🍁好耐無同瑪姬皇后出銅鑼灣行街🛍，行完街肚餓緊係要醫肚，見百德新街有間日系輕食餐廳《Pancake Senmon》，裝修好特別✨，一於入去坐下。📌LOG ON 行前小小就係《Pancake Senmon》，門面以木系裝潢，透明玻璃🪟清楚看見店內一大棵黃金楓葉樹🌲放在櫥窗內，咁吸睛行過都會望兩眼👀。📌入到店鋪，就有一隻坐地貓貓擺設歡迎你，好得意喎！📌吧枱上都放了幾個日式貓系陶瓷，看來店鋪以貓貓🐱為主題。📌餐廳感覺好光猛💡，裝潢好簡潔，牆上掛上幾幅日式招財貓掛簾，枱凳🪑以灰白色及木系為主，日系風格真係出哂黎🇯🇵。📌金黃楓葉樹上都掛了一個個招財貓公仔，好搶眼喎😻！📌金黃楓葉樹下仲擺放了一個小小的金幣許願箱💰，成件事真係好日本風情🖼。📌《Pancake Senmon》以日式輕食為題，主打各款日本班戟甜品🍩，起碼有十款以上可選擇。
📌另外仲有日式輕食。和風輕食系列包餐湯、主菜同麥茶，主菜有好多款揀，有咖哩🐥雞、牛肋條🐮、五花腩🐷、燒帶子等等，可以跟飯、意粉或者烏冬，價錢$118-$138，套餐咁的價錢抵食喎！📌飲品方面都好精緻，有各款沖調咖啡☕️、特飲🍹同店鋪最吸睛的富士山系列🗻。日本鳴門金時蕃薯 MONT BLANC 班戟，$138
來到《Pancake Senmon》專門食pancake，緊係點個招牌pancake試下喇。云云十多款pancake甜品當中，最吸引的莫過於招牌MONT BLANC 班戟系列。
揀選MONT BLANC 班戟有三步曲，首先，選擇外層蒙布朗口味，有期間限定金時蕃薯🍠、和栗🌰、紫薯、黑朱古力🍫同巨蜂提子🍇，然後選擇內裡的班戟口味，有原味、抹茶同朱古力，跟住就揀雪糕口味🍨，有抹茶、朱古力、士多啤梨、焙茶、雲呢拿同栗子，嘩！一個甜品三款食材，呢個MONT BLANC 班戟唸起都興奮😝。
左揀右揀，最後揀左期間限定金時蕃薯做MONT BLANC 山，然後襯托抹茶班戟跟焙茶雪糕做內饀。
好震撼的一坐MONT BLANC 山上枱⛰，超大一份的甜品，外層的金時蕃薯蓉🍠係好香甜的蕃薯味，明顯係用日本靚貨先咁出呢陣蕃薯香甜味。然後山入面有一堆cream，就到焙茶雪糕，雪糕溶溶地會撈埋cream同蕃薯蓉一齊食，因為焙茶本身茶味濃，撈埋一齊都各自食得出本身的味道，熊妹認為呢個配撘唔錯喎！
雪糕🍨下層就有一件抹茶班戟做底，深綠色的班戟係濃茶的抹茶做成，茶味重點又唔係假甜，班戟質感好鬆軟又有厚度，也沒有被上層的雪糕溶化變成好濕潤，唔知係可以點做到呢？果然做班戟有一手！三款食材都各有味道同口感，熊妹就建議各自獨立品嚐三款食材，以免三種味道的混合遮蓋了它們原本的美味。濃蕃茄牛肋條意粉，$138
輕食當中想食意粉🍝，意粉黎講，濃蕃茄牛肋條應該會好匹配。意粉份量正常，質感偏淋身少少，反而同濃蕃茄醬汁🥫好夾，稀稀地一啖𠽌入口，又唔洗咬得太嚼勁，濃蕃茄醬入面有好多蕃茄蓉🍅，有紅蘿蔔粒🥕，係好酸甜香濃的蕃茄味。牛肋條切成粒狀，都有6-7大粒，一口牛更易入口，肉質煮到軟淋，無筋又唔韌，輕食來講，好夠份量。抹茶富士山，$56
招牌富士山系列咁吸睛，點都要叫一杯打下卡📸。焙茶同抹茶，抹茶控抹茶熊當然揀抹茶，不需解釋🙈。富士山系列🗻，其係上層一半係茶味奶蓋🍵，下層一半係牛奶🥛。品嚐呢杯富士山飲品，餐廳有教路，2️⃣先用匙羹品嚐一口400次抹茶奶蓋的濃厚醇滑，2️⃣然後再攪拌20個圈後嚐到兩種奶蓋與牛奶層次的味道，3️⃣跟著再充分攪拌，將整個奶蓋融入牛奶之中最後品嚐柔滑細緻的口感。又真係喎！開頭品嚐抹茶奶蓋係好濃郁好豐厚的creamy口感，攪拌後，融入了一半的奶蓋於牛奶當中，就輕易地讓牛奶從奶蓋逢中流出來，變成一次過品嚐奶蓋同牛奶的味道，最後攪拌均勻之後，整杯抹茶富士山就變成一杯好柔滑的抹茶牛奶🍵，咁多種層次的飲法🤹🏻‍♀️，有得玩又好飲，絕對值得一試！維也納咖啡，$48
瑪姬皇后鍾意飲咖啡，見訪間好少有維也納咖啡。
維也納咖啡同富士山系列都有點類近，也是上層放了一半忌廉，下層就是黑咖啡。
這次，上層的忌廉有別於富士山的奶蓋，質感是更為厚實，正正是忌廉的本身，奶油味道超重，甜味適中，食入口是好豐滿的奶油忌廉。
當吃掉了一口奶油忌廉，下層的黑咖啡即時蜂擁而上🔝，滲上忌廉中間的逢隙，濃濃的黑咖啡與甜甜的奶油忌廉混口一起，將本身黑咖啡的苦澀味都取走了，帶來的是奶油與咖啡的衝擊效果，甜味奶油中又散發香濃的咖啡味，整件事就像在維也納音樂會🎻演奏一樣的澎湃，難怪取其名明，不禁拍案叫絕🧱，拍手叫好👏🏻！
維也納咖啡又擺放了一隻陶瓷招財貓😺！可愛💕！📌專門製作pancake的《Pancake Senmon》，其出品的班戟絕對不用懷疑，閒時來吃一口班戟，歎一杯400次奶蓋富士山或者感受一下維也納的激情🎷，為下午帶來一個美好的時光。

🔥熊妹今日放假，難得冇約人，就帶阿豬媽出去食好嘢順便行吓街啦。同阿豬媽食嘢就梗係食返佢鍾意食嘅辣野啦。想去‪荃灣行吓街‬，就搵到位於荃灣廣場4️⃣樓食四川辣菜的《川魔》，聽個名都好震撼。
‪📌下午兩點‬嚟到，阿豬媽話避過放中午飯的人頭，少人啲，坐得可以舒服啲。
📌估唔到餐廳嘅裝修以木係為主，仲有三角形教堂式設計的望窗卡位🏛，真係冇諗過食川菜都會有咁摩登嘅設計，熊妹梗係爭住坐窗口卡位啦。🖼
📌餐牌係真係有各款四川麻辣菜，著名嘅酸菜魚、水煮魚地、麻辣干鍋、仲有好多涼拌小食、川炒小菜，飲品仲有沙冰、梳打、茶類，食完辣嘢一定要飲嘢先可以解渴，樣樣都好吸引，真係每樣都想試吓，無奈得兩個肚。
📌另外仲有川味活燒生蠔，限時推廣價$‪10/1‬隻，點都試吓啦！
麻辣魚皮， $68
📌阿豬媽鐘意食魚皮，因為鐘意佢的爽口。
一碟麻辣魚皮份量都幾多，魚皮口感超級爽口彈牙，每舊魚皮嘅表面都浸滿麻辣香油，麻麻辣辣，辣到適中，有花椒八角的味道，份量雖然好多，但係呢種麻辣嘅味道好適合食得辣的阿豬媽，食吓食吓竟然俾佢食得晒。
香辣海蝦干鍋，（加新鮮牛肉，萵筍，鮑魚），$268
📌嘩！好大一兜喎！個盤大到要兩隻手先捧到🙌🏻。
阿豬媽同熊妹都食得辣🌶，所以叫咗中辣，因為干鍋唔夠辣會唔夠惹味。
干鍋🥘炒得好香，辣到剛剛好，干鍋的做法就係將辣椒爆出油，將出黎的辣椒油再同配料炒埋一齊，所以要揀啲乾身啲的配料先配合干鍋炒的做法，熊妹就揀咗萵筍同新鮮牛肉，阿豬媽就揀咗鮑魚。
每樣材料份量都非常多，首先跟干鍋的海蝦🦐起碼有10幾隻，嚐完蝦殼表面的辣味，再食入邊的蝦肉，口感彈牙，更出海蝦的味道，海鮮真係好配炒辣椒。
鮑魚都有三隻，屬細鮑魚但係size都唔係好細，口感都好彈牙，好出海鮮味。
新鮮牛肉有一大堆，真係數唔到的咁多，係食極都仲有，新鮮牛肉口感好厚實，放入口啖啖肉，又無肥肉位，同辣椒油炒埋一齊，好入味。
食咁多肉類配料，都要有少少蔬菜中和下，其實係想中和下心理。萵筍配干鍋好一流，乾身的萵筍炒到爽口，又可以令到辣油沾滿萵筍的表面，非常惹味。
雲南花菜炒豬頸肉， $88
📌本身菜式係炒臘肉，但係店舖臘肉賣哂轉咗做豬頸肉🐷，仲好，因為熊妹喜歡食豬頸肉，怕臘肉太鹹。
其實呢個款小菜，阿豬媽喺屋企都有陣時會炒，但真係無佢炒得咁香口，佢用上大量的醬汁令每一嚿花菜同豬頸肉都沾滿醬汁，好入味。花菜好大一舊，炒到好爽口，唔會炒過龍變淋，豬頸肉份量超級多，肥肉位唔係好多，食落口啖啖肉，有肉有菜，成件事就好均勻啦。
川燒生蠔，限時優惠價， $10/1隻
📌本身原價$‪28/1‬隻嘅生蠔，俾阿豬媽遇上$‪10/1‬隻，梗係要試兩隻過吓癮啦。
生蠔超大一隻，一上枱，蒜香嘅味道芬香撲鼻👃🏻，真係好想即刻放入口👅，但係太熱♨️，唯有攤凍一陣先。🌬
真係好肥美一隻，生蠔面頭佈滿蒜蓉一齊燒，令到蒜蓉滲入生蠔入邊，燒出更多的蒜蓉汁，濃味的蒜蓉更吊出生蠔的海鮮味，食一隻真係唔會夠喉，但因為食得太多嘢，食兩隻止下癮先。
紅糖糍粑， $48
📌紅糖糍粑係阿豬媽最愛的川菜甜品🍡，就算幾飽都好，甜品都有另一個胃。
果然無令到阿豬媽失望，糍粑有六件，面頭鋪滿紅糖汁，仲灑上少少黃豆粉，增添口感。
糍粑表面炸到脆面，入邊軟糯，咬落去真係外脆內軟，軟糯的口感係，真係一路咬一路黏着牙齒，仲有本身適量的紅糖汁調味，令入面本身冇味嘅糍粑同表面嘅紅糖汁融為一體，甜度適中，細細地一件，真係令到人食到停唔到口，一碟六件，每人三件，份量味道剛剛好。👍🏻
芒之戀人（左）， $38
📌阿豬媽鍾意芒果，呢杯芒果沙冰就啱晒佢。
超濃郁嘅芒果味，有一球芒果雪糕在杯頂🍨，杯入邊全部都係充滿芒果蓉的沙冰渣炸到綿綿的，唔係食到一粒粒碎冰咁凍傷喉嚨，非常解渴，主要係解辣。
薄荷青檸荔枝梳打（右）， $36
📌熊妹呢排鍾意飲梳打，因為天氣熱，食辣野又可以gut 下佢。
嘩！成支象牌梳打反轉倒入杯，一啲都唔吝嗇，咁的設計咁有睇頭都已經加哂分喇。
青檸的酸同荔枝味的甜配搭，再加上梳打的氣，絕對係非常解渴解辣的飲品。重點係超級大一杯，絕對可以解辣到最尾。💦
📌兩個人，一盆干鍋，兩樣小食，一碟小菜，一款甜品，兩杯飲品，大概五百幾蚊，每款菜式味道都到位，連阿豬媽都話可以再來試其他菜式，讚。

🎉登登登登！呢排卡肥頻頻出場，今日仲要係卡肥大日子，梗係出黎食餐好嘅！ 📌就返卡肥唔鐘意去太遠，熊妹知道太子開左差不多有一年的新cafe《Owens》都未試過，一於一齊黎品嚐下。 📌《Owens》地理位置真係超級方便，係太子地鐵站D出口一出轉右就係，成條街望落去，一望到個拱門門口裝修咁有特色，就知係《Owens》。 📌《Owens》裝潢行波希米亞風味，以白色同木系簡約設計，入到去已經感覺好光鮮舒服。 📌三點黎到，有午餐同下午茶menu，有意粉、飯、漢堡包、牛排、全日早餐等等，價錢由$48-$128，包餐包及飲品，今時今日香港地，咁的價錢，咁靚環境，真係買少見少。 📌另外，仲可以追加小食$28-$38，有洋蔥圈，雞翼，焗生蠔等等，又或者追加甜品$38-$48，有招牌法式焦糖燉蛋，自家制蛋糕，芝士蛋糕，心太軟，提拉米蘇等等，真係樣樣都好吸引！ 香烤雞胸西西里意粉， $58 以為下午茶餐細細碟，一上枱同平時正餐嘅份量係一樣咁大碟，但價錢就平啲，咁抵食喎！ 一大舊雞胸切成五六大件，上下表面都煎香過，香烤雞胸煮得好淋身鞋口，調味都幾入味冇雪藏味，份量好多一啲都唔吝嗇。 西西里意粉即係蕃茄醬意粉🍝，蕃茄醬酸甜味調得剛好，仲有粒粒蕃茄蓉，意粉煮得淋身易入口，撈埋蕃茄醬酸酸味味食，非常滋味！ 美國安格斯芝士牛肉漢堡， $78 📌熊妹其實好鍾意食漢堡包，因為好鍾意食漢堡扒個舊肉，而且仲可以加埋蕃茄生菜，非常清新。 漢堡包就係經典嘅漢堡包樣🍔，上下兩塊麵包，中間夾住一片芝士🧀，一塊漢堡扒🐷，兩片蕃茄片同一大片生菜片，真係好典型嘅漢堡包。 熱熔芝士鋪喺漢堡扒肉上面，再塗上少少燒烤醬，咬落去會融入喺漢堡扒，芝味濃郁，蕃茄同生菜片就可以解吓漢堡肉的油膩，呢個就係熊妹喜愛食漢堡包嘅原因。 比較驚喜嘅反而係塊麵包，入面塗了一層牛油再焗過，層層牛油香味滲入係麵包中，麵包冇比醬汁或者蕃茄等等濕潤材料整淋左，咬落去仲好軟熟同煙靭，烤焗過但又唔乾，可以就咁食塊麵包都好香牛油味。 另外仲有一兜粗薯條🍟，卡肥話粗薯條好過幼薯條，因為面積大啲可以沾上更多嘅蕃茄汁，令到比例均勻啲，大大條又有咬口多啲。熊妹就粗幼都冇所謂，最緊要夠淋身，熊妹真係好鍾意食淋patpat嘅薯條，可以食到本身薯仔肉，咁先食似食薯仔條。 仲有少少沙律菜伴碟🥗，撈上黑醋汁，清新又健康。 水牛城雞翼（4隻），跟餐價，加$38 📌卡肥淨係食一個主食又點夠㗎，再追加小食就唔使講啦。 四隻雞翼大大隻，非常夠份量。 雞翼🐥炸過之後再撈上濃濃的水牛城醬，水牛城醬唔算太辣，成隻雞翼都鋪滿醬汁非常濃郁，炸過的雞翼，內裡可以鎖住雞肉汁，水牛城雞翼的滋味就出來了。 芝士焗生蠔，跟餐價，加$38 📌卡肥鐘意食生蠔🦪，脆脆地食兩隻試吓啦！ 面頭鋪滿芝士去焗，真係要趁熱食，鹹香芝士更吊出蠔的海味，食得出成粒蠔肉，咁的價錢配得上咁的大小。打孖食過下口癮好夠！ 抹茶紅豆麻糬卷蛋，跟餐價，加$38 📌食完主食，終於到熊妹最期待的甜品時間啦！熊妹就係衝着呢個抹茶卷蛋而來，因為熊妹就係抹茶控。 卷蛋蛋糕層有厚度，中間的抹茶cream同蛋糕的顏色有深淺的漸變效果，然後再包住白色的麻糬，仲有少少紅豆嘅點綴，所有的層次分明，側邊仲有一啲玫瑰花瓣🌷做裝飾， 前面仲放一塊Lotus焦糖餅乾🍪，成件事又升格左，成款甜品的賣相已經好得，明顯係有構思，值💯分！ 抹茶蛋糕層軟綿又濕潤，就算放喺雪櫃入邊都冇令到表層抽乾咗，好明顯係好新鮮，即日製造。 抹茶cream抹茶味出，又唔係好甜，質感又creamy，軟滑滑又唔係好實， 麻糬做得超軟糯，煙煙韌韌唔好雪凍咗變硬，所有食材質感都做到恰到好處，呢個卷蛋仲要呢個跟餐價錢，性價比絕對超值！ 伯爵茶麻糬提拉米蘇， $58 點算 ？由於個抹茶紅豆麻糬卷蛋太好味，令到熊妹呢個甜品控意猶未盡，打開左個甜品胃，再想試埋《Owens》另一款招牌甜品-伯爵茶麻糬提拉米蘇。 首先，用咗個好精緻嘅透明玻璃盒裝上的提拉米蘇成件事好高級。🔝 嘩！好香濃嘅伯爵茶味道！好creamy的伯爵茶意大利軟芝士🧀！啖啖cream放入口，啖啖都係伯爵茶味道！茶味濃郁唔太甜，食吓食吓仲有用咖啡酒浸軟咗嘅手指餅，咖啡同伯爵茶味道撞埋，有種獨特嘅味道各有千秋，再食吓再有驚喜，有軟糯嘅麻糬係底層，本身帶有少少甜味，軟綿綿已經好好味，再跟埋伯爵茶cream一齊食，口腔有伯爵茶的味道之餘又有麻糬的咬口，一個字， 牛角窩夫配雪糕，跟餐價，加$38 📌卡肥想試下呢個牛角窩夫，話未見過又未試過，熊妹心唸：甜品界黎講都係算新的但其實都興左一排喇，哈哈。 牛角窩夫🧇唔係好大一件，剛剛焗起，外層好酥脆，內裡係QQ的口感，好軟糯，又脆皮又煙韌，呢個就係牛角窩夫啦！跟上兩球雪糕🍦係雲尼拿同朱古力味，跟返牛角窩夫的size，一口熱窩夫一口冰雪糕，冷熱交融，卡肥好欣賞呢款新甜品喎！ 凍檸茶（左），跟餐價，加$0 📌卡肥例飲係檸檬茶，凍飲唔洗加錢咁抵既😳。 卡肥話一杯正宗的檸檬茶🍹係三塊檸檬🍋，篤篤篤篤，茶味帶點酸甜，咁就夠解渴喇。 熱情果·菠蘿乳酪（右），跟餐價，加$21（以原價半價） 熊妹就想飲杯乳酪特飲🥤，想酸酸地開下胃又清下腸胃。 熱情果、菠蘿🍍本身已經係酸甜，同乳酪下齊造成特飲，就係酸甜上加酸甜再加酸甜，所以絕對係解渴又解膩，夾！ 📌真係好豐盛嘅一餐！由小食到主食到甜品樣樣都係大大份，賣單都係四百幾蚊，抵食之餘又大份，好味之餘又飽肚，服務態度仲要超好，不嫌其煩不停加水加紙巾，又會同食客有交流，一間餐廳，價錢平、服務好、味道正，在香港地，寸金尺土，物價高漲的城巿，真係難能可貴！

🎯好耐冇食過漢堡包啦，熊妹有一日行過‪旺角黑布街‬，發現開咗呢間美國風貧民窟漢堡包店《Ghetto》，太空艙的門面設計非常搶眼👀，今日再同愛吃漢堡的卡肥過嚟試一下啦。
📌漢堡包店唔算好大，有四五張四人枱，用上透明膠凳膠枱，牆身畫上五顏六色的塗鴉🎨，成個感覺真係好美國hip-hop風。🥁
📌成間餐廳都係以橙色做主題，連餐牌餐紙全部都係橙色，感覺好鮮艷。
📌漢堡包價錢真係唔貴，由$45到最貴嘅$110 ，仲可以額外加$5至$10添加漢堡包內的配料，不過要加一⤴️。
📌點個漢堡包，加$10就可以有套餐，包汽水同粗薯條，再另加$10就可以轉甜薯條、芝士墨西哥粟米片或者炸洋蔥圈。
📌其餘仲有一啲炸物小食包括魷魚圈、吉列魚手指同水牛雞翼等等，價錢由$40至$78 ，真心唔貴。
📌飲品方面有美國人最經典的餐飲奶昔🍼，另外仲有酒精類飲品🍸提供，成個外國風味都出晒嚟。
美式經典芝味牛肉漢堡， $45 ，加洋蔥， $5
📌卡肥話漢堡包最經典最好食，冇其他咁多配料整色整水，先可以食得出牛肉漢堡嘅原汁原味，但係都係要加埋洋蔥先成立。
經典芝味牛肉漢堡🍔即係上下一層軟熟嘅麵包🍞，夾住一層牛肉漢堡🐮，一片蕃茄片🍅、一片生菜片🥬同一片芝士片🧀。
果然，經典真係經典，牛肉漢堡層非常厚實，煎香嘅牛肉漢堡咬落去仲會滲啲牛肉汁出嚟，連埋軟熟嘅麵包，仲有蕃茄同生菜的清新解左牛肉油脂油膩，仲有熱熔芝士嘅鹹香，多層味道就係形成經典漢堡嘅滋味。
卡肥必要嘅洋蔥🧅，又真係令到經典漢堡包錦上添花🌸，炒熟咗嘅洋蔥絲煮得好濃稠，變成好似洋蔥醬咁，密集式嘅洋蔥絲好濃味，夾埋牛肉漢堡同其他材料一齊食，多多一重重味嘅味道，又真係如果冇咗佢就真係爭緊啲野咁，卡肥果然冇介紹錯，漢堡包粉絲果然並非浪得虛名。
黑松露芝味牛肉漢堡， $65 ，轉暗黑竹炭包，加$10
📌熊妹真係黑松露愛好者，不嬲有選擇困難症，但係望到個餐牌就即刻二話不說揀呢個-黑松露芝味牛肉漢堡，另外仲轉左暗黑竹炭包，黑黑嘅配搭啱晒啦！
好正呀！黑松露醬好香呀！黑松露醬係杰身的，搽喺面頭嘅暗黑竹炭包上面，下面一層就係牛肉漢堡，可以即刻食到黑松露夾係牛肉漢堡嘅味道，濃味嘅黑松露醬滲出牛肉漢堡嘅煎香，仲有滿瀉嘅熱溶芝士，夾埋蕃茄生菜片，食到最後口腔仍然會縈繞住香濃嘅黑松露醬，黑松露醬果然完勝。
暗黑竹炭包包嘅質感比起普通漢堡包硬啲隨脆身啲，味道本身冇乜味，都係食噱頭嘢，賣相特別的。
爆炒洋蔥煎蛋手打牛漢堡， $55
📌作為漢堡包大食粉絲，食量驚人的卡肥平時食開兩個餐，食一個包又點會夠㗎？再點咗個爆炒洋蔥煎蛋手打牛漢堡，又係一定要有的洋蔥🧅。
呢個漢堡包就多咗一份煎蛋🍳，多一重蛋味，蛋黃雖然唔係流心，實心嘅蛋黃粉粉地，令蛋黃味更加出，連埋牛肉漢堡、蕃茄、生菜同芝士一齊食，各款材料味道獨到，喺口腔入面又混合埋一齊，好味又飽肚。
甜薯條（右上），跟餐價追加$10
📌熊妹鍾意食甜薯條，有薯條同甜薯條揀，一定會揀甜薯條。
用上番薯條🍠炸成嘅甜薯條，食落會淋身啲，番薯條嘅口感，面頭仲灑滿一啲糖粉，令到番薯條更吊多一層甜味，比起出邊嘅做法有啲唔同，又幾特別，甜甜地的番薯條解左剛才漢堡包的油膩，然後再能夠戰鬥跟著的鹹食炸物，呢個就係熊妹偏愛吃番薯條的地方，食吓食吓，熊妹成兜食晒，真係唔係講笑。
炸洋蔥圈（右下），跟餐價追加$10
📌咁鍾意食洋蔥嘅卡肥梗係唔會錯過洋蔥嘅產品啦。
炸洋蔥圈份量都幾多下，有大大小小嘅洋蔥圈，洋蔥炸皮厚實少少先可以令一片片洋蔥圈炸得成形，雖然有一層炸皮，但係同薄薄嘅洋蔥圈🧅食落去又唔覺好厚仲要好脆身，咬落去食到條條洋蔥絲，炸物再點埋茄汁食，又鹹又甜酸又有洋蔥本身嘅重味，呢個洋蔥圈做得幾出色。
芝士墨西哥粟米片（左），跟餐價追加$10
📌芝士墨西哥粟米片係卡肥最愛嘅零食，當然都唔會放過啦。
香濃嘅芝士味，就配上《Ghetto》自家製嘅sour cream，質感好濃稠食落似cream cheese，雖然都知道係現成嘅包裝芝士墨西哥粟米片，但卡肥話要喺出面先可以食到連埋sour cream嘅味道，酸酸鹹鹹芝士味🧀，果然食到卡肥舔舔脷。👅
吉列魷魚圈， $68
📌跟餐嘅小食仲未夠喉，卡肥話仲要再額外點啲小食，咁一於試勻去啦。
吉列嘅做法比炸皮薄啲，就係魷魚圈面頭塗一層連蛋炸粉的蛋漿去炸，炸皮唔厚但係又脆脆地，重點食出魷魚圈嘅魷魚味🦑同煙靭，一大兜份量好多，本身都加入咗調味粉去炸，鹹鹹地已經好夠食出魷魚嘅味道。
水牛雞翼， $78
📌食完咁多炸物，再食埋個雞翼就真係圓滿啦。
一兜有六七件雞翼🐥，雞翼嘅size可以叫做係雞翼仔，細細地一啖擺落口再可以連骨拉返出嚟，呢個size真係唔錯。
水牛城醬酸酸辣辣非常惹味，沾滿上每一件雞翼的表面，食落去充滿醬汁嘅味道。
士多啤梨奶昔，跟餐價加 $38
📌熊妹覺得嚟到美國漢堡包店，都一定要飲返美國人嘅餐飲-奶昔，先算係完成成個美國餐。
奶昔嚟講，士多啤梨奶昔應該係最為突出喇，因為士多啤梨🍓同奶🍼嘅味道會好夾。
真係好出色嘅一杯奶昔🍹，軟綿綿嘅奶昔好creamy，用上嘅士多啤梨醬唔會好甜，亦都冇藥水味，好豐滿嘅奶味，飲落唔會好稀，材料嘅比例做得好好，上面仲有一大朵忌廉花🌹，成個賣相都好美麗，好似一杯粉紅佳人咁💃，食咁多肥嘢仲飲埋呢杯肥妹野，熊妹今鋪唔肥都難喇。
📌餐廳就會不斷播放住一些Hip Hop嘅廣東歌🎼，一路食一路聽，好似參加緊一個搖滾派對咁🎸，再望住牆上各式各樣嘅graffiti🎨同暗黑的環境氣氛，熊妹好似身處喺美國漢堡包快餐店入邊，喺香港嚟講真係一個非常另類嘅餐飲感受！

🎱卡肥，出場啦！熊妹太耐冇帶卡肥出嚟食嘢啦！今次特登揀間日式輕食店《宏》，有卡肥最愛的蛋包飯同熊妹最愛的抹茶芭菲，鹹魚青菜，各有所愛！💕 📌位於尖沙咀美麗華廣場4樓的《宏》係一間日式輕食餐廳，地方都幾大下，裝修行日式簡約風，以白色同木系為主，感覺好鮮明，樓底高好開揚，有好多張四人枱，仲有好多張可坐多人嘅梳化枱，枱與枱之間都有好大段距離，感覺上坐得好舒服，就算熊妹講嘢大聲少少都唔怕比隔離聽到。 📌餐牌主食有日式蛋包飯🍛、意粉🍝、烏冬🍜同埋定食🍱，會附送日式沙律或者麵豉湯🍵，價錢由$138至$168 ，加$50可以轉套餐，包咖啡或者茶同埋一件小卷蛋，最後收埋加一服務費。⤴️ 📌《宏》主打的輕食有日式小食揚物，仲有招牌甜品日式雪糕、日式卷蛋同窩夫，食完主食仲可以食甜品，真係大快朵頤。😋 日式漢堡扒蛋包飯， $138 📌曾經，日式蛋包飯🍛係卡肥的常餐，可以話都試盡各款口味菜式的蛋包飯。 漢堡包好厚實超大一塊，咬落去啖啖肉，絕對真材實料唔野少，配濃味燒汁真係好惹味。 蛋包飯外皮包咗一層蛋皮🍳，煎熟左的蛋皮咬落去比較實在，唔係帶蛋汁個款流質性，變成煎熟咗蛋香味重啲。 一般嘅蛋包飯都可能會用上白飯🍚，多數就係靠啲醬汁吊味。《宏》的蛋包飯係有驚喜架！佢係用咗西炒飯做飯底，西炒飯係用上茄汁、喼汁等等嘅調味料炒埋一碟，令到就咁食個炒飯都會好有味，而且仲有啲菇做配料，又唔係食白飯咁掛。如果想濕潤啲又可以點埋燒汁一齊食，由於用咗西炒飯做飯底，就可以同木一身配上的燒汁更為撘配，代替原本一般蛋包飯用嘅茄汁，鹹中帶點酸甜，多一重醬汁嘅味道，食得出《宏》喺材料配搭方面有用多一點心思，唔錯。 仲跟上嘅餐前日式沙律🥗，有啲椰菜絲、粟米粒🌽同埋蕃茄仔🍅，撈埋日式芝麻醬，酸酸甜甜非常開胃。 牛肉壽喜燒定食， $168 📌好少日式輕食店會有牛肉壽喜燒呢款定食，而且價錢仲要係百零蚊，一定要點嚟試吓啦。 首先店員會遞上一個迷你鐵爐，點着火🔥，喺上面就可以慢慢煲熱著牛肉壽喜燒鍋🥘。 牛肉壽喜燒鍋嘅湯底係偏甜嘅火鍋湯，有五六片大片火鍋牛肉，肥肉位唔多，差唔多只在邊緣。首先，將跟上的日本生蛋🥚打勻，變成一碗生蛋汁，再夾起一片滾熱嘅牛肉片，沾上蛋汁，熱呼呼的牛肉片上的熱力可以令蛋汁沾滿牛肉面上，形成蛋漿黎食，食落口滑潺潺又軟熟的牛肉，本身已帶有浸滿偏甜火鍋湯湯味，呢個就係牛肉壽喜燒嘅滋味。 鍋物入邊仲有幾舊冬菇🍄、甘筍🥕、日本大蔥、嫩豆腐同埋娃娃菜，配料連湯撈落飯一齊食，係非常送飯嘅餸菜。 跟餐仲有一碗麵豉湯🍵，入邊有油豆腐同海帶片，唔算話好鹹，食飯前暖一暖胃，就係日本定食嘅特色。 小食拼盤， $98 叫咗兩款煮食，都想食啲炸物小食咬下口🍢，過吓癮，小食拼盤有齊明太子雞翼、炸雞軟骨粒、炸花枝餅同炸芝士圈，全部都啱食又可以試多幾款。 拼盤份量都幾多下，明太子雞翼有兩隻，雞翼外皮揸到金黃色，雞肉入邊釀咗啲明太子醬，辣辣地，連埋雞肉一齊食，啖啖肉同平時要食拆骨嘅雞翼好唔同。 炸花枝餅同炸芝士圈都有三四件，炸雞軟骨粒有一大堆，各款炸物炸皮唔算厚，咬落去香口，點埋跟上嘅明太子醬一齊食，呢款小食咁惹味，食吓食吓真係食到停唔到口。👅 抹茶芭菲， $78 📌食咗咁多鹹食，當然要點返個飯後甜品先大完🈵喇。其實熊妹都係衝着《宏》呢款招牌抹茶芭菲而來，真係好期待！ 芭菲特獨特之處就係望落去以為只係一杯軟雪糕🍦，但係食食吓就會發現一層一層嘅驚喜😍，食完一層嘅配料又會再發現下一層嘅配料，而且會不斷同軟雪糕撈埋一齊食，有好多種材料好多種味道，所以熊妹最喜愛就係呢款甜品 ，而《宏》的抹茶芭菲真心多不同款的配料之餘仲要係大大份，熊妹極力推介給喜歡吃芭菲的朋友。 抹茶控，抹茶婊，抹茶熊嘅熊妹對住呢款抹茶芭菲真係招架不住！首先，賣相已經驚喜到暈！呢款新推出嘅夏日芭菲，主角除咗有抹茶軟雪糕，入面仲有牛奶雪糕，下面配料包含咗一層粟米片一層抹茶啫喱，側邊包圍着好多粒抹茶糯米糍，最特別既係有一件抹茶小卷蛋同抹茶macaron，成杯抹茶芭菲真係抹茶到暈，抹茶雪糕抹茶味香濃，連埋各款抹茶味嘅配料，絕對滿足到抹茶愛好者。 📌熊妹做錯了，真的做錯了😞，熊妹唔應該當呢杯抹茶芭菲係飯後甜品，應該做飯前甜品，甚至係呢餐食嘅主食，咁就可以讓胃的每一個角落同舌尖上的味蕾盡情咁享受到呢杯抹茶芭菲的美味。 草莓慕絲蛋糕， $42 真係估唔到原來《宏》有同《香港遺傳性乳癌家族資料庫》合作，推廣「Pink Desserts 2023」，就係推廣餐廳有幾款指定的粉紅甜品，售賣款項嘅一半會捐去資料庫為高風險嘅遺傳性癌症人士作為研究基金的用途，有得食又有得做慈善，何樂而不為？😝 草莓慕絲蛋糕都好大一件，直程有一個飯碗咁大，唔係hightea嗰啲細件甜品。粉紅色賣相好吸引，外表一個粉紅半圓球就係有忌廉慕絲組成，士多啤梨味🍓酸酸甜甜冇藥水味，食落去好mossy好creamy，唔會話落咗好多魚膠粉好膠好實，而且仲有一層士多啤梨醬，再添多一重酸甜嘅效果，餅底係軟淋的曲奇餅底🍪，同埋軟綿嘅慕絲一齊食落去又幾夾。 日本綠茶-玉露，$28 食完咁多炸物，飲返杯日式熱茶絕對可以解下油膩。好驚訝嘅係《宏》竟然有熊妹平時去便利店都會買開嘅淳茶舍-玉露。熊妹點解咁鍾意飲玉露🍃，因為佢係淡味綠茶之餘又好重煎香嘅茶味，飲落去茶葉嘅回香味仲會停留喺鼻腔入邊，但係又冇紅茶咁濃味，大愛。💓 📌《宏》無論主食、小食、甜品、飲品味道，賣相，份量都一樣有驚喜，熊妹味蕾大滿足之餘，卡肥又頂住個大肚離開，係一間值得推介嘅日式輕食餐廳。

🌺𡃁妹想熊妹陪佢去啟德睇樓🏢，所以就約咗喺附近商場《Mikiki》食個晚餐先。 📌有熊妹在，有Cafe在，滿佈花朵設計的《Tiger Lily》真係啱晒充滿少女心的𡃁妹同熊妹。 📌《Tiger Lily》可以話係一間pink lady café， 以粉紅色為主題，天花板用上多款花朵💐組成大花球，還吊起一個個玫瑰金色嘅大波波，設計非常吸睛👀；粉紅色的牆身在配合白色的梳化椅同餐枱，感覺簡潔又光鮮，充滿少女心的女孩子們一定很喜歡。💓 📌沙化椅上面仲有一個個花花款的咕臣，靠背挨上，柔軟又舒服，好像家的感覺🏠。 📌餐廳主要以西式為主，晚餐套餐📋有沙律、薄餅、漢堡、意粉、牛扒等等選擇，套餐包是日餐湯同一杯飲品，價錢由$98至$198，另收加一，都算幾抵食。 是日餐湯，雜菜湯 今日嘅餐湯係紅湯，少少地一杯，蕃茄味🍅都幾濃郁，有幾片椰菜紅蘿蔔，材料味道正常，幾開胃。 燒烤豬肉薄餅， $128 📌熊妹想食薄餅🍕，成個晚餐Menu就係得呢款，太好啦，選擇困難症嘅熊妹唔使揀。 嘩，材料都幾豐富喎！面頭鋪滿芝士同埋菠蘿粒，本身好怕豬肉係用五花腩肉咁肥，原來係用豬髀肉🐷，食落去啖啖肉無一點肥，仲有甜甜嘅燒烤醬，連埋酸甜嘅菠蘿粒解下膩，味道非常夾，非常好味。 熊妹習慣食薄餅會點tabasco🌶，淡味嘅芝士🧀，帶甜嘅燒烤醬，再加點辣味嘅tabasco，多重味道融合埋一齊，咁樣食係非常滋味！ 煙三文魚明太子扁意粉， $138 用煙三文魚砌成嘅燈色玫瑰花，賣相好吸引又切合主題，真係打卡都嚟唔切。 煙三文魚拆開其實仲有兩大塊，煙燻香重，肉質肥美，唔係平價貨。扁意粉好有咬口，係7分鐘熟度，煮得非常之好，明太子忌廉汁🍝非常杰身，每條意粉都掛上明太子忌廉汁，味道好creamy，又帶上粒粒明太子少少嘅辣味，真係會令人食到唔停口。 配料仲有啲菇片🍄同荀條，食落去爽口，令到成碟意粉有多重口感，份量都幾多，兩個妹子食啱啱好。 另外仲跟上一塊蒜蓉法包🥖，蒜蓉味都重，不過法包就唔係好脆口同唔係好熱，睇嚟似係一早整定好等上碟，烘返熱啲♨️會比較好啲。 香橙特飲，跟餐價，$0 跟餐飲品除咗咖啡或茶之外，可以揀呢款香橙特飲唔使加錢，幾抵飲喎。 都幾大杯喎🍹，入邊有新鮮香橙片同西柚片，然後係橙汁配上梳打，熊妹叫咗少甜，酸酸甜甜又有氣泡，開胃又解渴，唔錯！ 📌《Tiger Lily》係好似進入咗一個粉紅世界的花花Cafe💐，成個裝修格局好開揚，都令人好舒服，食物味道同價錢都大眾化，行開呢頭都絕對可以再encore！

🧩朋友，就算幾忙，都要約出嚟聚一聚嘅，聚餐梗係要揀返間餐廳，呢排旺角《T.O.P》開咗間《No Money So Lonely》大玩特別菜式，就當然啱晒成班後生仔女出嚟飲飲食食啦。
📌《No Money So Lonely》位於《T.O.P》3樓，餐廳可以話係冇門口嘅，有塊大大嘅招牌，即係餐廳係開放式，喺商場行過都可以望到餐廳入面。
📌裝修格局附有泰式風味，用上木藤椅，仲有花花草草同浪漫的燈做設計，營造泰國夜市嘅味道。
📌由於餐廳係「B類食肆」，五個妹子被安排在有間版嘅座位上，準備點餐。
📌突然間有個女職員好冇禮貌地粗魯地兵鈴嘭鈴攞走咗我們剩餘一張嘅吉坐椅，一句說話都冇講，係一種咩嘅態度呢？完全一頭霧水，究竟發生咩事呢？好似做錯事得罪了她要發脾氣咁？雖然我哋係五個人六張凳，但如果想攞返走一張凳，係咪都可以講一聲呢？而且多一張櫈俾客人擺手袋行李🧳都好正常啦。
📌一開波態度咁差都已經搞到冇咩食慾，但一心嚟都想試吓啲菜式，食完就算冇下次。
📌菜式就係大玩fusion菜，泰式風味之餘又配合西式嘅食品，又確實係幾特別嘅。
燒八爪魚要你慢慢地切沙律， $128
熊妹食大餐一定要有沙律，賓妹又鍾意食八爪魚，呢個沙律好似幾特別幾吸引。
睇到食物個名都打定左個底，個八爪魚🐙都幾煙韌，又真係要慢慢咁切先至得斷喎。
燒八爪魚都幾香煙燻燒烤味，有幾驚喜喎！超長嘅八爪魚鰓慢慢咁切，咬落去好彈牙，食落都幾新鮮，唔似雪藏貨，咁得一條來講都幾抵食，貨真價實。
沙律菜🥗都幾多，係泰式秘製醬汁，辣辣地拌落去本身燒味八爪魚，味道幾夾。
貧窮是寂寞拼盤，$148
個名咁得意，其實就係餐廳嘅名，簡單啲嚟講，即係招牌拼盤啦。
小食拼盤🍱有六款，有薯條🍟、腐皮扎肉、秋葵蝦、天婦羅蝦、炸魷魚、炸飯波，有別於一般嘅小食拼盤喎。
份量都幾多，每款有3，4件，其中秋葵蝦🦐同炸魷魚🦑最好味，一來最特別，未食過，二來曯惹味。
冬陰功大蝦比薩， $138
比薩都係有好多fusion款式，就試下冬陰功味喇。
顧名思義，冬陰功味就係辣辣地，材料有大蝦、魷魚、雜菌、蕃茄粒，就類似帶辣的海鮮比薩，既然係用開做比薩的配料，所以味道一啲都唔奇怪。
比薩🍕係薄脆薄批，薄批同海鮮係幾夾，唔會太厚太多麵包，令冬陰功海鮮餡料更突出。
煙三文魚秘製泰式海鮮醬意大利麵， $132
煙三文魚係炒碎的，配料仲有爽口的椒絲，洋蔥絲，扁意大利麵🍝好有咬口，炒碎左容易入口，配合秘製泰式海鮮醬真係一流，少辣，惹味，
蜜味酸辣豬肋骨（半），$148
豬肋骨🍖叫左半份，酸辣味好出，偏辣，豬肋骨恰得剛剛好去焗，好容易就可以撕到肉出來，最驚喜係好多沙津菜拌碟，沙津菜多而新鮮，仲有紅莓同藍莓，酸甜清新，食咁多肉就係要菜來中和！
人人都嗌的啖啖蟹肉擔擔飯，$138
骨妹係無底黑洞，食左咁多野都好似無食過野咁，就叫埋個招牌擔擔飯。
熱辣辣上碟，飯就係緊係要趁熱食。白雪雪的蟹肉絲🦀滿怖碟周圍，果然係啖啖蟹肉，絕無欺場。粒粒飯粒🍚分明，配上蟹籽更出蟹味，特別在加上花生粒切合擔擔主題，fusion得黎又不失各菜式的原本味道，唔錯！
抹茶紅豆陳皮奶昔， $52（左）
熊妹作為抹茶控🍵，就當然唔會放過抹茶製品喇。本身好抗拒紅豆，但呢杯紅豆陳皮真係令熊妹改觀了。紅豆蓉打得綿綿，撈埋唔太甜的抹茶奶昔一齊飲，茶味帶甜仲有少少陳皮的甘味，這種配方會唔會太好味？而且奶昔飽飽的，雖然杯子唔大，但質感又唔稀，絕對非常夠喉。
楓糖香蕉肉桂奶昔， $52（右）
香蕉奶昔🍌又加多點楓糖肉桂味，奶昔打得細膩，入口綿綿，估唔到飲品都做得相當出色。
📌整體來講，大玩fusion菜想法前衛，味道出奇制勝，係幾岩大班後生伙兒結伴同行來飲飲食食吹吹水的餐廳，只不過服務態度確實有待改善，由一班年輕人主導，係剛踏入職場而未識人情世故定係時代變遷新一代太受保護而缺乏了待人接物的基本禮貌呢？想留得住人的胃？最重要先留住人的心啊！🥴

💮之前同樹熊講好咗想試吓呢間台灣菜《燈籠滷味》，聽講話好多人排隊🚶🏻，今日熊妹做完面之後就早啲過去排隊攞位啦。 📌旺角呢間係分店，位置喺朗豪坊4樓以前《池記》雲吞麵嘅舊址。 📌紅紅嘅大燈籠🏮懸掛喺門口位置做裝飾，未嚟過嘅人一定認得呢間就係《燈籠滷味》啦！ 📌夜晚大概七點三嚟到，都排第🥇喎，咁唔算好難排姐。大概七點半就入得，店鋪唔算好大，二人枱四人枱都排得密密麻麻，枱與枱之間就零距離，用塊隔板隔一隔又一張二人枱，感覺有點狹窄同壓迫，講野都唔敢大聲。 📌餐牌都幾台式，主打滷味車仔麵，另外仲有好多台灣小吃，同特式台灣特飲。 📌期間朗豪坊限定「豪豪」吃二人套餐，包招牌燈籠滷味麵🍜、兩款台式小吃🍢同兩杯台式飲品🍹，價錢為$198，抵喎！ 招牌燈籠滷味，$198 招牌燈籠滷味都包含多款滷味餸菜，有蹄膀、豬耳朵、甜不辣、花枝丸、百頁豆腐、高麗菜同杏鮑菇，另外再選一款麵底，樹熊係公仔麵王，當然選擇王子麵。 真係幾大一碗，二人份量係足料的，款款材料份量都多，味道都好濃滷味，而湯底都係滷水湯，變成啖啖都係滷味，食幾啖就滋味，食多幾啖就感覺鹽分超標🧂，愈食愈鹹，鹹到有點吃不下去。 人氣爆漿葱抓蛋餅 - 芋泥肉鬆 台灣手抓餅🌯係台灣嘅著名小食，其實就係酥皮餅入邊再擺啲鹹嘅餡料，包住嚟食。 少少甜嘅芋泥餡料份量都幾多，仲有鹹鹹甜甜嘅肉鬆，爆曬餡嘅餡料真係好吸引。 手抓蛋餅加咗蛋🍳疊底，餅皮脆脆有少少蛋香，好飽肚嘅一款小食。 台式香蒜腸 樹熊係香腸怪，任何腸型都岩食，餐餐食腸都無問題。 台灣熱狗腸係好味的，帶點臘腸的甜味又有香腸的口感，雖然係醃製垃圾食物，不過真係好惹味，食物不嬲愈垃圾就愈好味喇。 惹味塔香鹽酥雞，$46 大食怪樹熊係度就梗係唔夠食，叫多個小食塞飽佢個肚先。 好大一碟喎，鹽酥雞🐥就咁睇都有十幾廿粒，熱辣辣啱啱炸起好酥脆，炸皮外面沾上鹽粉，炸皮入面充滿雞肉粒，真係好香口嘅一款小食，抵食。 柚子綠茶（左），蜂蜜荔枝紅茶（右） 熊妹鍾意飲綠茶，樹熊鍾意飲紅茶。柚綠茶清得來又有柚子果醬嘅柚子皮同甜味，唔係得綠茶咁苦澀。蜂蜜涼支紅茶就預咗會甜啲，啱晒鍾意飲甜嘢嘅樹熊。 📌整體來講，係典型嘅台灣美食，有小食又有麵，仲有台灣特色飲品，價錢都正常，唯滷味比較鹹咗啲，可以試吓其他散叫小食，唔一定叫二人餐套餐局限左。 📌裝潢同氛圍都怖置得幾台灣feel，仲要不斷播放著台灣著名歌手的經典歌曲🎵🎶，周杰倫、五月天、林俊傑、F.I.R.等等首首金本名曲真係耳熟能詳，好似播緊自己個playlist咁，當飛左轉台北🇹🇼。

💝瑪姬皇后而家湊得掂屋企兩隻化骨龍🦖，終於咇到啲時間回復自由身出返黎飲飲食食喇。
📌難得有機會出黎食野，熊妹緊係揾啲人氣爆登的餐廳同瑪姬皇后試下喇。呢排出名主打滑蛋多士的《E FOR EGG》咖啡小店位於大圍，都算係偏門少少的地方，可以一試又可以發掘下新地方。
📌其實位置真係有啲偏遠，距離大圍火車站有一段距離，仲要係一堆車房中間，可謂鶴立雞群。
📌主打當然係人氣滑蛋盒子吐司🥪，想飽肚啲仲有定🍱食，淨係吐司唔夠喉？仲有小食🍢同甜品揀🍰，咖啡小店黎講款色都算多。
📌飲品就緊係有各款唔少得的沖調咖啡☕️同茶包茶，另外仲有沖調特濃朱古力🍫，抹茶鮮奶🍵，焙茶鮮奶，黑芝麻鮮奶。
📌店舖小小，枱數得幾張，難怪坊間傳聞一等就要等一個鐘以上，熊妹今次一點到，等左10分鐘就入到，真係好好彩。
香蒜雜菌黑松露拉絲芝士盒子吐司，$65
有熊妹在，即係有港女恩物在，黑松露炒蛋就係其中一樣喇。
吐司盒子裝滿爆滿的黑松露炒蛋，黑松露芬香撲鼻，夾雜同黑松露好夾的雜菌，滑蛋炒得熟透，係實口，唔算好滑溜，蛋味重，就係好典型的黑松露炒蛋。
吐司有塗上牛油煎香過，食落口脆脆地重牛油味。
伴碟仲有少少沙律菜同幾條炸蕃薯條，份量小小的，襯返份量唔大的主食。
金沙軟殼蟹三文治魚釨海鮮沙律吐司盒子，$108
有瑪姬皇后在，即係有貴價食物在，軟殼蟹就係其中的摯愛。
炸軟殼蟹🦀有成隻，絕對唔欺場，酥炸好脆，蟹肉蟹腳蟹殼都有齊，好夠份量。面頭仲有幾粒三文魚釨，粒粒新鮮，一啖即爆鹹鹹的魚釨汁，另外仲有啲蟹肉絲，係一款好滋味的海鮮吐司。
招牌奶蓋咖啡，$48
熊妹最鐘意試招牌菜，呢款咖啡打響名堂， 一定要試喇。
非常特別，奶蓋切合雞蛋🥚主題，造成荷包蛋造型🍳，好豐厚的奶泡層，面頭鋪上朱古力粉，下面係凍咖啡，然後底層係牛奶🥛，可謂多重口感多重滋味，凍飲都好重咖啡味，再混合埋厚實的奶泡一齊飲，咖啡的濃味混合忌廉奶泡的甜味，係非常另類的咖啡飲法，真係好特別，幾好飲，果然係招牌菜，絕對值得推介。
焙茶鮮奶，$38
瑪姬皇后話好耐無飲過焙茶，認真要試下。
焙茶茶味濃，有淡淡的牛奶味，心型拉花做得好好，有多層心型，絕對唔馬虎。
焦糖雞蛋布丁吐司盒子，$60
最後，食完鹹食都要食個甜品先美滿的。
今次係雞蛋布丁🍮夾係吐司盒子入面，雞蛋布丁滑溜，側面有灑上焦糖，甜度適中，為呢餐吐司盒子劃上完美句號。
📌小店來說，以雞蛋為主題的食物質素同款式都幾突出，不過限時進食就失去左咖啡店的休閒，希望小店可以保留咖啡店的舒適感同自由。

👹上次聽過富妹講想試吓滑蛋多士，熊妹知道太子開咗間由長洲過嚟嘅特色咖啡店《Moontone》，招牌菜就係食滑蛋多士，All Day breakfast同埋乳酪飲品，一於午餐嚟呢度chill下先。
📌中午一點黎到， 剛剛開門未有人， 可以任坐。《Moontone》以單一粉色為主題，主要以天藍色為色系，然後仲有深藍色同埋粉紫色，全部都係少女心💕嘅pantone顏色，感覺好柔和，令人即刻賞心悅目👀。
📌成間咖啡店嘅裝修格局都好年輕化，除咗顏色係粉色系之外，仲有一大幅牆喺社交平台打卡位，都係食正年輕人鍾意影相打卡呢條路。📸
📌連餐牌都係社交平台化，有#㗎。除咗招牌盒子吐司之外，仲有沙律、意粉同甜品，飲品方面當然唔少得主打嘅乳酪飲品啦。
📌另外，仲有期間限定嘅甘露系列，睇相都非常吸引。
超豐盛全日早餐， $118
港女嚟到港女餐廳梗係食港女常餐--全日早餐，熊妹見到諗都唔使諗就叫咗啦。
全日早餐份量都幾多，又幾大份，包括有煙三文魚、煙肉、大啡菇、薯巢、黑松露炒滑蛋、雞肉腸、德國腸、沙律菜、大番茄、茄汁豆、蜂蜜同丹麥吐司。
煙三文魚食落冇渣，都算正常貨；煙肉煎到乾身咗啲，比較有點硬；大啡菇同大蕃茄上面都鋪咗啲芝士黎焗，多重味道，煎烤過好香，唔係就咁白烚hea 你，切落去好多汁，食材好新鮮；雞肉腸德國腸咬落去啖啖肉，肉質唔霉，仲有油脂標出嚟，唔算普通貨仔。
比較特別嘅係用上薯仔絲砌成左一個鳥巢嘅薯巢，薯巢上面仲擺放左一團炒蛋，十足十一個雀仔巢咁，造型非常特別。薯巢因為用好幼細嘅薯仔絲造成，炸到好脆口，超級香口，超級惹味，炒滑蛋有蛋汁又嫩滑又有實淨位，好實在嘅一款炒蛋，中間仲放咗一啲黑松露醬，點少少口腔已經充滿咗黑松露味，絕對係港女恩物。
丹麥吐司可算係嘅《Moontone》招牌產品，首先吐司上面印有《Moontone》招牌名，有個人特色又靚幫店舖做宣傳，賣相已經好得。丹麥吐司嘅味道非常可口，食得出有好多層牛油酥皮，重牛油味之餘，想甜啲又可以再淋上側跟跟上嘅蜂蜜🍯，變成蜂蜜吐司，有咸有甜有鬆脆，就係丹麥吐司可口嘅味道。
食咁多澱粉質同肉類，就真係要食啲沙律菜清一清腸胃。沙律菜🥗拌上黑醋汁，好開胃又可以中和返肉類嘅油膩，配撘得非常好。
鰻魚滑蛋吐司， $98
一心來梗係要試吓滑蛋吐司呢個招牌菜啦！有軟殼蟹同鰻魚揀，熊妹覺得鰻魚襯滑蛋會比較好味啲。
首先招牌吐司上又係印上《Moontone》招牌名，真係到處都做緊店鋪宣傳。丹麥吐司搽上蜜糖再焗烤過，又甜又香牛油味又鬆脆，呢個丹麥吐司真係做得非常出色，果然係招牌菜。
餡料有兩厚身的鰻魚🐟，面頭浸滿鰻魚燒汁，超級惹味，鰻魚肉質軟腍無骨，就係想像中嘅味道，再連埋有蛋汁嘅嫩滑炒蛋🥚，濃味鰻魚再加淡味滑蛋，味道非常夾，配料仲有少少生菜絲同埋芝士片，成件事就好似一份公司三文治咁🥪，咩材料都有，幾重材料，幾重口感，幾重味道，
飲品就一定係揀母店嘅角酪飲品啦。角酪其實即係乳酪飲品咁解。
甘露角酪（左）， $58
富妹想試吓期間限定，又好芒果，楊枝甘露角酪就真係啱晒啦。
甘露嘅主題係秋季，飲品杯側邊都有片楓葉做裝飾，顏色主題以紅色嘅紅柚🍊同黃色嘅芒果🥭為主，設計方面已經頗有心思💗，值得一讚。
杯底又真係有紅柚粒同芒果肉，紅柚同芒果本身都係酸甜嘅味道，同乳酪一定好夾，識得用楊枝甘露嘅諗法配合自己嘅主題品牌角酪飲品，呢個做法真係非常聰明又恰當。✨
百香果角酪（右）， $38
熊妹本身都好好飲酸嘢，百香果加落乳酪一定勁夾勁好味。
果然有粒粒百香果果子，味道酸甜清甜，非常解渴，母店嘅角酪飲品果然做得非常出色。
角酪卷蛋，$52
《Moontone》的招牌卷蛋-角酪卷蛋，勝在顏色鮮艷用上同《Moontone》一樣嘅天藍色，好靚呀！伴碟又係印有《Moontone》招牌字樣，果然係到處都係《Moontone》。
蛋糕質感軟綿，味道就係青清蛋糕咁，唔好以為天藍色會有啲咩味道，因為天藍色係一種色素唔係一種味道。以為入邊係普通卷蛋配合嘅牛奶忌廉？食落去又有驚喜喎！係加咗忌廉芝士同乳酪混合嘅芝士忌廉，中間紫色饀料仲有藍莓味添，變成口感實少少，唔係忌廉嗰種入口溶化嘅感覺，係好簡單嘅一款下午茶茶點。
焦糖布甸吐司，$68
其實一人一份正餐再加一杯嘢飲都好夠飽，不過既然一場黎到，就真係唔爭在試埋佢啲甜品。
焦糖布甸🍮好滑溜，入口軟滑，重雞蛋味，底部嘅吐司就係蜜糖丹麥吐司🍞，可能因為要成托住雞蛋布甸，所以用上麵包包皮嗰塊，變成厚實啲，硬正啲，再有咬口啲，吐司依然係印有《Moontone》招牌名，貫徹始終。
其實雞蛋布甸同吐司又唔係話算好夾，一個就係軟滑口感，一個就係鬆脆口感，好難兩樣嘢夾埋一齊食，始終都係分開兩樣食材嚟食，熊妹認為咁樣嘅設計其實都係一個賣相gimmick野，造成一個特別嘅甜品，價錢正常都可以一試。
📌《Moontone》，一間由年輕人主打嘅社交平台店，由內到外都係社交平台打卡嘅地方，食物飲品都係正常咖啡店嘅價錢，大眾化的食物配合母店的招牌角酪飲品，絕對可以喺城中站得住腳，掂！