食物不過不失但安排麻麻, 如果唔係個女職員係咁話唔好意思同送左兩杯飲品, 真係話當場鬧人.  因為係幫朋友慶祝生日, 所以提早左韁唔多一個星期book枱 (booking係7點半), 而且係book枱時會remark到係甜品碟幫忙寫生日快樂, 當日上午餐廳職員打黎confirm booking時有再特燈同職員講聲話要係甜品碟寫生日快樂, 對方亦覆我已經mark底左, 不過佢地冇寫字服務, 但係可以加個生日牌同埋蠟燭, 咁我覺我問題不大, 所以覆左佢地話冇問題. 到夜晚, 安排左我地坐樓上, 因為得兩個人又食得唔算多, 所以我地只係叫左一個parma ham頭盤, 一個薯條同一份豬鞍, 加兩杯cocktails (The Hidden Coconut同Aperol Spritz). 等左大概20分鐘左右, parma ham, 薯條同飲品先後送到, 食物味道不過不失, cocktail反而算唔錯. 之後再等多差唔多10分鐘, 豬鞍亦送到, 不過無奈既事實開始發生.  當岩岩切完份豬鞍開始食既時候, 有位男職員過黎問我地係米要叫甜品, 因為甜品要大概20分鐘焗, 咁我地又差唔多要交枱喇, 所以建議我地可以叫左甜品先. 我地即刻 "下" 左出聲, 同佢講你地岩岩先上份豬鞍, 食都未食就同我地講差唔多要交枱? 之後佢話我地可以叫左先, 之後繼續食住先, 食完先交枱都得. 咁我地就好無奈咁叫甜品, 朋友揀左佢地個拖肥蘋果pancake. 結果幾分鐘之後, 另一個女職員過黎問我地介唔介意換位坐落樓下, 因為有人book左枱, 我就忍唔住問佢一句, 個客係米book左呢張枱? 佢話唔係, 只係因為佢地係4個人, 咁當下全部4人枱都有人, 我地隔離張2人枱差唔多食完, 所以想睇下我地介唔介意換枱. 咁我地見個女仔都好好禮貌咁問我地就算數, 照坐左落樓下.  個女仔幫我地拎D食物, 我地自己拎返杯cocktail, 點知落到去坐低左之後等左幾分鐘都冇人俾餐具我地, 但當時有幾個職員係隔離, 佢地好似好忙咁, 但其實佢地比較似只係行黎行去. 再等多幾分鐘, 我又忍唔住出聲問 可唔可以俾兩份餐具我地? 之後先有人發現原來我地冇餐具. 結果我地拎到餐具冇耐, 又有職員過黎同我地講, 唔好意思呀, 個拖肥蘋果pancake冇曬喇, 你地介唔介意換檸檬伯爵茶pancake? 咁我地覺得賣曬都冇辦法喇, 唯有轉檸檬伯爵茶pancake. 結果, 轉個頭, 連俾我食嚿豬鞍既時間都冇, 個pancake就送到, 個職員仲要補多句話個pancake係岩岩焗好既. 我地又忍唔住 "下" 左出聲, 首先我朋友話就算真係岩岩焗好既, 個pancake真係好熱, 個雪糕都唔可能熔左一半. 我再話明明book枱果陣同埋reconfirm既時候都再講左係要有生日牌, 點解會冇架呢? 之後佢地再睇返個booking, 先話係呀, 唔好意思, 因為你地轉左位, 同事冇睇到, 而家再焗詔一份俾你地. 結果, 我朋友忍唔住講左句, 轉位唔係我地要求囉. 其實都已經一肚氣, 不過叫我地轉位既果個女職員再一次過黎, 係咁話唔好意思, 係佢地安排有問題, 話會送返兩杯飲品俾我地當補償. 咁當時個pancake又未上, 我地亦見個女仔係咁話唔好意思, 又話送兩杯飲品就諗住算喇. 結果個pancake黎度, 我朋友就忍唔住同我講, 呢個先叫做係岩岩焗好囉, 個雪糕熔得合理好多. 我話算喇, 佢肯換一個俾我地, 個女仔又係咁道歉同送兩杯飲品, 當係我地唔好彩. 但個pancake我地都覺得好一般, 唔係為左慶祝生日既話, 應該係唔會叫.  到埋單時, 我真心再一次發現check單好好好重要, 雖然前後4杯cocktails, 佢係free左2杯, 但佢計左我2個甜品, 我就同個職員話, 你地計左我2個甜品喎, 之後佢話, 係既, 我幫你改返呀, 我當下即刻唔想再理佢地. 大佬呀, 明明係你同我講個拖肥蘋果pancake冇曬喇, 叫我要轉另一個, 點解又可以計落我張單度呢?  即刻覺得我叫個朋友算數係錯架, 明明錯不在我, 係你地既安排亂到爆炸, 結果搞到好似係我地好麻煩咁. 7百幾蚊食到一肚氣, 真係bye bye你條尾. 

諗住生日飯揀一間好feel又好食既餐廳同屋企人慶祝，結果好後悔冇睇多幾間餐廳先落決定。 有室外同室內位揀，不過見係食夜晚飯，加上天氣又凍，我哋揀左室內位，結果由於冇暖氣，而且佢哋嘅牆身設計大部份係做咗窗，所以就算坐室內都係咁凍，直頭係挑戰人類抵抗寒冷嘅能力。 食物方面不過不失，有餐前麵包，不過就冇得添食。生蠔同羊架都唔錯，紙包海鮮既龍蝦湯底都好得，好重龍蝦味。不過牛就真係好一般，口感好麻麻，有啲失望。 甜品叫左tiramisu同檸檬撻，賣相好啱打卡，味道就非常見仁見智，可能係我哋唔識欣賞卦。 Tiramisu唔係好似平時一般做法咁一件件上，而係每個部份分開曬，食法非常考技巧。檸檬撻既酸甜度適中，不過啲檸檬醬比想像中溶得快，而且係配pesto，同屋企人一致認為兩者非常之唔夾。 服務態度算唔錯，會主動斟水。但問題係即使佢哋話係斟緊熱水，但可能因為天氣凍，我同屋企人都唔覺係熱水，最多係暖水。 總括嚟講，覺得價錢偏貴，唔抵食，名過於實，冇咩特別。

果然有時真係希望愈大，失望愈大 環境唔錯，好好feel。 但係食物水平真係不了，價錢亦唔平。以為價錢會同分量成正比？不要太傻豬豬，因為你諗太多。 明明係一間賣潮洲菜既餐廳，但冇一樣野有潮洲菜既感覺。個打冷拼盤 ($168) 每樣得兩，三嚿，唔知以為係試食，而且味道麻麻。本身對佢個蠔烙充滿期待，結果食左少少已經唔想食。好似食緊好難食既天婦羅咁，因為會成口都係啲炸漿，冇蛋味又冇蠔味。食完即刻覺得會喉嚨痛同爆瘡。三個人仲叫左個肉，不幸地唔記得個菜名，但係大家都好同意其實係魚香茄子啲friend，而且係啲油都同魚香茄子有得比。唯一叫做好啲既係佢個春菜煲，其他就真係不了。 第一次食到一半好想走🥲餓住入餐廳，餓住出返黎既經歷真心唔想成日試

一路都對呢間餐廳好好奇，因為有得玩塔羅牌 (雖然最後我同朋友都冇玩)。 我地4個女仔，因為大家都唔算係大食既人，所以諗住叫三個主菜同一個小食拼盤一齊開心share (外加三杯野飲)，但冇諗到最後4個都唔飽，因為啲份量真係唔多，加上小食拼盤每雖然有4樣野食，但每樣得3件，結果我地要share咁食😓 而且食物選擇唔多，亦冇甜品，想話不如叫甜品食可能會飽，但原來我地諗多左。。。 雖然可以坐好耐 (有可能因為係平日，冇咩人)，但食唔飽，每個人又百幾蚊，其實唔抵食😥

同同事之前食過, 覺得幾好食而且又好快送到, 所以決定再食. 但今次真係好傷心. 明白天氣凍, 會多左人叫外賣, 唔介意等下, 但我地都1點半先叫外賣, 相信唔會太忙, 但都等左個幾鐘D野食先送到黎. 問題係, 打去問既時候, 對方過等多5-10分鐘, 結果等多半個鐘多D先送到, 期間同事們只能不停咁食零食充飢.
好喇, D野食終於黎到, 發現6個餐入面, 有3個係送錯左, 打去問點解. 點知對方一句唔好意思都冇, 淨係話今日生意太好, 咩都賣曬, 所以有咩送咩, 你叫D同事自己傾掂去喇. 當下心諗, 你咁都得? 生意好係好事, 但你D衰賣曬, 係米都應該要話俾個客知等佢自己揀返? 覺得麻煩, 寧願你幫個客揀都冇問題, 咁都至少通知返個客呀. 又唔通知, 送外賣個同事都冇講到, 咁如果個客有食物敏感, 食左你幫佢點既餐, 你地係米會負全責先? 就算個客冇食物敏感, 都有義務同個客講聲. 或者個客打黎問, 都講聲唔好意思, 而唔係叫個客自己傾掂數. 
食物係唔差, 但服務態度唔得, 真係要改一改.

第一次去係因為同朋友去左西營盤搵野食，之後諗住附近搵cake食。我叫左fresh lime, 朋友叫sesame matcha, 食左第一啖已經好surprised，好好食又唔太甜，直頭好鍾意個fresh lime！所以我決定帶媽媽去食一次！！
第二次去我叫左creme brûlée, 媽媽試fresh lime。我好鍾意個creme brûlée, 媽媽都好滿意個fresh lime! 所以我地最後決定買幾個返屋企開心share 😋 每個都好好食！
雖然我住元朗，去上環路途好遙遠，但係我拎到返屋企啲蛋糕都冇溶或者爛。因為佢地好細心咁獨立包裝每個蛋糕，不過就有少少唔環保☹️
佢地仲有得訂做蛋糕，係6吋大，有得delivery, 前一日去個website訂就已經可以，唔使太早訂☺️
遲啲哥哥生日都諗住訂一個試下😋😋