由尖沙咀嗰邊搭天星小輪,大約五分鐘左右船程就嚟到灣仔碼頭嘅築地山貴水產市場,幾方便. 呢度係由日本東京築地市場嘅批發商經營,落戶香港約一年左右. 入面嘅海鮮係由日本同世界各地直送,一直好想嚟試,呢日終於成行. 入口附近係零售區,售賣唔少日本產嘅食品同飲品,另外仲有啲外賣壽司. 再行入少少就係用餐區域,分別有浜燒海鮮區,海鮮丼區,梅酒區等等. 不過我呢次嚟嘅主要目的係最入嘅壽司區,三面都係向住維多利亞港海景嘅落地玻璃窗,加上特高樓底,幾開揚. 呢個位仲可以睇到隔離嘅會展新翼,如果遇啱煙花匯演嘅話,應該係個唔錯嘅觀賞位.同埋聽講呢度開業初期只有立食,但呢日嚟到見佢已經加咗高身吧凳,相對而言比企晌度食來得舒服. 有見呢度係由日本東京築地市場嘅批發商經營,所以呢次主力試刺身同壽司. 檯上面已經預先放咗餐具同醬油壺,筷子係即棄嘅,不過用料就非常高質. 先試呢款叫縞鰺嘅刺身,即係深海池魚,厚切三片口感爽甜,魚香味足又唔會過份濃重. 另外試咗兩個壽司盛同兩件散叫壽司,由上而下,左而右嘅係Set A, Set D,左口魚裙邊同炙燒左口魚裙邊. Set A即係吞拿魚盛,分別有大吞拿魚腩,中吞拿魚腩,赤身,炙燒吞拿魚腩,香蔥吞拿魚腩蓉軍艦各一件,大吞拿魚腩幾乎入口即化,魚生下嘅壽司飯壓得啱啱好,而且係一啖一件嘅大小,食得幾方便. Set D就有油甘魚,三文魚,海膽,三文魚子,香蔥吞拿魚腩蓉軍艦,海膽幾creamy同鮮甜. 油甘魚食落柔軟,三文魚就爽口. 左口魚裙邊有嚼勁,同埋有魚油甘香.炙燒左口魚裙邊經火槍輕輕燒過,幾香口. 呢度冇免費茶水提供,於是就叫咗杯熱焙茶,溫度暖暖哋咁.同行嘅人就叫咗蘋果汁,味道甜甜哋幾解渴.

等埋朋友收工就去咗銅鑼灣間FireBird,門面睇嚟有啲似咖啡店同酒吧嘅混合體. 呢度其實係間日式串燒酒吧,裝修好新派嘅感覺. 餐廳有部份食材係產自日本,餐牌寫採用嘅雞肉品種係元氣雞同阿波尾雞.雖然主打係雞肉,不過亦都有提供其他肉類,同埋壽司,刺身,串燒等等日本料理. 呢次我哋就試咗幾樣嘢,先嚟嘅係野菜棒配FireBird特製味噌,就咁睇個名以為係用蔬菜打成棒狀嘅嘢,實際原來係冰鎮蔬菜.蔬菜切成粗長條形,俾少少想像力的確可以叫做棒,分別有西芹,甜黃椒,甜紅椒,青瓜,甘筍,車厘茄,粟米同番薯等等,爽爽脆脆咁,蘸埋微甜嘅特製味噌,簡單得嚟又清新. 自家製京風冷豆腐,豆腐滑溜,上面有蔥花同薑蓉,可以同埋鹽同醬汁一齊食,又係一個好輕盈嘅菜式. 海鮮寶箱壽司,賣相好吸引.帆立貝殻上面鋪咗海膽,三文魚子,蟹籽,牡丹蝦,帆立貝,三文魚,油甘魚,吞拿魚同玉子,下面就係紫菜飯卷. 鹽燒鮭魚腩,鮭魚腩外皮焦脆,魚肉綿而同有魚油香,切成四小件,食得幾方便. FireBird雞肉串燒盛合,可以一次過試晒餐廳嘅日本產雞肉串燒,包括雞胸串,雞腿串,長蔥雞肉串,自家製免治雞肉棒配日本鮮蛋黃,另外仲有一串秋葵.佢哋嘅雞肉脂肪含量少,質感比較彈牙,而自家製免治雞肉棒就加咗少少雞軟骨,幾有咬口. 秘傳雞肉火鍋,雞湯味濃郁鹹香.配料除咗有軟骨雞肉丸同雞肉之外,仲有豆腐,冬菇,甘筍,娃娃菜等等,都好豐富. 鮭魚親子釜飯,鮭魚即係三文魚,親子嘅意思係指三文魚肉同三文魚子,餐牌寫兩款食材都係產自北海道. 侍應會幫我哋撈好啲飯,再另外用小碗載住. 三文魚肉同三文魚子之間仲有本菇等等,整體嚟講味道冇負擔. 炸番薯條,餐牌寫採用嘅係日本宮崎番薯,每條番薯都係厚切,炸得脆口中有粉糯口感,蘸埋黑糖漿嚟食,完全唔覺膩. 試埋呢度嘅飲品,Lover Kyoto主要用抹茶,牛奶同糖漿沖調,另外仲有鮮忌廉,抹茶糖漿同白玉點綴,再用雕成玫瑰花咁嘅士多啤梨做裝飾,飲落微甜. Lava Flow就用咗菠蘿汁,椰奶,櫻花糖漿同士多啤梨糖漿混合而成. 杯邊同樣插咗雕成玫瑰花形嘅士多啤梨,同埋一片菠蘿,驟眼睇同餐廳嘅公雞圖案有啲似.

K11最近開咗間食西餐嘅K11 Bora Seafood,佢係晌商場嘅盡頭角落位. 入面有唔少同海洋有關嘅佈置,中間仲有個舞台,應該會有live band表演之類. 靠邊嘅係一列梳化卡位,可以由旁邊嘅百葉窗睇到餐廳嘅另一邊. 走過去睇一睇,呢邊嘅格局就比較似酒吧. 仲有電子飛鏢機,俾食客玩樂之用. 佢哋仲有室外座位,如果天氣唔熱嘅話應該幾舒服. 餐墊紙上面印咗龍蝦圖案同拆殼教學,睇嚟龍蝦係呢度嘅主打之一. 除咗海鮮之外,仲有唔同嘅菜式,呢日就試咗幾樣嘢食. 日式麻醬煙鴨胸田園沙律嘅煙鴨胸鹹香,另有唔少紫生菜,車厘茄,粟米,彩椒,配埋酸酸哋嘅日式麻醬,幾開胃. 黑松露野菌忌廉湯,每啖都係打得細碎嘅野菌,味道貼近原味,可以用牛油多士蘸嚟食,對我嚟講都唔錯,食慣濃味嘅人就可能覺得味道比較輕. 呢碟係黑松露西班牙黑毛豬頸肉意大利粉. 黑毛豬頸肉上面有啲黑松露醬,口感爽脆. 忌廉汁分佈晌意粉表面,入面仲有大量切粒洋蔥同彩椒等等,幾有咬口. 雜果賓治,用鮮菠蘿點綴,飲落甜而微酸,幾消滯. 朱古力撻,仲有藍莓,棉花糖,朱古力醬,糖霜等做伴碟. 撻皮鬆化,中間嘅朱古力餡軟身,濃郁微甜,食完主菜之後食都唔錯. 呢次試嘅食物唔講得上非常特別,不過烹調都見用心,加上嗰日啱啱好食客唔多,個感覺都幾幽靜,有機會再嚟嘅話都想試試佢哋嘅龍蝦菜式.

（影片） 最近新開咗間黃記煌三汁燜鍋,佢哋晌國內已經有多間分店,就連美國,台灣等地都見到佢嘅蹤影. 嚟試呢晚時間尚早,仲未有食客,之後就陸續有人入座. 雖然嚟自國內,但裝修唔俗氣,仲幾有特色. 每檯都預先放咗金色嘅燜鍋,個蓋設計到好似頂帽,又有啲似棋,幾有趣. 餐牌詳細地介紹佢哋嘅三汁燜鍋,係用清代御膳名菜香辣汁魚做藍本,再加入多款蔬菜同藥材等等. 呢度嘅燜鍋共有十多款配搭,分咗魚,雞,牛,豬,海鮮類,醬汁就有五款,其中兩款唔辣,另外三款就有唔同程度嘅辣,另外亦有多款涼菜同火鍋料去揀. 我哋最後決定叫自選燜鍋,可以自己揀四款指定食材.同行嘅人唔食辣,所以醬汁就揀咗唔辣嘅招牌鹹鮮汁. 呢份餐前小食係竹炭花生嚟嘅,賣相幾特別. 冇幾耐侍應就拎咗一個好似花樽咁嘅六寶盒嚟,每層都放住唔同嘅食材,之後就即席晌我哋面前煮燜鍋. 侍應先開電爐,晌鍋度加入底油,再倒埋西芹,甘筍,紅薯,洋蔥,青椒,紅椒,車厘茄,蒜頭,紅棗等等十款蔬菜同藥材. 之後逐一鋪上我哋自選嘅石斑魚柳,白蝦,牛肚,秀珍菇. 將食材平均鋪好之後,加少少調味料同調味酒,就加蓋煮一陣. 然後,侍應小心翼翼地將非常黏身同杰身嘅招牌鹹鮮汁加入鍋度,再加蓋煮多陣. 燜鍋加熱時傳嚟陣陣討好嘅藥材香,非常吸引. 最後加啲芫茜,咁就完成. 成個過程都由侍應負責,同埋用咗無水烹調法,主要係靠食物自己嘅水分嚟燜煮,咁樣比加水煮更加可以保留原味,又唔怕食物營養會流失去水入面. 食物表面蘸滿佢哋嘅招牌鹹鮮汁,幾濃郁美味.自選食材方面,石斑魚柳肉質唔鬆散. 秀珍菇吸滿醬汁. 當中以牛肚最為爽脆. 燜鍋嘅食物食得七七八八之後,就可以請侍應加埋高湯用嚟做火鍋. 哈哈,加湯之後又係另一種風味. 我哋人比較少,加上啱啱燜鍋嘅肉類份量幾多,所以只係叫咗蔬菜野菌拼盤,入面有金菇,秀珍菇,杏鮑菇,粟米同生菜,正好用嚟中和一下. 由網上得知佢哋早前收購咗許留山,所以餐牌入面有唔少相關產品.我叫咗壺銀菊露,一邊食火鍋一邊飲感覺唔錯. 同行嘅人就叫咗芒椰芒果爽,頂層有唔少芒果粒,中間有層厚厚嘅椰汁,然後係芒果汁同芒果爽,甜甜哋咁幾好味. 之後再叫多份芒之戀,一份就有晒迷你版多芒亮晶晶,多芒小丸子同芒果糯米糍三款甜品,啱晒多心又想試多幾款嘅我. 小丸子煙煙韌韌,同埋係沙冰底嚟嘅.芒果糯米糍入面嘅芒果肉甜而唔酸,仲用芒果片伴碟,從外到內都係芒果嚟. 雖然同行嘅人唔食辣,所以唔可以一試佢哋嘅辣汁,但呢次嘅招牌鹹鮮汁都夠惹味. 服務方面啲侍應非常細心,會不時走嚟換碟.幫我哋煮燜鍋同打開蓋時,仲特登將個蓋向住佢自己嗰邊,以免熱水蒸氣吹向我哋嗰度.加湯時又會特登用手擋住,防止熱水彈出,可謂見微知著.

荃新天地二期對面開咗間叫Catee嘅餐廳,門面睇落幾有特色. 餐廳入面有唔少用貓做主題嘅佈置,就連logo都同貓有關. 水吧嗰邊嘅瓷磚全部都係貓圖案,好吸引. 環境燈光昏暗,幾有氣氛. 其中一幅牆度仲掛咗好多幅用貓做主題嘅畫. 陳設都好用心. 我都幾鍾意呢度嘅環境. 呢度嘅晚餐有十幾款,包沙律,湯,飲品同甜品,亦都可以散叫,呢次我哋就叫咗幾款嘢食嚟試. 店員拎咗兩隻碟俾我哋share嘢食時用,上面嘅圖案好靚呀! 然後又拎咗籃麵包嚟,仲有黑醋橄欖油用嚟蘸麵包用,不過如果佢哋將麵包烘暖一下嘅話應該會更加美味. 晚餐沙律入面有橄欖,紫生菜,紫椰菜等等,而上面一粒粒嘅嘢其實係蘭度豆嚟嘅,少見多怪嘅我係第一次食呢種豆,幾有咬口,醬汁就酸酸哋幾醒胃. 餐湯嘅湯質creamy,同埋有少少粉粉哋嘅口感,味道同我晌其他餐廳飲過嘅餐湯有啲唔同,問過店員之後先知原來係蘭度豆湯,對我嚟講都真係幾特別. 雙影帶子配黑魚子嘅帶子分咗熱食同凍食兩款,前者焦香惹味,後者就突顯咗黑魚子嘅鹹鮮. 晚餐主菜我哋揀咗香煎挪威三文魚扒,用咗露筍,藤茄,薯蓉等等做伴碟,賣相吸引.三文魚扒魚皮煎得香脆,魚肉有油香,水準唔錯. Catee炸三文魚蛋,店員話呢款菜式係佢哋用咗唔少時間去研發,雖然話係魚蛋,但同平時嘅魚蛋絕對唔一樣. 吉列外皮薄而脆,切開之後仲清楚可見一絲絲三文魚肉,食落鬆化兼帶汁,蘸埋個醬就酸酸辣辣. 晚餐嘅甜品芒果芝士餅酸香滑溜,仲用龍珠果伴碟,幾消滯. 另外叫埋朱古力布朗尼蛋糕,餐廳特登將佢切成一片片,食落更加方便.質感脆同帶啲濕潤感,仲跟埋朱古力醬,味濃唔澀,又唔會過份甜膩. 晚餐仲包飲品,驚喜嘅係配Latte唔洗加錢,其他嘅mocktail等等亦只係加$15左右,同同類餐廳相比,改其他飲品嘅收費可以話係幾平.   嚟之前以為係間賣外表嘅餐廳,估唔到食物有一定水準,烹調亦見用心,仲俾我見識到蘭度豆呢樣嘢.另外大部份西餐廳提供嘅清水一般都加檸檬片,而呢度就係加青瓜同青檸葉嘅,飲落既香口又清新,同樣係坊間比較少見.

銅鑼灣明記甜品係西灣河老店嘅分店,雖然同大部份港式甜品店一樣,檯同檯之間分佈得比較近,但個裝修都幾光潔企理. 原本想食芒果系列入面嘅香芒小丸子,不過最後都係試咗其他甜品. 招牌芒果凍餅即係冰凍版木糠布甸,上面鋪咗芒果粒同芒果汁,凍餅中夾住大大粒芒果肉,食落冰感重. 抹茶心太軟配雪糕,賣相OK. 切開心太軟之後,中間嘅流心度唔係好強,但都唔錯.外皮有少少脆口,入面抹茶味濃甜,旁邊仲有抹茶醬,抹茶雪糕同原粒紅豆蓉,幾有咬口.

呢晚嚟到Me Bar+Grill,係間酒吧餐廳嚟. 呢邊牆就用咗名畫蒙娜麗莎嘅圖案做裝飾,環境幾有特色. 抬頭一睇先發現天花板都有乾坤,掛咗唔同嘅霓虹燈字句. 餐牌方面,由前菜,小食,主菜,意粉,甜品都有,同一般西餐廳冇太大分別. 酒精類非常豐富,亦有mocktail等非酒精類飲品去揀.而且推廣期內即場讚好餐廳嘅facebook或instagram仲會有九折優惠,即係變相唔洗加一. 先試飲品,呢杯Mango Smoothie係mocktail嚟,另外仲有熱情果,士多啤梨或椰子味去揀,飲落解渴. 餐牌寫呢杯Gaarden Rose係用Hoegaarden Rosee,冧酒,士多啤梨汁同青檸汁調成,拎到嚟之後侍應先將一整支Hoegaarden Rosee倒轉,杯邊仲蘸咗鹽粒,賣相唔錯.Hoegaarden Rosee即係桑莓味啤酒,飲落微酸消滯,幾啱女仔口味. 酥焗菠菜芝士釀大啡菇焗得既香噴噴又多汁,上面嘅煙肉香脆,菠菜嫩而冇渣,芝士雖然冇拉絲效果,但加埋一齊食口感唔錯. 汁焗水牛城雞腿,起初以為嗰一瓣瓣橙紅色嘅嘢係番茄,睇清楚先知其實係切件鮮橙嚟,另外仲有大量洋蔥. 雞腿有六隻,外皮微焦,雞肉唔乾身,食落辣味啱啱好,仲有淡淡嘅鮮橙甜味,感覺討好,不過在我嚟講如果可以多少少酸味就更加好.

尖沙咀間和牛燒肉純,入口附近陳列咗多款日本出產嘅酒精,睇落都幾吸引. 餐廳燈光昏暗,氣氛唔錯. 每張檯中間都嵌入咗日式網燒燒烤爐,而用嚟燒肉嘅鉗就設計得比較幼身,末端位置就比較尖,拎上手感覺比一般嘅鉗慳力. 其中一本餐牌封面印咗熊本熊,好得意. 呢個餐牌入面嘅肉類都係嚟自熊本縣. 呢次我哋試咗四款和牛,先係汁燒和牛赤身肉,放晌爐上面輕輕燒兩邊就得,食落鬆化. 鹽燒日本產和牛牛肩眼嘅牛味幾濃郁,對於嗜牛嘅人嚟講幾滿足. 鹽燒特選日本產和牛牛排肉嘅雪花分佈細密,又唔會太膩. 鹽燒特選日本產和牛肉眼,比牛排肉更加肥美,雖然過癮,但如果食得多就可能會覺得有少少膩. 食燒肉多少都有啲熱氣,於是就叫埋飲品試試.梅梳打有粒梅晌杯入面,鹹鹹酸酸咁幾消滯. 荔枝梳打,相對起嚟就比較甜.

愉景新城對面有間睇落似酒吧嘅Chalet,原來係西餐廳嚟,呢日我哋就嚟試試. 由玻璃大門走入去,係一個設計好似小花園咁嘅位置. 用咗單車同藤籃做裝飾,幾得意. 裝潢用木材為主,好英倫小木屋嘅感覺,晌荃灣嚟講呢類型餐廳都真係幾少見. 午市以套餐為主,價錢由七十幾到百幾不等,而且唔洗加一,都算合理. 我哋叫咗兩份午餐,先嚟嘅係餐湯同沙律,呢日係雜菜湯,湯入面有大量切粒椰菜,意大利青瓜等等,大大增加蔬菜攝取量.沙律就淋咗黑醋,幾醒胃.側邊嘅麵包烘到暖暖哋,外面脆入面有少少煙韌,質素唔錯. 意大利煙肉芝士配菠菜沙律伴日式芝麻醬,表面鋪滿芝士碎. 煙肉煎得香口唔乾身,底下仲有菠菜,咀嚼起嚟清甜爽脆,配埋車厘茄同微酸嘅日式芝麻醬,作為主餐的確好輕盈. 澳洲穀飼肉眼扒配有機薯片伴芝士忌廉汁,以呢個價錢嚟講肉眼扒好大塊,食落口感軟嫩有油香.起初以為有機薯片係指炸到脆身嗰種,實際係將薯仔切成片狀,再撈埋芝士忌廉汁,既滑溜又惹味,比想像中有誠意. 我哋仲試埋呢度嘅mocktail,呢杯Refeshing係用咗鮮西柚汁,檸檬汁同梳打調成,再用風乾西柚點綴,飲落有果香又可以消滯. Girls Generation個杯好似一個小小嘅擺設咁,非常特別. 頂層有塊好似杯仔咁嘅冰塊,上面放咗鮮藍莓同紅桑子,再用竹籤插住檸檬葉同士多啤梨等等,下層就用咗紅莓汁,接骨木花糖漿,薑汁汽水調配,味道微酸清新. 眾所周知莓類水果有抗氧化功效,女仔飲多啲或者食多啲嘅話就唔怕好似隻杯個公仔咁生晒皺紋啦!

（影片）
假日下晝同人嚟到尖沙咀,試吓呢間Shine. 雖然brunch menu嘅套餐好抵食,但我對佢哋新出嘅龍蝦菜式同甜品仲有興趣,咁就索性散叫啦. Fruits Tea入面有切片鮮橙,青蘋果,士多啤梨同藍莓,聞落清新,飲落有果味酸香. 波士頓鮮活龍蝦配焗軟芝士西西里番茄醬圓管粉,賣相吸引. 龍蝦肉厚鮮甜有汁,軟芝士焗得外脆內軟滑.底下仲有圓管粉,表面嘅西西里番茄醬微酸,幾惹味. 試完主菜就急不及待跳去食甜品,玫瑰蘋果金寶用咗乾冰營造好似瀑布咁嘅夢幻效果,就咁睇已經覺得開心. 餐廳將切得透薄嘅蘋果片砌到好似玫瑰花咁,再用雲呢嗱雪糕,鮮士多啤梨,棉花糖,提子乾同朱古力碎伴碟,配搭都幾夾. 特濃咖啡雪糕杯用咗奶凍,意式芝士餅,雲呢嗱雪糕同士多啤梨片組成,食之前倒埋啲熱特濃咖啡入去,雪糕冰凍,意式芝士餅軟綿,奶凍滑溜,咖啡甘澀同杯入面嘅甜味互相中和,一杯有齊多重口感,都幾得意. 自製威士忌雪糕伴鮮果用原個起咗肉嘅鮮橙皮載住,上面嘅忌廉幾有奶香,下層嘅威士忌雪糕酒味唔重,仲撈埋大量鮮士多啤梨,奇異果,青蘋果同紅蘋果粒,連平時唔太飲酒嘅人都話唔錯.