2021年4月25日。晴。銅鑼灣。
呢日嚟到登龍街，思鄉情濃，決定食呢間魚生丼 舖位喺登龍街中間 入面好有居酒屋氣息，裝修帶有濃濃嘅東瀛味道～ 餐廳原來樓上都有位，牆身仲有手繪畫，可愛又精緻！ 食物方面都有唔少選擇～ 白咖喱都有！ 呢版睇落就最吸引喇，睇到流晒口水！！ 三文魚丼，$88
呢個係男朋友嗌嘅三文魚丼
全部都係定食，有餐湯同前菜送～
餐湯就係蜆肉麵豉湯，鮮味十足！
前菜係胡麻醬豆腐，都好味～
主食當然係更加正！！
三文魚新鮮，仲有牛油果粒，兩種食材好夾～
（P.S.男朋友唔食得生蛋，所以走咗蛋，走寶！） 拖羅丼，$168
拖羅丼係餐廳嘅人氣No. 1！
一場嚟到，緊係要試～
拖羅丼其實係吞拿魚三食，有炙燒、赤身同埋吞拿魚蓉三個食法，一次過滿足晒三個願望！！
吞拿魚食落當然非常鮮美，但最鍾意嘅係吞拿魚蓉，撈飯真係冇得輸！
另外仲要一讚嘅係佢個飯底，個飯唔係簡單嘅醋飯，係已經稍微調咗味，帶淺啡色，所以食嘅時候都唔使再加豉油已經夠味～ 仲要唔使加一～
喺銅鑼灣算幾抵食！

2021年4月2日。晴。九龍灣。
由地鐵站行去MegaBox，沿路除咗大渣哥，都開咗唔少新嘢～
大渣哥樓上就有呢間木衛二 佢同平時嗰啲唔一樣，可能為咗吸引埋附近嘅寫字樓客
會賣埋蒸飲，仲有下午茶優惠添～
但我哋去嘅時候其實唔肚餓，淨係想飲杯嘢坐下，所以冇認真睇塊板～ 近排嘅特飲～ 各種系列飲品～ 有得坐㗎！ 翡翠茶那堤&鳳梨綠茶，$32＋$49 夏天飲一杯透心涼嘅嘢飲真係人間一大樂事～
翡翠茶那堤即係奶茶，但個茶底係鐵觀音（好似係）
專登揀咗杯用鮮奶沖嘅奶茶～
而另一杯鳳梨綠茶係特飲，價錢貴勁多！
不過係真係好飲嘅～
用咗台灣金鑽鳳梨嚟整，甜度適中～～ 鹽酥雞&地瓜球，$0 最最最驚喜嘅係原來買嘢飲送小食！！！！！！！！
鹽酥雞同地瓜球每樣半份
兩樣小食都好好味呀！
鹽酥雞即叫即炸，食落酥脆可口～
地瓜球煙韌香甜！！ 呢個下午享受到突如其來嘅幸福～

2021年4月4日。雨。上環。
呢日去咗上環新開嘅高先戲院睇戲
睇戲前先搵食～ 喺app搵到呢間有參與懲罰祭嘅日式餐廳 餐牌有多款唔同組合，有啲花多眼亂
但價錢勁抵！ 舖位唔算大，好似仲有上層 坐低仲見到有懲罰祭嘅痕跡！ 呢啲係前菜～
有麵豉湯、沙律同螺肉 自選壽司拼盤，$108
喺A（壽司）、B（迷你丼）、C（刺身／天婦羅／炸物）選項入面揀3樣嘢
難為了選擇困難症患者。。。
所以我哋最後揀嘅嘢都係差唔多，呵呵！
男朋友揀咗A1，有鹽燒三文魚腩、鹽燒左口魚邊、芝士燒海老、沙律醬燒蟹棒、蒲燒鰻魚同埋焦糖三文魚
當中最特別嘅就緊係焦糖三文魚，佢話好好味～
自選壽司拼盤，$108
呢個就係我揀嘅～
壽司類我就揀咗A3，有油甘魚、真鯛、蒲燒鰻魚、玉子、北寄貝同埋牛油果沙律（呢個似乎唔係同類？！）
鍾意食魚嘅朋友揀呢個就最啱嘞～
迷你丼類我哋都揀咗B1，角切魚生丼，咩都有啲～
各類魚生都好鮮味，分量都唔細，最後我係食唔晒嘅
C就緊係揀刺身喇！
有三文魚X2、帶子X2，同埋甜蝦X2
帶子同甜蝦超級鮮美！！！ 最後埋單都只係每人$108加一，抵到爛！

2021年4月10日。晴。太古。
行街行到攰，要叉叉電～
喺誠品，sensory ZERO當然係不二之選！ 小食有呢幾款～ Latte，$45
雖然夏天熱辣辣，但係商場凍，我都係飲番杯熱啡～
補充腦力之餘，仲可以養生（亂噏）～ Mocha，$50
男朋友嗌嘅Mocha～
唔算太甜，夏天飲冰凍Mocha最啱～ 唐揚墨魚嘴，$48
本身想叫午餐肉條，但驚太heavy，所以叫咗呢個炸墨魚嘴，估唔到都幾驚喜喎！

一份嘅分量多得驚人，堆到成座山仔咁多！
仲意想不到咁好味！
正！

2021年4月4日。雨。上環。 呢日雖然天雨濛濛，但咁嘅天氣去呢間法式餐廳反而充滿情調～ 聽朋友介紹先識呢間新開嘅法國餐廳～ 餐廳個名係「Valley」咁解，幾符合佢隱蔽嘅位置！ 上環站行上去嘅話五分鐘左右 餐廳新開，而家係試業期間，只有晚市，留意番～訂咗位，所以坐咗門口側邊嘅檯，檯面有樽好靚嘅花～ 感覺非常浪漫～ 另外試業期間餐廳offer tasting menu，對於有選擇困難症嘅我哋係個佳訊～ 唔使揀，唔使諗，嚟到坐定定等候餵食便可～餐廳座位唔算多，所以最好先訂位！門口側邊幅牆都好有意境，成幅畫咁～ 以我有限嘅法文無法解讀呢句法文，之後問番老闆先知係「Do what you love」咁解～ 成件事係咪又加咗啲法國氣息呢？Miso corn velouté, sago and baby corn 店員喺上每一道菜嘅時候都會介紹番個菜嘅材料同做法，服務好高質！ 第一道菜呢個粟米湯已經令我好驚艷！ 粟米嘅甜味同味噌好夾，湯面擺咗略微燒過嘅粟米芯，入面仲有西米，令口感更豐富！Potato galette 飲緊湯嘅時候就上咗第二道菜 個底係薯餅嚟嘅，炸得好香脆！ 上面有一層sour cream，最上面就有洋蔥同炸白飯魚～ 就咁食非常香口，又可以沾個湯嚟食，兩個食法都好味～ Sourdough bread & tofu mousse Sourdough bread喺香港唔算太常見，但近年都幾流行 個包帶有少少sourdough獨有嘅酸味，外脆內軟！ 個豆腐mousse軟綿綿，雅淡嘅cream口感同個包好襯 Local squid with cauliflower 呢道菜個賣相好有驚喜！ 但更加有驚喜嘅係個味道！ 首先魷魚係每日新鮮採購嘅本地食材，擺面嘅係酥炸魷魚鬚，非常crunchy 跟住就係切到好薄片嘅爽脆椰菜花，原來係沙律嚟！撈咗啲醋，帶少少酸味，第一次食椰菜花沙律，先知道佢係咁適合做沙律！！ 再下一層係炙燒魷魚，同平時食壽司嘅味道唔同，可能係呢個魷魚較厚，食落一啲都唔韌，仲好creamy添，鮮味十足～ 最底仲有一個用sour cream調製而成嘅醬汁，同魷魚意想不到地夾！ 成個菜式嘅組合都好新穎！Taro gnocchi, sauce coconut with preserved duck 跟住呢道菜更加充滿驚喜！ 竟然係荔芋油鴨風味嘅fusion菜！ 本身我係有啲驚嘅，因為我係唔食油鴨嘅，但原來油鴨係融入咗個醬汁度，變成一個椰汁油鴨汁，咁又容易接受好多喎！ 油鴨嘅味道淡咗，襯番椰汁濃郁嘅香味～ 而平時用薯仔整嘅gnocchi，就變咗用芋頭做材料，口感會比薯仔gnocchi冇咁煙韌，有啲似芋圓嘅感覺，同個汁一齊食真係好有荔芋油鴨煲仔飯風味，好得意！Fish of the day，+$150 Tasting menu每日都有個精選魚類菜式，呢日嘅魚就係馬友 法國菜嘅海鮮菜式好似都比較出色，所以我哋都決定加錢嗌嚟試下～ 馬友當然係呢道菜嘅主角，外脆內軟，肉質軟滑嘅程度超乎我想像！ 側邊嘅配菜都好出色，准山軟糯～ 而經過火炙之後嘅百合，啲甜味出晒嚟！ 個汁用咗魷魚乾調製，好特別！Waiyu strip loin steak, sauce béarnaise with water bamboo 呢道菜係澳洲和牛，肉質鮮嫩，唔會有我好驚嘅牛羶味！ 個汁係用咗枸杞葉做材料整成，微微酸，可以平衡下牛肉嘅油膩～ 另一重點係個茭白筍！ 本身睇個menu，見到寫住water bamboo，諗咗好耐都唔知係咩，然後店員介紹先知原來係茭白筍～～ 係未食過嘅食材！ 台灣非常普遍，但香港就好少見，一試便愛上！ 爽口又鮮甜～Salt baked pineapple, soy milk pastry cream, pineapple carpaccio 呢個甜品用咗時令嘅台灣金鑽鳳梨製成 用咗2種「煮法」，兩塊脆片中間嘅鳳梨用咗鹽焗方法製作，同鳳梨乾有啲異曲同工之妙！不過加咗鹽味，令個甜味更突出！ 另外嘅鳳梨就整成個醬，店員介紹嘅時候話個醬會好似食puff入面嗰啲醬咁 食一啖之後，個簡直就係一模一樣！！ 就係咁creamy，而且鳳梨香味濃郁！超級好味！ 期待下次再去嘅新菜式～～

2020年12月19日。晴。中環。
呢日行完街諗住買外賣番去同屋企人食
見附近有呢間餃子專門店，一於試下～ 舖位喺石板街行到最高嗰條街嘅右邊 門口就有外賣紙，睇啱先入去落單～ 餐單有兩版，選擇都幾多！
每款餃子都可以揀煎餃或者湯餃，又可以揀中碗（7隻）或者大碗（10隻）
我就揀咗4款，2款煎餃，2款湯餃咁 落單10分鐘左右就攞得！好快手！ 煎元貝豬肉餃，$53
攞到番屋企，啲煎餃都仲係暖暖地嘅，雖然有啲倒汗水，但食嘅時候個皮都仲係香脆嘅！
餡料嚟計，呢個元貝豬肉餃又真係食到元貝仔！
調味適中，唔錯～ 野生松茸素餃，$48
其他湯餃都會跟湯嘅，但係素餃就唔會跟湯嘅，留意番～
作為素餃，佢用咗好多菇，所以鮮味十足，鍾意食菇嘅記住嗌喇！ 龍鳳松茸雙灼餃，$86
呢個松茸同上面嗰款松茸係兩回事，因為佢係加咗黑白松露，非常矜貴！
咬一啖已經畀松露獨有嘅香味包圍，好高級嘅感覺～ 狀元九鼎湯
嗌湯餃大部分都會跟呢個湯，素餃除外～
個湯試咗一啖，感覺冇落味精，但係係用蓮藕煲嘅（由於我唔太鍾意蓮藕，所以屋企人飲晒～） 壽喜燒牛肉餃，$74
最有驚喜係呢個壽喜燒牛肉餃！
完全複製到壽喜燒嘅味道，餃子入面嘅肉汁鮮甜～
大家都爭住嚟食！

2020年11月21日。晴。灣仔。 返工有時會喺呢區食lunch，之前見到呢間日本餐廳想試，但又唔想平時lunchtime趕頭趕命咁食 趁呢日行開附近，專登試試～ 出𨋢就見到呢個有氣勢嘅招牌～ 餐牌都設計得好靚！！！！ 有午巿精選，為選擇困難症患者提供某程度嘅幫助 仲有一版，呵呵～ 餐具都好靚，符合番餐廳風格～ （好鍾意對木筷子，極幼身，夾嘢好好用！） 前菜 一開始上嘅呢個前菜睇唔清係咩嘢嚟 夾起就知係雞腎，但我唔食內臟，諗住成碟畀男朋友之際。。。
發現原來入面仲有細粒蜆肉～～～～
漬蜆肉好少見，醃得好入味，但又唔會太鹹，正！
好快咁就食晒啲蜆肉粒先畀啲雞腎男朋友食～～～沙律 食完前菜食番個清新嘅沙律，可以平衡番個味覺～
跟住落嚟食好嘢都滋味啲～銀鱈西京燒定食，$188 呢個鱈魚嘅造型幾靚，上面嗰條本身以為係類似蔥嘅物體，點知男朋友食咗話係酸嘅，原來都係漬物嚟！
唔好睇條魚個樣普普通通，個肉質無敵軟滑！！！
蒸魚都唔夠佢咁滑！
另外燒魚個汁嘅鹹甜比例做得非常好～
而且可能條魚事先醃過（？！），調味唔係流於表面，仲滲埋入魚肉入面～
點沙律醬嘅話會再有埋creamy嘅口感，但個人鍾意就咁食多啲～自選迷你飯（三款），$198 有六款揀，可以任揀三款～
我哋就揀咗雜錦魚生飯、碎蔥吞拿魚腩飯，同埋三文魚拼三文魚籽飯
雖然個名叫迷你，但估唔到飯量都唔少！
平時自己比較少食碎吞拿魚腩飯／軍艦，呢度食嘅呢個又好驚喜喎！
我加咗豉油之後成個飯撈勻再食，吞拿魚腩有個軟綿綿嘅口感，又會食到吞拿魚嘅油脂～
平時就咁成嚿吞拿魚腩咁食嘅話會好滯，但咁樣撈埋又一啲都唔膩，唔錯！茶碗蒸 茶碗蒸好早就上咗，但我哋都係食完飯先食佢～
當佢甜品咁（雖然佢係鹹嘅）～
食完就好滿足～～甜品 食完茶碗蒸諗住去個廁所就走之際，原來仲有真甜品！！！
甜品係紅豆抹茶奶凍～～～～
奶凍creamy，抹茶味濃！！好好味～～～食咗咁多咁多嘢，每人$200多啲，幾抵食！

2020年11月1日。晴。灣仔。 朋友係愛tea之人，呢日就一行四人嚟灣仔呢間可愛餐廳high個靚tea！ 門口已經好有特色，牆身畫咗大量文青手繪黑白花紋圖案～ 上咗樓梯就到呢個reception位，有靚口罩（相片經過處理，你懂的）同靚文宣～ 未到自己張枱之前經過呢個位，忍唔住要影張相！
有假裝在歐洲嘅感覺～ 餐廳牆上都畫滿晒黑白2D手繪，圖案可愛～
坐牆邊可以瘋狂打卡！！就連餐紙都要玩埋illusion，配合餐廳主題～ 呢日專誠嚟食下午茶，個名叫「彩花之里。溫室下午茶」，又幾有意境喎～ 睇下有咩先～Uluru Rose Tea / Lavender Dream 跟下午茶嘅特飲有呢兩款～
兩杯嘅造型都好靚～
連個杯外面都用咗顏料嚟上色～（但飲嘅時候要小心，揸住杯柄，因為啲顏料會染色，不過溫紙巾一抹就會甩）
玫瑰係粉紅色，薰衣草係藍色，兩杯都好夢幻～
我飲玫瑰嗰杯，味道清甜，入面仲打咗啲雜莓，飲落有crunchy口感～ 泰式炸魚蛋&吉列炸蝦 首先上枱嘅食物係鹹點～ 鹹點有兩款，睇個樣有啲平平無奇，不過好好味！
唔知係咪即炸，上枱嘅時候係好熱嘅，攤咗一陣先食，但無損佢嘅酥脆～
香脆而唔油膩，鹹香十足，正！ Mini Chocolate Greenhouse
跟住上枱呢個令大家嘩嘩聲加心心眼！
佢嘅造型靚到一度令我哋以為係擺設。。。
問咗店員先確認係食得嘅～
雖然唔知佢用咩材料整成，但食落有啲似Chips Ahoy嗰款朱古力餅～
呢個甜品有唔同質感嘅朱古力，互相配合得好好，唔覺太甜，好鍾意～～～Afternoon tea set 戲肉就係佢喇～
個架本身就好靚，玻璃設計，完全get到溫室呢個主題～
再加埋啲甜點，感覺又再靚啲～
款款甜品都唔錯，最欣賞係唔會過甜！
咁多款，最鍾意嘅係迷你玫瑰奶凍，味道唔會artificial，質感軟滑～

2020年11月23日。晴。尖沙咀。
呢日同朋友補祝生日，約咗一齊喺K11 Musea食晏

我哋兩個都鍾意食辣嘢，所以揀咗呢間川菜！

入到去先知原來有窗邊海景位～～～
再食book枱嘅時候要講低！

餐牌都好精美～

小食，$25
似係炸蠶豆同青豆，少少鹹，多多脆！
鮮椒海鮮匯，$168
呢個菜由上枱嗰一刻就散發住濃濃嘅麻味，聞到／諗起都流口水～～
侍應介紹呢個海鮮匯入面有南澳帶子、緬甸白蝦同埋迷仔八爪魚
帶子鮮甜，蝦肉新鮮，八爪魚煙韌，樣樣海鮮都好出色！
再加埋個汁，香、辣、麻，食得好過癮～～～

蒜汁秋葵，$78
呢個菜嘅蒜味冇想像中咁濃，不過醋同秋葵就真係好夾～
味道清爽，非常開胃！

碧綠脆瓜北寄貝，原價$138，特價$69
北寄貝食日本嘢就食得多，但原來呢個川菜fusion煮法都幾特别～
當涼拌醬汁係豉油咁沾北寄貝食，別有一番風味！
宮保蝦球，$268
我發誓，呢個蝦球係我人生食過最最最好味嘅蝦球！！！！！
一！定！要！點！
店員都有稍稍介紹下呢個菜嘅材料，用咗緬甸香蝦、辣椒乾同紅花椒
呢幾樣食材都唔係好識，但係呢個緬甸香蝦大大隻，肉質彈牙～
呢道菜最令我着迷嘅係個醬！
啲蝦球外面好似有層玻璃紙包住咁，睇落好晶瑩～
食落更加有驚喜！店員話就話用咗辣椒乾同紅花椒，但食落唔辣，反而係帶甜味，有啲似包咗層麥芽糖糖衣咁
咬落去又食到蝦球嘅爽脆，滋味無窮～～
（淨係為咗呢個蝦球，疫情過後，都要帶屋企人嚟試！！）

乾鍋茶樹菇，$178
鍾意菇類嘅我，本身諗住茶樹菇咁乾，再乾鍋炒佢，可能會更乾。。。
但朋友想食，緊係照嗌！
嚟到見個茶樹菇原來有落肉片一齊炒，肉片睇落有啲肥
可能因為有肉片嘅油脂，炒出嚟嘅茶樹菇一啲都唔乾，加埋啲辣椒同配料，非常惹味！

魚蝦蟹炒飯，$228
炒飯粒粒分明，夠晒鑊氣！

2020年10月24日。晴。銅鑼灣。
近年銅鑼灣近大坑嘅希雲道、禮頓道呢一帶開咗好多食店～ 經過見到呢間「麻王」，嗜辣嘅我同唔食辣嘅男朋友即管試下～ 有酸辣、有水煮，自己鍾意點砌都得～ 仲有多種小食揀！ 舖位細細，堂食夾埋五六個位左右，建議大家嗌外賣～
食嘅時候不斷有外賣員嚟攞餐，送外賣，都幾受歡迎！ 其中一邊座位對住壁畫，幾靚～
夠晒詩情畫意～ 四餸粉麵，$45
配料揀到眼都花，加加埋埋有成40種！
揀完配料到揀粉麵～
粉麵選擇都好多，有薯粉、烏冬、米線、拉麵，仲有粉絲～
唔鍾意食粉麵又可以食齋餸，仲平啲！
六餸都只係$42！
最後，經過一番掙扎，我揀咗爆醬豬肉丸、芝士腸、白蘿蔔同埋金菇，配幼薯粉～
只係叫咗小辣，但都唔可以睇少佢！！！
辣得非常過癮，各種配料都帶到的辣味，紅薯粉亦都煙韌彈牙～
推薦畀食辣人士～ 涼拌海帶絲，$26
見佢咁多辣椒粉就即刻流晒口水～～
海帶絲爽口，辣味其實OK
男朋友都食到，仲食咗好多！ 酸菜肥牛，$68
呢個真係唔係講笑，一上枱嘅時候即刻問呢個係咪一人份。。。
因為唔止佢正面震撼，就連側面都好震撼！ 滿到瀉咁濟！ 口水雞，$32
仲嗌多個小食，令人舔舔脷嘅口水雞～
調味惹味，雞肉嫩滑，同埋有好多嚿，唔記得有六定七嚿，最後食唔晒。。。
做咗大嘥鬼。。。 影張大合照就開餐～
P.S. 酸菜肥牛原來仲跟個飯！！
情侶完全可以嗌一個share！ 食食下個酸菜肥牛忍唔住再影咗張相同啲friend share
個碗上面就好多肥牛，食極都仲有，而成個碗個底係塞滿晒津白、蓮藕！
抵食到癲！