一大朝早同朋友行完港島徑⛰️，由黃泥涌落返銅鑼灣，因為天氣太熱🥵 又啱啱行完山嘅關係，老編本身已經冇乜胃口食嘢，淨係想食啲凍冰冰嘅甜品消暑兼解渴💨，但係同行嘅朋友就覺得好肚餓又想食啲飽肚啲嘅食物，所以一時間諗唔到應該去邊度同時滿足我地兩個截然不同嘅需要，諗住搭車落咗時代廣場再算。 落咗車啱啱經過鵝頸橋底嘅時候，見到一間以前中學成日放學都走過嚟食下午茶嘅鋪頭，諗都唔駛諗就決定入去食個輕便午餐。 呢一間小店就係人和荳品廠，佢嘅位置啱啱喺正鵝頸橋底嘅隔離，旁邊就係灣仔街市，對面就係好多過海巴士嘅鵝頸橋巴士站，地理位置非常方便。據我所知除咗鵝頸橋底呢一間分店之外，渣甸坊嗰邊亦都有一家，另外旺角嗰頭都有兩家，都算係一間連鎖式嘅豆製食品小店！ 入到去店舖嘅空間唔算好大，店內設計簡單樸素，冇乜太多花巧嘢，座位亦都係以舊式嘅直木凳為主，整間店舖大概最多可以容納20人左右，係一間實而不華嘅小店，仲有滿滿以前同中學同學落嚟食嘢嘅回憶添。 入到舖頭右邊首先見到一個開放式嘅廚房，展板上鋪滿左一嚿嚿魚肉豆腐，聞到都香噴噴，雖然小店嘅設備睇得出都用咗好長嘅一段時間，唔算新，但整體來講都係好整齊好乾淨。 好香嘅魚肉豆腐製作中 😋 豆腐花類
豆漿, 小食類 同朋友喺店裏面兩個人揀咗一張四人枱坐，小店嘅餐牌只有兩頁，一頁全部都係豆腐花類，另一頁就有豆漿同埋一啲小食，選擇唔多，但每一碟嘅價錢都只係$20內，感覺好抵食！ - 睇完餐牌之後，同朋友一共嗌咗兩碗豆腐花同三碟小食。雖然話就話小食，但每一碟嘅份量都好大，食完就好似食咗一餐正餐咁，性價比好高！而且上菜嘅速度非常快，我哋落咗單5分鐘之後就已經開始列咗啲小食，啱晒啲趕時間嘅人過嚟快吃一餐。 首先食係豉油王炒麵（$16），記得以前放學之後最鍾意就係食呢個炒麵啦，雖然只係$16 ，但係炒麵嘅份量多到可以搭一個小山丘，食完已經飽咗一半，而且炒麵嘅配菜好足料，有好多芽菜同豆卜條，面質一啲都唔濕，豉油嘅味道仲好入味添，又便超級好食仲好飽肚添，味道同以前都仲係一樣！ 另外我哋都嗌左碗柴魚花生粥（$20 ），雖然天氣真係熱到完全唔想食粥，但係人和出嘅柴魚花生粥就算再熱都一定要食返碗，因為真係太好食啦！粥底煲得好綿，水同米嘅份量啱啱好，絕對唔會好水，好多柴魚肉同花生係粥入面，一啲都唔馬虎，啱晒我呢啲鍾意「食花生」嘅人！ 滷水豆腐豆卜（$16 ）  黎得豆製專門店當然要嗌翻碟滷水豆腐豆卜（$16 ）啦，豆腐好滑滷水汁好入味，配埋自家製酸辣醬真係一流，簡單又健康嘅小食！   豆卜嘅豆味亦好重，食落口啲滷水汁咇曬出黎好香口，配粥食又得！
食完三個一啲都唔小嘅小食之後，我地就嗌埋甜品，朋友揀咗花奶豆腐花（凍）（$16 ）而中意朱古力味產品嘅我當然就嗌咗碗朱古力豆腐花（凍）（ $16 ）啦！  兩個比較之下我都係鍾情朱古力味多啲，記得以前中學都係一定會帶呢一個味嘅豆腐花，因為朱古力嘅甜同豆腐花嘅滑好夾，仲係用我最鍾意嘅吉百利朱古力粉開，用咗朱古力粉就唔需要額外加糖水，覺得呢個食法好食過傳統食法好好味！ 花奶味就第一試，都唔錯嘅，不過略嫌同豆味冇咁夾，會好似變咗食啫喱咁，怪怪地。 總括嚟講，人和荳品廠真係實惠之選，食物平靚正之餘上餐速度仲好快添，當然價錢上已經冇以前中學嗰陣咁平，但係依然係好抵食，喺度仲可以搵返好多中學嘅感覺同回憶，呢啲就真係用錢都買唔到啦！🥰🥰

珍珠奶茶嘅熱潮近呢10年黎可以話係有增無減，唔單止多咗好多唔同品牌投入呢一個行業，台式沖調飲品嘅選擇同種類亦都多咗好多，黑糖珍珠鮮奶更係呢幾年黎好多香港人嘅至愛添！好多時候呢啲台式飲品嘅味道都偏濃同偏甜，尤其香港人飲慣咗重口味嘅港式奶茶，喺香港買到嘅珍珠奶茶一般都比台灣嘅更加濃味。

正正因為呢個原因，我哋反而就冇乜機會認真嘗試同感受到呢一類珍珠奶茶店嘅出嘅茶，所以今次就同朋友決定order最Basic嘅齋茶同埋奶茶，入面任何材料都唔擺，感受一下最raw嘅奶同茶味。

同朋友啱啱喺銅鑼灣附近食完午餐之後，就行到過嚟木衛二，當係飯後甜品兼消暑下。可能因為午飯過後多啲人嚟買珍珠奶茶，所以都要排一陣隊，店舖嘅設計同其他分店都大同小異，以白色為主調，地面有個以銅鑄整咗店舖嘅標誌，係簡約嘅設計中再顯幾分文青風格。由窗口望入去所見，呢間台式飲品店舖嘅廚房非常整齊乾淨，唔通茶同調味品井井有條咁樣排喺廚房架上，牛奶唔會一早擺定出嚟去到最後衝先至有雪櫃拎出嚟，見到都令人飲得更加安心。有餐牌所見，除咗平時飲開嘅冰茶、奶茶，呢度亦有自家製嘅手作果茶同埋無酒精雞尾酒，非常特別。 - 由落order去到攞到飲品大概等咗10分鐘左右，首先先講友人嗌嘅鐵觀音茶（凍、正常糖、正常冰）（$25），鐵觀音嘅茶味好龍，但甜度亦都好重，可能朋友飲開重口味嘅飲品，佢覺得好好飲，但係老編就偏向啲淡啲嘅茶，所以就覺得呢一杯略為太甜喇。 我就嗌左一杯鐵觀音茶那提（凍、微糖、正常冰）（$30），老編覺得呢一杯嘅甜度啱啱好，奶味同埋茶味互相唔會掩蓋咗大家，奶同茶好夾，如果你都唔係屬於好重口味嘅人，推薦大家記住要嗌微糖，即係只會有30%嘅甜度。 第一次飲杯咁簡單嘅台式飲品，冇珍珠、冇芋圓、冇仙草、原來都好Fresh，飲完又唔會好飽肚，真係夏天消暑一流嘅飲料，或者以後真係要試多啲唔同品牌嘅齋茶同齋奶茶啦！ By 🦕 周 - 為  食 👁

平時去開諾士佛台飲野🥂，通常都係去地舖嗰幾間最出名嘅酒吧，貪佢夠近夠方便又有氣氛，但無諗過原來喺諾士佛台樓上嘅酒吧，環境更加舒服，食物同飲品嘅質素更加高，價錢仲要比地舖嘅酒吧更實惠！今次揀嘅呢間酒吧位置係喺諾士佛台入面一棟大廈嘅4樓，由於佢係一間上樓酒吧，如果唔係特登上網search都未必咁容易留意到。👀

事源就係有朋友曾經講過呢間酒吧嘅shisha同飲品都好正，上網睇完佢個餐牌之後發現原來都有正餐選擇，於是就趁着爹哋媽咪結婚周年紀念👨‍👩‍👧‍👦黎呢度幫佢哋慶祝，諗住俾個驚喜佢哋！結果除咗環境一流，食物嘅質素更加比到好大驚喜我哋，而且老闆熱情嘅招待，肯定左自己今次冇揀錯地方！

酒吧嘅空間好大好寬敞！👍🏻

除咗有一個好大嘅吧枱之外，中間更加有一張桌球枱同兩張beer ping-pong 嘅長枱，客人嘅枱同埋燈就圍住成間舖頭嘅四邊，相隔嘅位置有一段距離，所以私隱度好高，就算大聲啲講嘢傾心事都唔怕比隔離聽到，係三五知己嚟吹水嘅好地方！😎

酒吧嘅內部裝修都好華麗，好有賭場嘅豪華feel，特別鍾意吧枱上方嘅咕嚕咕嚕招牌霓虹燈，添加左成間舖頭好chill嘅氣氛。🤟🏻🤟🏻


-

一入到酒吧坐低之後，店員首先就拎咗一桶蝦片招呼我哋。呢桶蝦片本身已經計咗落單入面每張枱$40 ，但係蝦片可以無限添加，而且佢唔係普通原味嘅蝦片，而係有辣粉同肉鬆係上面，係一流嘅送酒小食！
-

主食餐牌


串燒餐牌

因為今晚係慶祝爹哋媽咪嘅anniversary，所以我哋主要都係黎食晚餐，呢度嘅食物餐牌選擇唔算好，主食只有一頁，另外加一頁串燒嘅選擇。所謂貴精不貴多，雖然食物嘅選項唔多，但係每一樣都好好食好高質！
-

首先講吓媽咪揀嘅小食先，本身媽咪都好鍾意食日本嘢所以佢就揀咗個煙三文魚小型薄餅（$78）。雖然薄餅嘅size唔算好大，每一片大概兩至三啖就食完，但上面嘅topping依然好足料，每一片都有一舊煙三文魚，而且番茄醬嘅份量好足夠，配上火箭菜一齊食，口感清新得來又不失三文魚嘅魚香，加上薄餅底唔厚，食完都唔會好飽，係好一道好開胃嘅前菜。
-

主菜方面由我同媽咪揀咗一個粉一個飯。意粉方面我哋點左卡邦尼闊意粉配流心蛋（$98），卡邦尼個白汁味道好濃，煙肉同洋蔥食得出有預先爆香先再加入去個汁入面，所以令到白汁好香，一啲都唔馬虎！

意粉嘅軟硬程度適中，雖然汁同粉未能夠完全融為一體，但因為流心蛋煮嘅時間調教得啱啱好，撈埋入去個汁同意粉嘅時候就完美咁將成碟意粉昇華。
-

另一道都係以白汁為主嘅白汁海鮮意大利飯（$98）真係好驚喜，意大利飯烹調好入味又唔會過分鹹之餘，飯嘅軟硬程度啱啱好。

而且飯入面嘅海鮮材料非常有份量同足料，包括有青口、蜆、帶子、蝦、魷魚，仲要每樣餸都有幾粒，呢$98真係物超所值！
-

而超級食肉獸嘅爸爸同細佬就揀咗三碟肉。先來嘅係竹炭芝士牛肉漢堡配薯條（$118）。成個漢堡包嘅味道中規中矩，材料豐富，有番茄、生菜、生洋蔥，仲有半溶嘅芝士，而塊牛肉漢堡亦都好juicy，略嫌黑色嘅竹炭包就冇乜特別啦，同普通包差唔多。

不過值得一提嘅係中間個白色汁好特別，好似開稀咗嘅mayonnaise再mix咗好濃嘅酒精，點個漢堡落去食令到成個包嘅味道完全唔同晒，即刻感覺到有半分醉意！
-

成餐飯個人最鍾意嘅就係呢一碟德國鹹豬手配薯蓉及雜酸菜（$168）！隻豬手非常大，四個人分啱啱好。配菜烹調嘅技巧亦都好高，包括酸菜嘅酸度啱啱好，同豬手好夾，而薯蓉嘅cream味好重，所以個質感好滑好香！

豬手嘅質感可以話係💯分，完美做到外脆內軟，個皮炸到卜卜脆但係入面嘅肉依然keep到好嫩滑，一切開啲汁就彈晒出嚟，非常Juicy！加埋酸菜薯蓉一齊食，真係令到隻豬手錦上添花，超級推薦👍🏻👍🏻！
-

最後食嘅一道菜係特色烤春雞全隻配薯條（$118），成隻雞嘅size唔算好大，但個皮同豬手一樣炸得趣卜卜，而同時裏面嘅肉依然keep住好滑，唔會好乾，唯一美中不足你係雞偏油膩，食落口好似食咗成啖油咁，下次未必會再嗌返。
-

飲品方面，我哋嗌左兩杯cocktails，三杯hoegaarden。

第一杯 sex on the beach（$78）就真係麻麻哋啦，飲落去藥水味好重，完全冇平時飲開嘅橙汁同埋西柚味，飲咗一啖已經想放棄。

反而杯Cosmopolitan（$78）有驚喜，酒精味唔算好重，甜甜地又有淡淡的水果味，飲落好清新好match，可以平衡一下咁Heavy嘅dishes。

另外啤酒亦都好好飲，相比起平時自己喺超級市場買嘅樽裝/罐裝嘅hoegaarden（$60），呢度嘅hoegaarden比較甜，飲落唔會太苦，就算一杯有成500 mL一個女仔都飲得曬。

最後好好人好熱情嘅老闆免費請我哋飲6 shot黎慶祝爹哋媽咪anniversary，好好飲，亦都係一個好大嘅surprise！


😋 總括嚟講，呢間樓上bar嘅食物質素意外地高，10分滿黎講絕對值得9分，每一碟餸都食得出係認真製作，貴精不貴多，最後埋單每人大約230蚊，仲飲咗咁多酒，性價比好高！成餐飯唯一美中不足就係冇甜品，本身諗住同老細講叫佢哋預備一份甜品上面寫字嚟比surprise爹哋媽咪，點知原來成間Bar都冇甜品供應，如果有埋就真係完美啦！

絕對係一個一流嘅酒吧晚餐體驗！可以好肯定下次一定會再同朋友嚟過！

🦕 by 周 - 圍 食 👁


其他酒品套餐選擇

因為疫情嘅原因, 喺英國提早番黎嘅表弟自我隔離咗一個月之後, 我地終於可以同佢去佢掛住咗好耐嘅飲茶! 可能係星期六嘅關係, 今日喺茶樓嘅人都好多, 我地大概都等咗20分鐘先入到去.
見到餐車呀E都係照舊周圍送餐.
餐單
蒜蓉蒸鮮魷 (精點) 魷魚好入味, 亦都食得出好鮮, 不過個汁就好油.

翡翠筍蝦餃王 (特點) 蝦餃嘅size偏細, 而且個皮好厚.

櫻花蝦煎薄撑 (精點) 薄撑入面嘅料唔多, 味道冇咩特別.

鮮竹牛肉球 (小點) 牛肉味幾重, 可以再嗌!

黑金流沙包 (中點)
蘿蔔千絲酥 (大點) 養顏紅棗糕 (中點) 唯一比較好食嘅點心!

雞蛋叉燒腸 (大點) 香煎蘿蔔糕 (大點) 無味嘅蘿蔔糕...

紫心香芋丸 (中點) 脆皮鮮奶卷 (中點) 好似食咗成淡油入口, 一D鮮奶味都冇, 好失望!

埋單4個人食到好飽, 星期六飲茶黎講都算幾抵! 但食物整體黎講真係太油, 食物味道亦只係一般, 下次飲茶應該未必番黎!

星期日同朋友喺銅鑼灣行完街之後，本來想食黃到發金嘅龍門冰室，但實在太多人去懲罰佢哋啦，而我哋又好肚餓，見到隔離有間好似新開嘅車仔黃店，於是就決定去幫襯下！ 呢間黃店雖然冇隔離龍冰咁多人，但一樣坐滿全場，咁好彩啱啱入去嘅時候有一台人走於是我哋就可以有一張四人枱。入到去見到周圍都好多好多抗爭裝修裝飾，而且店內不斷放着手足必聽嘅歌，令人都坐得特別舒服！

同朋友四個人分別嗌咗三碗麵加一碗齋餸（因為友人唔肚餓）。

豬大腸豬紅咖喱魷魚 油麵 配咖喱辣加麻辣（少）（$40）
先講吓個湯底先，我食嘅係豬大腸豬紅咖喱魷魚 油麵 配咖喱辣加麻辣（少）（$40）！超級鍾意佢嘅麻辣醬，係果一種啱啱食落口覺得冇乜感覺但啲辣味會慢慢慢慢開始散出嚟。如果你唔係好食得辣嘅話，建議你可以叫個waiter將個麻辣醬另上自己少少少少咁加落去！食到最後個嘴真係辣到腫晒，但真係辣得好好食！！

而車仔麵嘅餸亦都好出色，魷魚整得非常入味，食落啲咖喱汁會必晒出嚟，加埋個汁真係錦上添花！豬紅同豬大腸處理得好乾淨，食落唔會冇腥味，滷水味好重好入味，下次黎一定會再嗌！

腩汁 有葱 豬紅魷魚豬頸肉 （$30）
唯一少少美中不足嘅係個麵底，油麵煮得唔夠耐，麵質有啲硬，可能太多客人所以淥嘅時間唔長。而朋友食嘅米線都有同一個問題，食落都好硬好生，如果可以煮耐番少少就好啦！當然個面浸耐啲個湯其實都開始軟化啲嘅，所以一樣係咁好食。

腩汁 麻辣（少）豬皮雞中翼咖喱魷魚 米線 （$40）
另外其實個Menu亦都有大尊同細尊嘅配搭， $40就可以一次過食到好多款餸，啱口味嘅話就真係好抵食啦。

咖喱辣腩汁 有葱 細尊 （豬紅, 蘿蔔, 咖喱魚蛋, 紅腸, 豬皮 油麵） （$40） 下次經過開銅鑼灣都一定會再返嚟呢間黃店車仔麵幫襯！

🦕 by 周 - 為 食 👁

一直以來，總覺得中環是一個洋人地方，酒吧林立，到處都以西方或是Fusion菜單為主的餐廳，沒想到在這裏竟然可以找到一間以台灣為主題的餐廳，一走進就好像飛到了台灣！ 走過石板街的斜路，經過大館，再走進荷李活道。 在一個位於灰暗轉角位的店舖中，櫥窗竟然閃着「我愛台妹」四個大字的霓虹燈，十分吸睛，亦吸引到我和朋友停留！

因為疫情的關係，與友人一早籌備已久的台灣旅行也泡湯了，剛巧最近又經常看到朋友在ig上到Check-in Taipei打卡，於是就抱着當自己飛到台灣一趟的心態，來到這裡用餐！老實說，吃過後失望比驚喜更大，食物質素中上，但價錢來說真的不值了！
原來真的如餐廳名字，來打一次卡就夠了！ 。 餐廳的內部裝修和設計很有心思，由你踏進門口的第一步開始，就恍如置身在台灣。 除了我愛台妹的霓虹牌外，餐廳四周都擺放着很多台灣啤酒樽，牆上有掛住一些文清的裝飾，好多位置都好適合打卡喔！ 餐廳的左邊是吧枱，適合二至三人來試試這裏特製的cocktail，而bartender的身後亦掛着周董膾炙人口的歌詞，然而個人覺得這些poster的設計與整體餐廳風格有點格格不入，不過亦算是與餐廳內熱播着的台灣歌互相映襯着！ 。 坐下以後，餐廳職員細心地放上餐牌，亦很熱情地跟我們介紹折扣優惠。 小食 蛋餅 主餐 甜品 飲品 餐牌上的食物選擇並不多，然而設計卻是十分特別，所有食物都以帶照片展示，令人一目了然，圖文並茂，所以很快便選擇了想嘗試的菜。 / 前菜方面，我們點了一個冬陰功龍蝦牛油果蛋餅（$88），身為一個牛油果die heart fans看到冬陰功加牛油果這個組合很新奇，於是想試試看，怎料吃過後一點冬陰功的味道都沒有，反而跟西餐廳的小龍蝦沙律醬麵包的味道無別，不太驚喜，而且這個價錢的小龍蝦沙律將蛋餅來說，真的有點貴。 值得一提的是，蛋餅上的蝦餅增加了整個蛋餅的口感，不過還是彌補不了當中的失望。 。 主菜方面則點了一客糖心蛋滷肉飯 （$48）和鮮蟹肉麻婆豆腐撈麵 （$148）。滷肉飯可算是整頓飯之中性價比比較高的一道菜，滷肉汁的鹹到剛剛好，滷肉和飯的比例亦十分恰當， 份量不算大，但吃過後已有一點飽肚的感覺。 然而撈麵真的有點遜色，味道感覺不太特別，與自己在家中煮台式撈麵的感覺無異，而且麻婆豆腐的辣味亦不太重，以$150來說吃一碗撈麵的價錢也太昂貴了吧！ 雖然面的軟硬度剛好，但始終還是不太抵吃！ 。

之前看過朋友的打卡，知道這裏的甜品也十分受歡迎，於是和朋友點了一碗伯爵茶凍QQ芋圓（ $65）和一客Oreo奶奶麻薯 （$75）。 兩款甜品比較之下，個人還是喜歡奶奶麻薯多一點。
奶奶麻薯的煙韌度和質感比在淡水吃到的水份較多，因此很容易便會斷開，未能做到「彈下彈下」的感覺，但oreo脆脆也因此而容易黏在麻薯上，而牛奶味亦頗重，所以吃下味道挺好！如果可以便宜一點就更好了！ 相比之下，芋圓的味道就比下去了。芋圓比較煙韌，但沒有什麼味道，而家佔整個碗的份量不多，反而伯爵茶凍、檸檬愛玉和珍珠所佔的位置更多，而個人對這些甜點的興趣亦不大，所以有點失望。不太建議真的很想吃芋圓的人點這款甜品！ 。 最後在臨走之前，和朋友研究了一會飲品的餐單，發現每款homemade cocktail的名字都很有趣，於是點了奶茶妹妹，醉了（$95 ）一個試試。 這個飲品的材料包括伯爵茶、vodka、Bailey、蜜糖，味道頗像大型的B52再加珍珠，挺特別！另外喝這杯Cocktail之前，要先將一支已燃點的木支放進飲料中，因此有一點煙燻的味道，令到整杯cocktail的層次更上一層樓，亦令整杯飲料的賣相更加好看！ / 總括而言，個人認為以台灣菜而言，這間餐廳的定價都很高，雖然食物味道不差，材料的運用上亦有很多新嘗試和配搭，而且從餐廳內部的裝飾、餐牌和食物名稱的設計上都突顯心思，但始終以台灣菜的水平來說，我想我未必會再來了。 by  👁️ 周 - 為 食 🦕

難得搵到一間黃店酒吧，當然要支持下啦！ 雖然呢度嘅手工啤同Cocktail普普通通，唔算係特別好飲，但係環境不得了！以香港傳統霓虹燈做主題，好多香港嘅集體回憶都可以係度搵到，手工啤嘅包裝仲好得意，係只有香港人先會明白嘅回憶！ / 瘋啤 - 液體麵包 （$79） 見到呢個名相信玩過ocamp嘅你哋都一定有所共鳴啦！😏 啤酒嘅味道唔算好重，飲落好似真係有小小麵包味，清清地，去到最後係會有啲甘味，唔算特別好飲，但為咗個包裝都值得一試！ / 瘋啤 - 陳皮啤 （$79） 唔知係咪比個名影響咗，但飲落好似真係有陳皮嘅味道，中西合璧嘅感覺幾特別！😂 地方唔算好大，但係座位都算鬆動所以坐得好舒服，店內貼嘅文宣好靚，亦睇得出好花心機去佈置，好有親切感同熟悉感，而且店內播着嘅background Music係可以任你點歌聽，老闆亦好friendly好nice，好有家的感覺！ / 我相信，有時候揀餐廳其實未必淨係睇食物嘅質素，感覺或者先係最重要！💎 By 🦕 周 - 圍 食 👁

講起印度菜，平時都只係聯想到印度咖喱、印度薄餅，但係食完Pizza Max Bistro之後就發現，原來印度菜唔止咁簡單！ 呢間餐廳嘅位置喺佐敦嘅內街、屬於比較靜嘅地帶，由於唔係好近彌敦道嘅大街，附近人流唔算多，由地鐵站過去亦都大概要行10分鐘，對面亦有幾間酒吧，適合三五知己過黎食餐飯、飲杯野！正正因為餐廳嘅位置並唔係大街，如果唔係刻意上網去搵都未必留意呢間餐廳。  事源就係最近出街食飯都係食日、韓、台，所以就同朋友抱住「試伏」嘅心態喺網上揀咗佐敦呢間印度/多國菜，發掘一下除咗咖喱之外嘅其他印度菜式！意想唔到，由試伏變咗有驚喜，亦都增加咗我對印度菜嘅興趣！ - 餐廳唔算好大，唔知係咪因為限聚令未過，今晚黎食飯嘅人亦唔算好多，坐得好舒服，大聲啲講野都唔怕嘈親隔離枱嘅人！   餐廳盡頭係吧枱嘅位置，望落好精緻亦有好多酒品選擇，而呢度嘅signature cocktail價錢唔算好貴，大概60-70蚊一杯，不過因為第二日要翻工所以淨係嗌咗蘋果汁🍹。  餐廳內部裝修偏向以dark color為主，比較簡約，牆上面掛咗啲風格畫，提升咗整間餐廳嘅情調，餐廳亦keep住播啲jazz music，好有氣氛，啱晒食完飯繼續坐喺度同frd吹水hea下，所以我地5個女人都坐到差唔多收鋪先走！ - 頭盤 去到揀食物方面，餐牌中英對照，非常方便，對於我呢啲英文差又懶得google translate嘅人黎講真係一個懶人恩物！ 沙律 雖然餐廳已印度作為主題，但無論係頭盤、沙律、到主菜、廚師精選、意粉等等，其實都有好多西餐嘅選擇，一啲都唔會好似好悶剩係得咖喱揀！  Pizza 由餐牌所見， Pizza嘅選擇特別多，甚至可以自己配搭出最啱口味嘅Pizza ！ 值得一提嘅係，只要加多$40就可以喺pizza上面食到水牛芝士，非常抵呀！ 主菜 咖哩 飯 Dish of the day - 經過一番掙扎之後，前菜我哋order左一個蒸嘅momo、一個炸嘅momo同埋一份沙律。 首先講吓momo，亦即係特製醬雞餃（炸：$75；蒸$70），Momo係街知巷聞嘅印度街頭小食，可以話係印度人由細食到大，外型同口感都有啲似中國餃子，但係入面個餡係mix咗印度香料，所以食落係有另一番風味！ 雖然炸嘅momo外皮脆卜卜比較有口感，但係個人就鍾意食蒸嘅momo，因為蒸嘅做法可以keep住個餡入面嘅肉汁，一咬開啲肉汁就爆曬出嚟，非常juicy，再加埋佢個homemade辣醬，超好食！！！！！！！！ - 另外再嗌咗個雞肉牛油果沙律 Chicken and Avocado Salad（$125），中規中矩嘅沙律，份量尚算大，5個女仔share啱啱好，感覺個牛油果如果再熟啲就會好食啲，因為個牛油果太生會冇乜味。但都好欣賞個雞肉醃得入味，食得出黑椒味，加埋呢個沙律用柚子醋Max埋，所以好Fresh唔會感覺太Heavy ！ - 主菜出場喇！ 首先講下呢個必食嘅去骨牛油烤咖喱雞（$109）配蒜蓉烤餅 Garlic Naan （$28），啱啱上菜已經聞到好香牛油味，而烤餅亦係新鮮熱辣辣出爐，嚟到啲煙不斷升起。咖喱同個烤餅非常match，咖喱味食得出比較重Coconut milk，加埋牛油，個質感好滑，但同時亦都比較好「漏」所以食咗一小塊咖啡烤餅已經覺得好飽好濟。至於個雞因為已經去咗骨嘅緣故，所以食得好舒服，啖啖肉，而且整得好嫩唔會overcook咗，超級推薦👍🏻👍🏻！  我地另外再嗌咗個牛油烤餅 Butter Naan（$24），牛油烤餅比較油，而且無蒜蓉烤餅咁香，所以我會建議大家都係嗌翻蒜蓉烤餅！ - 既然餐廳叫得自己做Pizza Max，我哋當然就要試吓佢個公司特選薄餅 Max’s Special Pizza （中：149  大：$179）啦！呢間餐廳嘅Pizza全部都有分M size同L size嘅，M size嘅尺寸係10吋，而L size就係14吋，兩個size都係切開成八片pizza，好容易同朋友share！ 由於我哋有個朋友係對芝士敏感，我哋同店員講咗之後佢都好細心幫我哋淨係放咗半邊pizza有芝士，留返半邊係冇芝士比我朋友可以食到。呢個Pizza係簿批，好足料，一切開啲topping已經跌曬出黎！味道黎講呢就唔算好impressive ，不過一定好食過Pizza Hut DHL嗰啲連鎖薄餅店！ - 最後我地亦點咗個意大利式餃子 Tortellini （$120），餃子本身好有口感，加埋芝士忌廉醬個味即刻豐富好多，佢本身個sauce入面仲有菇同豆，再落埋extra芝士粉真係錦上添花，好食過好多自稱正宗意大利菜嘅tortellini！ - 總括嚟講呢間印度fusion菜餐廳10分滿黎講絕對值得8分，每一碟餸都食得出係認真製作，而且好多樣化，最後埋單每人都唔駛140蚊，性價比極高！唯一美中不足就係呢度嘅餐牌冇甜品，如果有埋甜品就真係完美啦！ 🦕 by 周 - 圍 食 👁

聽過Wasabi拉麵好耐，但因為平時好少去開荃灣，所以一直都冇機會食。今日終於同朋友入嚟，加上響應5️⃣1️⃣黃金周，就揀咗呢間想試好耐嘅黃店！冇諗過除咗餐廳deco高質，連拉麵都一樣咁高，難得遇到一間又好食又好睇嘅黃店，一定要大大力推介俾大一齊懲罰佢！💛💛 - 日本芥末拉麵 $80 下次再嗌機會率：🍜🍜🍜🍜🍜 冇諗過Wasabi加芝士粉個味係咁驚喜，個Wasabi味本身唔係好鹹，加埋芝士粉個味道啱啱好，好多層次好驚喜！個感覺有啲似食緊pesto醬嘅意粉，不過就冇pesto 個香草味咁重，同時個麵底就變咗係拉麵！ - 拉麵本身可以揀直面或者曲面，朋友話曲面可以更加容易掛喺掛起個湯底，所以就揀咗曲面，而掛湯嘅效果亦都非常之好，面嘅軟硬度煮得啱啱好，好啱老編口味！ - 平時食開嘅拉麵湯底都偏鹹，但今次呢一個拉麵嘅湯底就唔算太鹹，食完唔會有成日都想飲水嘅感覺，份量亦都好大，配菜亦都好足料，非常推薦大家一定要黎試吓，我諗我下次想食拉麵嘅話都應該會返嚟食呢個會食翻wasabi拉麵！ - By 🦕 周 - 圍 食 👁 ———————————

🦕 周 - 圍 食 👁 ————————— 難得老編同媽咪一齊wfh，於是去咗屋企附近海旁嘅餐廳食個Tea ！可能平日嘅關係，周圍都唔算好多人，於是隨便入咗一間泰國餐廳，點知有驚喜地食咗一個又平又高質、性價比高到爆嘅下午茶！🈵 - 餐廳嘅下午茶Menu平均每個餐都只係$50仲包一杯嘢飲，另外加10至$20就仲可以多個小吃，係一個超級豐富嘅下午茶！以呢一個價錢來講嘅泰國菜嘅食物質素真係好正！😍 - T4 冬陰功湯雞河粉/金邊粉 $48 下次再嗌機會率：🍜🍜🍜🍜 👍🏻：$48來講呢個粉同餸嘅份量真係好多，除咗有大量雞肉之外仲有菇、芽菜等等嘅料，真係超值選！依個冬陰功湯嘅味道亦都啱啱好，味精唔算好重，呢個價錢可以食到冬陰功味算係咁㗎啦！ 👎🏻：如果你本身好食得辣嘅話，呢個冬陰功湯就唔算好辣辣，未必滿足到你嘅口味！ - T9 泰式地道豬手飯 $58 下次再嗌機會率：🍚🍚🍚🍚 👍🏻：個飯大到爆炸，豬手煮得好淋好入味，肉嘅肥瘦分佈啱啱好，驚喜地好食！配埋個醬汁，唔講真係估唔到係食緊一個咁平嘅豬手飯！呢個飯我真係諗唔到缺點哈哈！ - 春卷（兩件）+ $6 下次再嗌機會率：🥠🥠🥠 👍🏻：$6有個小食真係幾抵，個春卷皮唔係平時茶樓嗰隻硬皮，而係一條條麵粉絲組成嘅脆皮好鬆脆，好食！ 👎🏻：不過入面個餡係有啲凍如果可以再整返熱啲就更加好啦！ - 蝦餅（四件）+$18 下次再嗌機會率：🍤🍤🍤🍤🍤 👍🏻：呢個蝦餅真係冇得輸，好似新鮮炸出嚟咁，熱辣辣好香好食，入面亦都好有蝦味，下次一定會再加呢個小食！ - 每個餐仲有嘢飲送添！其中個泰式奶茶好好飲，個感覺似係茶走再加香草味，而煉奶味亦好重，鍾意飲茶走嘅你一定唔可以錯過！下午茶好抵食，選擇亦都好多，基本上傳統嘅泰國菜式都有齊！ - 總括來講，老編覺得呢度嘅下午茶真係又經濟又實惠，食完基本上唔使食晚飯，平日黎食仲唔使+1添！餐廳嘅枱凳亦好寬敞，坐得好舒服，而且近海旁，天氣好嘅時候仲有一陣陣自然風吹入餐廳，好寫意！真係用平民價買咗一個高級嘅下午茶體驗！ / 🦕 by 周 - 圍 食 👁