間取得平衡。 吞拿魚醬油漬雖然係赤身，但夠新鮮、入口好滑，師傅話係最矜貴嘅天身，我覺得同中拖羅不遑多讓，可以話係我食過最好食嘅赤身。 一開頭個蜆清湯飲完之後一直念念不忘，壽司正正用返同一款蜆，幾隻疊埋一齊口感更加突出爽彈。 海膽唔使多講，就係最好食最純粹最甜嘅味道，為今晚留下完美句號。

之前新開張嘅時候嚟試過牛小排餐驚為天人，一直想再嚟，今晚想打邊爐又唔算好餓，就揀咗美國牛肩胛餐。 連鎖邊爐好多時唔同餐之間肉嘅質素差好遠，要揀到中間價位先叫入得口，但牛摩完全打破咗我嘅既定印象。 特選美國牛肩胛賣相已經好得，油脂分布平均，食落牛味濃，厚度都足夠，完全唔會輕飄飄咁。 今晚encore咗幾次牛，好欣賞質素好穩定，同第一round差唔多咁靚，定價百幾蚊真係抵到爛。 放題仲有得揀豬、雞、黃金花枝棗同牛摩飯，以我專攻牛、加一兩碟豬嚟講都好夠食，豬梅肉幾靚，整體嚟講幾欣賞啲肉，似平時AEON買嗰啲咁有肉味。 自助區仲有好多款菜、特別嘅丸同響鈴，飲品特別，出面單點都要十幾蚊一罐，完全滿足晒打邊爐嘅慾望，一定會再嚟。

灣仔返工食日本野其實去黎去去都係個幾間，家賀屋就係其中食得最多嘅。 lunch set就成日食，今晚終於黎試下晚市菜式。 法國聖馬天尼生蠔同西班牙特級銀堡壘生蠔都好新鮮有光澤，簡單用酸汁提鮮，蠔味都好濃，好鐘意先有海水味，餘味超鮮甜，滑溜creamy。 西京燒三文魚鮫估唔到係全晚最驚喜，平時食開嘅魚鮫都係偏乾鹽燒，所以冇乜期望，但呢個完全係一個新境界。 三文魚鮫本身非常新鮮高質，超多肉汁有魚油，多肉到好似食緊三文魚扒咁。 西京燒做法好入味，調味唔會太甜，好惹味。 生燒白鱔皮脆厚肉彈牙，滿足到想食肥美白鱔嘅欲望。

之前係度留下深刻印象，一直心掛掛想再黎，除左回味最愛嘅dry aged牛之外，好多新菜式都好得意。 Sichuan Style Dry Aged Bone Marrow係我嘅牛骨髓初體驗，四川調味毫不手軟，食到好明顯嘅花椒麻香，所以完全唔會有任何牛骨髓嘅怪味，幼滑甘香。 The Victuals Pulled Pork Roll內餡用咗打拋豬嘅做法，外面用蛋餅包住，口感好豐富，配埋酸甜嘅醬汁好有提鮮嘅作用。 30 Days Dry Aged Prime Rib Eye名不虛傳，表面焦脆、內裡幼嫩。 好鐘意dry aged獨有表面比較粗糙嘅口感，連脂肪位都變得較乾硬煙韌，越嚼越甘香。 side dish我覺得都好有心機，第一次食忌廉西芹芯，非常幼嫩有奶香。

一年到晚總有幾次會黎陳儀興打邊爐，未開啟德站前已經有幫襯開，咁多年黎食過咁多好野，估唔到都係冇咩地方取代到手切牛界佢係我心目中嘅地位。 唔洗諗叫返個大手切肥牛先，睇個色澤同雪花就知正，加上大塊厚切，牛味更加倍升，腍滑甘香，兩個人必須叫大份先過癮。 無蝦有蟹鍋真係我咁多年打邊爐生涯入面食過最足料嘅湯底，近乎係料多過湯，淨係蟹都有四隻，鮑魚又四隻，仲有海量蜆同炸過嘅薯仔，仲要海鮮真係新鮮唔頹，滾左一陣個湯底已經甜到爆。 蟹籽墨魚滑夠哂爽口彈牙，足料有鮮味，仲有大量卜卜脆嘅蟹籽同墨魚粒，口感好豐富。

一路幫襯開觀塘店好滿意，物超所值，中環新店收工黎食都好方便，迫不及待黎試下水準。 鮮菠蘿芥末蝦球每次都會叫，蝦球非常大粒，大口如我都要分幾啖食。 芥末醬係好有深度嘅味道，微微攻鼻好惹味，淨係為左個醬都值得再食。 酥炸蜂巢蠔餅首先比一般潮州菜大份已經好驚喜，全塊蠔餅真係炸得好酥脆而唔會油膩，每一啖都好似食緊酥皮咁好香。 除左粒粒蠔仔同有蛋香之外，我鐘意食落有好多炸得好香口嘅蔥，味道好豐富。 十年陳皮魚茸羹真係落咗好多陳皮，平時我都少食但真係有清新香味唔苦澀，有提鮮嘅作用。 魚茸羹好順滑，清清地味道好養生，食得出係啲工夫菜。

香港omakase有時好食係好食，料係靚，但烹調方式硬係有少少港味，一味柚子醋、柚子胡椒就好似調左味咁。 今晚驚喜發現呢間餐廳真係有日本師傅風味，每道菜調味獨特，清淡而突出到食材原味。梅貝煮好彈牙入味，雞肉丸令我眼前一亮，加左明太子同雞軟骨好爽口，酸酸甜甜好惹味。煙燻平政魚睇個光澤就知好新鮮，魚肉有彈性魚味濃。備長炭燒金目鯛連魚皮都燒到好香口，炭香味好濃，只係表面有少少熟，仲係好幼嫩。每次食omakase基本上都係期待緊一個好基本嘅組合：大拖羅配紫菜、紫蘇葉，大拖羅魚油爆曬出嚟，最驚喜係加埋蜜糖醃製梅醬都唔會好搶味，主線都係大拖羅嘅甘香，加埋其他清新嘅香味，滿足。煙燻熟成和牛非常出色，煙燻香味好突出，和牛厚度好足，煎到外脆內嫩。 呢個肉味同油香都好高質，媲美鐵板燒嘅和牛主菜。池魚柔軟清甜，雖然麻麻地白身魚，但質感新鮮，難得地覺得幾好食。粒貝有檸檬香，厚實彈牙完全唔腥。魷魚係我食過最爽口嘅魷魚刺身，切成一條條令到口感更加有層次，熟紫海膽令魷魚味道變得香濃。櫻鱒魚食落類似三文魚，用鮮醬油醃製過，比一般三文魚重味，蔥香味做到個平衡。大拖羅柔軟到好似係口入面化開咁，好甘香，難怪有自信一連兩道都用左大拖羅，真係好有水準。赤海膽如我所料真係今晚mvp，層層疊嘅大堆頭已經令我滿意左一半，最重要當然係夠唔夠新鮮，好開心係百分百鮮甜嘅靚海膽，甜得黎海膽香味都好突出，滑不溜口。鮑魚切嘅時候見到仲出緊煙，煮到好軟腍幼滑。 連埋海膽一齊食令味道昇華咗好多，海膽嘅甜味同鮑魚嘅幼滑相輔相成，成個組合好完美。 底下嘅鮑魚肝飯好香，如果醋落少啲會更加好，但整體嚟講好好食。酒漬甜蝦酒味超級濃，一般嚟講太濃酒味會苦到入唔到口，但調味辣辣地，配埋飯一啖放入口，味道啱啱好。鐵火卷好足料，作為最後菜式一人一件岩岩好。鱧魚燉湯清甜，鱧魚幾滑。

見朋友開心share一間火焰主題嘅餐廳，每個位都真係見到熊熊烈火幾得意，今晚去朝聖下。三款前菜甜薯、鮟鱇魚肝同吞拿魚各有特色，我最鍾意吞拿魚扒新鮮厚實，配埋黑白芝麻好香。牡丹蝦、吞拿魚蓉同黑魚子呢個奢華嘅組合一啖放入口，一個字鮮，軟滑甘香。黑毛和牛刺身開頭擔心睇落都幾生，但肉夠靚又有火炙香味都接受到。 芥末籽水菜沙律印象都幾深刻，新鮮爽脆，水菜原來仲有一種未食過嘅香氣，一路食一路覺得好健康。鵝肝茶碗蒸係分子料理，第一次食到泡沫狀態嘅蛋，感覺幾得意，幼滑有蛋香。清酒煮帆立貝幾大粒，只係輕輕燒咗兩面，非常幼嫩僅僅熟。 最特別嘅係上菜時放咗喺金魚缸上面，下面仲有條金魚游緊水，打卡一流。炭燻牛舌芯估唔到真係放左舊燒紅嘅炭係牛舌上面焗多陣，個焦香真係不得了。 牛舌心同預期一樣爽口彈牙，配有梅子鹽Wasabi同芥末醬，味道好豐富多變。和牛他他配漬物、紫蘇葉同紫菜包住食，即使幾樣嘢咁濃味都冇搶到和牛嘅味道，牛味好濃好香。白蘭地酒香迷你壽喜燒好啱我口味，師傅煮到只係剩返酒香完全唔苦，令到甜甜地嘅壽喜燒更加有層次，和牛當然冇得輸，值得一讚呢個小小嘅壽喜燒都用咗好多款唔同嘅蔬菜，豆腐同芋絲都有齊，好有誠意。重頭戲A5黑毛和牛柳有返咁上下厚度，一咬落去油花爆曬出嚟，唔需要好複雜嘅調味，簡簡單單刨咗啲烏魚子碎，咸香味同牛味相輔相成。慢煮安格斯封門柳飯肉量估唔到同一個main差唔多，比較紮實重牛味。 來自北海道嘅米好香，燒得焦香嘅封門柳配埋惹味嘅山賊醬，成個組合好完美。