好耐冇食omakase喇！今日決定對女朋友同自己好d，去食好西！ 今次黎左間喺銅鑼灣既餐廳，試吓佢地既Sake Pairing Omakase Menu。 話明sake menu, 第一時間梗係揀隻靚靚sake 杯先啦。 而今晚會飲用既酒有呢幾款，包括日本泉純米吟釀新米新酒，森嶋雄町純米大吟釀，長崎美人 大吟釀清酒，真稜至純米吟釀，菊姫冷卸純米等，每款都各有特色。 食物方面首先有前菜，建議由左至右開始食，有豆腐，紫蘇花鮑魚，煙燻雞肉卷。鮑魚相當新鮮，而淨係靠煙燻既雞同平時煮熟左既口感好唔同，好好食好有驚喜！更值得一提的係裝飾用既係食用花，連埋一齊食個味道更有層次。 然後有一隻非常巨型，鮮甜肥美既生蠔，配合柚子醋同食用紫蘇花，超滿足！ 再嚟有燒到好香既大蝦， 然後就到魚類，先有薄切立魚加酸汁 深海池魚伴梅醬 仲有我最愛既金鯛，脆魚鱗加炸糙米爆谷，口感一流，而且落既海鹽份量剛剛好，鹹鹹地非常好食！ 最後有壽司做結尾 北角道帆立貝壽司- 師傅已經加咗岩鹽，完全唔需要點豉油已經好好食。 仲有火炙呑拿魚壽司，油份勁重，有溶喺個口既感覺。 最後有非常鮮甜嘅海膽，用紫菜包住嚟食，好完滿既句號！

雖然呢排天氣熱辣辣，但仍然無阻我想食韓燒嘅決心！而講到韓燒，一定係我最愛嘅喜來稀肉！之前食過好多次銅鑼灣分店，今次嚟到旺角分店，個人認為坐得更加舒服，而且服務非常好！ 有個男職員真係好值得一讚，不停會睇你嘅伴菜，爐邊蛋，生菜夠唔夠，塊燒烤板係唔係需要換等等。 今次仍然係要咗我必點嘅喜來烤肉，玫瑰花嘅擺盤已經令人食指大動。作為食肉獸嘅我，其實平時食燒肉都好少用生菜包，反而會用呢舊肉來包飯，真係好好食！ 另外重點左牛舌，貪佢夠薄快燒完。而且其實份量真係好多，其實三至四個人叫一條都完全冇問題 。而且有個自創食法，用牛舌配泡菜係好夾的！ 最後仲有護心肉，同佢哋店舖招牌豬嘅護心肉一樣，非常淋！ 所以佢永遠都係我食燒肉嘅最愛店！

今日同屋企人去食大排檔，搵咗呢間喺佐敦熟食中心嘅大排檔，當初以為冇冷氣會好熱，但係原來都有好多風扇，唔會好焗。而且地方都好乾淨，可以放心。 而呢度嘅食物選擇非常之多，海鮮，肉類，蔬菜，粥粉麵飯，基本上大部份嘅大排檔小菜都會搵到。 今次我哋就要咗三款食物，首先有我最愛嘅豉椒炒蜆。呢度用咗大蜆，而且份量都好足，每一隻炒完之後都唔會縮到好似冇嘢咁。再加上本身蜆亦都非常鮮甜，完全冇沙，加埋豉椒辣辣地更加開胃。 繼續豉椒唔好俾佢停，要咗呢度其中一個招牌菜，豉椒炒蟶子皇伴煎米粉底。呢碟嘅份量更加驚人！因為當初以為只有四隻聖子，都唔會太大跌，點知蟶子皇真係蟶子皇，每一隻都好大條，同樣地鮮味十足，又爽口。加埋脆脆既米粉底，再配合齊同樣係惹味嘅豉椒汁，真係冇得彈。 因為我哋全家人都好鍾意食粉面，所以就嗌多咗一碟乾炒牛河。碟牛河絕對夠四人或以上分享，炒得救獲氣之餘又唔會油，芽菜又夠爽口，牛肉有牛味又唔會韌。更值得一讚嘅係店員一早會問你要辣椒醬定辣椒油，終於唔會係比錯我唔想要嘅嘢我啦！ 總括嚟講呢度有大排檔嘅風味，又食得出用咗好靚嘅海鮮，仲有分量十足，好建議一大班人嚟食飯！

又來嚟到我其中一間最愛嘅餐廳食燒肉喇，因為今日比較晏先食午飯，所以夜晚唔算太肚餓。就算有好多好吸引嘅嘢食，我同朋友都唔係嗌咗好多嘢食。 當然有嚟呢度必叫嘅護心肉啦！其實佢係豬肝同橫膈膜中間嘅肉，由於每隻豬只有好少呢一部份嘅肉，所以香港都唔係好多地方有得食㗎咋。 佢除咗矜貴之外，係真心好好食，非常爽口彈牙，又唔會太肥太油，每一次嚟都一定會叫！ 另外亦都要咗碟牛舌，諗住食得比較輕鬆，冇咁飽肚嘛！但原來一碟份量都幾多，好在佢夠薄切，燒半分鐘已經可以食得，牛味濃亦完全唔韌。 配合埋呢一個紫菜蟹子飯真係一流。唔好以為就咁普通一碗飯啊，其實可以用手套整粒粒飯團，夠晒好玩。用生菜一次過包住黎食都好正！

今日去完九龍灣做野，同朋友嚟咗呢間令我非常滿意嘅餐廳。 首先佢哋座位好寬廠，坐得好舒服，亦都好適合朋友約食飯傾偈。第二就係佢哋嘅服務，特別記得佢哋個經理態度真係超好，亦都好細心，有賓至如歸嘅感覺。 第三當然係食物啦，呢度嘅食物份量夠大之餘，味道亦都好好，今次我哋首先要咗個軟殼蟹沙律。軟殼蟹超大隻厚肉，加埋流心蛋既蛋汁，令本身唔鍾意食沙律菜嘅我都覺得好正。 另外仲要再份白酒煮蜆，每粒蜆都脹卜卜，又鮮甜，仲要冇沙。加埋白酒同埋少少辣椒大喜嘅鮮味，超正！ 最後仲叫咗個非常之出色嘅甜品，呢個tiramisu同平時見到嘅有d唔同，用玻璃杯將材料逐層鋪出，個樣已經十分吸睛。然後再將然辣辣既espresso淋上雪糕，打卡一流之外，冰火交融又好香濃既咖啡味，真係勁正！ 當我想再食Tiramisu嘅時候佢一定會係我頭三位諗起嘅餐廳！

今日決定對自己好d，食餐好啲嘅午餐。嚟到銅鑼灣呢間日本餐廳豪一豪。 知道呢間餐廳係出名日式火鍋，但係好可惜午餐時段係冇得食火鍋，唯有要個差唔多既迷你黑毛和牛壽喜燒定食止住打邊爐癮先。 所有set lunch都包括前菜螺肉，沙律，茶碗蒸。 食完之後，好快我嘅主菜就黎到啦。鍋入面有主角煮到大概七成熟嘅黑毛和牛片，唔同嘅蔬菜例如娃娃菜，紅蘿蔔，冬菇，豆腐同京蔥等等。 和牛牛味勁濃，而且肥瘦適中，加埋煮到半熟既蛋黃做汁，送飯一流！ 當我食完準備埋單之際，侍應竟然拎咗個非常吸睛嘅甜品過嚟，係好耐都冇見過嘅水信玄餅呀！本來以為呢啲嘢食都係比女仔影吓相，唔會好食。估唔到食落口感又幾特別，個黑糖漿甜味適中，加埋黃豆粉，係久違嘅味道！

中秋放假咁多日，梗係要同女朋友周圍食下野，今次去到尖沙咀呢間餐廳，主要為左呢個龍蝦餐，果然都冇令我失望。 呢個餐而家仲做緊優惠價，非常抵食。首先有非常香濃又滑嘅龍蝦湯。 然後到重點，打卡一流嘅火焰龍蝦pizza，一早都知道呢度嘅Pizza好出名，果然冇令我失望，餅底好脆，而且餡料有滿滿嘅龍蝦肉。加上火焰之後有一陣焦香，好好食呀。 再有龍蝦芝士通粉，粗館通粉可以索道更加多龍蝦汁，當然更加唔少得龍蝦肉啦，而且個汁唔會好漏好濟，第一次可以完成整個Mac & cheese! 除咗龍蝦餐之外，我哋亦都點左分香蒜辣椒白酒煮大顯。出奇地非常好食，蜆肉非常新鮮飽滿，加埋少少辣椒同埋濃濃嘅白酒煮過鮮味十足！ 值得一讚嘅係，雖然呢度好旺場，但係每個侍應嘅服務都非常之好，絕對會再返黎！

自從第三波疫症爆發之後，都好少出街食飯，莫講話飲茶，而家疫情稍為好轉，即刻同屋企人去嘆杯靚茶食個點心先！ 呢度個無敵大海景真係好正，除咗景靚之外，呢度嘅點心都好好食，所以疫情前我哋經常都會嚟。 今次總共要咗七款點心，首先有每次我哋都必點嘅金沙脆皮鮮蝦腸。薄薄嘅腸粉皮包着非常酥脆又唔油膩嘅脆脆，仲有主角彈牙鮮甜嘅蝦，每次都同媽咪爭食！ 然後繼續係香脆嘅點心，就係椒鹽鮮魷！炸皮夠薄，魷魚亦都完全唔靭，加埋重口味椒鹽，想拎佢嚟送酒。 煎炸野嘅代表仲有腐皮素鵝，同樣地外層好脆，但係入面嘅餡，包括紅蘿蔔冬菇木耳等等非常之入味，個汁嘅稠度剛好，唔會整淋啲腐皮又唔會標水，好好食。 之後就到蒸嘅點心，首先有金箔賽螃蟹餃，將賽螃蟹，即係蛋白，放入蝦餃皮入邊，好軟滑，原來都好好食。 再有呢排大熱既蟹粉小籠包，小籠包湯汁非常之夠，但係如果蟹粉味再龍多啲就更加完美啦。 再要咗籠叉燒包，呢度嘅叉燒並唔係非一般嘅叉燒，係用咗上等嘅黑毛豬肉去做，豬肉食落特別香同淋，個叉燒醬味道都調得好好，甜甜地好開胃。 壓軸嘅有豐料珍珠雞，一打開除咗聞到好香嘅荷葉味之外，好驚喜嘅係呢度用咗紅米，更加健康。而且佢真係冇改錯名，真係好足料！啖啖都有冬菇雞粒！ 好滿足同埋好令人懷念嘅飲茶味道啊！

講到喺香港食韓燒，我永遠都會諗起喜來稀肉。因為好多地方食牛都好好食，但係唔知點解豬永遠都差啲。呢度就唔同啦，呢度嘅豬非常出色，甚至令到我可以喺度淨係食豬唔食牛。 未講主角之前，呢度嘅配菜都值得一提，前菜嘅醃物辣度適中，好開胃。 仲有可以無限refill嘅爐邊蛋都相當出色，仲要有誠意咁有兩款口味，分別係泡菜同芝士。個人比較喜歡芝士，將蛋燒到半熟，加拉絲嘅芝士配合滑滑嘅雞蛋好正。 到主角燒肉，今次叫嘅呢個一頭豬套餐有6款唔同既豬部分，包括護心肉，五花肉，豬頸肉，豬大腸，豬皮，同埋梅肉。 其實全部肉質素都好高，唔會有豬嗰陣腥味。而個人最推介最愛嘅一定係招牌護心肉，其實係位於豬的橫隔膜和肝之間，每隻豬只有好少好少，非常珍貴。 護心肉燒香之後油分唔多，爽滑彈牙，真係好好食！ 雖然呢個餐望落好似唔多咁，但係其實兩個人食再加埋啲配菜，都夠食咖！

臨近端午假期，返兩日已經好holiday mood，本身應該遊日當中卻因疫情仍然在港日出而作，今日收工就同朋友去左鳥居居酒屋happy hour。 點野食前黎左道前菜，有青瓜條、白蘿蔔條、西芹、紅蘿蔔條同椰菜，全部都爽甜多汁，配埋個日式甜醬同少少鹽花更覺滋味。 點左個燒明太子墨魚棒打頭陣，食落口有少少胡椒味係條墨魚棒度散出黎，每一啖都食到好香嘅墨魚肉，再加上魚棒內夾雜住索曬墨魚汁嘅蔬菜碎，口感爽脆之餘又入味，真係停唔到口好快就咬到得返支竹桿。 極速KO完個墨魚棒，整多碟明太子蛋捲嘆下。蛋卷甜味好適中，放入口已經feel到陣溫和嘅甜味係個蛋捲到飄出黎。蛋卷好嫩仲有蛋漿係層層嘅蛋皮之間，但係筷子夾住嘅時候一d都唔鬆散。咬開左個蛋皮就感覺到好rich嘅明太子粒由心而發，果陣鮮味帶有少少鹹慢慢咁覆蓋同取代蛋捲嘅甜味。整個豐富嘅味覺cycle唔係度度食到，就連好怕明太子腥味嘅朋友都話好好食。 朋友話想食d燒海鮮，於是我叫左碟燒象拔苗，象拔苗姐係象拔螃嘅BB，面層一座小蒜泥山，加埋牛油連殼燒，d象拔BB嘅肉好嫩易咬，剛剛好一口唔會韌，鮮甜又多汁。 嘆完個燒象拔苗，我地點左個免治雞肉棒加蛋。個免治雞肉連埋雞骨軟筋一齊磨成肉碎，聽落都覺得充滿營養。伴埋個香濃嘅蛋漿撈埋一齊食，真係唔洗分雞先定蛋先。 今晚黎鳥居居酒屋食日式燒物，係疫情底下當自己走左轉日本，希望疫情快d過去，唔需要受限聚令影響，打破餐桌間嘅隔板。