而家好多時喺屋企食飯，所以難得出街食飯，我盡量搵啲自己煮起上嚟有難度嘅餐點，天婦羅係其中一樣。今日嚟到朗豪坊嘅天吉屋，一早聽過呢度有水準，無論係食物質素、賣相定價錢都非常吸引。 為咗避開多人等位嘅時間，我早少少到餐廳，好快就可以入座。餐廳位置都唔少，而且坐得幾鬆動，唯獨枱面細啲。 餐牌
枱面有秘製醬油、漬牛蒡。 好好食，又解膩。 沙律菜任食 我地叫咗兩款丼飯，其中有天吉丼，呢個係榮獲日本連續7年天丼金賞。 天吉丼入面嘅炸物多到成個碗滿哂全部炸到金黃色，好吸睛，又啱打卡。食嘅時候，強烈建議問店員攞個碟仔，會方便啲。 炸物有蝦、軟殼蟹、洋蔥、魷魚、紅鯛魚、茄子、南瓜、炸紫菜。最特別同搶眼相信係嗰隻溫泉蛋，一督開隻蛋，啲蛋液慢慢流出，用嚟拌飯真

係又簡單又好味！
呢舊魚都係出色，脆而不膩，魚肉滑嫩有汁。

再加上免費供應嘅沙律菜，可以清新口腔；飲埋牛蒡茶，互相配合，成件事好完美 另一款係天幕御膳，呢款份量超多，擺盤大堆頭。裡面會有黑草蝦、軟殼蟹、洋蔥、魷魚、紅鯛魚、茄子、南瓜、炸紫菜等等，超豐富，份量特大 呢款會有3種食法，分別有天婦羅，即係傳統天婦羅嗰種食法；另外係天丼，即係將炸物配飯一齊食；而最後係天茶泡飯，即係將炸物同飯加上高湯、芥末等撈埋食。 講番天婦羅嘅質素，絕對拍得住日本嘅水準！炸蝦用雙蝦炸法，食落口感十足，外層非常鬆脆，配炸蔬菜更加係我最愛，香口得嚟又唔會太漏，送飯一流。(白飯任加，大食嘅朋友，啱哂) 而且一上枱嘅感覺幾震撼，仲跟埋個好足料嘅湯，女仔應該都會好似我咁食到捧住個肚。

知道二鍋頭喺尖沙咀開咗新店，位於漆咸道所有後生仔都識嘅嘉芙中心一樓，面積感覺上比旺角店大，又有落地大玻璃，光線好充足，坐喺窗邊歎個火鍋感覺舒服又自在 而家疫情嚴峻嘅時候，食物衛生非常重要，由於地方寬敞枱與枱之間嘅空間都非常足夠，自助區嘅食物亦都非常企理乾淨，令人食得安心 呢度都係提供放題 任飲任食，除咗雞煲同鴛鴦鴨煲之外，呢間分店仲有特別嘅黑椒豬手煲。 咁梗係要試吓啦，黑椒夠晒香濃惹味，豬手件大細適中唔會食得好論盡，兩個人輕輕鬆鬆食晒一煲 咁梗係唔夠喉啦，仲整多煲招牌雞煲先夠皮。 之後就轉湯底打邊爐，食完辣野，簡單啲整返個蕃茄薯仔湯底，配料有幾十款任選咁似我哋食咗個高級版，尖沙咀分店獨有嘅牛魔皇餐，包括每人一客澳洲M6和牛，SRF美國極黑和牛，安格斯Prime牛頸脊同牛小排，仲有牛柳條添，真係淨係食牛都飽呀M6和牛香得來唔會太油，極黑和牛重牛味，有咬口。但自己最鍾意Prime牛頸脊，肉質諗身，入口鬆軟。 其他配料例如脆鯇腩、臘鴨同炸魚皮都係我嘅心水選擇，當然大量蔬菜，菇類同丸等等都係必食嘅。 食食吓唔覺意有爆肚嘅感覺，食完真係要行返過零鐘後先好搭車。

抗疫期間多咗約朋友去行吓山，呼吸下新鮮空氣。今日就去咗八仙嶺一帶行山，回程後要搵地方醫吓肚，由於今日消耗量大，心思思想食火鍋放題，就揀咗喺大埔舊墟直街附近落腳 呢度食店頗多，我地相中稻八日式火鍋炸物放題，餐廳係地舖面積頗大，枱與枱之間唔會話太密。 呢度同好多火鍋店一樣，以肉嘅種分套餐，最平嘅套餐每位$158，特級美國特上牛肉每位$208，但我哋今日揀咗最豪嘅日本國產黑毛和牛，$388一位，除左無限牛肉丶豚肉丶雞肉，仲有任食沙律 吧丶多款自取配料丶飲品任飲丶雪糕任食。 最過癮係自制天婦羅炸物，新鮮熱辣，食足120分鐘湯底8款任揀，包括有豆乳丶豬骨丶昆布丶牛乳牛骨丶地獄丶沙嗲丶壽喜燒丶蕃茄。  店員上完鍋底，好快就上埋啲肉，我地梗係主打食牛喇，黑毛和牛肩肉，肉質非常軟淋，唔會太油，食多都無負擔牛三角則牛香味較重，口感有彈性，非常正，估唔到放題都有咁嘅水準，真係好過好多逐碟計嘅火鍋店 我哋個套餐仲包埋刺身任食，我哋點左幾款大路刺身，包括三文魚、帶子、劍魚，油甘魚，北寄貝，甜蝦等等，樣樣都新鮮好食，鍾意刺身嘅朋友一定要點多幾round。 其他配料任食丶自取，款式夠多，補添得快，丸類唔會雪到死實實，蔬菜都好新鮮，我最鍾意油麥菜同秋葵都有！ 天婦羅DIY好有趣，一手一腳製作，炸漿炸起好脆口，唔厚粉，加少少調味粉，又幾好食 雪糕飲品都係任飲任食，最後仲有每人一盒Movenpick或者Dreyers作為完美嘅終結。

疫情稍稍緩和，多返好多人出街食飯，去荃灣行吓買完嘢，就打算喺商場入面開餐，揀咗citiwalk2樓嘅M Kitchen，由於時間尚早都仲有位，由於地方濶落，間隔咗透明板都仲坐得舒適 睇睇餐牌，介錢幾相宜，兩個人都幾肚餓，所以都盡情咁叫，點咗原個蕃茄濃湯安格斯肥牛烏冬，煎安格斯紐西蘭西冷牛扒，三文魚凱撒沙律同埋炸物拼盤配蟹皇醬 前菜先嚟凱撒沙律配煙三文魚份量適中，當前菜幾開胃 烏冬用小火爐熱住湯底，保持温度，夠貼心。原個蕃茄剝咗皮，切開好Juicy，唔會太酸好好食。湯底夠濃厚，配烏冬食一流，安格斯肥牛質素高，夠諗又有牛味，完全係出乎意料，$68真抵 安格斯西冷牛扒都幾大塊，叫咗七成熟，個熟到啱啱好，比起好多其他餐廳嚟得準確，肉質軟得嚟有咬口，配上大量薯條，啱晒大食人士 炸物拼盤有茄子、番薯、冬菇同埋南瓜，炸起唔會油立立，夠香脆，配上香濃惹味嘅蟹皇醬（蟹糕），幾上癮。整體來講，質素高而且街坊價錢，下次去荃灣應該會再回頭。

雞煲火鍋周圍都有，食得多都想轉下口味 今日去咗旺角中心對面嘅二鍋頭佢哋除咗有雞煲供應之外，仲有個「鴛鴦鴨煲」就係我想食嗰個，一口價兩個半小時任飲任食，先食鴨煲，有鴨件同埋臘鴨，用秘製醬料炒香，真係好惹味，又好食，2個人食完唔夠再加多煲先收手 食完鴨煲就可以轉湯底打邊爐，咁就揀個清清地嘅蕃茄薯仔湯，本身都有蕃茄喺入面，我地自己再加粟米、蘿蔔、瓜類，點會唔好味另外有幾十款配料可以選擇，一部分係向店員點單，一部分係喺自取區拎嘅，好方便~首先揀咗正路嘅肥牛、魚皮餃、雲吞、蝦，鮮魷魚、脆鯇、丸等等，全部都正常水準，海鮮都幾新鮮。 因為呢度有咁多時間，所以絕對足夠，講真香港都好少有可以食兩個半鐘嘅火鍋店~ 另外仲有自助火鍋配料可以自己任揀，好多丸類、腸仔、蔬菜同菇類等等，都可以自己選擇。 埋單計人頭都係2佰蚊左右，抵食又好食。

一般火鍋放題都係以港式，日式同雞煲為主，台式相對較少，今日就食嘅佐敦莊士敦廣場嘅鍋霸，俾我感覺十分唔錯呢度佔整個商場6樓，相當寬敞，有大少不同卡位，新束乾淨，店員招呼亦非常周到，經常會睇下你有咩需要呢度亦用上手機點單，非常方便。提供十多款湯底，主要可分藥膳雞，蕃茄牛肉，麻辣等，咁當然可以加錢雙拼。我地點嘅蟲草花桃膠雞同麻辣蕃茄牛肉，兩款味道都濃而不膩，雞件用上雞脾肉，且帶有藥膳氣息，有滋補養生感覺蕃味湯頭較濃密，唔算太辣，牛肉非常腍，如果加上手工麵，正正就係食台灣牛肉麵果種感覺。
隨即就有小食跟上，涼菜拍青瓜同麻辣木耳，很好開胃。即炸黃金魚皮配上四款Shake Shake粉，香口惹味，亦新奇有趣。其他火鍋配料都係任食，份量會按人數出，好處係量少款多，因為咁，我地兩個人都點左廿幾款試，食過覺得好食又可以返點，好適合好似我地眼闊肚窄嘅朋友。當然所有配料都係有質素好似蜆同聖子，脹卜卜又鮮甜，蝦亦新鮮爽口，梗係再返點喇。另外prime牛肉亦有誠意，薄切唔鞋，唔係一般任食嘅紙皮牛肉。另外亦喜歡台式鴨血，夠滑有香味！其餘三款手打丸都唔錯，一口咬size，尤以麻辣牛丸味道最特出。
另外一提呢度嘅飲品除左一般罐裝汔水同紙包飲料外，仲有自家茶飲，用透明膠樽載，有桂花烏龍，四季春冷泡同山楂烏梅。最後食埋雪糕作甜品，十分完滿。

雖然呢排全城抗疫，但可能情況穩定咗，發現多返人出街食飯，無他嘅，日日係屋企食，多咗都悶嘅，間唔時出去食返有兩餐都可能嘅，小心啲咪得囉，今日我地都要出嚟唞下氣，食返餐為自己打打氣近近地揀咗荃灣大鴻輝嘅相馬日式火鍋，揀佢因為食物質素唔差，款式頗多，尤其蔬菜系列好得我心，另外又有串燒同炸物可以點，啱晒想放縱吓嘅我哋。 menu： 湯底：要咗豚骨湯，清得嚟幾香，又唔會油，平平地點咗238嘅特選牛肉餐，亦包埋豚肉同雞肉，仲提供十五款串燒同十款炸物，抵食喇 雖然價錢平但啲肉嘅質素一啲都唔差牛肉薄薄地，但係都有牛味，唔會un，豚肉亦幾香，食落唔。 至於串燒，有幾款口味，鹽燒，醬燒同味噌燒可選，自己偏向醬燒同鹽燒多啲，睇你點嘅食物以定，醬燒嘅雞翼同埋蘆筍胸肉卷好食，鹽燒雞皮同雞軟骨亦好正。炸物方面個人覺得多春魚、炸蝦同埋洋蔥圈一定要點嚟試吓，最特別係佢跟埋松露醬，令成件事提升不少 另外仲有幾十款火鍋食了可以自己攞，最得我心嘅蔬菜系列，有蘆筍、䈑筍、蟲草花、冬瓜、粟米等等，蔬菜都有四、五款俾你選擇，另外丸類、餃類同埋腐竹等等，每樣都攞咗少少，食晒個肚都突埋，飽到嘔 最後提一提鍾意食辣嘅朋友 佢有個秘製辣醬，感覺上有啲食餃子嗰啲辣菜甫咁樣，好惹味、好開胃，不妨攞嚟試吓 當然汽水、茶嗰啲梗係任飲啦，咁嘅價錢，加上環境好闊落，唔會坐得好迫，啱晒而家出去食飯嘅準則，不妨一試。

食餃子，皮、餡料同湯頭，三樣同樣重要，其中一項都會影響整體感覺，所以好食嘅餃子唔容易揾，最近食咗一間三方面都配合得唔錯算係近期值得推介，呢間位於太子汝州街嘅豐信餃子，記得之前都有媒體介紹過，今次嚟試吓，覺得的確唔錯 首先呢度餃子款式都比較多，有10幾款，普遍嘅韭菜、白菜、芫茜，雲耳椰菜等等當然有供應，另外仲有麻辣、梅菜、粟米芝士同南瓜等等比較新鮮嘅口味。 我哋兩個人點左一個芝士粟米鮮肉拼西洋菜鮮肉湯餃，麻辣白菜鮮肉煎餃，甜蜜蜜雞中翼同埋秘汁雞腎先講湯頭用上椰子海帶鮮雞豬骨煲制而成，飲落冇味精，而且夠潤，淨係飲湯都好舒服芝士粟米餃屬於店家招牌，甜甜嘅粟米配上剛溶嘅芝士，無論口感、味道都唔會抗拒。另一款西洋菜鮮肉比較傳統，西洋菜味道濃郁，而且呢度嘅豬肉夠鮮味，絶唔會有好大陣雪藏味。 麻辣白菜煎餃，皮夠薄，又唔油，麻辣味唔算強勁，一般人都會接受到，而且就味道開胃，煎起夠香，兩個人好容易K.O 甜蜜蜜雞中翼一份五隻，類似豉油雞翼，應該加咗蜜糖，所以食起甜甜地、鹹鹹地，幾滋味。秘汁雞腎都唔錯，雞腎唔硬，好容易咬，而且夠晒入味，以小食嚟講，分量亦唔少。 總括來講，呢度嘅湯頭、餃子皮，餡料都好有水準，另外小食亦都出色，而且價錢合理，唔使諗，一定會再嚟食。

聽講poke bowl係由夏威夷人嘅一種食生魚的方法，佢地將魚生整成細粒細粒，再加埋醬汁，連同一啲沙律菜或者健康嘅食材，做成魚生碗，同日式魚生飯又唔同，通常賣相都砌得好靚，又好colourful，令人開胃香港都有幾間呢類型poke bowl，因為有次來D2 Place市集，我先留意到荔枝角呢個位都有間Pickabowl，放假都唔想去太遠，近近地喺附近食個簡單lunch，始終日日自己煮都好煩！
餐廳喺D2一期，都幾大喎，座位比想像中多好多，星期六過到來，開門無耐已經有客食緊，仲不時有外賣order，我地食完之後，先知道poke嘅魅力 首先睇左menu，先揀一款「煲底」，分別有海苔飯、半糙米飯、沙律或者烏冬；然後揀「煲料」，例如有三文魚、吞拿魚、慢煮雞胸、薑汁松板豬、大蝦等。另外有一款適合素食者嘅選擇同埋可以額外追加配料，組成你心目中嘅best bowl 配料好整齊放喺食物櫃中。 茶水自助。 落單後店員會俾一個號碼牌，做好個bowl後，就會振動提示，自己到櫃枱拎。 經典雙拼：呢款啱哂心大心細嘅人，乜都有啲，而且顏色繽紛。一碗有齊三文魚、吞拿魚；配料超級多，有烤南瓜、玉子燒、炸豆腐、四季豆、毛豆、紫洋蔥、秋葵，用自家製醬油醃過，我配左海苔飯，非常豐富！(而且佢地轉左用外賣盒，都好嘅，呢個時期較敏感，可以食得安心啲)
魚生基本上都好新鮮，粒狀口感十分好，三文魚柔軟肥美，味道屬於比較清新，唔會太鹹或者好膩，幾入味架
裡頭嘅海苔飯係暖暖地嘅，口感偏硬一啲，配埋大量配料，唔會覺得單調，料嘅份量係足夠配哂成碗飯。 香草蜜糖芥茉大蝦加煙燻辣味三文魚：呢款都好正啊，主食得體，我配左烏冬，更加輕盈。蜜糖芥茉少少杰身，配大蝦好fresh，最重要係蝦肉好爽！ 配料會有有蛋黃醬、牛油果、青瓜、蟹籽、菠蘿，口賀豐富。 溫泉蛋 仲飲埋羽衣甘籃果汁！

好耐冇打邊爐、食雞煲，講到食雞煲，我地好多時都會揀放題任食嘅餐廳，否則價錢都幾cum計。任食就唔洗擔心，先食雞煲，後打邊爐，同D大食少少嘅朋友食飯最適合不過。18樓雞煲係我心目中嘅高性價比之選 而家屬於敏感時期，人流就唔多，而且職員好細心，安排座位方面，唔會太密麻。 佢地好環保，採用手機落單，二來可減少出錯機會，上菜速度夠快，分量方面按人頭俾。 坐低就點雞煲，分大中小辣，我地揀中辣。店員幫我地翻炒，好快就食得，雞煲醬炒，非常入味，份量方面夠兩人食，雞件整體都好有肉地 店員會俾定一壼火鍋湯，食完雞煲之後，就可以加入煲，打邊爐！ 火鍋配料方面好多款式，其實食咁多野，真係飽到上心口 點左肥牛、特級肥牛、鮮牛肉。肥牛ok嘅，唔會太薄身，食落都唔會太韌。鮮牛肉彈牙 其他配料我地都點左好多，海蝦幾新鮮，食落仲爽！蜆就一般啦，唔算好新鮮。 魷魚、脆鯇、豬紅呢啲都食得過 腸仔、蟹柳、丸類大量。 菇菌配濃湯一流，鐘意秋葵嘅我地都點左幾次。 其他蔬菜自取，擺放整齊衛生。
飲品方面選擇唔少，我鐘意呢個道地纖茶。 呢個價錢又食到惹味雞煲，又打到邊爐，爽。臨尾仲每人有一杯movenpick架~~