聽過鱈卵屋已經有一段日子，不過呢晚係我第一次嚟試。 打開餐牌，選擇幾豐富，估唔到明太子嘅菜式可以有咁多變化。 餐紙同筷子托用紅葉做主題，好有秋天嘅感覺。 鬆軟明太子上灌湯蛋卷，每層蛋皮煎得薄而鬆，中間夾住明太子，份量多到就快爆出嚟咁，食起嚟就多汁鹹香。 鱈卵碗配鰻魚，飯面鋪咗大量明太子，然後就係自選嘅鰻魚，另外仲有筍粒同蛋絲。呢碗飯有三種唔同嘅食法，首先將配料同飯撈勻嚟食，味道唔錯。之後按個人喜好加啲調味料，例如白芝麻、蔥花、紫菜絲、芥末、香草絲或黑芝麻，咁就多添幾分惹味。最後倒埋特製嘅日式上湯落去整成茶漬湯飯，湯飲起嚟有淡淡木魚清香，唔會太膩。 極品番薯，質感香軟粉糯，甜度啱啱好，用佢嚟做結尾都唔錯。

山林道附近嘅Mini Club雖然開業有一段時間，但啲裝修都尚算新淨。 佢哋係用平板電腦做餐牌，都幾時尚。 先試呢度嘅飲品，呢支叫Lindemans Apple嘅手工啤，飲起嚟酸酸甜甜近似果汁，幾啱女仔口味。 What the Duck，隻鴨仔好似晌度浸緊泡泡浴咁，仲有啲爆炸糖晌度，玩味十足。泡泡之下係用咗青蘋果、奇異果、菠蘿汁、紅莓汁同紅石榴糖漿混合而成嘅cocktail，飲起嚟甜甜哋咁。 Honey Bee，木盤上嘅小裝飾都好得意。餐廳將Grand Marnier、Advocaat、Baileys、菠蘿汁同桃肉打成沙冰，上面仲插咗塊蜂膠點綴，旁邊就有樽蜂蜜，將佢加入去，雖然用咗多款酒精，甜味卻突出，完全唔似晌度飲酒，口味偏向女仔一啲。 之後就試呢度嘅嘢食，海鮮拼盤入面有熟龍蝦、睡蟹、鮑魚、翡翠螺、蒜味青口、玫瑰蝦，陣容鼎盛。 泰式生蝦，生蝦質感脆口，泰式醬汁嘅辣勁好強，食唔到辣嘅人就唔建議挑戰喇！ 韓式醬燒安格斯牛柳粒，牛柳粒切成厚身條狀，外層就蘸咗香甜嘅醬汁，同埋灑咗啲紫菜絲同白芝麻上去，另外仲有泡菜、醃蘿蔔同韓式辣醬跟埋一齊食，味道唔錯。 我哋仲試埋餐廳新出嘅The Love of Eiffel，桃紅色嘅巴黎鐵塔上面放咗各式各樣嘅精緻甜品，最底下嘅黑色托盤就內有機關，可以做出煙霧效果，都幾觸目。 頂層嗰三粒銀河圖案嘅大朱古力豆幾靚，旁邊有印咗餐廳名嘅朱古力牌，後面仲有朵糖膠玫瑰花。 另一邊亦有三粒印咗唔同圖案嘅馬卡龍，外層脆脆。另外嗰粒印咗I Love You字樣嘅心形朱古力中間位置就香軟，有少少似松露朱古力嘅感覺。 下層就有三個唔同造型嘅冬甩形小圈圈，分別用咗彩色糖霜同唔同形狀嘅碎糖點綴，入面就係蛋糕嘅質感，整體嚟講唔會話非常非常甜。

去咗美麗華酒店嗰邊嘅商場，試咗呢間Mike’s Chicken Comida de Portugal Restaurant。 顧名思義，佢係間食葡國菜嘅餐廳。香港嘅葡國菜好似唔多，而我上次食都已經係幾年前晌澳門嘅事。 打開餐牌，除咗葡國菜式，仲有多款多國菜式去揀。 叫完嘢食之後，侍應就拎咗餐前麵包嚟，質感外脆內有韌性，仲跟埋牛油、黑橄欖同橄欖一齊食。 啤梨番石榴沙律，啤梨配番石榴好似幾少見，前者腍身，後者爽口，配埋紫洋蔥、紫生菜同醬汁等等，都幾酸香開胃。 香蒜燒春雞，春雞表面鋪滿香蒜，拎嚟時香噴噴。切開時雞肉仍然有啲肉汁，用車厘茄、西蘭花同薯條伴碟都唔錯。 葡式烤乳豬，呢款係需要預訂嘅，同埋可以揀全隻、半隻或四分一隻。我哋呢份係四分一嘅份量，乳豬外皮香脆，中間夾住膠質感嘅肥脂，肉質就幾嫩。旁邊嘅炒飯就有切粒肉腸、番茄醬、紅腰豆同提子乾晌度，食完乳豬再食雜菜沙律就可以解膩。 餐廳嘅凍櫃陳列咗多款甜品，睇起嚟好吸引，可惜胃口有限，唯有留返下次有機會再嚟嘅話先試。

同人嚟到銅鑼灣嘅金羅寶韓國料理，餐廳係晌金百利廣場入面，呢度都有唔少食肆。 佢係間比較傳統嘅韓國菜，已經開咗幾多年，不過今次係第一次嚟試。 同大部份韓國菜一樣，呢度係有嵌入式嘅燒烤爐，同埋係有燒肉嘅。 午市時段嘅套餐定價七十幾至百幾左右，選擇仲幾多。 叫完嘢食之後，侍應就拎咗一堆餐前涼菜嚟，泡菜、馬鈴薯、銀魚仔乾、青瓜、蓮藕、菠菜大豆芽、魷魚絲、四季豆，就咁睇都覺得豐富。每次食韓國菜都最期待色彩繽紛嘅餐前涼菜，除咗可以增加蔬菜攝取量之外，又可以解膩，不過新派嘅韓國菜就反而無咁多款式喇。 每份午餐都包一碗湯，當日湯入面有牛肉、蘿蔔同胡蘿蔔，飲起嚟清清甜甜。 鐵板烤豬頸肉，口感爽嫩，調味足夠唔過重，只係多油咗少少。 辣泡菜餅，煎餅粉漿唔過厚又唔過薄，入面仲有唔少泡菜粒，食起嚟外脆內軟。 可以點埋佢個特製嘅醬汁嚟食，表現唔錯。 牛肉石鍋雜錦飯，燒紅咗嘅石鍋入面有牛肉、大豆芽、菠菜、胡蘿蔔、冬菇、煎蛋、紫菜同米飯，侍應晌我哋面前加埋韓式辣醬之後就將佢哋撈勻。 每口飯都有配料跟埋一齊食，近石鍋邊位仲有脆脆嘅飯焦。 我哋仲加多咗份調味牛肋骨肉，份量比想像中多。 將牛肋骨肉放晌燒烤爐上面燒，肉質軟嫩。 最後嘅甜品係紅棗茶，紅棗味香甜，感覺養生。 呢次試嘅午餐一份先八十幾左右，但係份量就唔少，以銅鑼灣區嚟講都幾抵食。

食過鉄人旨花嘅omakase覺得唔錯，呢次就嚟試試佢哋嘅鐵板燒。同上次嚟相比，環境無大改變，都係分咗omakase同鐵板燒兩個區域，另外仲有啲獨立房。 日式鐵板燒係食客圍住半圓形鐵板燒檯而坐，師傅就企晌另一邊中間位烹調食物。我覺得食omakase同鐵板燒，除咗享受美食之外，欣賞師傅處理食物嘅過程亦係重點之一。所以除非同行人數比較多或其他原因，如果唔係坐壽司吧或鐵板燒檯真係會開心啲。 當晚有幾款套餐，我哋就揀咗伊勢海老鐵板燒二人前。 兩款前菜，都幾開胃。 然後，師傅就即席烹調銀鱈魚，佢先將銀鱈魚同櫻花葉兩面煎香，淋咗西京味噌醬後就用火槍燒呀燒，場面都幾壯觀。 煎過嘅櫻花葉薄脆又有少少鹹味，幾得意。上面啲玫瑰乾花瓣傳嚟陣陣花香，除咗有點綴作用之外，同魚肉一齊食就更顯清新。 海膽汁煮龍蝦，師傅將原隻龍蝦放晌鐵板上。 稍為煎一下之後，師傅就將龍蝦肉同龍蝦殻分開處理，同時炒勻牛油同海膽，最後將兩者炒勻。 龍蝦煮得啱啱好，感覺唔錯。 A5日本產和牛，師傅話呢個係宮崎牛肉嚟，肉味會比較重。 煮好之後，連擺盤都一絲不苟。 我哋揀咗五成熟，肉質軟嫩。師傅仲特登將靠邊嘅位置切開分開嚟煎，出嚟嘅效果微焦香脆，一份和牛有兩種唔同口感。食完和牛再食食燒過嘅大啡菇、青椒仔同番茄，啱啱好可以中和一下。 炒飯，師傅先將蛋打晌鐵板上，同埋米飯一齊炒，同時晌另一邊炒其他配料，炒咗一陣之後就將佢哋炒埋一齊。 之後，加埋蔥花略炒就完成。 白魚湯，湯色奶白有魚香，入面仲有少少切粒豆腐同蔥花。 嚟到甜品環節，當晚係番薯豆腐雪糕，表面有唔少番薯粒粒，口感軟糯，豆腐雪糕就清清甜甜。

一邊食嘢一邊睇住師傅晌我哋面前烹調食物再細心裝飾，呢啲就係食鐵板燒嘅樂趣嚟喇！

（附上影片，openrice要電腦桌面版先可以睇到）

呢晚同人嚟到Amina Modern European，佢係間位於尖沙咀旺區嘅西式私房菜。 由入口走入去經過走廊之後，就係水吧同蠔吧。 燈光係柔和嘅暖色系，氣氛都唔錯。

（因為我唔想啲相出嚟嘅效果偏暖色，所以之後都較咗白平衡） 餐廳分咗八道菜同十道菜兩種，其中後者仲有四款主菜去揀，我哋就叫咗兩份十道菜嚟試試。 侍應先將餐上小品拎嚟，呢啲係餅乾條。 當晚嘅麵包有兩款，烘得外脆內軟，我比較鍾意加咗核桃同提子乾嗰款，蘸埋特製甘筍蓉，唔經唔覺就食晒。 風乾火腿鹹香，食完再飲埋杯梨蓉汁，酸酸甜甜啱啱好互相中和。 輕炙北海道元貝，北海道元貝燒得焦香，上面嘅三文魚子令佢更加鹹鮮，伴住椰菜花泡沫、椰菜花蓉、藜麥同醃青瓜，既清新又爽口。 番茄清湯，呢個係凍湯嚟嘅，湯色清澈，仲用三文魚子同脆片裝飾，睇落唔錯。 飲起嚟凍凍哋同帶甜味，餐廳仲特登用紙巾包住支凍匙羹，幾細心。中間有兩粒圓形，其實係分子料理嚟嘅，比較大嘅係用蝶豆花整，甜甜哋有啲似啫喱。比較細嘅就用番茄整，擺入口之後一咬即破，幾得意。 當晚餐廳嘅鵝肝醬凍轉咗做三文魚醬凍，口感軟滑，下面仲有威化餅，同埋用黑椒碎、血橙汁同血橙肉伴碟，入面仲有屬於分子料理嘅油醋汁爆珠，同沙律菜一齊食好夾。 龍蝦濃湯，侍應話碟邊嘅係乾身嘅龍蝦籽，可以將佢加入湯度飲。湯味濃郁、質感creamy，溫度就暖暖哋，唔怕辣到嘴唇。 香煎法國鵝肝，同行嘅人話鵝肝好香口，油份又唔會太重，同灑晌上面嘅炸牛蒡絲、開心果碎，仲有南瓜薯蓉、黑醋一齊食就可以解膩。 因為我唔食鵝肝，所以就改咗做香煎大蝦，大蝦燒得香噴噴，伴碟方面除咗無開心果碎等等之外，其他嘅大致相若。 檸檬木煙燻阿拉斯加蟹肉，蟹肉、梨肉、紫椰菜、生菜、麵包粒等等用玻璃樽載住，另外嘅有機雞蛋同羅勒油柚子醬就分別用兩個小量杯拎嚟。 將木蓋打開，樽入面嘅燻煙即時湧出，傳嚟陣陣怡人嘅檸檬木芳香。再將小量杯入面嘅嘢加入去撈勻嚟食，感覺軟滑輕盈。 餐廳晌上主菜前先用番石榴雪葩做間場，微微酸甜，可以清一清味蕾。 然後就係主菜之一嘅香煎澳洲黑盲鰽魚，魚皮煎得香脆，魚肉就比一般魚類扎實，下面有啲燴雜菜，加埋一齊食幾討好。 紅酒燴牛面肉，牛面肉花咗長時間去燉煮，用刀叉切開已經覺得軟腍腍，咬起嚟就好鬆化，用小番茄、小甘筍、海鹽等等伴碟，食起嚟幾平衡。 食完主菜，侍應就拎咗個小木盒嚟，入面放咗多款茶包同花茶。 我哋分別揀咗茉莉花同菊花，餐後飲花茶可以消滯。 之後就到甜品時間，自家製柚子芝士蛋糕用鮮藍莓、紅桑子、啫喱、開心果碎等等點綴。 另一碟用咗木板咁拎嚟，賣相就更加吸引。柚子芝士蛋糕食起嚟滑溜，味道就比較溫和。 雪影，餐牌寫有五款口味，而我哋當晚就係紅桑子同榛子兩款，甜度唔高，仲有微微嘅可可豆甘澀。

呢度嘅食物幾有驚喜，仲大玩分子料理，出嚟效果同味道都討好。餐牌仲寫咗大部份菜式嘅主要材料，侍應拎嚟時亦會稍為講解一吓。

要留意嘅係，餐廳每道菜之間都有一段幾長嘅空檔，當晚食吓食吓，都最少用咗四小時先完成。對於步伐急速嘅香港人嚟講，四小時實在太花時間，但係偶爾同摯愛或親朋好友停落嚟慶祝相聚都不為過。

呢日嚟到銅鑼灣，試試呢間日式串燒店Bilibala Yakitori Bar。 餐廳有多款串燒同小食，選擇都唔少。 白飯魚乾，將白飯魚拼埋一齊再炸成薄片，脆口鮮香，真係幾啱送酒。 玉子蛋，每層都煎得非常薄，咬起嚟濕潤鬆軟，同埋有啲甜味，一向鍾意食玉子燒嘅同行朋友都好欣賞。 店員拎咗三款醬汁嚟，分別係柚子汁、梅子汁同麵豉，仲話係用嚟點之後嘅串燒食嘅。
餐廳嘅串燒係用類別嚟分，其中雞肉類就佔咗唔少篇幅。大蔥雞肉，雞肉嫩滑多汁，同大蔥一齊食好香口。

沖繩苦瓜雞肉燒，呢款係嚟之前已經想試嘅串燒。嚟自沖繩嘅苦瓜質感爽口兼無苦澀味，仲可以同雞肉互相中和，表現無令我失望。 免治雞肉棒，免治雞肉打得鬆化得嚟又有咬口，蘸埋撈勻之後嘅醬汁同雞蛋黃，就多添幾分滑溜感。 銀鱈魚，既大塊又夠厚，魚皮燒得焦脆，魚肉軟綿。 牛舌，每片都切得幾厚身，食起嚟爽嫩帶油香，好鍾意。 日本花竹蝦，餐廳特登將佢切成小片，食嗰時就仲方便。 試埋比較飽肚嘅燒飯團，碟上仲有酸酸嘅牛蒡，同埋剪成長條形嘅紫菜片，可以用佢包住飯團嚟食，咁就唔怕米粒會癡手，幾細心。

海膽燒飯團，頂端嘅海膽濃香，燒飯團外層就有層飯焦，同埋加咗紫菜絲，味道豐富。

明太子燒飯團，上面嘅明太子份量唔少，幾鹹鮮惹味，原本以為飯團嘅主體只有米粒，食食吓先發現中間仲包住明太子架。 另外，朋友仲叫咗杯Kirin Ichiban，一邊飲啤酒一邊食串燒都唔錯。

餐廳有部份串燒係搽咗醬汁嚟燒，食起嚟惹味又唔會太鹹。燒烤嘅時間又啱啱好，食物仲有肉汁，無出現乾身嘅情況，整體嚟講印象良好。

約咗人嚟到尖沙咀美麗華六樓嘅My Day，呢度係俾新人擺酒或舉行宴會嘅地方。 如果無包場嘅話夜晚就會提供半自助餐，呢晚我哋就嚟試試。 場內色調用淺綠同白色為主，佈置充滿西式婚宴氣氛。 除咗大圓檯之外，亦有多張長方形檯。 餐廳仲有戶外位，可以俾新人晌呢度舉行證婚儀式，而且仲有開揚嘅尖沙咀鬧市景。 然後就睇睇自助區嘅食物，主要係頭盤同沙律，分別有薯仔沙律、紅菜頭沙律、辣肉腸長通粉同多款冷切肉，另有幾款生果、羅馬生菜、紫生菜、青瓜、車厘茄、粟米、黑橄欖、鷹咀豆、煙肉乾、烘麵包粒、芝士粉同四款唔同口味嘅醬汁，俾食客自己調配沙律。 肉眼所見，當晚嘅冷切肉至少有五六款。 餐廳提供嘅係半自助餐，其中一啲食物係限額嘅、一啲食物就可以去自助區任意享用。入面嘅主菜就係每人一份，價錢由二百幾至三百幾左右，其中兩款兒童餐就唔洗一百，另設加一服務費。 海鮮拼盤，分別有龍蝦、海蝦、翡翠螺、松葉蟹腳同青口，數量方面係按人數發放。 當晚嘅龍蝦幾大隻，翡翠螺肉厚彈牙，青口嫩滑，松葉蟹腳鮮鹹，其餘四款嘅質素唔錯，如果可以任食就好喇。 另外，仲有麵包多士。 自助區嘅冷切肉幾香口，我最鍾意加咗彩椒同黑椒嗰兩款。蔬菜都幾爽嫩，而生果類嘅菠蘿、哈密瓜同火龍果都幾香甜多汁。餐湯方面，呢晚係青豆湯，質感都幾creamy。 然後就上主菜嘅美國頂級肉眼扒，餐牌寫有十安士重，仲用露筍、炒雜菌、沙律同薯條伴碟，同埋跟咗黃芥辣、茄汁同燒汁點嚟食。 法式燒乳豬配法國血橙燒汁，伴碟嘅甘筍同加咗番茄醬嘅雜菜有解去肉類膩感嘅作用。 餐飲就揀咗熱檸茶，餐後飲幾消滯。 食完主菜，侍應就拎咗一份甜品拼盤嚟，同海鮮拼盤一樣每款嘅數量都係按人數發放。呢個拼盤有啲似英式下午茶，賣相討好。 甜品名係我憑外觀同味道嚟估，紐約芝士蛋糕、藍莓芝士蛋糕口感滑；布朗尼入面有榛子果仁，朱古力味濃郁中帶甘澀；綠茶蛋卷嘅綠茶味唔重，但口感唔錯；原味同綠茶曲奇細細件咁，都幾鬆脆。 椰汁奶凍香滑；芒果布甸質感唔硬，幾唔錯；焦糖燉蛋甜味唔高；杞子桂花糕整到成個心形，味道清清甜甜；啫喱糖就色彩繽紛。 
（附上影片，openrice要電腦桌面版先可以睇到）

由尖東站嚟到Diletto，入口面向漆咸道南，都幾易搵到。 呢度嘅樓底好高，格局有啲似酒店嘅餐廳。 絲花遍佈唔同角落，環境雅致。 抬頭一望都係花，裝修嘅感覺好女仔。 餐廳嘅午餐價錢大約百幾左右，亦有唔同嘅散叫菜式。我哋就叫咗兩份午餐，另加兩份甜品試試。 侍應先拎咗籃麵包嚟，麵包籃設計好特別，仲跟咗橄欖油同黑醋用嚟點麵包食。 午餐包一份沙律或餐湯，我哋揀咗各一。Daily Soup，忌廉湯入面有甘筍同黃椒粒等等。 Marinated Prawn and Pomelo Salad，用蝦肉、柚子、車厘茄、藜麥同酸忌廉砌成環形，望落精緻。蝦肉表面蘸滿青醬，食起上嚟惹味。柚子就多汁，藜麥有咬口，酸忌廉香軟，成個配搭都好開胃。 Garlic Calamari Spaghetti with Chili Flake, White wine, Parsley，嗰幾瓣花瓣令賣相升級唔少。魷魚口感彈牙，當中仲有車厘茄同蒜片。雖然加咗辣椒片，但食起嚟唔覺得辣，對我嚟講個味道夠，又唔會太濃。 Pan-Fried Salmon Fillet, Sautee Potato and Broccoli，三文魚扒嘅魚皮煎得脆口，魚肉嫩滑。 伴碟有西蘭花、炒薯仔片同炒洋蔥，炒洋蔥有少少甜味，既好食又解膩。 餐飲方面揀咗熱檸檬茶，餐廳用嘅茶壺茶杯款式都好女仔，就咁睇都覺得開心。 Tiramisu，用咗一粒粒嘅疑似手指餅點綴，簡單但幾靚。食起嚟咖啡味對我嚟講啱啱好，仲有淡淡酒香，甜味又唔會太高。 Creme Brulee，隻鴨仔好似晌度浸緊泡泡浴咁，好得意。 鴨仔係用白朱古力整，而泡泡同花瓣都可以食架。 另外，碟上面仲鋪咗黃色海綿蛋糕、藍色啫喱、花形白朱古力同酸酸哋嘅碎糖，成件事好色彩繽紛。 撥開浴缸上面嘅泡泡，下層就係有啲軟身嘅法式燉蛋，入面仲有雲呢嗱籽，味道討好。

服務方面，侍應會不時走嚟收碟或加水，舉手又會即時嚟幫手。食物方面就幾有心思，三文魚扒更見出色，份量對女仔嚟講就啱啱好。

嚟到呢間位於尖沙咀鬧市，嘉威大厦入面嘅Layback Cafe & Bar。 餐廳嘅面積唔算大亦唔算細，入到去有少少似去咗人哋屋企嘅感覺。 由佈置睇嚟，似乎花咗唔少心思。 佢哋另外仲有室外座。 走出去八卦一下，座位比室內仲多呢！ 呢度仲有個有少少日式feel嘅高台位，坐晌上面食嘢嘅話應該幾得意。 食物方面選擇唔太多，主要以意粉同小食為主。 佢哋始終係間樓上咖啡店，所以飲品餐牌就豐富得多。 呢次叫咗幾樣嘢試，等咗陣店員就拎到嚟喇。 芝士煙肉焗有機大燒烤菇，幾乎每次睇到餐牌入面有類似嘅菜式嘅話都會叫嚟食，因為配搭穩陣又唔易失手。 大燒烤菇juicy，中間嘅芝士有微微拉絲效果，配埋煙肉絲，正常嚟講無可能唔好食。 香蒜白酒蜆肉露筍扁意粉，用四隻連殼蜆肉點綴，賣相吸引。扁意粉軟硬度適中，蒜味香濃，微辣惹味。當中仲有唔少蜆肉、磨菇片同露筍，以一間樓上咖啡店嚟講水準唔錯。 貢菊杞子茶，睇住啲花晌壺入面飄浮，唔知點解有種莫名嘅治癒感。 菊花芳香撲鼻，杞子清肝明目，飲起上嚟仲有陣陣甜味，好順喉。 士多啤梨朱古力沙冰，餐牌寫係新出嘅。同士多啤梨一齊打碎，令朱古力多咗份果味酸甜。 藍莓芝士蛋糕，上面嘅藍莓醬都幾多。芝士蛋糕香軟微酸，完全唔覺得漏。

雖然離尖沙咀地標The OXX唔遠，但就有種幽靜嘅感覺。平日夜晚嚟到，食完嘢之後都無被催促離座，睇嚟係個唔錯嘅休息地方。