主要以輕食為主，但係所有嘢都係真材實料，而且價錢對得住食物嘅質素，屬於區內CP值高嘅食店，今日係星期五晏晝1:30左右，過咗最繁忙嘅lunch時間，店入邊依然都有幾台客人，雖然店舖面積唔係好大，但係坐喺入邊亦都唔會覺得好逼夾，樓底非常高，最吸睛嘅就係喺廚房上面嗰幾幅畫，應該係畫屯門青山嘅，文青得來又唔做作 跟住講吓啲食物，我覺得係全日餐ok抵食，樣樣都有啲有沙律有慢煮雞胸，而且慢煮雞胸真係廚師用兩日時間去準備，我相信喺區內其他店都比較少有，食得出係原形食物，而且好味道，呢個set全日都係$48 另外最經驗嘅就係佢跟餐可以六折試佢其他嘅飲品，佢廚師推介我呢一杯水果酵母茶，我揀咗雜莓味，佢真係新鮮生果唔係用糖水溝出嚟嘅，雖然係熱飲，但係唔係細細杯，六折之後$18，呢個我一定要帶屋企人過嚟試 總括嚟講呢一間餐廳值得推介👍

同一個舖位上一手嘅質素越做越差，所以對呢啲韓國小店本身一直都冇期望，有一日跑完步諗住是但買少少嘢食就買咗個牛肉飯卷，有驚喜喎！餸比飯多，$58，味道唔錯，冇其他谷有講話出水嘅情況，如果要買嗰啲靚靚盒裝住就要多$10, 另外我仲試咗佢個醃魷魚，味道偏鹹，細細樽都要$60，不過會令人唔停口食完再想食😜 第二次我就試咗佢水冷麵，呢個就真係一般啦，我以為係梨水，佢就用咗蘿蔔水，咁就爭好多啦，價錢好似要$68㗎唔係平，唯一嘅好處就係堂食，可以慢慢欣賞出邊青山嘅風景，佢又唔會逼我走嘅，hea 一陣都幾正。 希望佢可以維持到食物嘅質素，長做長有啦！

真係剩係得屯門先至有，而且的確真係好味道，本身自己唔係好食得辣，但係成日就比嗰浸麻辣嘅味道吸引，喺呢度爬文咗好耐，終於今日lunch先至第一次搵到一間相對地容易有位嘅分店，未到12點已經坐滿人，我嗌咗一個細麻辣湯底米線，一定要試佢嘅豬頸肉，邪惡但係堅好味，我食少少辣都已經會流鼻水鼻，佢有紙巾提供，加$3有凍檸茶，即刻可以平衡返。 應該係未瞓醒錯手篤咗凍奶茶，佢哋肯幫我轉做凍檸茶，感覺上服務態度唔錯👏 埋單$51 ，價錢合理，第一次體驗感覺OK！

你嚟得西九就預咗要俾錢，話晒政府唔知幾千億打造，喺度開鋪嘅又咁靚嘅海景，又有藝術氣息，鋪租一定唔平，自然就要轉嫁俾我哋呢啲遊客，比較所謂又chill有感覺高級嘅咖啡餐，呢間嘅食物味道算係啱我哋本土居民，我知道呢間嘢有明星效應，另一間分店喺山頂食過都係貴㗎，相對之下期比起其他算係叫做平啲咁多，我淨係嗌咗佢一個撈麵同埋一杯免費嘅熱水，記住有+1 㗎，埋單$140，唔係特別好食，但係我知道要等好耐，算啦，今日抱住本土旅行嘅感覺，佢有佢Hea做我有我Hea等. 本身約咗第一場睇三星堆，所以早咗落嚟食，舖頭人唔係太多可以揀梳化位，之前有留言話佢服務一般，預咗，香港今時今日有邊間服務特別好，除非你去酒店或者好貴嗰啲囉，百零蚊食一個lunch你想點？乾隆咩？ Btw, 隻蛋係雪櫃攞出嚟嘅感覺，真係要聽佢講撈埋一齊食.

趁今日搭輕鐵唔使錢，真係得閒冇事做走入去元朗，諗起屋企有老人家冇牙，最好就係買佢嘅牛腩加餸，蒸牛筋腩，就算拼牛丸都好啦，最低消費要$52，而且只係收現金，去到嘅時候大概晏晝六點，眼見喺元朗嘅兩間舖頭入邊都冇乜人坐，可能出咗名，但係品質始終冇特別大驚喜，而且價錢又唔平，唯一可取真係佢嘅牛筋腩，超級腍，冇牙嘅都可以搵條脷篤散佢，牛丸就梗係唔得啦，但係我都唔覺得有乜大驚喜囉，唔會話冇幫襯，但係唔至於特登走入去幫襯。

自己本身唔食得辣，亦都好少食酸辣粉，可能因為我屋企人入醫院，想出嚟散吓心食啲可以刺激味蕾嘅食物，喺井財街經過呢一間小店，覺得價錢合理，入到舖頭首先第一下就係比呢一幅畫吸引，望住佢哋覺得好搞笑😆 因為外賣，所以就揀咗一個撈麵款，加7蚊要咗一個好似魚蛋咁嘅東西老細極力推，可惜原來得一條，另外，雖然叫做肉醬撈麵，但係啲肉醬好細碎，冇乜咬口，but overall酸味都比較突出嘅，紅薯粉煮得好琳，唔會靭，如果多啲花生有咬口會好啲 埋單$42 OK啦

餐廳面積有限，雖然係平日嘅夜晚，想要book都要趁早，今次係同航空公司嘅同事小聚會，店入邊嘅服務員都盡量用英文同普通話同我哋解釋每碟，服務係有heart嘅，能夠喺屯門嘅住宅地區搵到一間米芝蓮餐廳又近機場，而且能夠帶外國同事感受本地民生環境，呢一餐揀呢一個地點的確唔錯😊 我哋一行四人，每人都揀咗自己鍾意嘅意粉，全部都好好味： 另外早一日留咗一隻三黃雞，真係皮脆肉嫩，而且啲飯真係好好食 最後我哋重點咗兩款甜品，我鍾意紅酒啤梨嗰隻多啲

我係食咗好多餐，買過幾次外賣，淨餸，雞肉卷都試過，先至喺度出post，食物味道唔可以話驚為天人，但係方便程度，價錢，仲有佢嘅營業時間，去到夜晚9:30都仲有一碗熱湯麵，我相信如果天氣轉涼，絕對係一間窩心小店👍 同佢喺本店一樣入邊都有好多，扮懷舊嘅裝飾，其實都幾得意，開張嗰陣時真係人頭湧湧，熱潮退減，依然有捧場，屬於區內數一數二多人幫襯嘅食肆，希望佢第日可以再增加多啲餸嘅選擇，另外呢我覺得佢個頭像有啲甜，其他都冇乜投訴啦

天氣熱到34度，相信好多人都會揀食刺身壽司，今日特登搭車過嚟，因為見到都有唔少好評，而且見佢午市套餐有做刺身丼飯，價錢合理啦，入到去空間都合理嘅，不過師傅服務員唔係好識點樣安排客人入座，反而要我提議唔介意搭枱，佢先至將一個近廁所嘅四座位分開兩個座位，其實都係好小事，同樣服務員係唔識得攞茶俾客人嘅，又唔見得呢一間店屬於自助形式，都唔緊要，期望食物好食啲啦，揀咗一個午市餐牌嘅148廚師發辦嘅壽司當飯，廚師發辦理應會揀合適嘅刺身放埋一齊，如果要熱嘢飲就加兩蚊，OK啦total$150, 上枱嘅時候就如圖，大大隻牡丹蝦確實吸引，不過竟然係有沙嘅，港督海膽都預咗佢唔會好多，不過識落都鮮甜嘅，其他嘅刺身魚各一塊啦，唔會話特別大塊，我諗我坐喺嗰度都等咗30至40分鐘，雖然我唔趕時間，但係服務員都知道我坐咗喺度好耐，食到一半嘅時候，服務員話唔記得咗攞沙律，其實都係啲菜碎淋啲汁… 總括嚟講一般般，唔係特別好食

基本上整個Menu都加咗價，本來諗住去食下午茶，2:30去到門口，入邊都差唔多坐滿人，果然好生意，一心諗住食個下午茶，不過禮拜六日就冇咁嘅優惠，只有lunch Menu去到5:00pm, 認真mode, 真係今次先至第一次食到佢嘅王牌白咖喱豬扒飯，果然名不虛傳，堅係好食, 唔知係咪太好生意，我哋坐喺度差唔多一個鐘先至有嘢食 另外，點咗芫荽菠蘿特飲，基本上係梳打水加菠蘿汁，你會見到一片片嘅芫荽，但係完全冇芫荽味，有點可惜